|
Хы
фIыцIэм мыдрыщIкIэ «Иужьрей убых» скульптурэ, адрыщIкIэ,«Япэ лъэбакъуэ
Кэфкэн»
Скульптор
ГущIапщэ IЭрсэн 1962 гъэм
Кенжэ къуажэм къыщалъхуащ. Налшык и гъуазджэ школым 9-нэ классым
нэс щеджэри Мэзкуу дэт ику ит гъуазджэ школым щIэсащ, иужькIэ
МГУ-м художественнэ институтым и скульптурэ факультетым
илъэсихкIэ щеджащ. Къыщиухыным щыгъуэ диплом лэжьыгъэу
«ПсыхуэлIэ цIыху» скульптурэр ищIащ. СССР-м и гъуазджэ академием
дыщэ медал къритащ. А медалым
IЭрсэн Италием практикэ щищIыну
Iэмал къритащ.
ГущIапщэ IЭрсэн и лэжьыгъэхэр Къэбэрдей-Балъкъэрым
щрегъэкIуэкI. Ди республикэми УФ-м и адрей регионхэми, Мэзкууи
щекIуэкIа зэгъусэ выстэвкэхэм хэтащ
IЭрсэн. Тыркум и Кайсари
къалэм щрагъэкIуэкIа адыгэ фестивалым хэту къызэIуаха выставкэм,
Яловэ къалэм къыщызэIуаха гъуазджэ фестивалым, Македонием
щекIуэкIа симпозиумым хэтащ
IЭрсэн.
IЭрсэн и лэжьыгъэхэу Налшык дэтщ: « Псэ жыг»,
Урыс- Кавказ зауэм хэкIуэда ди хэкуэгъухэм и фэеплъу ягъэува
скульптурэр, Михаил Лермонтов и фэеплыр, Фияпщэ
Борис и
фэеплъыр.
ГущIапщэ IЭрсэн перестройкэ зэманым лажьэу
щIидзащ, абы щыгъуэм къэралым и системэр яхъуэжти гъуазджэр
зыми тэмэму къыфIэIуэхутэкъым. IЭрсэн щеджэм щыгъуэ гъуазджэм
реализмэр нэхъ япэ ирагъэщу щытащ, ауэ реализмэм и жыпхъэм иту
лажьэ цIыхум и лэжьыгъэхэм езым и гухэлъхэр хилъхьэфыркъым.
«Гъуазджэм елэжьым абстрактнэ гупсысэкIэ иIэн хуейщ»,- жеIэ
IЭрсэн. IЭрсэн ипэкIэ
скульптурэм елэжьа цIыхухэм ядоплъей,
абыхэм щапхъэ къатырех.
2008 гъэм IЭрсэн езым и выстэвкэ къызэIуихащ.
Рецептуализм жыпхъэм иту абы темищ къигъэлъэгъуащ, ахэр: «Псэ
жыг», «Дыгъэ», «Бзу». Темэ къэс зы серие ищIащ. Зы темэ
материал зэмылIэужьыгъуэхэмкIэ елэжьащ, абы
ипкъ иткIи
къигъэлъэгъуахэр нэхъ гъэщIэгъуэну, нэхъ удихьэхуу щытщ.
Лэжьыгъэм къыщыгъэлъэгъуа материалхэм ( гъущI, абдж, тхылъымпIэ,
арджэн) зы бзэ, зы макъ яIэщ. « Уи лэжьыгъэр щыпщIкэ мис а
макъым уедэIуэн хуейщ, абы нэмыщI цIыхум къыбгъэдэкI энергиемрэ
уэ уи гупсысэмрэ зы пщIыфу щытын хуейщ»,- жеIэ
IЭрсэн.
ГущIапщэ IЭрсэн хуабжьу елэжьыну хуейуэ проектитI
иIэщ:
япэр- I779 гъэм къэхъуа Къетыкъуэ тIуащIэ
зауэшхуэм хэкIуэда ди хэкуэгъухэм я фэеплъу сын ищIыну. Мы зауэм
пщы – уэркъхэм я ягъэкIэ цIыху куэд хэкIуэдауэ щытащ,
икIи Къэбэрдейм и къарур щIихат.
ЕтIуанэр- мыр
IЭрсэн и пщыхьэпIэу жыпIэ хъунущ. Хы
фIыцIэм мыдрыщIкIэ «Иужьрей убых» темэм къриубыдэу зы лэжьыгъэ,
хым адрыщIкIэ «Япэ лъэбакъуэ Кэфкэн, зи Хэкум ирахуахэм папщIэ
лэжьыгъэр.
Мы лэжьыгъитIми я макетхэр игъэхьэзрауэ щылъщ.
Тыркум щыпсэу художник Ахъмэт Озел мы темэм йолэжь.
Дэри IЭрсэн и пщIыхьэпIэр нэхуапIэ хъуну, и
мурадхэр псори къехъулIэну дохъуэхъу.
Iэрсен
теухуа информацэр къыщывгъуэтынущ:
www.arsengu.com
e-mail
:gu.ars@mail.ru
 
 
 
 
 
  |
