Ивгъуэтэнухэр
|
|
. |
. |
НЭМ ЫЛЪЭГЪУРЭР - ШЪХЬЭМ ЫУАС
Елбэшэ Руслъан |
|
CC -
News Department |
. |
Джырэблагъэ Москва къикIыжьи
нэбгырэ 22-рэ зыхэт кIэлэеджэкIо куп Мыекъуапэ къэкIожьыгъ.
УФ-м ФедерациемкIэ и Совет исенаторэу Хьащыр Аслъан иунэе
мылъкукIэ зэхищэгъэ шIушIэ зекIом Адыгеим ирайонхэмрэ
икъалэхэмрэ ягурыт еджапIэхэм ащеджэхэрэр хэлэжьагъэх. Гъот
макIэ зиIэ унагъохэм ащапIурэ, ны е ты закъо нахь зимыIэ
ныбжьыкIэхэу еджэнымкIэ дэгъоу зыкъэзыгъэлъэгъуагъэхэм
мэфитфым къыкIоцI Москва ианахь чIыпIэ лъэгъупхъэхэр
къаплъыхьагъэх.
КIэлэеджакIохэм загъэпсэфыным ыкIи заплъыхьаным пае
афызэхагъэуцогъэгъэ программэр баеу щытыгъ. Бэдзэогъум и 5-м
къыщегъэжьагъэу и 11-м нэс Адыгеим икIыгъэ купыр УФ-м
ФедерациемкIэ и Совет зычIэт унэм, Адыгэ Республикэм и ЛIыкIо
илэжьапIэу УФ-м и Президент дэжь щыIэм, Краснэ площадым,
Кремлым, Оружейнэ палатэм, Третьяковскэ галереем, Воробьев
Iуашъхьэхэм, Христос УхъумакIом итхьалъэIупIэ унэ,
музей-панорамэу «Бородинская битва» зыфиIорэм, киностудиеу
«Мосфильмэм», Москва иIэгъо-блэгъу дэжь я II-рэ Екатеринэ
щаригъэшIыгъэгъэ хэпIэшхоу «Царицыным», палеонтологическэ
музеим, Москва игупчэ шъыпкъэ пэмычыжьэу чIы чIэгъым
чIашIыхьэгъэ бункерым, тарихъ ыкIи культурнэ мэхьанэ зиIэ
нэмыкI чIыпIабэхэм ащыIагъэх.
Краснодар иаэропорт самолеткIэ тытебыбыкIи Москва
тызыщынэсыгъэ апэрэ пчыхьэм къалэм зыщыпплъыхьан гухэлъ
уиIагъэмэ ом изытет уигъэрэзэн дэдэу щытыгъэп. Бэдзэогъу
мазэр итми умышIэнэу Москва фабэу щыIагъэр градус 12-м
шIокIыщтыгъэп, макIэу къещхыщтыгъ. Аущтэу зэрэщытызи,
кIалэхэм самолетым есыфэхэкIэ алъэгъугъэхэмрэ апэрэ
нэплъэгъухэу къэлэшхом дадзагъэхэмрэкIэ зэхъожьыхэзэ къалэм
мэфитфэ тыщэIэфэ жъогъуищ зытедзэгъэ хьакIэщ зэхэтэу
«Измайлово» зыфиIоу тызэрысынэу къытфыхахыгъагъэм «Внуково»
аэропортым къыщытпэгъокIыгъэ автобусыкIэ зэтегъэпсыхьагъэм
тырищэлIагъ. Нэбгырэ тIурытIоу тызэрысыщт номер гупсэфхэм
тарыхьагъ.
Арбат урамыр.
Неущрэ мафэр ошIу хъумэ зэлъашIэрэ урам цIэрыIоу АрбаткIэ
заджэхэрэм апэдэдэ зыплъыхьакIо тищэнэу зэриIогъагъэр
тигъусэгъэ экскурсовод бзылъфыгъэм къыгъэшъыпкъэжьи, Москва
нэIуасэ тыфэхъуныр мы урамымкIэ едгъэжьагъ.
Сатыр Iужъоу зэкIэрыт тучанхэу нэпэеплъ зэмылIэужыгъо
кIэракIэхэр зыщащэхэрэм кIалэхэр якIуалIэхэзэ, Москва
зэрэщыIагъэхэр агу къэзгъэкIыжьыщт пкъыгъо цIыкIухэр
къащащэфыгъэх. Лъэсэу ущыкIоным урамыр тегъэпсыхьагъэти,
Арбатым тытетыфэ тарихъ мэхьанэ зиIэ унэхэмрэ саугъэт
хьалэмэтэу тетхэмрэ апылъ къэбархэм тигъусэгъэ экскурсоводым
нэIуасэ тафишIыгъ. Нэужым урам цIэрыIом тыкъытемыкIыжьызэ
зекIон программэм къыдыхэлъытагъэу Булат Окуджавэ исаугъэт
дэжь щыт шхэпIэ зэтегъэпсыхьэгъэ цIыкIоу «Муму» зыфиIорэм
щэджэгъуашхэ тызэхэтэу щытшIыгъ. ЫпэкIэ бэрэ зэхахыгъэу, ау
апэрэу зытехьэгъэхэ урам цIэрыIом къыщалъэгъугъэхэр
ныбжьыкIэхэм бэрэ агу къэкIыжьынэу къытшIошIы.
Зэпэуцужьыныгъэм исаугъэт
Советскэ Союзымрэ США-мрэ азыфагу илъыгъэ Iэшэ зэпэуцужьыны-
гъэм илъэхъан ядернэ заор къежьэмэ ПВО-м икоманднэ пунктрэ
зыкъэухъумэжьыгъэнымкIэ Министерствэм телефон-телеграф
зэпхыныгъэхэмкIэ иштабрэ ягъэIорышIапIэхэр зычIэтыщтхэу
агъэпсыгъэгъэ бункерышхоу чIы чIэгъым чIашIыхьагъэр кIалэхэм я
2-рэ мафэм къарагъэлъэгъугъ. Ар 1956-рэ илъэсым ашIыгъагъ.
Шъыпкъэр пIощтмэ, Москва и Таганскэ площадь пэмычыжьэу ащ
фэдэ бункер чIычIэгъым зэрэчIэтыр къэлэдэсыбэмэ амышIэнкIи
хъун. Атом заор къежьэмэ узычIэсыщт, Iоф зыщыпшIэщт унэхэу
бункерым иIэхэр кIэлэеджакIохэм къарагъэлъэгъугъэх.
ЗыплъыхьэкIо купым хэтыгъэ кIалэхэм къызэрэтаIуагъэмкIэ,
шъэф шIыкIэм тетэу къагъэгъунэщтыгъэ военнэ объектыр лъэшэу
ашIогъэшIэгъоныгъ, ащ ишыхьатэу бэмэ сотовэ телефонхэу
аIыгъыгъэхэмкIэ сурэтхэр тырахыгъэх.
Джэрз топышхор, одыджыныр
Урысыем икъэлэ гупчэ икъоу нэIуасэ зыфэтымышIыгъэу тлъытэныгъи
Краснэ Площадымрэ Кремлымрэ къэтымыплъыхьэгъагъэхэмэ. Апэдэдэ
тыздэкIонэу щытыгъэ объектхэм Краснэ площадымрэ Кремлымрэ
ащыщыгъ. Ау Америкэм и Президентэу Барак Обама тызщыкIогъэ
апэрэ мафэм Москва къэкIуагъэу щыIагъэти, къэлэ гупчэм
уекIолIэшъунэу щытыгъэп, зэфашIыгъагъ, ащ пае Краснэ Площадым
тызыкIощт мафэр зэблэтхъунэу хъугъагъэ.
Сыхэукъонэп, купым хэтыгъэ кIалэхэми пшъашъэхэми
къыздырагъэштэнщтын, Краснэ Площадыр, Кремлым и Оружейнэ
палатэ, джэрзым хэшIыкIыгъэхэ топышхомрэ одыджынышхомрэ,
Спасскэ башнэр, Успенскэ соборыр лъэшэу ашIогъэшIэгъон
зэрэхъугъэр къасIомэ. Ахэм тарихъ ыкIи культурнэ мэхьанэу
яIэм икуугъэ зэрэзэхашIагъэр, шIушIэ зекIор зэхэзыщэгъэ
сенаторэу Хьащыр Аслъан зэрэфэразэхэр, «нэм ылъэгъурэр -
шъхьэм ыуас» адыгэмэ зыкIаIуагъэм мэхьанэу иIэри джащыгъур
ары зэкIэми нахь къызыдгурыIуагъэри.
Адыгеим и ЛIыкIо илэжьапI
Москва щыIэгъэ ныбжьыкIэ купым анахьэу ыгу къинэжьыщт мафэхэм
ащыщ хъугъэу къысшIошIы Адыгэ Республикэм и ЛIыкIо илэжьапIэ
зэрэщыIагъэхэмрэ ащ къызэрэщытпэгъокIыгъэхэмрэ.
Республикэм и ЛIыкIо илэжьапIэ иIофышIэхэр Адыгеим къикIыгъэ
кIалэхэм лъэшэу ащыгушIукIыгъэх. УмышIэмэ Адыгэ Республикэм
ичIыгу тыкъыр теуцуагъэхэ фэдэу къыпшIуагъэшIэу
къафаIуатэхэрэм яшъыпкъэу ядэIущтыгъэх.
ЛIыкIом илэжьапIэ ипащэ игуадзэу Бэрзэдж Вадим лэжьапIэм
тарихъэу пылъымрэ Iофтхьабзэу зэшIуихыхэрэмрэ къатегущыIагъ.
Адыгэу Москва дэсхэм Представительствэр яунэ шъыпкъэм фэдэу,
ренэу къызэрэкIохэрэр, IэпыIэгъу горэ ящыкIагъэмэ зэраратырэм
щигъэгъозагъэх. Нэужым хьакIэхэм ЛIыкIом илэжьапIэ
щэджэгъуашхэ щарагъэшIыгъ. АР-м и ЛIыкIо илэжьапIэу Москва
щыIэм зэрэщыIагъэхэр агу къэзыгъэкIыжьыщт нэпэеплъ
шIухьафтынхэр къаратыгъэх, а чIыпIэм къаратыгъэхэр аIыгъхэу
сурэт щызытырарагъэхыгъ.
ФедерациемкIэ Советым
ЗекIоным иофициальнэ Iахь диштэу, аужырэ мафэм кIалэхэр
зэхэтхэу ФедерациемкIэ Советыр зычIэт унэм рагъэблэгъагъэх.
ФедерациемкIэ Советым хэтхэм пшъэрылъэу яIэхэм, Iофыгъоу
зэшIуахыхэрэм ахэр нэIуасэ афашIыгъэх. Зэхэсыгъохэр зыщыкIорэ
залэу ащ хэтым чIащэхи, зыщарагъэплъыхьагъ. ФедерациемкIэ
Советым IэкIыб къэрал зэфэшъхьафхэм яхэбзэ органхэм
шIухьафтынэу къыратыгъэхэр лъэгъупIэ чIыпIэхэм
ащызэIугъэкIагъэхэу, чIэхьэрэ пстэуми нэIуасэ зыфашIынэу
зэрэгъэпсыгъэм еплъыгъэх. Ахэм тарихъэу апылъхэр къафаIотагъ.
Джащ фэдэу тигъэгушхуагъ УФ-м хэхьэрэ субъект пстэуми
ябыракъхэм апэ шъыпкъэкIэ.
Адыгэ Республикэм ибыракъ уцышъо щыплъэгъунэу зэрэщытыгъэм.
Урысыем и Апшъэрэ хэбзэихъухьэ орган иIофшIэн зэрэзэхэщагъэм
илъэныкъо пстэури къафаIотэнэу мыхъугъэми, а унэшхор
зэралъэгъугъэр ныбжьыкIэхэм бэрэ агу къинэжьыщт.
АР-м тыкъызэсыжьым кIэлэеджакIохэм къапэгъокIыгъэ ны-тыхэм
Хьащыр Аслъан гущыIэ дэхабэ фаIуагъ. КъыткIэхъухьэрэ
ныбжьыкIэхэм янеущрэ мафэ зэрэгъэпсыгъэщтым, ахэр гъогу дахэ
тещэгъэнхэм, акъылышIо хъунхэм зэрафэгумэкIырэм фэшI инэу
зэрэфэразэхэр гъэзетым инэкIубгъокIэ раIожьы зэрашIоигъор
хагъэунэфыкIыгъ. |
|
|
|
. |
. |
|
|
. |
|
|