Ткъош
Къэбэртэе-Бэлъкъарым Адыгэ Республикэм и Лъэпкъ театрэ
джырэблагъэ зэрэщыIагъэм, 2008 - 2009-рэ илъэс IофшIэгъур
зэриухыгъэм афэгъэхьыгъэ пресс-зэIукIэ тыгъуасэ Мыекъуапэ
щыIагъ. Лъэпкъ театрэм идиректорэу, УФ-м изаслуженнэ
артисткэу, АР-м инароднэ артисткэу Зыхьэ Мэлайчэт ипэублэ
гущыIэ къызэрэщыхигъэщыгъэу, Къэбэртэе-Бэлъкъарым дэгъоу
къащыпэгъокIыгъэх, спектаклэу «Мэдэя», «Псэлъыхъохэр»
зыфиIохэрэр Налщыкрэ Бэхъсанрэ Лъэпкъ театрэм
къащигъэлъэгъуагъэх.
Илъэс 18-кIэ
узэкIэIэбэжьмэ, Адыгэ театрэр Къэбэртэе-Бэлъкъарым аужырэу
щыIагъ. Краснодари зымыкIуагъэхэр илъэс заулэ хъугъагъэ.
Къошхэмрэ гъунэгъухэмрэ нахьыбэрэ зэхэхьанхэ, ятворческэ
амалхэмкIэ зэхъожьхэзэ зэрэзэдэлэжьэнхэ фаер къыдалъыти,
театрэм иIофышIэмэ щыкIагъэхэр дагъэзыжьхэу фежьагъэх.
- НахьыпэкIэ театрэхэр зэлъыкIощтыгъэх, артистхэм
яунагъохэм ныбджэгъуныгъэ зэдыряIагъ, - къыIуагъ Урысыемрэ
Къэбэртэе-Бэлъкъарымрэ язаслуженнэ артистэу, АР-м инароднэ
артистэу Мурэтэ Чэпае, - Москва тыщеджэ зэхъум
Къэбэртэе-Бэлъкъарымрэ Адыгеимрэ ятеатральнэ студиехэм
ныбджэгъуныгъэу зэдашIыгъэр щыIэныгъэм гъэшIэгъонэу
щылъагъэкIотагъ.
Лъэпкъ театрэм ирежиссер шъхьаIэу, Урысыем инароднэ
артистэу, Абхъазым изаслуженнэ артистэу Кукэнэ Муратэ
къызэриIуагъэу, аужырэ илъэсхэм агъэуцугъэ спектаклэхэу
«Нысхъап», «Тыкъэсыжьыгъ», «О, си Тхь, къысфэгъэгъу!»,
«Мэдэя» зыфиIохэрэр, жъы мыхъурэ спектаклэхэу «Сомэ мин
600»-р, «Псэлъыхъохэр», «Дэхэбаринэ ихьакIэщ», нэмыкIхэри
цIыфмэ ашIогъэшIэгъоных.
Урысые Федерацием изаслуженнэ артисткэу, АР-м инароднэ
артисткэу Уджыхъу Марыет
Кукэнэ Муратэ игупшысэхэр лъигъэкIуатэхэзэ,
Къэбэртэе-Бэлъкъарым тиартистхэм къыщагъэлъэгъогъэ
спектаклэхэм осэ ин къафашIыгъэу къыIуагъ, Лъэпкъ театрэр
зэгурыIоу зэрэлажьэрэр хигъэунэфыкIыгъ.
Адыгеим Iоф щызышIэрэ театрэхэм я Союз итхьаматэу,
Урысыемрэ Къэбэртэе-Бэлъкъарымрэ язаслуженнэ артистэу,
Кубань искусствэхэмкIэ изаслуженнэ IофышIэшхоу, АР-м
инароднэ
артистэу Зыхьэ Заурбый шIогъэшIэгъонэу ынаIэ зытыридзагъэр
къош республикэм зэкIохэм спектаклэхэр сурэтхэмкIэ
гъэкIэрэкIагъэхэу, едзыгъохэр щыIэныгъэм епхыгъэхэу
гъэпсыгъэхэу бысымхэм къызэрэраIуагъэр ары.
Лъэпкъ театрэм опытышхо зиIэ режиссерэу ТхьакIумэщэ
Налбый щэлажьэ, ыгъэуцурэ спектаклэхэр цIыфмэ
ашIогъэшIэгъоных. Режиссер ныбжьыкIэхэри егъэджэгъэнхэ,
нахьыжъхэм щысэ атырахын зэрэфаем З. Зыхьэм игугъу къышIыгъ.
Театроведэу, АР-м искусствэхэмкIэ изаслуженнэ
IофышIэшхоу Шъхьаплъэкъо Къэсэй АР-м итеатрэ итарихъ
ехьылIэгъэ тхылъэу Шъхьэлэхъо Светланэ къыдигъэкIыгъэм
цIыфхэр ыгъэгушIуагъэхэу къыIуагъ. Лъэпкъ театрэр зэгурыIоу
мэлажьэ, Академическэ щытхъуцIэр къыфаусыным пылъын
ылъэкIыщтэу ылъытагъ. Артисткэ ныбжьыкIэу Джымэ Заремэ
Лъэпкъ театрэр Налщык зэкIом спектаклэхэр
къызэрэщигъэлъэгъуагъэхэм дакIоу, зэкъош республикэхэм
яартистхэр зэрэзэIукIагъэхэр гум имыкIыжьыщт мэфэкIхэм
афигъэдагъ. Артистэу Нэхэе Адами илъэс IофшIэгъур дэгъоу
зыгъэкIуагъэмэ ащыщ. Сэнэхьатэу къыхихыгъэр
зэрэшIогъэшIэгъоным тыщигъэгъозагъ.
Лъэпкъ театрэр Тыркуем зэрэщыIагъэм, гухэлъэу иIэхэм,
нэмыкIхэми пресс-зэIукIэм щатегущыIагъэх.
Сурэтыр зэхахьэм къыщытырахыгъ.
