Лъэпкъ
проектэу «Гъэсэныгъ» зыфиIорэм къыдыхэлъытагъэу
джырэблагъэ Адыгэ республикэ клиническэ сымэджэщым
гъэцэкIэжьын ыкIи гъэкIэжьын IофшIэнхэр щырагъэжьагъэх.
Сымэджэщым иврач шъхьаIэу Къэлэкъутэкъо Казбек
къызэриIуагъэмкIэ, приемнэ отделением гъэцэкIэжьынхэр
бэшIагъэу ищыкIэгъагъэх. Мы уахътэм ащ IофшIэнхэр
щырагъэжьагъэх, ахъщэу пэIухьащтыр республикэ бюджетым
къытIупщыгъ.
Объектым
игъэцэкIэжьын фэгъэзагъэхэм зэу ащыщ ООО «Интерстрой»
зыфиIорэр. Мыщ ипащэу Р.ПIатIыкъом къызэриIуагъэмкIэ,
зэнэкъокъу шIыкIэм тетэу сымэджэщыр зэтезыгъэпсыхьажьыщтхэр
къыхахыгъэх ыкIи ахэм ежь зипэщэ организациери ахэфагъ.
ЗэкIэмкIи сомэ миллиони 5,8-рэ агъэфедэнэу щыт. Приемнэ
ыкIи хирургическэ отделениехэр гъэцэкIэжьыгъэнхэр,
инженернэ ыкIи канализационнэ сетьхэр зэблэхъугъэнхэр
пшъэрылъ шъхьаIэхэм ащыщ. Джащ фэдэу приемнэ отделением
итеплъэ зэблэхъугъэ хъущт: чIэхьапIэм нахь зиушъомбгъущт,
регистрационнэ зал хэтыщт. ЗэрагъэнэфагъэмкIэ,
IофшIэнхэр тыгъэгъазэм и 26-м ехъулIэу аухыщтых.
Къэралыгъо
унитар учреждениеу «Стройзаказчикым» ипащэу Абрэдж Аслъан
къызэриIуагъэмкIэ, ящэнэрэ этажым актовэ залрэ еджэпIэ
классхэмрэ щагъэпсыщтых. Мы лъэныкъомкIи IофшIэнхэм
афэгъэзэгъэщтыр агъэнэфагъ. Ар ООО-у «Динара» зыфиIорэр ары.
Республикэ инвестиционнэ программэм ылъэныкъокIэ
къатIупщыгъэ сомэ миллиони 10-р мыщ ыгъэфедэнэу щыт.
Къэлэкъутэкъо
Казбек къызэриIуагъэмкIэ, приемнэ отделением иклиническэ
лабораторие диагностикэ зэрашIырэ оборудование чIагъэуцощт,
операционнэ блокыми ищыкIэгъэ Iэмэ-псымэхэр рагъэгъотыщтых.
