Ивгъуэтэнухэр





 

.

.

ГЪЭХЪЭГЪЭШIУХЭР АШIЫГЪЭХ
КIарэ Фатим

CC - News Department

.

Тигъэзет къызэрэхиутыгъагъэу, Адыге­им иныбжьыкIэ куп ныбжьыкIэ­хэм гъэсэныгъэмкIэ я Всероссийскэ форумэу «Селигер-2009»-рэ зыфиIоу бэмы­шIэу Тверь хэкум щыкIуагъэм хэлэжьагъ. Ахэм гъэхъэ­гъэшIу­хэр яIэхэу Адыгеим джырэбла­гъэ къагъэзэжьыгъ. Ащ фэгъэ­хьыгъэ пресс-конференцие
АР-м ныб­жьыкIэ IофхэмкIэ и Комитет зэхищагъ.

КъэIогъэн фае илъэситф хъугъэу Тверь хэкум ит хыкъумэм инэпкъ щагъэуцурэ лагерым мыщ фэдэ форумыр зэрэщызэхащэрэр ыкIи ащ илъэс къэс Урысыем иныбжьыкIэ анахь чанхэр, сэнаущыгъэ ин зыхэлъхэр къызэрэращалIэ­хэрэр. НыбжьыкIэхэм яфорумэу «Селигер-2009»-рэ зыфиIорэм мыгъэ апэрэу сменитф иIэнэу ашIыгъ. КIогъу (сменэ
пэпчъ лъэныкъо зэфэшъхьафхэмкIэ
«Ты - предприниматель», «Зворыкинский проект», «Артпарад», «Лидерст-
во» ыкIи «Молодежный туризм») зэ­теутыгъагъ.

Форумым Адыгеим икIыгъэ нэбгырэ 42-рэ хэлэжьагъ. ТапэкIэ мыщ зекIоным­кIэ инструкторхэр ыкIи ахэм язэхэщэн пылъ купыр хэлажьэщтыгъэмэ, мыгъэ Адыгеим иныбжьыкIэ чанхэм, волон­терхэм, щыIэныгъэм илъэныкъо зэфэ­шъхьаф­хэмкIэ гъэхъагъэхэр зышIыгъэхэм форумым зыщаушэтын амал яIагъ. Адыгеим икIыгъэ лIыкIо купым форумым зэрифэшъуашэу зыкъыщигъэлъэ­гъонымкIэ зишIогъэшхо къэзыгъэкIуа­гъэхэм ащыщых АР-м культурэмкIэ и Министерствэ, АР-м ныбжьыкIэ Iоф­хэмкIэ и Комитет ыкIи туризмэмрэ ку­рортхэмрэкIэ и Комитет.

ШышъхьэIум и 3-м къыщегъэжьагъэу и 11-м нэс Урысыем ичIыпIэ зэфэшъ­хьаф­хэм къарыкIыгъэ ныбжьыкIэ мини 5-мэ сэнаущыгъэу аIэкIэлъхэмкIэ форумым зыщаушэтыгъ. А уахътэм къыкIоцI программэм хахьэу лъэныкъо 200-м къехъукIэ (къэгъэлъэгъонхэр, ныбжьыкIэ туризмэм ылъэныкъокIэ конференциехэр, Всероссийскэ зекIо зэнэкъокъухэр ыкIи шIэныгъэхэм ахэгъэхъогъэнымкIэ курсхэр, бизнес-проектхэмкIэ лъэтегъэуцохэр, нэмыкIхэмкIи) ныбжьыкIэхэм зыкъы­зэ­­Iуа­хыгъ. Джащ фэдэу мы программэм иIоф­шIэн хахьэщтыгъэ Къэралыгъо Думэм идепутатхэм, Урысые Федерацием и Правительствэ, ФедерациемкIэ Советым ыкIи Общественнэ палатэм ахэтхэм аIукIэнхэр.

- Адыгеим икIыгъэ ныбжьыкIэ пэпчъ исэнаущыгъэ къыгъэлъэгъонымкIэ мы форумым ишIогъэшхо къэкIуагъ, - еIо АР-м ныбжьыкIэ IофхэмкIэ и Комитет иIофышIэу Елена Никишинам. - Мафэ къэс форумыр Iофтхьэбзэ зэфэшъхьаф­хэмкIэ баигъэ. НыбжьыкIэхэр ашIогъэ­шIэ­гъонэу лекциехэм, семинархэм ахэлажьэщтыгъэх, Урысыем иполитик цIэ­рыIохэм, бизнесменхэм, журналистхэм аIукIагъэх, спорт зэнэкъокъухэм, фестивальхэм ахэлэжьагъэх.

АР-м ныбжьыкIэ IофхэмкIэ и Комитет иIофышIэхэм къызэраIуагъэмкIэ, мы форумыр мэхьэнэ ин зиIэ общественнэ, гъэсэныгъэ Iофтхьабзэу щытыгъ. Адыге­им икIыгъэ лIыкIо купым лъэпкъ туризмэм зегъэушъомбгъугъэным фэгъэхьы­гъэ хэушъхьафыкIыгъэ проектэу туриз­мэм­кIэ республикэ ассоциацием къы­гъэхьазырыгъэр форумым къыщигъэлъэ­гъуагъ ыкIи лъэныкъо зэфэшъхьаф­хэм­кIэ гъэхъагъэхэр яIэу Адыгеим къагъэзэжьыгъ, щытхъу тхылъхэмрэ дипломхэмрэ мымакIэу къафагъэшъошагъэх.

Художественнэ самодеятельностым ылъэныкъокIэ текIоныгъэр къыдихыгъ Лолита Арутюновам, самбэ бэнэнымкIэ килограмм 62-рэ къэзыщэчыхэрэм азыфагу щыкIогъэ зэнэкъокъум апэрэ чIы­пIэр къыщихьыгъ Кахриман Кафаровым, ныбжьыкIэ туризмэм Урысыем зыще­гъэушъомбгъугъэнымкIэ курсэу зэхаща­гъэхэм къащыхагъэщыгъ Елена Никишинар. Джащ фэдэу къушъхьэ зекIон зэнэкъокъумкIэ Адыгеим илIыкIо куп апэрэ чIыпIэр къыфагъэшъошагъ, электроннэ презентацием ылъэныкъокIэ волонтерхэм ятIонэрэ чIыпIэр къыдахыгъ.

НыбжьыкIэхэм форумым шIэныгъэу, гъэсэныгъэу щызэрагъэгъотыгъэм имызакъоу, ащ зэфищагъэх, нэIуасэ зэфи­шIыгъэх.

.

.

.