Кризисым
пэшIуекIогъэнымкIэ штабэу АР-м щызэхащагъэм шышъхьэIум и
14-м игъэкIотыгъэ зэхэсыгъоу иIагъэм тхьамэтагъор
щызэрихьагъ АР-м и Президентэу ТхьакIущынэ Аслъан.
Мэхьанэшхо зиIэ лъэныкъоу ащ къыщаIэтыгъэхэм ащыщ
профессиональнэ еджэпIэ учреждениехэр къэзыухыгъэхэм
IофшIапIэхэр ягъэгъотыгъэнымкIэ республикэм щызэшIуахырэ
Iофыгъохэр.
Мыщ фэгъэхьыгъэу
АР-м IофшIэнымкIэ ыкIи социальнэ хэхъоныгъэмкIэ
иминистрэу Наталья Широковам къызэрэхигъэщыгъэмкIэ, АР-м
гъэсэныгъэмрэ шIэныгъэмрэкIэ и Министерствэрэ еджэпIэ
учреждениехэм япащэхэмрэ мы Iофыгъом изэшIохын лъэшэу анаIэ
тырагъэты. ЕджапIэхэр къэзыухыгъэхэм IофшIапIэхэр
арагъэгъотынымкIэ Iофтхьэбзэ гъэнэфагъэхэр зэпыу имыIэу
рагъэкIокIых, ащ зэфэхьысыжьэу фэхъухэрэр Урысые Федерацием
гъэсэныгъэмрэ шIэныгъэмрэкIэ и Министерствэ IэкIагъахьэх.
Адыгеир пштэмэ,
сэнэхьат зэфэшъхьафхэр зыщызэрагъэгъотырэ ублэпIэ, гурыт
ыкIи апшъэрэ профессиональнэ еджапIэхэр мыгъэ
къэзыухыгъэхэм япчъагъэ нэбгырэ мини 6,4-рэ мэхъу. Ахэм
ащыщэу нэбгырэ мини 4,7-мэ IофшIапIэ арагъэгъотынэу ары
зэрагъэнэфагъэр. НыбжьыкIэ 630-рэ фэдизмэ дзэм къулыкъу
щахьынэу кIощтых, нэбгырэ 770-мэ яеджэн лъагъэкIотэщт,
яшIэныгъэхэм ахагъэхъощт. Ау профессиональнэ еджапIэхэр
къэзыухыгъэ нэбгырэ 300 фэдизмэ IофшIапIэ амыгъотыным
ищынагъо щыI.
Наталья
Широковам къызэриIуагъэмкIэ, УФ-м и Правительствэ кризисым
пэшIуекIогъэнымкIэ ыгъэнэфэгъэ программэу 2009-рэ илъэсым
телъытагъэмрэ республикэ программэу «ЦIыфхэм IофшIэн
ягъэгъотыгъэнымкIэ АР-м гумэкIыгъоу илъым
къыкIегъэчыгъэныр» зыфиIоу мы илъэсым телъытагъэмрэ
гъэцэкIэгъэнхэм пае цIыфхэм IофшIэн ягъэгъотыгъэнымкIэ
федеральнэ къулыкъум и ГъэIорышIапIэу АР-м щыIэмрэ
муниципальнэ образованиехэм ягупчэхэмрэ Iофышхо ашIэ. Ащ
ишIуагъэкIэ щылэ - мэкъуогъу мазэхэм къакIоцI нэбгы-
рэ мини 7 фэдизмэ IофшIапIэхэр арагъэгъотын алъэкIыгъ.
БлэкIыгъэ илъэсым мыщ фэдэ иуахътэ егъэпшагъэмэ, ар нэбгырэ
870-кIэ нахьыб.