Адыгэхэр зэрыгушхорэ цIыф
ЧIышъхьэм ищыIэныгъэ
щызэпычыгъэ мэхъуми, ар цIыфхэм гукъэкIыжь дахэу, псэ
зыпытым фэдэу къахэнэжьы. ЛIыгъэшхо
хэлъэу, акъылышIоу, ащ фэдэ цIыфхэр илъэс къэс къэхъухэрэп
зыфаIорэмэ ащыщэу, адыгэхэр зэрыгушхорэ цIыфышхоу Къалмыкъ
Юрэ Хьамзатэ ыкъор псаоу щыIагъэмэ ыныбжь илъэс 75-рэ
хъущтыгъэ.
Ащ фэгъэхьыгъэ пчыхьэзэхэхьэ
гъэшIэгъон жъоныгъуакIэм и 22-м къалэу Черкесскэ щыкIуагъ.
Адыгеим икIыгъэ лIыкIо купэу зэхахьэм хэлэжьагъэхэм
ахэтыгъэх
АР-м и Къэралыгъо Совет - Хасэм итхьаматэ игуадзэу Сапый
Вячеслав, зэлъашIэрэ народнэ тхакIоу МэщбэшIэ Исхьакъ,
Къэралыгъо Советым - Хасэм идепутатэу Пэнэшъу Руслъан, Адыгэ
Республикэм лъэпкъ IофхэмкIэ, IэкIыб къэралхэм ащыпсэурэ
тилъэпкъэгъухэм адыряIэ зэпхыныгъэхэмкIэ ыкIи къэбар
жъугъэм иамалхэмкIэ и Комитет итхьаматэу ЖакIэмыкъо
Вячеслав ыкIи мы сатырхэр къэзытхырэр. АР-м иобщественнэ
движениеу Адыгэ Хасэм хэтхэри пчыхьэзэхахьэм хэлэжьагъэх.
Къалмыкъ Юрэ Къэрэщэе-Щэрджэс
Республикэм и Хьабэз район стажерэу, нэужым народнэ судьяу
IофшIэныр щыригъэжьэгъагъ, Саратов дэт юридическэ институтым
икIэлэегъэджэ шъхьаIэу щытыгъ, доцентыгъ, профессорыгъ ыкIи
гражданскэ правэм икафедрэ ипэщагъ. 1989-рэ илъэсым СССР-м
инароднэ депутатэу хадзыгъ, СССР-м и Апшъэрэ Совет
хэбзэгъэуцугъэмкIэ и Комитет итхьаматэу, Урысые Федерацием
юстициемкIэ иминистрэу, Урысыем щынэгъончъагъэм-
кIэ и Совет хэтэу Iоф ышIагъ. 1993-рэ илъэсым
къыщегъэжьагъэу УФ-м и Къэралыгъо Думэ иапэрэ зэIугъэкIэгъу
идепутатыгъ. УФ-м и Гражданскэ кодекс, референдумым ыкIи
нэмыкI законхэм ятхын ар хэлэжьагъ.
КъызхэкIыгъэ лъэпкъыр
щымыгъупшэу, хэбзэ IофшIэным дакIоу адыгэ Iофыгъохэми
Къалмыкъ Юрэ лъэшэу апылъыгъ, Дунэе Адыгэ Хасэм итхьамэтагъ.
1992-рэ илъэсым Къэбэртэе-Бэлъкъар Республикэм
зэпэуцужьыныгъэ инэу къихъухьагъэм фэшI Урысыем идзэхэр
ращэнхэу унашъо зашIым, Юрэ ялъэIуи, пчыхьэм сыхьатыр 7-м
нэс уахътэ къаIихыгъагъ цIыфхэр ыгъэдэIонхэу,
зэбгыригъэкIыжьынхэу. А уахътэм ехъулIэу ащ ыIуагъэр
ыгъэцэкIэжьыгъ. Лъытэныгъэ ин Юрэ къызэрэфашIырэм ишыхьатэу
игущыIэхэм мэхьанэ цIыфхэм къыратыгъ, зэпэуцужьыгъэхэр
мамырэу зэхэкIыжьыгъэх, дзэхэри къэбэртэе чIыгум ихьагъэхэп.
Арэущтэу мыхъугъэмэ, хэт ышIэра тинепэрэ мафэ
зыфэдэщтыгъэр?
Чэчэн Республикэм зао
рашIылIэнэу Урысыем щынэгъончъагъэмкIэ и Совет уна-
шъо зешIым Къалмыкъ Юрэ закъу ащ хэтхэм адезымыгъэштагъэр,
рахъухьэгъэ заом зэрэпэшIуекIорэр къыгъэшъыпкъэжьэу Советым
къыхэкIыжьыгъ, министрэ IэнатIэри ыгъэтIылъыгъ. Абхъазым
грузиныдзэхэр къызытебанэхэм, зэкъош лъэпкъхэр пыим
къыфэзыIэтыгъэхэм Къалмыкъ Юрэ ащыщыгъ, абхъазхэм
текIоныгъэ къыдахыным иIахьышхо хишIыхьагъ.
Юрэ илIыгъэрэ игулъытэ чанрэ
бэдэдэм зэралъыIэсыщты-
гъэр, адыгэмэ ямызакъоу ар зэрэхэгъэгоуи яцIыфэу зэрэщытыр
пчъагъэрэ игущыIэхэм къащыхигъэщыгъ Къэрэщэе-Щэрджэс
Республикэм и Президентэу пчыхьэзэхахьэм чанэу хэлэжьэгъэ
Борис Эбзеевым. Юрэ ишъхьэгъусэу Къалмыкъ Октябринэ, Урысыем
ичIыпIэ зэфэшъхьафхэм къарыкIыгъэ лIыкIо купхэм япащэхэр
зэхахьэм къыщыгущыIагъэх, адыгэлIым, лIы шъыпкъэм игугъу
дахэкIэ ашIыгъ.
Дунаир пхъожьыгъэми, цIыфхэм
агу укъинагъэмэ, лъэпкъэу узфэлэжьагъэм, къин
зыфэплъэгъугъэм узэхишIыкIыжьыгъэмэ, уишIэжь егъэлъапIэмэ,
ащ нахь насып мэхъужьа?! Къалмыкъ Юрэ фэдэ адыгэлIхэр
нахьыбэрэ Тхьэм тилъэпкъ къыхерэгъэкIых!