Абы къызэрихутамкIэ, Колумб къызыхэкIар кавказ лъэпкъщ,
нэхъ белджылыуэ жыпIэмэ, адыгэщ - аращ щыхьэт зытехъуэр
адмиралым и хьэдэ къупщхьэм и ДНК-р. Колумб и къуэшхэм я
ДНК-ри къихутащ профессор Льоренте ари щыхьэт тохъуэ ахэри
шэрджэсхэм къазэрыхэкIам.
Колумб 1451 гъэм къыщалъхуащ Генуе (Италие). Курыт
лIэщIыгъуэхэм къаруушхуэ бгъэдэлъащ Генуе республикэм, абы щыщ
сатуущIэхэр XII лIэщIыгъуэм нэсауэ щытащ Кърымми абы къедза
щIыналъэхэми, илъэс 200 дэкIри, генуез сатуущIэхэм Кърымым
пщыгъуэ лъэрызехьэ къыщызэрагъэпэщын яхузэфIэкIащ. А зэманым
абыхэм нэхъ я гъунэгъу дыдэр адыгэхэрат - ахэр щыкуэдт Кърымым
(Таврием). Генуезхэмрэ шэрджэсхэмрэ щIэх дыдэ благъэ
зэхуэхъуащ, сату зэдащIурэ, зауэ къалъыкъуэкIмэ, дзейуэ
зэувалIэурэ. Аркъудейкъым: адыгэ лIакъуэлIэшхэм ящыщ куэд
чыристан диным ихьащ, генуез бзылъхугъэ щхьэгъусэ ящI хъуащ,
Италием (Генуе) Iэпхъуари мащIэкъым. Езы генуез
лIакъуэлIэшхэми сатуущIэхэми щхьэгъусэ ящI хабзэр шэрджэс
бзылъхугъэт. Колумб и адэра хьэмэ и анэра адыгэр - ар
гъэбелджылыгъуафIэкъым, ауэ профессор Льеоренте шэч
къызытримыхьэр абы адыгэлъ зэрыщIэтырщ.
Испан Интернет-сайтхэм япкъ иткIэ зытхар
Тернавский
Николайщ. 2009 гъэ.
P. S. Генуезхэр Кърымым къыщысам щыгъуэ абы адыгэ куэд исащ.
Джэнуез - аращ адыгэхэр Таврием (Кърымым) къитIысхьа генуезхэм
зэреджэу щытар. Джэнуезхэм Кърымми абы къедза щIыналъэхэми
къалэ-быдапIэ (сату щIыпIэ) зыбжанэ щаIащ, я къалащхьэр
Къафэт (иджы Феодосие). Джэнуезхэм апхуэдэ сату щIыпIэ щаIащ
Кавказми - шэрджэс хы Iуфэм (Анапэ, Тэман, н.)
Кърымым къыщызэтенащ абы адыгэ зэрисам щыхьэт техъуэ
щIыпIэцIэ, псыцIэ, бгыцIэ куэд; иджы Альмэ зи цIэ псым
КъэбэрдейкIэ еджэу щытащ зэгуэр (Къэбэрдеипс, Къэбэрдей
псыхъуэ).
Тэтэрхэм Кърымыр яубыда нэужь (1443 гъэм), джэнуезхэр
зэхэзехуэн ящIри, а щIыналъэр ябгынэн хуей хъуауэ щытащ,
адыгэхэри я хэкум, Кавказым, къэIэпхъуэжащ. 1451 гъэм
тыркухэм Истамбыл яубыдащ, Босфор хытIуалэр абы щегъэжьауэ
зэхуащIри, джэнуезхэмрэ адыгэхэмрэ зэрызэкIэлъыкIуэжа
щыIэкъым, сатуи зэдащIыжакъым. |