Xэгъэгу зэошхоу блэкIыгъэм
хэкIодэгъэ зэолIхэм ащыщхэу икIодыкIи, зыщыкIодыгъэ чIыпIэри,
икъэ зыдэщыIэри амыгъэунэфыгъэу джы къызнэсыгъэм къэнагъэр
макIэп. А зикIодыкIэ мыгъэунэфыгъэ зэолIхэм ащыщыгъ Пэнэхэс
щыщэу Къэрэтэбэнэ Мыхьамоди. Ащ ехьылIагъэу статья Мыхьамодэ
икIалэу Асфар «Адыгэ макъэм» къыригъэхьэгъагъ. ЩытхъукIэ
фэплъэгъу хъущт Асфар ышIагъэр: ятэ къырыкIуагъэр
зэригъэшIагъ, гъэзетым къытхыжьыгъ, Iоф зыщишIэгъэ Пэнэхэс
еджапIэм мемориальнэ пхъэмбгъу къыщызэIуаригъэхыгъ.
Гъэзетеджэмэ
агу къэзгъэкIыжьы сшIоигъу Мыхьамодэ лIыгъэу заом
щызэрихьагъэр. 1922-рэ илъэсым къэхъугъ. КIэлэегъаджэу
Пэнэхэс Iоф щишIэщтыгъ. Заор къызежьэм, зэуапIэм
Iухьагъ. Псыфабэ, Мэздэгу адэжьхэм ащыкIогъэ зэошхохэм
ахэлэжьагъ, орденхэр, медальхэр къыфагъэшъошагъэх. Илъэс
20 ыныбжьэу сэкъат хъугъагъэ. Зэо ужыми икъуаджэ
кIэлэегъаджэу Iоф щишIагъ. Илъэс 47-рэ ыныбжьэу идунай
ыхъожьыгъ.
Iоф
зыщишIэгъэ еджапIэм ичIэхьэгъу дэжь дэпкъым шIэжь
пхъэмбгъур раIулIын зэхъум бэ Пэнэхэс щыщхэу еджапIэм
къекIолIэгъагъэр. Ахэр Къэрэтэбанэмэ яIахьылых,
Мыхьамодэ икIалэмэ яныбджэгъух, кIэлэегъаджэх,
еджакIох. Мыхьамодэ ищыIэныгъэ гъогу къытегущыIагъэх
кIэлэегъэджэ IофшIэным иветеранэу Ацумыжъ Хьамидэ,
гъэсэныгъэмкIэ район гъэIорышIапIэм ипащэу Жэдэ
Андзаур, Хэгъэгу зэошхом иветеранэу Мамхыгъэ Рэщыдэ,
Къэрэтэбэнэ Махьамодэ ыкъоу Асфар ыкIи ахэм анэмыкIхэри.
- Сэ Iоф
дэсшIэнэу хъугъэп Мыхьамодэ, ау нахьыжъхэм ащ
иIофшIэкIагъэр къаIуатэу бэрэ зэхэсхыгъ, - ыIуагъ
Ацумыжъ Хьамид. - Сэ еджапIэм IофшIэныр зыщесэгъажьэм,
Мыхьамодэ щысэ къысфэхъугъэмэ ащыщ.
- Лъэшэу
сигуапэ непэ зэхэшъущэгъэ Iофтхьабзэр, - ыIуагъ Мамхыгъэ
Рэщыдэ. - Сэри заом сыхэтыгъэшъ, дэгъоу сэшIэ ар
зыфэдэр. Мыхьамодэ къинэу ыхъугъэр зынэсырэр. ЦIыф
хьалэлыгъ, гукIэгъу, шъыпкъагъэ хэлъыгъэх, цIыфхэр
икIэсагъэх.
ЗэIукIэгъум
къыщыгущыIагъ Мыхьамодэ ыкъоу Асфар, тым ищыIэныгъэ
гъогу къыIотагъ, лъэшэу къоджэдэсхэм зэрафэразэр
хигъэунэфыкIыгъ.
