Зихэгъэгу
егъэзыгъэкIэ зэрагъэбгыни, хымэ хэгъэгухэм арытэкъухьагъэ
хъугъэ адыгэ лъэпкъым къырыкIуагъэр егъэшIэрэ гумэкIыгъоу
титарихъ къыхэнагъ.
Тыркуем, Сирием,
Иорданием, США-м, нэмыкI IэкIыб хэгъэгухэм ащыпсэурэ
адыгэхэм япчъагъэ бэкIэ нахьыб чIыгужъым къинагъэм нахьи.
ХэхэсыцIэ зиIэ адыгэхэм хымэ чIыгум щыIакIэу щыряIагъэр сыд
фэдагъа? Сыд фэдэ гузэжъогъуа ахэр зыхэтыгъэр! Ау адыгэ
лъэпкъым къыхэкIыгъэхэр ялъэпкъ егупшысэхэу, ятэжъхэм
дэхагъэу, шIоу ашIагъэр агу илъэу, ячIыгужъ, япсыхъо
дахэхэр, якъушъхьэ лъагэхэр ащымыгъупшэхэу яамал
къызэрихьэу псэугъэх. Ящытхъу, ядахэ хымэ хэгъэгоу зэрысхэм
щагъэIугъ, шIоу, псапэу ашIагъэр ячIыгужъэу Адыгэ хэкум
къынэсыгъ. Ащ фэдэ цIыфхэм зэу ащыщ Тыркуем щыпсэурэ
тилъэпкъэгъоу, сикъош лъапIэу Дзыбэ Музафар.
Дзыбэ лIакъом
изэIукIэу Тыркуем Музафар щызэхищагъэхэм, Адыгэ Республикэм
ыкIи Къэрэщэе-Щэрджэ-
сым ащыпсэурэ икъошхэр бэрэ ежь имылъкукIэ ригъэблэгъагъэх.
Ащ фэгъэхьыгъэу илъэс заулэкIэ узэкIэIэбэжьмэ, «Адыгэ
макъэм» сыкъэт-
хэгъагъ. Псапэу, шIоу ащ лIакъом
фишIагъэр цIыфхэм ащыгъупшэнэп сшIошIы.
Электротехникэм
епхьылIэн плъэкIыщт пкъыгъохэр къэзышIырэ фирмэ иунаеу
Музафар иIагъ, ау ащ ызыны-
къо ыщэн фаеу хъугъэ. Дунаим къыщекIокIырэ экономическэ
кризисыр Тыркуеми нэсыгъ. Арэущтэу Iофыр зэрэхъугъэр
Музафар лъэшэу ыгу къео, сыда пIомэ пшахъорэ мыжъорэ зыхэлъ
чIыгу зэгъэфэгъуаеу щытыр илъэс пчъагъэрэ ыукъэбзыгъ, ащ
изэгъэгъотын мылъкушхо тыригъэкIодагъ. ПкIуачIэ уемыблэжьэу,
зыгъэпсэф уимыIэу уугъоигъэ мылъкур пшIокIодыныр гукъау,
къин. Ау Музафар ыгу ыгъэкIодырэп, лIы кIочIэшху, хьаджэ.
ИIофхэр зэтыригъэуцожьынхэу, мылъ-
коу IэкIэкIыгъэр ыгъотыжьынэу Тхьэм сыфелъэIу.
Музафар адыгэ
чIыгужъыр ыпсэм фэдэу шIу елъэгъу. Хэхъоныгъэу ащ ышIыхэрэм
арэгушхо, Кавказым икъушъхьэ лъагэхэр, имэз шхъуантIэхэр
лъэшэу ылъэгъухэ шIоигъу, акIэнэцIы, афэзэщы. Ау илъэс заулэ
хъугъэу Адыгэ Республикэм къихьан ылъэкIырэп. АщкIэ
пэрыохъу ащ фэхъурэ цIыфхэм шIу агу къихьанышъ, Тхьэр агу
къэкIынышъ, Музафар гъогу ратынэу сялъэIу.
Сэ илъэс
заулэкIэ узэкIэIэбэжьымэ, Дзыбэ Музафар ыдэжь сыщыIагъ.
Иунагъо шIукIуапIэ Тхьэм ешI. Икъошхэр, ишъхьэгъусэу,
бзылъфыгъэ гуа-
щэу Зухьалэ, икIэлэцIыкIухэр дахэу къыспэгъокIыгъэх,
сагъэшIуагъ, салъытагъ. Исабый цIыкIухэм адыгабзэм
изэгъэшIэнкIэ IэпыIэгъу сафэхъугъ. Сэ зызэрэзгъэпсэфыщтым,
нахьыбэ зэрэсигъэлъэгъущтым ренэу Музафар ынаIэ тетыгъ.
Тхьаумэфэ мафэ горэм хы- Iушъом зыдгъэпсэфынэу зэрэунагъоу
тыкIуагъ. ШхэпIэ цIыкIу горэм тычIэсэу Музафар ынэхэр
плъызэу чыжьэу, чыжьэу хым хаплъэзэ къыIуагъ: «Муслъимэт, сэ
силIакъо, силъэпкъ пае сшIэрэм фэшI зыгорэм сыкIэнэцIырэп,
ау хэт ышIэра, зэгорэм тикIалэхэм якIалэхэм Кавказым
агъэзэжьынкIи мэхъу. Тятэжъхэм ячIыгу ис адыгэхэр,
сигупсэхэу силIакъо щыщхэр дахэкIэ ахэм къапэгъокIынхэу ары
сызыфаер».
Музафар лIышхом
ынэ нэгъо дахэхэм нэпсыр къатехьагъ ыкIи гупшысэ инхэм
ахилъэсагъэу, рэхьатэу, зи къымыIоу бэрэ щысыгъ. Ащ сыгу
ыгъэузыгъ.
УигухэлъышIухэр
Тхьэм къыбдегъэхъух, Музафар! ТапэкIи гъэхъэгъэ инхэр
пшIынхэу, уиIофхэр зэтеуцожьынхэу, уищытхъу аIо зэпытэу,
уигъогу тыгъэм инэбзый дахэхэм къагъэнэфэу бэрэ ущыIэнэу
Тхьэм селъэIу. ШIу утэлъэгъу, утэгъэлъапIэ, унэпэ къабзэ
тырэгушхо.
Дзыбэ Музафар
шIушIэным къыфэхъугъэ цIыф, дахэкIэ зигугъу ашIырэмэ ащыщ,
адыгэ лъэпкъым джащ фэдабэ къыхэкIынэу Тхьэм телъэIу!