Наркотикхэр
хэбзэнчъэу гъэзекIогъэнхэм пэуцужьырэ комиссиеу АР-м
щызэхащагъэм тыгъуасэ, бэдзэогъум и 21-м, игъэкIотыгъэ
зэхэсыгъо иIагъ. Ар зэрищагъ АР-м и Президентэу ТхьакIущынэ
Аслъан. Зэхэсыгъом хэлэжьагъэх АР-м и Премьер-министрэу
КъумпIыл Мурат, АР-м и Къэралыгъо Совет - Хасэм и Тхьаматэу
Анатолий Ивановыр, федеральнэ инспектор шъхьаIэу ЛIыIужъу
Адам, АР-м и Президент ыкIи министрэхэм я Кабинет я
Администрацие ипащэу Александр Пиценкэр, правэухъумэкIо
орган зэфэшъхьафхэм япащэхэр, нэмыкIхэр.
НыбжьыкIэхэр
нахьыбэу зыщызэрэугъоихэрэ ыкIи зызыщагъэпсэфырэ чIыпIэхэм
наркотикхэр ащызэрамыхьанхэм, нахь макIэу ащ пыщагъэ хъунхэм
фэшI шIэгъэн фаехэм апэу атегущыIагъэх. АР-м ныбжьыкIэ
IофхэмкIэ и Комитет мы лъэныкъомкIэ Iофэу ышIэрэм
фэгъэхьыгъэ доклад къышIыгъ ащ ипащэ игуадзэу Татьяна
Самонинам, ау комитетым екIолIакIэу иIэм уигъэрэзэнэу
зэрэщымытыр рес-
публикэм ипащэ къыхигъэщыгъ. Зыфызэрэугъоигъэхэм
ылъэныкъокIэ Iофхэм язытет икъоу зэрэщымыгъуазэ-
хэр, пшъэрылъэу ащкIэ яIэхэм ягъэцэкIэн Iэпэдэлэл
зэрашIыгъэр хэти зэрэфимыдэ-щтыр ТхьакIущынэ Аслъан
къыIуагъ, нахь чанэу дэлэжьэнхэу, щыкIагъэхэр псынкIэу
дагъэзыжьынхэу пхъашэу къафигъэпытагъ.
Наркотикхэм
апыщагъэ хъугъэ ныбжьыкIэу республикэм непэ исыр зыфэдизым
щигъэгъозэнхэм пае Президентым гущыIэр ритыгъ Адыгэ
республикэ наркологическэ диспансерым иврач шъхьаIэу Римма
Спиринам. Ащ къызэриIуагъэмкIэ, илъэс 30-м аныбжь
шIомыкIыгъэу мыхэм яучет хэтыр нэбгырэ 1357-рэ. Районхэмрэ
къалэхэмрэ зызэрегъапшэхэм, Мыекъуапэ (нэбгырэ 961-рэ),
Тэхъутэмыкъое районым (нэбгыри 199-рэ), Мыекъопэ районым
(нэбгыри 153-рэ) ыкIи Джэджэ районым (нэбгыри 132-рэ) нахь
ащыбэу къыIуагъ.
Мыекъопэ къэлэ
администрацием ипащэ игуадзэу Сергей Стельмахрэ
Тэхъутэмыкъое район администрацием ипащэу Пщыдатэкъо Ризорэ
Iофхэр нахьышIу шIыгъэнхэм фэшI зэшIуахыхэрэм, щыкIагъэу
щыIэхэм, зыгъэохъухэрэм къатегущыIагъэх. Наркотикхэр
хэбзэнчъэу зыгъэзекIохэрэм, ахэр къэзыгъэкIыхэрэм
якъэгъотынкIэ район пащэхэмрэ къоджэ койхэм япащэхэм-
рэ нахь зэпэблагъэу Iоф зэдашIэмэ шIуагъэ къызэритыщтыр,
республикэ программэхэм анэмыкIэу, чIыпIэ программэхэри
аштэнхэ фаеу зэрэщытыр мыщ дэжьым Премьер-министрэм
къыщыхи-гъэщыгъ.
Повесткэм
щыгъэнэфагъэу, ныбжьыкIэхэр наркотикхэм ащыухъумэгъэнхэм
фэшI Iофэу ашIэрэм фэгъэхьыгъэу нэужым доклад къашIыгъ
Адыгэкъалэ иадминистрацие ипащэ иIэнатIэ зыгъэцэкIэрэ Лъэцэр
Адамэрэ Кощхьэблэ район администрацием ипащэу Тхьаркъохъо
Налбыйрэ. Ахэм мы Iофыгъом изэшIохын екIолIакIэу фыряIэм
зэригъэразэрэр Президентым къыIуагъ, ау ащ пэIуагъэхьащт
мылъкоу чIыпIэ бюджетхэм ащагъэнэфагъэр зэрэмакIэр, ар
нахьыбэ шIыгъэнымкIэ хэкIыпIэхэм зэдягупшысэнхэ зэрэфаер
къыхигъэщыгъ.