АР-м и Къэралыгъо
Совет - Хасэм идепутатэу КIэрмыт Мухьдинэ зэхищэгъэ
кIэлэцIыкIу ансамблэу «Нэфыр» Тыркуем тхьамэфищырэ къэтыгъ.
Адыгэхэр зыщыпсэурэ чIыпIэу Тыркуем итхэм ансамблэм хэтхэр а
уахътэм къыкIоцI щыIагъэх. Километрэ минихэу хэгъэгу
кIоцIым къыщакIугъэм къыхиубытагъэх къалэхэу Стамбул,
Синоп, Самсун, Эрбаа, Измир, Гексун, Афшин, Дюзджэ,
Адапазары ыкIи ахэм апэIулъ къуаджэхэр. Карлы-Кой, Рихьанлы,
Элькуршин, Арикбаша ыкIи нэмыкI адыгэ къоджэ тIокIым
къехъурэмэ адэхьагъэх, концертхэр къащатыгъэх, адыгэ
унагъохэм арысыгъэх.
ХэгъэгуипшI
пчъагъэ зыхэлэжьэгъэ фестивалэу Самсун щызэхащагъэм Адыгеим
икIыгъэ кIэлэцIыкIу ансамблэр къыщышъуагъ. ЗэкIэмкIи
фестивалитфымэ «Нэфыр» ахэлэжьагъ. Тыркуем щыпсэурэ
адыгэхэмрэ «Нэфым» хэтхэмрэ тхьамэфищым къыкIоцI ныбджэгъу
зэфэхъугъэх, адресхэмкIэ зэхъожьыгъэх. «Нэфым» игъусэу
Тыркуем щыIагъэх шIэныгъэлэжь цIэрыIоу, гуманитар ушэтынхэм
апылъ Адыгэ республикэ институтэу КIэрэщэ Тембот ыцIэ
зыхьырэм ипащэу Бырсыр Батырбый, зэлъашIэрэ орэдыIохэу
Къушъэкъо Симэрэ Устэкъо Нухьэрэ, Адыгэ телевидением
иIофышIэхэу ТIэшъу Светланэрэ ЯхъулIэ Мэдинэрэ, гъэзетэу
«Шапсыгъэм» иредактор шъхьаIэу Ныбэ Анзор ыкIи мы
сатырхэр къэзытхырэр.
КIэрмыт
Мухьдинэ имылъкукIэ нэбгырэ 46-рэ зыхэхьэрэ купыр Тыркуем
кIон амал ыгъотыгъ. Тилъэпкъ зы хъужьыным, тиреспубликэ
щыпсэухэрэми Тыркуем ис адыгэхэми ялъэпкъ зэхашIэ
зыкъиIэтыжьыным, тызэрэгъотыжьыным фэшI а Iофыгъор
Мухьдинэ зэшIуихыгъ. Тыркуем щыIэ Адыгэ хасэмэ яшIогъэшхо
къэкIуагъ. Ахэр ары купым хэтхэм ашхыщтымрэ зыдэщыIэщтхэмрэ
зыпшъэ ифагъэр, дэгъу дэдэуи ар зэшIуахыгъ. ЛъэпкъымкIэ
мэхьанэшхо зиIэ Iофыгъохэм - Тыркуем щыпсэурэ адыгэхэм
ящыIэкIэ-псэукIэ, ащ итарихъ тилъэпкъэгъухэр
зэрэхэхьагъэхэм, гъэхъагъэ зиIэ цIыфхэм, зыкIыныгъэм
екIурэ гъогур зыфэдэм - афэгъэхьыгъэ тхыгъэхэр тигъэзет
шIэхэу къыхиутыщтых.