Джылэхъстэней
щIыналъэм цIыху зэчийфIэхэр имащIэкъым, ар нэхъыжь е
нэхъыщIэ ирехъуи. « Нэхъыжь зиIэм нэхъыщIи иIэщ» - жеIэ
адыгэ псалъэжьым. Абы и щыхьэтщ куэд мыщIу Сочи къалэ
щекIуэкIа Урысейпсо лъэпкъ фестивал – зэпеуэм Тэрч къалэ
щыщ Хьэгъур Наинэрэ Апэжэ Аслъэнрэ и лауреат зэрыхъуар. Мы
гъэм 6-у екIуэкI лъэпкъ фестивалым зэчий зыбгъэдэлъ
ныбжьыщIэу 600-м щIигъу зэхуишэсат. Гъуазджэм и къудамэ
зэхуэмыдэхэмкIэ екIуэкIа фестивал – зэпеуэм ныбжьыщIэхэм я
зэфIэкIыр къафэм, уэрэд жыIэным лъэпкъ Iэмэпсымэхэм еуэн
номинацэ лIэужьыгъуэхэм щагъэлъэгъуащ. «Ди къэкIуэнур» зи
цIэ дунейпсо псэпащIэ фондым къызэригъэпэща зэIущIэр
щекIуэкIащ «Дыгъэмыс» зыгъэпсэхупIэ комплексым.
Урысейм и
къалэ зэхуэмыдэхэм къикIа щэнхабзэмрэ гъуазджэмрэ и
лэжьакIуэхэм фестивалым жюриуэ хэтам имызакъуэу мастер –
классхэри ятащ. Утыку итыным, уэрэд жыIэным, пшынэ
еуэным и мурад щэхухэмкIэ ныбжьыщIэхэм ядэгуэшахэщ, езы
жюрихэри я Iуэху еплъыкIэхэмкIэ зэчэнджэщахэщ.
Джылэхъстэней щIалэмрэ пщащэмрэ я зэфIэкIым жюрим щысахэм
гу лъамытэу къэнакъым. Тэрч къалэ гъуазэджэмкIэ сабий
школым и 6-нэ классым щеджэ Апажэ Аслъэн лъэпкъ Iэмэпсымэхэм
еуэнымкIэ номинацэм 1 степеным и лауреат цIэ лъапIэр
къыфIащащ, а еджапIэ дыдэм 2-нэ классым щеджэ Хьэгъур Наинэ
хор къудамэм 3-нэ степеным и лауреат хъуащ.
Аслъэн
адыгэ пшынэмкIэ къафитI еуащ ар: «Узбек къафэмрэ»,
«Ислъэмей» Адыгей къафэмрэ, Наинэ КъБР-м щэнхабзэмкIэ щIыхь
зиIэ и лэжьакIуэ, гъуазджэмкIэ сабий школым и егъэджакIуэ,
композитор – уэрэдус ЗэрамыщIэ Зэретэ и мэкъамэ зыщIэлъ,
(псалъэхэр Джылэхъстэнейм щыщ Емкъужь Мухьэмэд ейщ),
уэрэдитI игъэзэщIащ.
«Фестивальный аккорд» дунейпсо – хъыбарыщIэ газетым Наинэ
щита интервьюм щыжиIащ: - « Сэ уэрэд щIыжысIэнур фэращ.
КъызэхъулIэмэ, си зэфIэкIымкIэ фызгъэгуфIэну сыхуейщ.
Мураду зыхуэзгъэувыжари фестивалым сыщытекIуэнурщ. Cи зы
уэрэд нэхъ мыхъуми цIыхур игъэгуфIэмэ, ар си
ехъулIэныгъэшхуэу къэслъытэнущ.»
Шэч
къызытумыхьэн Iуэхугъуэу Наинэ и мурадыр къызэрехъулIар
наIуэ ищIащ. Догугъэ тэрч пщащэм и уэрэдхэмкIэ Къэбэрдейри
Джылэхъстэнейри дяпэкIи игъэгуфIэну.
Дауи
Наинэрэ Аслъэнрэ мыр я япэ ехъулIэныгъэу щыткъым. Ахэр мызэ
– мытIэу республикэ, региональнэ, дунейпсо зэпеуэхэм и
лауреат хъуахэщ. Апажэ Аслъэн 2008 гъэм и творческэ
ехъулIэныгъэхэм папщIэ Урысей Федерацэм щэнхабзэмкIэ и
министерствэм и стипендиант хъуауэ щытащ.
Дэри
дохъуэхъу ныбжьыщIитIым дяпэкIэ апхуэдэ ехъулIэныгъэхэмкIэ
дагъэгуфIэну, ефIэкIуэну, я зэфIэкIыр дунейпсо утыку
ирахьэну.