ЗэзэгъыныгъакІэм икъэбар цІыфхэм ятэгъашІэ  

1 Тызщытхъужьынэу джыри зэ къэтэубла? Хьауми зыгорэм къышъуфитхыгъэу е шъо шъутхыгъэу къытщытхъурэ тхылъ горэ тищыкІагъа, цІыф заулэмэ зэрящыкІагъэм фэдэу?

2 Шъо – тыгухэм арытхагъэу, къытщытхъурэ тхылъ. ЦIыф пстэуми а тхылъыр ашІэн, аджын алъэкІыщт.

3 ТиІоф шІугъэу къыхэкІыгъэу, Христос тхылъэу ытхыгъэм шъузэрэфэдэр къэшъогъэлъагъо. А тхылъыр къамзый мэрчэпкІэ тхыгъэп, щыІэныгъэ къытэзытрэ Тхьэм ы Псэ ЛъапІэкІэ тхыгъэ нахь.

Мыжъобгъухэми атетхагъэп, цІыфхэм агухэм арытхагъ нахь.

4 Христос Тхьэм тызэрэщигъэгугъырэм пае, аущтэу тэІо.

5 Тэр-тэрэу тилъэкІыкІэ зыгорэ къэтыгупшысын амал тиIэу тІорэп, ау лъэкІ къытэзытырэр Тхьэр ары.

6 Ащ зэзэгъыныгъакІэм* тыфэлэжьэнэу лъэкІ къытитыгъ. А зэзэгъыныгъэр гущыІэ тхыгъэхэм атет зэзэгъыныгъэп, Тхьэм ы Псэ ЛъапІэ дэжь къикІырэ зэзэгъыныгъ нахь; сыда пІомэ, гущыIэ 

тхыгъэм егъалІэ, ау Тхьэм ы Псэ ЛъапІэ къегъэпсэужьы.

7 ХьарыфхэмкІэ мыжъобгъухэм атетхэгъэ Тэурат хабзэм Іофэу ышІагъэм лІэныгъэ цІыфхэм къафигъэкІонэу арыгъэми, щытхъушхо иІэу къэкІуагъ. Аущтэу пегъымбар Мусэ ынэгу нэфынэшхоу къыкІэщырэр* кIодыжь пэтми, израиль цІыфхэр ынэгу еплъынхэ алъэкІыщтыгъэп.

8 Аущтэу зэрэщытым пае, Тхьэм ы Псэ ЛъапІэ Іофэу ышІэрэм ащ нахьи нахь щытхъушхо иІэн фаеба?

9 Тэурат хабзэу цІыфхэр зыгъэмысэрэм Іофэу ышІагъэм щытхъушхо иІагъэмэ, Тхьэм ы Псэ ЛъапІэу цІыфхэм Тхьэм дэжькІэ шъыпкъагъэ яІэу зыгъэхъурэм Іофэу ышІэрэм ащ нахьи бэкІэ нахь щытхъушхо иІэн фае.

10 Сыда пІомэ, Тэурат хабзэу щытхъушхо зиІагъэм щытхъу зи имыІэжьэу къэнэ, ыужкІэ къэкІогъэ къэбарышІоу нахь щытхъушхо зиІэм фэбгъадэмэ.

11 Тэурат хабзэу кІодыжьыщтыгъэм щытхъушхо иІагъэмэ, къэбарышІоу мыкІодэу къэнэжьырэм ащ нахьи бэкІэ нахь щытхъушхо иІэн фае.

12 Арышъ, ащ фэдэ гугъэ зэрэтиІэм пае, тыгушхоу тыкъэгущыІэ.

13 Пегъымбар Мусэ зэрэзекІуагъэм фэдэу тызекІорэп. Израиль цІыфхэм ащ ынэгу кІэт нэфынэшхор зэрэкІодырэр амылъэгъуным пае, ынэгу рихъуагъ.*

14 Яакъылхэр гуркъэ хъугъэх. Непэрэ мафэм нэс пэсэрэ зэзэгъыныгъэм итхылъхэм* зяджэхэкІэ, яакъылхэр ихъуагъэхэу къэнэх, сыда пІомэ, Христос закъор ары а нэгурыхъор Іузыхыжьын зылъэкІырэр.

15 Израиль цІыфхэр непи пегъымбар Мусэ и Тэурат хабзэ зеджэхэкІэ, агу техъон иІ.

16 Ау зыгорэм Зиусхьаным зызэрэфигъазэу, а техъуагъэр техыгъэ мэхъу.

17 Зиусхьаныр Тхьэм ы Псэ ЛъапІ ары, ар зыдэщыІэми шъхьафитыныгъэри щыІ.

18 Тэ зэкІэ зынэгу имыхъуагъэу Зиусхьаным ищытхъушхо гъунджэм къызэрищырэм фэдэу еплъыхэрэм, нахь щытхъушхо тиІэ хъу зэпытэу, ежь фэдэ тыхъоу, зэблэхъугъэ тэхъу зэпыт. А пстэур къызхэкІырэр Зиусхьаным ы Псэ ЛъапІ ары.
...