ЦІыфыбэ шІошъхъуныгъэм игъогу зэрэтекІыжьыпэщтыр

1 Тхьэм ы Псэ ЛъапІэ нафэу къеІо, дунаим иаужырэ лъэхъанхэм цІыфыбэ шІошъхъуныгъэм игъогу зэрэтекІыжьыпэ-щтыр. ЦІыфхэр дэзыхьыхырэ джынэхэми, джынапцІэхэм Іофхэу зыфагъасэхэрэми агоуцощтых.

2 ДжынапцІэхэм цІыфхэр зыфагъасэрэ Іофхэр ахэзгъахьэхэрэр нэпитІу зиІэ цІыфхэр ары. Ахэмэ шІури ери зэхадзыжьын амылъэкІэу гъучІ плъыгъэмкІэ агухэм тамыгъэ ядзыгъэм фэдэщт.

3 Къэщэн-дэкІонымрэ гъэнэфэгъэ гъомлапхъэр шхынхэмрэ мыхъун Іофхэу а пцІыусхэм цІыфхэм араІо. Ау Тхьэм а гъомлапхъэхэр къыгъэхъугъэх, шІошъхъуныгъэ зиІэхэу, шъыпкъэр зышІэхэрэм Тхьэм щытхъу фашІэу ахэр ашхынхэм пае,

4 сыда пІомэ, Тхьэм къыгъэхъугъэ пстэури шІу. Тхьэм щытхъу фэпшІэу къапштэмэ, зи хэбдзыжьын ищыкIагъэп,

5 сыда пІомэ, Тхьэм игущыІэхэмкIэ, Тхьэм узэрелъэІурэмкІэ ар къабзэ мэхъу.  

Исус Христос шІоу узэрэфэлэжьэщтыр

6 Мы Іофхэр тшыхэм агурыбгъаІомэ, ащыгъум шІошъхъуныгъэм игущыІэхэмкІи, тишІошъхъуныгъэ тызфигъасэрэ ІофышІухэу узтетхэмкІи лъэкІ зэбгъэгъотэу, Исус Христос шІоу фэлажьэхэрэм уащыщ.

7 Тхьэм ишIолIыкI зыхэмылъ мышъо-мыл тхыдэжъхэм защыдзый. Ау Тхьэм ишIолIыкI угу зэрилъыным ыуж ит.

8 Пкъыр ебгъэсэным шІуагъэ къыхэкІы, ау Тхьэм ишIолIыкI угу илъыным сыд фэдэ лъэныкъокІи ишІуагъэ къэкІо, сыда пІомэ, Тхьэм ишIолIыкI угу илъыным джырэ щыІэныгъэмрэ къэкІощт щыІэныгъэмрэ апае шІум ущегъэгугъы.

9 А гущыІэхэр шъыпкъэх, цІыф пстэуми ахэр адэнхэр яфэшъуаш.

10 Тыулэузэ, тишъыпкъэу тызкІэлажьэрэр цІыф пстэури, зэкІэмэ анахьэу шІошъхъуныгъэ зиІэхэр, мыкІодхэу къэзгъэнэжьырэ Тхьэу щыІэныгъэ зиІэм тызэрэщыгугъырэр ары.

11 Мы ІофхэмкІэ цІыфхэм унашъо афэшІ, ахэри агурыгъаIу.

12 УиныбжьыкІагъэ пае зыми нэмыплъ къызэремыгъэт, ау гущыІэхэмкІи, зекІуакІэмкІи, шІулъэгъумкІи, шІошъхъуныгъэмкІи, гукъэбзагъэмкІи шІошъхъуныгъэ зиІэхэм шапхъэ афэхъу.

13 Сэ сыкъакІофэ, Тхьэм игущыІэ тхыгъэхэм* цІыфхэм апашъхьэ укъызэряджэщтми, цІыфхэм зэрагурыбгъэІощтми, зэрябгъэшІэщтми апылъ.

14 Тхьэм ынэшІу къыпщифэнэу чылыс зэІукІэм инахьыжъхэм* аІэхэр о пшъхьэ къытыралъхьэхэзэ, Тхьэм ежь игущыІэхэр о къыохьылІагъэу ахэмэ агухэм къарилъхьэхи, къызарегъаІохэ ужым, Тхьэм ы Псэ ЛъапІэм лъэкІэу къыуитыгъэр умыгъэпсэуалъэу къэмыгъан.

15 Мы Іофхэм апылъ, уапэкІэ зэребгъэхъурэр зэкІэмэ нафэ афэхъуным пае, а Іофхэм ауж ит зэпыт.

16 Зыфэсакъыжь, Іофхэу цІыфхэр зыфэбгъасэхэрэми ябгъашІэхэрэми афэсакъ. А Іофхэм унаІэ атегъэт зэпыт. Аущтэу пшІымэ, къыодэІурэ цІыфхэр мыкІодхэу къэбгъэнэжьыщтых, о пшъхьи мыкІодэу къэбгъэнэжьыщт.
...