Мэлахъом мэлхэм ынаІэ зэратыри-гъэтырэм фэдэу, Тхьэм ицІыфхэм шъунаІэ атежъугъэт

1 Чылыс зэІукІэм инахьыжъхэу къышъухэтхэм сышъолъэІу. Сэри чылыс зэІукІэ горэм инахьыжъхэм сащыщ. Христос къинэу ыщэчыгъэхэм сыряшыхьат, Христос ищытхъушхоу къэлъэгъощтымкІи Іахь сиІэщт. СызэрэшъолъэІурэр мыры:

2 Мэлахъом мэлхэм ынаІэ зэратыригъэтырэм фэдэу, шъори Тхьэм ицІыфхэу шъуадэжь щыІэхэм мэлахъо шъуафэхъуи, шъунаІэ атежъугъэт, егъэзыгъэ хэмылъэу, ау шъуигуапэу, Тхьэм ыгу зэІурэм фэдэу. Мылъкум шъукІэмыхъопсэу, шъугу етыгъэу ахэмэ шъуафэлажь.

3 Ау шъуІэ илъ цІыфхэм лІыгъэкІэ тетыгъо афышъуиІэу шъуадэмызекІу, ау шапхъэ шъуафэхъуным пае, шІу шъушІэ.

4 ЕтІанэ Христосэу апэрэ мэлахъор къызылъэгъожькІэ, текІоныгъэм итанджэу щытхъушхо зиІэу мыкІодыжьыщтыр къышъуитыщт.

5 Шъо, ныбжьыкІэхэри, нахьыжъхэм шъуафэІорышІ. Пэгагъэ шъугухэм арымылъэу шъузэфыщыт, сыда пІомэ, «Тхьэр пэгагъэ зыгу илъ цІыфым пэуцу, ау пэгагъэ зыгу имылъым ынэшІу къыщефэ».*

6 Арышъ, лъэкІ зиІэ Тхьэм ыпашъхьэ зыщыжъугъэцІыкІу, ежь ыгъэнэфэгъэ уахътэр къызыскІэ, шъукъыІэтыжьыным пае.

7 ШъуигумэкІ пстэури Тхьэм фэжъугъаз, сыда пІомэ, ащ ынаІэ къышъутырегъэтышъ ары.

8 ЩэІагъэ зижъугъаІ, шъумычъыеуи шъусакъ. Гъуахъорэ аслъаным фэдэу, шъуипыеу шэйтаным зыгорэ зэхицунтхъэным лъыхъузэ къекІухьэ.

9 ШІошъхъуныгъэм игъогу шъукъызэкІэмыкІожьэу шъутетэу, шэйтаным шъупэуцужь, сыда пІомэ, шъушыхэм, дунаим тыдэ щыІэхэми, ащ фэдэ къинхэр зэращэчыхэрэр шъошІэ.

10 ЗэкІэ шIугъэрэ гукIэгъурэ зиІэ Тхьэм ищытхъушхоу мыкІодыжьыщтымкІэ Іахь шъуиІэнэу къышъоджагъ, Христос Исус шъугухэм зэрарылъым пае. Зы тІэкІурэ къин зышъущэчырэ ужым, ежь Тхьэм шъукъызэтыригъэуцожьынышъ, шъугухэр ыгъэпытэнхэшъ, шІошъхъуныгъэм игъогу шъукъызэкІэмыкІожьэу, пытэу шъутыригъэтыщт.

11 МыкІодыжьын лъэкІышхор Тхьэм ий.

 Амин.  

Аужырэ шІуфэс гущыІэхэр

12 Сшы шъыпкъэу слъытэрэ Силуан* иІэпыІэгъукІэ тІэкІу къышъуфэсэтхы. КъызыкIэстхырэр шъушІошъ згъэхъунэуи, къыжъугурызгъэІонэуи, Тхьэм ишIугъэрэ игукIэгъурэ яхьылІагъэу стхыгъэр зэрэшъыпкъэм шыхьат сыфэхъунэуи ары. Гъогу шъыпкъэм шъутемыкІэу, Тхьэм ынэшІущыфэн зыхэшъумыгъэн.

13 Тхьэм шъукъызэрэхихыгъэм фэдэу, Бабилэн* щыІэ чылыс зэІукІэу Тхьэм къыхихыгъэм шІуфэс къышъуехыжьы. Скъо Марки* шІуфэс къышъуехыжьы.

14 ШІулъэгъукІэ ІаплІ зэшъущэкІызэ, шІуфэс зэшъухыжь.

Шъо зэкІэ Христос зыгу илъхэм гупсэф Тхьэм къышъуерэт.

Амин
...