Заор лъэпкъ зэпэIэпчъ
Заор лъэпкъ итэкъухьагъ
Заор хэхэс гъашIэм
Зэгуиутыгъэ уикъош
Заор яхэгъэгучIэхэр къаухъумэзэ
ЗэрэукIыжьыгъэ зэкъош
Заор къэхалъэ хъужьыгъэ
Хэхэс адыгэ къоджэ пчъагъ
Заор уихэку узэрэщымакIэм
Гур пызIонтIыкIырэ ихьылъ
Заор хэку шIулъэгъум
Лъэпкъ шIулъэгъум
Игъонэмысы ышIыгъэ хэку-пэс адыг
Заор тхьамыкIагъу
Заор еммын
Заор тэллау…
Ауми гум къэбгъэкIыжьын фае заор
ИмэшIо лыгъэ джыри зыкъемыгъэстыным фэшI
Гум къэбгъэкIыжьын фае заор
Шъузэбэ пIугъэмэ джыри къахэмыхъоным фэшI
Гум къэбгъэкIыжьын фае заор
Ным ыбыдзыщэ зыIумыфагъэр джадэми
ЗэрэкIочIаджэр уинэрылъэгъушъ
Гум къэбгъэкIыжьын фае заор
Жэм дизэу «тимэз, сикъуадж» умыIошъуным
ИтхьэмыкIагъо зэхэошIэшъ
Зышыбгъэгъупщи, ашыьгъэгъупщи хъущтэп заор
ГэшIэрэ гухьэгужъым
Лъэпкъхэр зэрэ емытхъылIэрэр
КъыбгурегъаIошъ
Агу къэбгъэкIыжьын фае заор
УзгъэмэкIагъэм имысыгъэ щыгъупшэн
ЗыдишIэжьыным фэшI
Агу къэбгъэкIыжьын фае заор
Лъэпсэичъы узышIыгъэм
Лъапсэм укърищэлIэжьын зэрэфаер
ГурегъаIошъ.
Зыщыбгъэгъупши ащыбгъэгъупши хъущтэп заор
ТхьамыкIагъо къэмыхъужьыным фэшI
Емынэм тэллауэм защыпхъумэным фэшI
ТхьамыкIагъом къелыжьыгъэр псэун фае
ЩыIакIэм лъыхъун фае
Ар чIыопсы хабз
Арышъ,
Зэзэуагъэхэм ябынхэр зэшIужьы
Чъыги зэдагъэтIысы
Унэ ныкъостыр зэдеIэхэзэ дашIыежьы
Унэшхом ылъапсэ зэдагъэпытэ
Дунаир езгъэуцолIэгъэ пый мэхъаджэм
Хэгъэгури, дунаири щаухъумэ
ТилIыхъужъхэр ти шысэ
ЛIэшIэгъухэр къызэпызычыгъэ ылэжьыгъ
Тиорэдыжъмэ Tiлъэпкъ
АпIу алэжьы
Бын итэкъухьагъэр хэкужъым
КъетэщэлIэжьы
Ти къошхэм тыкъагъэбаи
УсакIэхэри къытфащэ
Орэдыжъхэри къытфащэжьы
ПкIыхьапIэр нэрылъэгъу тфашIы
Хэкужъым ымакъэ хэхэс адыгэр егъэгушхо
Хэкужъыр инэплъэгъу регъэты
Тиорэдмэ цIыф лъэпкъым алъегъэIэсы
Лъэпкъым къехъулIэгъэ тхьамыкIагъори
Лъэпкъым илIыгъэ зынэсри
Тикультурэ зэрэлъагэри
Тиорэдхэр къыфаджэх
Лъэпкъ зэрэлъытэм
Лъэпкъ зэрэгъашIом
Лъэпкъ зэгурыIожьым
Ахэр ары лъабжъэ афэхъущтыр
Дэхагъэм,
шIугъэм,
Зэдытиунэ хэгъэгу лъэпытэм
ЩымыIэжьым ыпсэ зезыдзэщтри
Зыгъэтынчыщтри
КъызызэплъэкIрэм ылъэгъурэр ары
КъыкIэныгъэр ипхъэхь-итэкъумэ
Дэдзыхыгъэмэ,
Ямыпэсыгъэ зекIуакIэ къахафэмэ
Тынчына фэхыгъэм ыпсэ
Унагъор зэтегъэпсыхьагъэмэ
Быным,
ЛIакъом щытхъу къыфалэжьмэ
МылIэгъэ пIалъэба щымыIэжьыр
Псэугъэми зыфыкIэхъопсыщтыгъэр арыба
Арышъ,
Непэ тызыфэшыгъохэрэмэ тафэшъыпкъэмэ
Апсэхэр дгъэтынчынэу тыфаемэ
Уасэ фэтэжъугъэшI тыбзэ
ЗетэжъугъэIэт тикультурэ…
Хэхэсыр къэтэжъугъэщэжь тыжъугъэбэгъожь
Тызэрэитэкъухьагъэм итхьэмыкIагъо
Лъэпкъ кIуачIэу къэтэжъугъэщтэжь…
Тырыжъугъэгушх тилъэпкъ
ТехъыкIыгъэр техъыкIыгъэу джыри зэрэщыIэм
Тыдэжъугъэлажь дунаир щэтыфэ
Тилъэпкъи зэрэщыIэщтым |