ЦIыфыр
опсэуфэ хъугъэ-шIэгъэ
гъэшIэгъоныбэмэ
арихьылIэн
ылъэкIыщт
ыкIи
ахэм ащыщ горэ анахь щымыгъупшэжьэу
ищыIэныгъэ
щыпхырищэу ыгу къенэжьы.
Джащ
фэдэ лъэныкъу сэ непэ сыкъызытегущыIэ сшIоигъор. Ар зыхъугъэр мары
илъэс 40 мэхъу.
1967-рэ
илъэсым зекIо купым сыхэтэу Чехословакием сыкIогъагъ. Ащ икъэлэ
шъхьаIэу Прагэ тхьамафэм къыкIоцI анахь чIыпIэ гъэшIэгъонэу ыкIи
анахь дахэу иIэхэр къытагъэлъэгъугъ. Лъэшэу сыгу рихьыгъэх ащ
илъэмыджхэр, изамокыжъхэр. Ащ нэуж лъыдгъэкIотагъ тигъогу ыкIи
тынэсыгъ къалэу Брно, зыщытплъыхьагъ, ащ ичIыпIэ дэхаби сыгу
къинэжьыгъ. Чехословакием изэгъэлъэгъун-къэплъыхьан щытыухыгъ
словакхэм якъэлэ шъхьаIэу Братиславэ. Псыхъоу Дунай пэмычыжьэу щыт
хьакIэщышхом тыращэлIагъ ыкIи тызэрэчIэхьагъэм тетэу слъэгъугъэр
згъэшIэгъуагъэ. МэкъэгъэIухэр зыпылъэгъэ дэпкъышхом анахь къахээу
мыщ фэдэ адыгэ гущыIэхэр тетхагъэу пылъэгъагъ: «Уадыгэу мы
хэгъэгум укъихьагъэмэ, сызэмыгъэлъэгъоу уимыкIыжь». Сэ сызыхэтыгъэ
купыр зэкIэ Ригэ щыщыгъ. ШъхьакIо нахь мышIэми, Мыекъуапэ
хэгъэкIи, адыгэ лъэпкъыр ышIэу зы нэбгырэ ахэтыгъэп.
СыкIэрыхьэпагъэу тхыгъэм седжэ зэхъум тикуппащэ къысэупчIыгъ:
«Сыда укъеджэшъуа мы тетхагъэм?»
— Седжэн
адэ сэ сыбзэкIэ тхыгъэмэ, — сIуагъэ.
Гид
бзылъфыгъэу тигъусэм селъэIуи, а чIыпIэ дэдэм телефон номерэу
тетымкIэ фытезгъэуагъ, ау имысэу къычIэкIыгъ.
Непэ
щыIакIэр зытетым фэдагъэмэ ар ащ фэдизэу мыгъэшIэгъоныгъэнкIи
хъуныгъэ, ау сэркIэ ар хьалэмэт дэдагъ а уахътэм.
Пстэумэ
анахь сызкIэгушIужьыщтыгъэр силъэпкъ нэIуасэ рыфэсшIынхэ гухэлъ
сиIэу «Адыгейский орнамент» зыфиIорэ тхылъэу зыдэсхьыгъагъэр
зыми есымытыгъэу зэрэсIыгъыгъэр ары. Мырэу адыгэхэм
къакIэлъэIурэм нэмыкIэу хэта ар нахь зифэшъуашэр зэптынэу? —
зэсIожьыгъэ.
ЯтIонэрэ
мафэм джа тхылъым телъхьэ цIыкIу-шъокIухэр фэтшIи, джа адресэу
тетхагъэр тшти, урыс пшъашъэу къыздисымрэ сэрырэ тыкIуагъ.
Унэшхоу тызэкIолIагъэр игъэпсыкIэ-шIыкIэкIэ европэ унэмэ
атекIыщтыгъ. Ар къыблэ унэмэ нахь афэдагъ. Джащ тызэрэчIэхьагъэм
тетэу джащ фэдэу къабзэу адыгабзэкIэ тетхагъэм гу лъыстагъ:
«СиеджапIэ уадыгэу укъычIэхьагъэмэ, сызэмыгъэлъэгъоу
учIэмыкIыжь». Унэу зэрысым иномер тетхагъ, ащ ежь имысэу
къычIэкIыгъ. Тхьыгъэхэр къэтхьыжьыныгъэха, зэрэстудентыр
къызгурыIуагъэти (ыцIэ сшIэщтыгъэп), псауныгъэ иIэу зычIэс
еджапIэр къыухынэу сыфэлъаIуи, къыдеджэрэ кIалэ горэм ритыжьынэу
телъэIуи, къятти, тыкъэкIожьыгъ.
А
пчыхьэм нэмыкI гухэлъи тиIагъ: «Славянское кладбище» зыфиIоу
тидзэкIолI минипшI фэдиз зыдэлъым къэгъагъэхэр тхьынхэшъ тыкIонэу
щытыгъ. Апэрэ мафэм тыкъызэрэсэу мыщ тащэгъагъ. Гидым
къызэриIуагъэмкIэ, заор аухынкIэ мазэ нахь къэмынагъэу Братиславэ
шъхьафит ашIыжьыным пае, джащ фэдиз нэбгырэ пчъагъэр щыфэхыгъагъ.
Ахэр нэбгырэ мин-минэу Iуашъхьэ шIыгъэхэу щылъыгъэх, ау офицерхэм
саугъэт шъхьафхэр яIагъэх. Джащ къыщыслъэгъугъагъ адыгэ кIалэм
исаугъэти, Н. И. Жанэ тетхагъэу.
Зыдгъэхьазырзэ типчъэ зыгорэ къытеуагъ. Пчъэр зыIусэхым кIэлэ
зэтегъэпсыхьэгъэ дахэ Iут, адыгабзэкIэ къысэупчIы:
— А
насыпышIо хъун, пшъашъ, уадыга?
— Ары.
Къеблагъ. — СыпэгъокIыгъ.
—
НэIуасэ тызызэфэхъу ужым къысэупчIыгъ къуаджэу, лIакъоу
сызыщыщымкIэ. ЕсIуагъ сигуапэу Адэмые сызэрэщыщыр, Чэтаомэ
сызэряпхъур. ЕтIанэ къысэупчIыгъ: «Адэ талъэныкъо щыIэ Чэтаомэ
шъуафэтха?»
— О тыдэ
ущыщ? — сеупчIы.
— Сириер
ары.
А
гущыIэмэ ауж тIэкIу сыкъэщтагъ, сыда пIомэ а лъэныкъом
къикIырэмэ
арэущтэу
шъхьафитэу уадэгущыIэн фитыныгъэр тэ тихэгъэгу щытиIэу щытыгъэп,
ау тыздэщыIэ хэгъэгум ащ зи мыхъун хамылъагъоу къысшIошIыгъ.
Апэдэдэу Фаисэл хэтлъэгъуагъэр адыгэгъэшхо зэрэхэлъымрэ
шъхьэкIэфэныгъэ дахэ зэриIэмрэ ары. Ащ изекIокIэ-шIыкIэхэм
КIэращэм игеройхэр сыгу къагъэкIыщтыгъ. Латыш пшъашъэхэу тиунэ
къихьэхэрэм ащ фэгъэхьыгъэу къысаIощтыгъ: «Алахьэр къышъотагъэба
мощ фэдиз Iэдэб шъуикIалэмэ ахэлъымэ».
Ары.
Уадыгэмэ ащ изекIуакIи, ишIыкIи, лъэпкъым шIулъэгъуныгъэу
фыриIи урымыгушхонэу щытыгъэп.
Сэ
институт къэсыухыгъагъ, ау силъэпкъыжъ къыкIугъэ гъогум мэкIэ дэд
хэсшIыкIыщтыгъэр. УедэIу зэпытыгъэкIи уемызэщэу Фаисэл къэбар
гъэшIэгъон дэдэхэр къыIуатэщтыгъэх, гъыбзаби къысфиIуагъ. Сэ
анахь сшIогъэшIэгъоныгъэр «тихэкужъ», «тичIыгужъ» игущыIэ
пстэумэ зэрахэтыгъэр, къызэрябэкIыщтыгъэр ары.
Мафэ
горэм есэIо: «Фаисэл, егъашIэм умылъэгъугъэ хэкужъымрэ
чIыгужъымрэ сыдэущтэу мыщ фэдиз шIулъэгъу афыуиIэн плъэкIыщта?»
Ащ джэуапэу къыситыжьыгъагъэм бэрэ сегупшысэжьэу къыхэкIы.
— Шъо ащ
шъукъихъухьагъэшъ а зэкIэ гурыIогъуае къышъущыхъущт, ау тэ
шъуфэдэу гъыбзэмрэ быдзыщэмрэ ахэлъэу къышъуатыгъагъэмэ, егъашIэм
шъуфызэплъэкIэу шъуфэлIагъэмэ хэгъэгум, джащ нэмыкI хъопса-
пIэ шъуиIэщтыгъэп».
— Тэ,
непэ адыгабзэр зышIокъинэу, зилъэпкъ гъэзет закъо зышIомыIофхэр,
уасэ фэзымышIыхэрэр, ахэм ачIыпIэ титыгъэмэ сыдэу тыхъущтыгъа? —
упчIэ къэуцу...
Фаисэл
адыгабзэкIэ дэгъоу гущыIэщтыгъэ ыкIи къыIощтыгъ:
— А
синасыпыба, ыпкIэ стызэ зэзгъэшIагъэми, адыгабзэкIэ сызэрэтхэрэр.
Арымырмэ сыдэущтэу мыщ фэдэ мэкъэгъэIу хъарзынэхэр стхыныгъа
ыкIи силъэпкъэгъу сыIукIэныгъа.
Ежь фэдэ
студентхэр гъэпсэфакIо зыкIохэкIэ, ежь Фаисэл зыгорэкIэ хэкужъым
къикIыгъэ горэм сыIукIэнкIи хъун ыIоти, хьакIэщхэр къыкIухьэзэ
джащ фэдэ мэкъэгъэIухэр ариIулIыщтыгъэх. Слъэгъугъэ, зэхэсхыгъэ
пстэумэ анахь сшIогъэшIэгъоныгъэр Фаисэл ипщынэрэ ипхъэкIыч
макъэрэ. Ар дахэу пщынэм еощтыгъ, нахьыбэмкIэ
къыригъаIощтыгъэхэр Тхьабысымэ Умарэ, Шъэожъ Розэ къаIорэ
лирическэ орэд мэкъамэхэр арых.
Фаисэл
Къэбэртэе-Бэлъкъарым итхэкIо цIэрыIоу ШэуджэнцIыкIуми, адыгэ
радиом итхьаматэщтыгъэу Жэнэ Къырымызи къафатхэщтыгъ ыкIи
къысэлъэIугъагъ тызэрэзэIукIагъэр Къырымызэ есIожьынэу. Ари
фэзгъэцэкIэгъагъ. СыкъэкIожьы зэхъум ар къызэрэсэлъэIугъагъэр,
сызIукIэрэмэ зэкIэмэ а лъэныкъом щыIэ тилъэпкъэгъухэр
къызэрэткIэхъопсыхэу, къызэрэтфалIэхэрэр ясIотэнэу, ясIожьынэу
ары. Адыгэ къашъохэр къашIыхэу сурэттехыгъэхэр бэу
къыситыгъагъэх. Ар хэгъэкIи, илъэпкъ идэхагъэ аригъашIэмэ
шIоигъоу, Сирием икультурэ и Мафэхэр Чехием щыкIохэ зэхъум,
Фаисэл чех пшъашъэхэм адыгэ къашъохэр аригъэшIагъэуи сурэтхэр
къысфаригъэхьыгъагъэх. Адыгэ шъуашэ зэригъэгъотыным пае,
Чехословакием тидзэ частэу итмэ зэращылъыхъугъагъэри письмэкIэ
къысфиIотэгъагъ, ау тыдэ къикIыныгъа адыгэ шъуашэр? ЕтIанэ ежьхэм
шъуашэхэр адыгъагъэх.
Фаисэлрэ
сэрырэ бэрэ тызэфэтхагъ, ау типсэупIэ зытэхъожьым тызэшIокIодыгъ.
Ау журналэу «Зэкъошныгъэм» итэу Бэрэтэрэ Хьамидэ Фаисэл
зэрэIукIагъэри, игъыбзэу къыхаутыгъэми сызяджэм,
адыгэ радиом
фэстхи, сэ сцIэкIэ гущыIэ заулэ ащ фарагъэхьыгъагъ.
1991-рэ илъэсым адыгэ лъэпкъым и Дунэе зэфэсэу
Къэбэртэе-Бэлъкъарым икъэлэ шъхьаIэу Налщык щыIагъэм IэкIыбым
щыщ адыгэ лъэпкъым илIыкIохэу хэлэжьагъэхэм Фаисэл ахэтыгъ.
Ахэр Абхъазым ащэхэзэ, Адыгэкъалэ сыхьат горэкIэ
къырагъэблэгъагъэх. Джащыгъум Фаисэл ялъэIуи, зыгорэ
къытлъигъакIуи тызэригъэлъэгъугъагъ. Шъыпкъэ, уахътэр макIэти
бэрэ тызэрэфаеу тыгущыIэнэу хъугъэп. Къезгъэблэгъэгъагъ
хэкужъым, ау янэ сымэджэ хьылъэу къэуцун зэримылъэкIыщтыр
къыIогъагъ. Джаущтэу тызэбгъодэкIыжьыгъагъ... |