Ali İhsan Aksamaz
(Ön açıklama: Maksut Kesici, Türkiyenin çok yönlü bir sanatçısı. Çok sıra dışı da bir hayatı var. Kendisiyle hayatı ve sanatsal çalışmaları üzerine bir söyleşi yaptım./ Goʒ̆otkvala: Andğa, xolo ar sumari komiqonun. Am sumari çkimi ren Maksut Kesici. Maksut Kesici ren opşa k̆ult̆uroni k̆oçi. Emus kuğun gurişmeç̆voni do mara gecgineri skidala. Xolo emuk ikips opşa pelaperi k̆ult̆uruli dulyape. Emu ren art̆ist̆i; mtini giʒ̆vat na, maxeşnoxvene ren. Edo Maksut Kesicis kuğun xeşnoxvenepe k̆arta speros. Maksut Kesici ren gemabire; birapapeşi t̆ekst̆epe ç̆arups, gelaçaps do ibirs. Emuk içalişeps p̆last̆ik̆uri xeşnoxveneşi sperosti; p̆last̆ikuri xeşnoxvenepe kuğun. Magomorgve ren, magolve ren. Fest̆ivalepe, ok̆oxtalepe ʒ̆opxups do amk̆ata dulyapapes mxuci meçaps emuk. Edo muşi k̆ult̆uruli k̆ap̆et̆oba va itkven nenaten otkvaluten. Andğaneri ndğas, Maksut Kesici skidun noğa Blumingt̆onis, Amerik̆as.Eşo miçkin. Edo ma p̆i ar int̆erviu Maksut Kesici k̆ala. Aya va ren p̆olit̆ikuri, mara k̆ult̆uruli int̆erviu. Aya ren int̆erviuşi t̆ekst̆i. Ali İhsan Aksamazi)
+
Ali İhsan Aksamazi: Maksut Begi, so yeçkindit, so dibadit? Sonuri ret do mi oğlepeşi ret? Mundes dibadit? Mu dulya ikipt? Muten skidurt? Çileri reti? Berebe giqonunani? Edo aşo gevoç̆k̆at, tkvani iptineri ndağeşen!
Maksut Kesici: Noğa Rizinişi Dikkaya (Mek̆aleskiriti) coxoni oput̆es dovibadi, (1957) vit̆on çxoro oşi do jure neçi do vit̆o şkvit ʒ̆anas. Ocağis (4) otxo bere vort̆it. Mek̆aleskiritişi geç̆k̆apuroni nʒ̆opulas doviguri maartani sinifi. Edo emk̆ata Amerik̆anuli oç̆k̆omalepetenti virdit. Eşo komşuns. Aya rt̆u maartani sinifis. Emindrosti, Ataturkişi renobaşen ambari maqu. Ataturki rt̆u t̆rakt̆ori k̆ala filimis do t̆rak̆t̆ori geçumert̆u. Aya rt̆u iptineri mk̆ule filmi skidala çkimis, na ma seyri dop̆i. Aya gonoşine va gomaç̆k̆ondinen ma. Gonoşinepe çkimişen arteriti ren mjaşmt̆veri. Amerik̆aşi şvela rt̆u aya mjaşmt̆veri emindros. Didi ç̆uk̆epe kort̆u nʒ̆opulas. Aya mjaşmt̆veris ʒ̆k̆ari uk̆atupt̆es nʒ̆opulaşi didilepek. Aya ʒ̆k̆ari digubaşi, “mja” xazireli rt̆u. Edo didilepek aya mja k̆op̆aten domirtapt̆es. Ma aya gonoşine çkimiti va gomaç̆k̆ondinen.
Maartani sinifi şk̆ule, noğa İzmirişa meptit muhaciri. İzmirişa dibargit. Aya rt̆u (1963) vit̆on çxoro oşi do sume neçi do sum ʒ̆anas. Noğa İzmiris, ar geç̆k̆apuroni nʒ̆opulas meviç̆ari. Nananena çkimi Lazuri rt̆u. Emuşeniti mamgurapaleşi notkvamepe va oxomaʒ̆onet̆u. Ar ndğas, mamgurapalek ar k̆itxala mk̆itxu. Mati, “va mişk̆un”-ya matku arşvacis. Mamgurapalek aya ognaşi, p̆at̆i aʒ̆onu emus; eşo domaʒ̆onen. Uk̆ule emuk dişumu do mibecğu. Ar ç̆it̆a mektubi ç̆aru do eya momçu. “Aya mektubi baba skanis komeçi”-ya miʒ̆u. Mati oxorişa meptaşi, mektubi, baba çkimis mepçi. Baba çkimik aya ik̆itxu vardoni, mibecğu. İpti mamgurapalek mibecğu nʒ̆opulas do uk̆uleti baba çkimik mibecğu oxoris. Mara ma va oxomaʒ̆onu çkimi k̆abaeti; mutuşen ambari va miğun. Mtini giʒ̆vat; ma Turkuli va miçkit̆u do mamgurapeleşi k̆itxalas Lazuro, nena gevuktireret̆i do mutu var: “Va mişk̆un (Bilmiyorum)”. Ma Turkuli va miçkit̆u do aya rt̆eren çkimi k̆abaeti! Mamgurapale do baba çkimik muşeni mibecğes, ma aya va oxomaʒ̆onu. Magurapale do baba çkimik mu oxoʒ̆ones, mati eyati va oxomaʒ̆oneret̆u. Muşeni amk̆ata domişumes, va oxomaʒ̆oneret̆u. Emindro şk̆ule oguru va mint̆u nʒ̆opulas. Emuşeni ki, Turkuli va miçkit̆u do va oxovoʒ̆onapt̆i milletişi Turkuli noğarğalepe do mutu var. Mitik va memişvelu oxoristi. Emk̆ata xali va uğut̆es. “Oki nʒ̆opulas oguruşa toli va giğun, emindrosti oçalişuşi re,”- ya tkumert̆u ocağik. Aşoten gamantanaşi dulya domaçadu. Açkva mamgure va vort̆i ma. Ç̆iç̆it̆a bere vort̆i mara, oçalişus kogevoç̆k̆i. Eşo-aşo k̆arta speros çiraği viçalişi. Çirağoba p̆i. Uk̆ule ma Efis Pilsenişi fabrik̆aşi ok̆idus çirağoba vikipt̆i. Aya rt̆u (1967) vit̆on çxoro oşi do sume neçi do şkvit ʒ̆anas ʒ̆anas. Ma (10) vit ʒ̆anas viçalişi ek.
Ali İhsan Aksamazi: Ma miçkin, tkvan ret azimoni. Azimi kogiğunan skidalas. Aya azimiten muepe qvit? Hele entepeti miʒ̆vit!
Uk̆ule iptineri at̆elye çkimi gomʒ̆k̆i (1977) vit̆on çxoro oşi do sume neçi do vit̆o şkvit ʒ̆anas. (2004) jur vit̆oş do otxo ʒ̆anaşa, met̆alişi dizaynişi dulyape dop̆i. Ma mint̆u manganaşi eliyeti maqvas, mara dip̆loma va miğut̆u xes. Ti-mçxupek imtianiten msinces. Aşoten geç̆k̆apuroni nʒ̆opulaşi dip̆loma maqu.
Ma rk̆inaşi sazi dop̆eret̆i çirağoba çkimis. Emuten oxomaʒ̆oneret̆u ki, guri do toli komiğut̆u musik̆işa.
Mara va gelamaçamu aya sazi; sersi va meçapt̆u. Aya dulyaten oxovoʒ̆onu ki, xemaxvencoba komiğut̆u ma abst̆rakt̆uli xeşnoxveneşa. Ora mek̆ilaşi, ʒ̆oxlenişen opşa vinç̆eli heikelişi xeşnoxvene. İpti uk̆eroʒxu heikelişi dizainepe dop̆i do uk̆ule eya heikelepe xepe çkimiten dop̆i. Çkimi noxvene aya heikelepeten, namtini devleturi vana doxmeli musessesepek uk̆oreʒxu oçukare momçes.
Majura k̆ele musik̆aşi sperosti şurdoguriten viçalişept̆i do vigurapt̆i do gecgineri viqvi; eşo visimadep. Jur Lazuri birapa dop̆i ma: “Berepe” do “Karmat̆e”. Entepeşi t̆ekst̆i do musik̆i ren çkimi noxvene. Edo xolo sum fara int̆ernasyonaluri k̆ult̆uri do neşnoveneşi fest̆ivalepe p̆ʒ̆opxi ma. Ar oput̆es p̆it aya fest̆ivalepe. Çodina fest̆ivali rt̆u (2015) jur vit̆oş do vit̆o xut ʒ̆anas t̆u. Eşo ptkvat na, aşo ptkvat na (2.000) jur vit̆oşi k̆oçi komomixtes fest̆ivalişa; eşo matkven. Fest̆ivalis; sureti, fot̆oğrafi, xeş noxvenepeşi merçapape p̆ʒ̆opxit; tiyat̆ro dop̆it, çkvadoçkva k̆onʒert̆epe iʒ̆opxinu. Aya fest̆ivalepeten mu oxvenu mint̆es, giçkinani?! Oput̆eş milleti, aya temapes gonç̆k̆iru rt̆u çkini noğire. Entepes skidalaşi çkvadoçkva nostenepe ognapu rt̆u.
Mtini giʒ̆vat, ma oguru mint̆u. Mara skidalaşi p̆ati xalepek ma aşo gzalepe memiç̆aru do mutu var.
Geç̆k̆apuroni nʒ̆opulaşi dip̆loma komiğut̆u mara, ar ketabi kobžiraşi, xoloti eya vik̆itxupt̆i. Eşo otkvalu minon ki,mtini giʒ̆vat; ma oguruşa meraği komiğut̆u. Aya oxomaʒ̆onu do imtianiten oşke nʒ̆opulaşi do liseşi dip̆lomape maqu, msinces ti-mçxupek do eşo.
Aya dip̆lomape va domibağes. Universit̆et̆işi imtianişa amapti do gecgineri gamapti. Sosyolojişi burmes mamgure viqvi. Xoloti mamgure vore universit̆et̆is.
Çili çkimi ren magamantane, emuşeniti aʒ̆iti ogurus vore ma. Çili çkimişi dulyaşen, ar p̆rojeşi noçalişeten Amerik̆aşa komoptit jur ʒ̆anas.
Amerik̆asti hemi musik̆i hemiti heikeliş merçapaten viboder. Ar endoli komiğut̆u. İnglisuri nena va miçkit̆u. Aʒ̆i eyati vigurap tamo-tamo. Aʒ̆ineri İnglisuri k̆ursik mendamiqonu geç̆k̆apuroni nʒ̆opulaşi gonoşinepeşa. Nananenaten, Lazuri nenaten gamantana va maqu. Edo aya iqu negat̆ifuri fakt̆ori mteli skidala çkimis. Lazuri nenaten gamantana maqvat̆u k̆onna, Turkuli nenati mskvaşa magurat̆u k̆onna, amk̆ata meç̆ireli skidala va maqvasunt̆u. Aʒ̆i Amerik̆ulepe k̆ala bğarğalaşi, p̆at̆i maʒ̆onen, k̆ai va maʒ̆onen. Lai çkimi tvini ren entepeşişen ç̆it̆a, eşo domaʒ̆onen. Aya xvala çkimi gagnapa va ren. Ar k̆oçis majurapeşi nena va uçkin na, hemi uquce, hemiti uneneli ren; mati eşo.
Ali İhsan Aksamaz: Maksut Begi; Ma şukuri giʒ̆umert. Aʒ̆i tkvanti ginonan na, voçadinat aya int̆erviu. Domibağunan. Tkvan k̆itxalepes mskvaşa nena gemiktirit. Mara tkvan otkvaluşi mutu giğunan na, miʒ̆vit. Allahik bere-bari k̆ala tkvan goxelan!
Maksut Kesici: Mati dido şukuri giʒ̆umert aya int̆erviu şeni.
Maksut Kesici’nin bazı çalışmaları:
https://www.youtube.com/channel/UCJ11ix2J_UCBCbJ7R9uanVg/videos
https://www.youtube.com/watch?v=08GvV2ldUOE
https://www.youtube.com/watch?v=p6apwgyfhOE
http://www.anamursedir.com/yazar.asp?yaziID=856
+
“ლაზური ნენათენ გამანთანა მაყვატუ კონნა, თურქული ნენათი მსქვაშა მაგურატუ კონნა, ამკათა მეჭირელი სქიდალა ვა მაყვასუნტუ.”
(გოწოთქვალა: ანდღა, ხოლო არ სუმარი ქომიყონუნ. ამ სუმარი ჩქიმი რენ მაქსუთ ქესიჯი. მაქსუთ ქესიჯი რენ ოფშა კულტურონი კოჩი. ემუს ქუღუნ გურიშმეჭვონი დო მარა გეჯგინერი სქიდალა. ხოლო ემუქ იქიფს ოფშა ფელაფერი კულტურული დულჲაფე. ემუ რენ არტისტი; მთინი გიწვათ ნა, მახეშნოხვენე რენ. ედო მაქსუთ ქესიჯის ქუღუნ ხეშნოხვენეფე კართა სფეროს. მაქსუთ ქესიჯი რენ გემაბირე; ბირაფაფეში ტექსტეფე ჭარუფს, გელაჩაფს დო იბირს. ემუქ იჩალიშეფს პლასტიკური ხეშნოხვენეში სფეროსთი; პლასტიქური ხეშნოხვენეფე ქუღუნ. მაგომორგვე რენ, მაგოლვე რენ. Фათმა ბაშურალიესტივალეფე, ოკოხთალეფე წოფხუფს დო ამკათა დულჲაფაფეს მხუჯი მეჩაფს ემუქ. ედო მუში კულტურული კაპეტობა ვა ითქვენ ნენათენ ოთქვალუთენ. ანდღანერი ნდღას, მაქსუთ ქესიჯი სქიდუნ ნოღა ბლუმინგტონის, ამერიკას.ეშო მიჩქინ. ედო მა პი არ ინტერვიუ მაქსუთ ქესიჯი კალა. აჲა ვა რენ პოლიტიქური, მარა კულტურული ინტერვიუ. აჲა რენ ინტერვიუში ტექსტი. ალი იჰსან აქსამაზი)
+
ალი იჰსან აქსამაზი: მაქსუთ ბეგი, სო ჲეჩქინდით, სო დიბადით? სონური რეთ დო მი ოღლეფეში რეთ? მუნდეს დიბადით? მუ დულჲა იქიფთ? მუთენ სქიდურთ? ჩილერი რეთი? ბერებე გიყონუნანი? ედო აშო გევოჭკათ, თქვანი იფთინერი ნდაღეშენ!
მაქსუთ ქესიჯი: ნოღა რიზინიში დიქქაჲა (მეკალესქირითი) ჯოხონი ოფუტეს დოვიბადი, (1957) ვიტონ ჩხორო ოში დო ჟურე ნეჩი დო ვიტო შქვით წანას. ოჯაღის (4) ოთხო ბერე ვორტით. მეკალესქირითიში გეჭკაფურონი ნწოფულას დოვიგური მაართანი სინიфი. ედო ემკათა ამერიკანული ოჭკომალეფეთენთი ვირდით. ეშო ქომშუნს. აჲა რტუ მაართანი სინიфის. ემინდროსთი, ათათურქიში რენობაშენ ამბარი მაყუ. ათათურქი რტუ ტრაქტორი კალა фილიმის დო ტრაკტორი გეჩუმერტუ. აჲა რტუ იფთინერი მკულე фილმი სქიდალა ჩქიმის, ნა მა სეჲრი დოპი. აჲა გონოშინე ვა გომაჭკონდინენ მა. გონოშინეფე ჩქიმიშენ ართერითი რენ მჟაშმტვერი. ამერიკაში შველა რტუ აჲა მჟაშმტვერი ემინდროს. დიდი ჭუკეფე ქორტუ ნწოფულას. აჲა მჟაშმტვერის წკარი უკათუფტეს ნწოფულაში დიდილეფექ. აჲა წკარი დიგუბაში, “მჟა” ხაზირელი რტუ. ედო დიდილეფექ აჲა მჟა კოპათენ დომირთაფტეს. მა აჲა გონოშინე ჩქიმითი ვა გომაჭკონდინენ
მაართანი სინიфი შკულე, ნოღა იზმირიშა მეფთით მუჰაჯირი. იზმირიშა დიბარგით. აჲა რტუ (1963) ვიტონ ჩხორო ოში დო სუმე ნეჩი დო სუმ წანას. ნოღა იზმირის, არ გეჭკაფურონი ნწოფულას მევიჭარი. ნანანენა ჩქიმი ლაზური რტუ. ემუშენითი მამგურაფალეში ნოთქვამეფე ვა ოხომაწონეტუ. არ ნდღას, მამგურაფალექ არ კითხალა მკითხუ. მათი, “ვა მიშკუნ”-ჲა მათქუ არშვაჯის. მამგურაფალექ აჲა ოგნაში, პატი აწონუ ემუს; ეშო დომაწონენ. უკულე ემუქ დიშუმუ დო მიბეჯღუ. არ ჭიტა მექთუბი ჭარუ დო ეჲა მომჩუ. “აჲა მექთუბი ბაბა სქანის ქომეჩი”-ჲა მიწუ. მათი ოხორიშა მეფთაში, მექთუბი, ბაბა ჩქიმის მეფჩი. ბაბა ჩქიმიქ აჲა იკითხუ ვარდონი, მიბეჯღუ. იფთი მამგურაფალექ მიბეჯღუ ნწოფულას დო უკულეთი ბაბა ჩქიმიქ მიბეჯღუ ოხორის. მარა მა ვა ოხომაწონუ ჩქიმი კაბაეთი; მუთუშენ ამბარი ვა მიღუნ. მთინი გიწვათ; მა თურქული ვა მიჩქიტუ დო მამგურაფელეში კითხალას ლაზურო, ნენა გევუქთირერეტი დო მუთუ ვარ: “ვა მიშკუნ (ბილმიჲორუმ)”. მა თურქული ვა მიჩქიტუ დო აჲა რტერენ ჩქიმი კაბაეთი! მამგურაფალე დო ბაბა ჩქიმიქ მუშენი მიბეჯღეს, მა აჲა ვა ოხომაწონუ. მაგურაფალე დო ბაბა ჩქიმიქ მუ ოხოწონეს, მათი ეჲათი ვა ოხომაწონერეტუ. მუშენი ამკათა დომიშუმეს, ვა ოხომაწონერეტუ. ემინდრო შკულე ოგურუ ვა მინტუ ნწოფულას. ემუშენი ქი, თურქული ვა მიჩქიტუ დო ვა ოხოვოწონაფტი მილლეთიში თურქული ნოღარღალეფე დო მუთუ ვარ. მითიქ ვა მემიშველუ ოხორისთი. ემკათა ხალი ვა უღუტეს. “ოქი ნწოფულას ოგურუშა თოლი ვა გიღუნ, ემინდროსთი ოჩალიშუში რე,”- ჲა თქუმერტუ ოჯაღიქ. აშოთენ გამანთანაში დულჲა დომაჩადუ. აჩქვა მამგურე ვა ვორტი მა. ჭიჭიტა ბერე ვორტი მარა, ოჩალიშუს ქოგევოჭკი. ეშო-აშო კართა სფეროს ჩირაღი ვიჩალიში. ჩირაღობა პი. უკულე მა ეфის ფილსენიში фაბრიკაში ოკიდუს ჩირაღობა ვიქიფტი. აჲა რტუ (1967) ვიტონ ჩხორო ოში დო სუმე ნეჩი დო შქვით წანას წანას. მა (10) ვით წანას ვიჩალიში ექ.
ალი იჰსან აქსამაზი: მა მიჩქინ, თქვან რეთ აზიმონი. აზიმი ქოგიღუნან სქიდალას. აჲა აზიმითენ მუეფე ყვით? ჰელე ენთეფეთი მიწვით!უკულე იფთინერი ატელჲე ჩქიმი გომწკი (1977) ვიტონ ჩხორო ოში დო სუმე ნეჩი დო ვიტო შქვით წანას. (2004) ჟურ ვიტოშ დო ოთხო წანაშა, მეტალიში დიზაჲნიში დულჲაფე დოპი. მა მინტუ მანგანაში ელიჲეთი მაყვას, მარა დიპლომა ვა მიღუტუ ხეს. თი-მჩხუფექ იმთიანითენ მსინჯეს. აშოთენ გეჭკაფურონი ნწოფულაში დიპლომა მაყუ.
მა რკინაში საზი დოპერეტი ჩირაღობა ჩქიმის. ემუთენ ოხომაწონერეტუ ქი, გური დო თოლი ქომიღუტუ მუსიკიშა.
მარა ვა გელამაჩამუ აჲა საზი; სერსი ვა მეჩაფტუ. აჲა დულჲათენ ოხოვოწონუ ქი, ხემახვენჯობა ქომიღუტუ მა აბსტრაქტული ხეშნოხვენეშა. ორა მეკილაში, წოხლენიშენ ოფშა ვინჭელი ჰეიქელიში ხეშნოხვენე. იფთი უკეროცხუ ჰეიქელიში დიზაინეფე დოპი დო უკულე ეჲა ჰეიქელეფე ხეფე ჩქიმითენ დოპი. ჩქიმი ნოხვენე აჲა ჰეიქელეფეთენ, ნამთინი დევლეთური ვანა დოხმელი მუსესსესეფექ უკორეცხუ ოჩუქარე მომჩეს.
მაჟურა კელე მუსიკაში სფეროსთი შურდოგურითენ ვიჩალიშეფტი დო ვიგურაფტი დო გეჯგინერი ვიყვი; ეშო ვისიმადეფ. ჟურ ლაზური ბირაფა დოპი მა: “ბერეფე” დო “ქარმატე”. ენთეფეში ტექსტი დო მუსიკი რენ ჩქიმი ნოხვენე. ედო ხოლო სუმ фარა ინტერნასჲონალური კულტური დო ნეშნოვენეში фესტივალეფე პწოფხი მა. არ ოფუტეს პით აჲა фესტივალეფე. ჩოდინა фესტივალი რტუ (2015) ჟურ ვიტოშ დო ვიტო ხუთ წანას ტუ. ეშო ფთქვათ ნა, აშო ფთქვათ ნა (2.000) ჟურ ვიტოში კოჩი ქომომიხთეს фესტივალიშა; ეშო მათქვენ. Фესტივალის; სურეთი, фოტოღრაфი, ხეშ ნოხვენეფეში მერჩაფაფე პწოფხით; თიჲატრო დოპით, ჩქვადოჩქვა კონცერტეფე იწოფხინუ. აჲა фესტივალეფეთენ მუ ოხვენუ მინტეს, გიჩქინანი?! ოფუტეშ მილლეთი, აჲა თემაფეს გონჭკირუ რტუ ჩქინი ნოღირე. ენთეფეს სქიდალაში ჩქვადოჩქვა ნოსთენეფე ოგნაფუ რტუ.
მთინი გიწვათ, მა ოგურუ მინტუ. მარა სქიდალაში პათი ხალეფექ მა აშო გზალეფე მემიჭარუ დო მუთუ ვარ.
გეჭკაფურონი ნწოფულაში დიპლომა ქომიღუტუ მარა, არ ქეთაბი ქობძირაში, ხოლოთი ეჲა ვიკითხუფტი. ეშო ოთქვალუ მინონ ქი,მთინი გიწვათ; მა ოგურუშა მერაღი ქომიღუტუ. აჲა ოხომაწონუ დო იმთიანითენ ოშქე ნწოფულაში დო ლისეში დიპლომაფე მაყუ, მსინჯეს თი-მჩხუფექ დო ეშო.
აჲა დიპლომაფე ვა დომიბაღეს. უნივერსიტეტიში იმთიანიშა ამაფთი დო გეჯგინერი გამაფთი. სოსჲოლოჟიში ბურმეს მამგურე ვიყვი. ხოლოთი მამგურე ვორე უნივერსიტეტის.
ჩილი ჩქიმი რენ მაგამანთანე, ემუშენითი აწითი ოგურუს ვორე მა. ჩილი ჩქიმიში დულჲაშენ, არ პროჟეში ნოჩალიშეთენ ამერიკაშა ქომოფთით ჟურ წანას.
ამერიკასთი ჰემი მუსიკი ჰემითი ჰეიქელიშ მერჩაფათენ ვიბოდერ.
არ ენდოლი ქომიღუტუ. ინგლისური ნენა ვა მიჩქიტუ. აწი ეჲათი ვიგურაფ თამო-თამო. აწინერი ინგლისური კურსიქ მენდამიყონუ გეჭკაფურონი ნწოფულაში გონოშინეფეშა. ნანანენათენ, ლაზური ნენათენ გამანთანა ვა მაყუ. ედო აჲა იყუ ნეგატიфური фაქტორი მთელი სქიდალა ჩქიმის. ლაზური ნენათენ გამანთანა მაყვატუ კონნა, თურქული ნენათი მსქვაშა მაგურატუ კონნა, ამკათა მეჭირელი სქიდალა ვა მაყვასუნტუ. აწი ამერიკულეფე კალა ბღარღალაში, პატი მაწონენ, კაი ვა მაწონენ. ლაი ჩქიმი თვინი რენ ენთეფეშიშენ ჭიტა, ეშო დომაწონენ. აჲა ხვალა ჩქიმი გაგნაფა ვა რენ. არ კოჩის მაჟურაფეში ნენა ვა უჩქინ ნა, ჰემი უყუჯე, ჰემითი უნენელი რენ; მათი ეშო.
ალი იჰსან აქსამაზ: მაქსუთ ბეგი; მა შუქური გიწუმერთ. აწი თქვანთი გინონან ნა, ვოჩადინათ აჲა ინტერვიუ. დომიბაღუნან. თქვან კითხალეფეს მსქვაშა ნენა გემიქთირით. მარა თქვან ოთქვალუში მუთუ გიღუნან ნა, მიწვით. ალლაჰიქ ბერე-ბარი კალა თქვან გოხელან!
მაქსუთ ქესიჯი: მათი დიდო შუქური გიწუმერთ აჲა ინტერვიუ შენი.