1 Сэ сы Паул. Силуанрэ* Тимофейрэ* сигъусэхэу, шъо, Тхьэу Ты лъапІэмрэ Зиусхьан Исус Христосрэ зыгу илъхэу, Фессалоникэ къалэм* щыІэ чылыс зэІукІэм щыщхэм, мы тхылъыр къышъуфэсэтхы.

Тхьэу Ты лъапІэмрэ Зиусхьан Исус Христосрэ анэшІу къышъущарэфи, гупсэф къышъуарэт.  

ШІошъхъуныгъэ зиІэхэу Фессалоникэ дэсхэм апае  Паул Тхьэм щытхъу зэрэфишІырэр  

2 Шъо пстэуми апае Тхьэм щытхъу фэтэшІ зэпыт, Тхьэм тызелъэІукІи, шъуигугъу тэшІы.

3 ШъуишІошъхъуныгъэ шІушІагъэхэр зэрэшъуигъэшІагъэм ти Тхьэу Ты лъапІэм ыпашъхьэ игугъу щытэшІ зэпыт. ШъуишІулъэгъу инэу шъузэригъэлэжьагъэм, ти Зиусхьан Исус Христос шъущыгугъэу шъузэрэпаплъэрэм пае, теубытагъэ шъуиІэ зэрэхъугъэми ягугъу Тхьэм ыпашъхьэ щытэшІ зэпыт.

4 Шъо, тшыхэу Тхьэм шІу ылъэгъухэрэр, Тхьэм ибын шъухъунэу шъукъызэрэхихыгъэр тэшІэ,

5 сыда пІомэ, къэбарышІур къызэрышъодгъэІугъэр гущыІэхэм язакъоп, кІуачІэкІи Тхьэм ы Псэ ЛъапІэ илъэкІыкІи къэбарышІур къышъодгъэІугъ нахь. Икъугъэуи къэбарышІур шъушІошъ дгъэхъугъэ. Тызышъухэтым, тишІуагъэ шъодгъэкІэу тызэрэзекІощтыгъэр шъошІэ.

6 Тэ тилъэужхэми Зиусхьаным илъэужхэми шъо шъуарыкІощтыгъ. Сыда пІомэ, гузэжъогъушхо шъухэтыгъэ пэтми, Тхьэм ы Псэ ЛъапІэ гушІуагъоу шъугухэм къарилъхьагъэмкІэ Тхьэм игущыІэхэр шъудагъэх.

7 Аущтэу Македоние хэкумрэ Ахаие хэкумрэ арысхэу шІошъхъуныгъэ зиІэ цІыф пстэуми шапхъэ шъуафэхъугъ.

8 Сыда пІомэ, Зиусхьаным ехьылІэгъэ къэбарышІур шъуадэжь къикІэу зынэсыгъэхэр Македоние хэкумрэ Ахаие хэкумрэ язакъоп, ау ТхьэмкІэ шІошъхъуныгъэ шъуиІэ зэрэхъугъэм икъэбар тыдэкІи цІыфхэм щашІэ хъугъэ. Арышъ, а Іофым ехьылІагъэу цІыфхэм ащ нахьыбэ ятІон ищыкІагъэп,

9 сыда пІомэ, дахэу тызэрежъугъэблэгъагъэри, щыІэныгъэ зиІэ Тхьэ шъыпкъэм шъуфэлэжьэным пае, тхьэ нэпцІхэм шъуакІыб зэрафэжъугъэзагъэри ахэмэ къаІотэжьы.

10 Тхьэм ы Къоу лІагъэхэм къахигъэтэджыкІыжьыгъэр уашъом къызэрехыжьыщтым шъупэплъэ – Исусэу Тхьэм игубжэу къэкІощтым тыкъыІэкІэзыхыжьыщтыр ары.
...