Паул зинэ зышІэгъэ лІыр зэригъэмысагъэр

1 Зинэ шІэн зэрэшъухэлъыр цІыфхэм къаІуатэ: зыгорэм ятэ ишъуз егъэшъузы. Ащ фэдэ зинэ шІэн хабзэ хымэ лъэпкъхэми ахэлъэп.

2 Ау етIани, шъузышІошІыжьы! Аущтэу шъузышІошІыжьыным ычІыпІэкІэ шъугу къеоу, ар зышІэгъэ лІыр зыхэжъугъэкІын фэягъ.

3 Сэ сшъхьэрэ спкъиплIырэкІэ шъуадэжь сыщымыІэми, сыгурэ спсэрэкІэ шъуадэжь сыщыІ, шъуадэжьи шъыпкъэу сыщыІэм фэдэу, ар зышІагъэр згъэмысэгъахэ.

4 Арышъ, ти Зиусхьан Исус ыцІэкІэ шъузэІукІэу, сэри сыгурэ спсэрэкІэ шъуадэжь сыщыІэ зыхъукІэ, ти Зиусхьан Исус Христос илъэкІыкІэ

5 а лІыр шэйтаным фэжъугъаз, ыпкъ кІодэу, Зиусхьаныр къызыкІожьыщт мафэм ыпсэ мыкІодэу къэнэжьыным пае.

6 Шъузэрэзыщытхъужьырэр дэгъоп. Тэджэпс тІэкІум тхьацур зэкІэ зэригъэшІоІурэр шъошІэба?

7 Арышъ, псэкІодым итэджэпсыжъ* зыхэшъух, тхьацукІэ къабзэм фэдэу шъухъуным пае – шъо тхьацу мышІоІу къабзэу шъущыт. Сыда пІомэ, Христос къурмэныпхъэ къытфэхъугъ. Ар шъынэу IутIыжъ мэфэкІ мэфэшхохэм* адэжь Тхьэм къурмэныпхъэ фашІыщтыгъэм фэд.

8 Арышъ, мэфэкІ мэфэшхор тэжъугъэгъэлъапІэ, ау бзэджагъэмрэ дэигъэмрэ ятэджэпсыжъ орэмыхъу, ау гукъэбзагъэмрэ шъыпкъагъэмрэ яхьалыгъу мыкIу-мыпшэ къабзэкІэ мэфэкІ мэфэшхор тэжъугъэгъэлъапІэ.

9 Зинэ зышІэхэрэм гъусэ шъуафэмыхъунэу къышъуфэстхыгъ.

10 Сэ къизгъэкIыгъэр мы дунаим ицІыфхэм ащыщхэу зинэ зышІэхэрэри, нэйпсыехэри, хъункІакІохэри, тхьэ нэпцІхэр зыгъэлъапІэхэрэри арэп. Ащ Iофыр тетыгъэмэ, дунаим шъутекІыжьын фаеу хъущтыгъ.

11 Ау къышъуфэстхыгъэр мыры: зыгорэ шъушыкІэ зэджэжьми, ау зинэ ышІэмэ, е нэйпсыемэ, е тхьэ нэпцІхэр егъэлъапІэхэмэ, е нэмыкІ цІыфхэм IаекIэ атегущыІэмэ, е ешъуакІомэ, е хъункІакІомэ, ащ фэдэ цІыфым гъусэ шъуфэмыхъу. Ары пакIошъ, ащ фэдэ цІыфым шъудэмышх.

12 Чылыс зэІукІэм щымыщхэм сэ хьыкум атесшІыхьанэу сиІоф хэлъа? Чылыс зэІукІэм щыщхэр арыба хьыкум зытешъушІыхьан фаер?

13 Чылыс зэІукІэм щымыщхэм Тхьэм хьыкум атыришІыхьащт. «Арышъ, цІыф бзаджэр зыхэжъугъэкІ»*.
...