1 Тхьэм ынэшІу хьаулыеу къышъущифагъэу къычІэмыкІыным шъуфэсакъынэу Тхьэм тызэрэдэлажьэрэм пае тышъолъэІу.

2 Сыда пІомэ, Тхьэм къызэриІорэр игущыІэ тхыгъэхэм арыт*: «Игъоу зыслъытэгъэ мафэм сыкъыодэІугъ, цІыфхэр мыкІодхэу, къызызгъэнэжьырэ мафэми ІэпыІэгъу сыкъыпфэхъугъ». ШъукъэдаІу, Тхьэм игъоу ылъытэрэ уахътэр джыдэдэр ары, цІыфхэр мыкІодхэу Тхьэм къызигъэнэжьырэ мафэри джыдэдэр ары.

3 ЦІыфхэм Іофэу тшІэрэр ашІомытэрэзыным пае, зыкІи цІыф горэм игъогу зыгъэлъэпаорэ мыжъо тетлъхьанэу тыфаеп.

4 Ащ пае, Тхьэм тызэрэфэлажьэрэр лъэныкъо пстэумкІи тэгъэлъагъо: теубытэгъэшхо зэрэтиІэмкІи, гузэжъогъу тыхэтми, къин тлъэгъуми, гухэкІ тиІэми,

5 къытаохэми, хьапсым тычІадзагъэу тычІэсми, бырсырышхо тыхафэми, тыулэуми, тичъые щыкІагъэ фэхъуми, мэлакІэ тылІэми;

6 гукъэбзагъэкІи, шІэныгъэкІи, щэІагъэкІи, шІугъэкІи; Тхьэм ы Псэ ЛъапІэ тыгухэм зэрарылъымкІи, пцІы зыхэмылъ шIулъэгъукIи Тхьэм тызэрэфэлажьэрэр  тэгъэлъагъо;

7 шъыпкъэр зэрэтІорэмкІи, Тхьэм илъэкІышхокІи, Іэ джабгъуми Іэ сэмэгуми арылъэу шъыпкъэм иІашэхэмкІи;

8 цІыфхэм лъытэныгъэ къытфашІыми,            къытфамышІыми, ІаекІэ    къыттегущыІэхэми, къытщытхъухэми,   Тхьэм   тызэрэфэлажьэрэр тэгъэлъагъо;   цІыфхэр тэгъэгъуащэхэу алъытэ, ау шъыпкъагъэ зиІэ тыцІыф;

9 тамышІэ фэдэу цІыфхэр къытэплъых, ау цІыф пстэуми ташІэ; тылІагъэ фэдэу къытэплъых, ау мары тыщыІ; къин къыттыралъхьэ, ау таукІырэп;

10 тыгу хагъэкІы, ау тэгушІо зэпыт; тэ тытхьамыкІ, ау цІыфыбэхэр бай тэшІых; зи тимыІэу къэлъагъо, ау зэкІэри тиІ.

11 Шъо, Коринф цІыфхэр, нафэу тыкъыжъудэгущыІагъ, тыгухэри къышъуфызэІутхыгъ.

12 Тыгухэр къышъуфэдгъэпытагъэп, ау шъо шъугухэр къытфэжъугъэпытагъ.

13 Ащ ипэгъокІ фэдэу, шъори шъугухэр къытфызэІушъухых. Сабыйхэм сызэрадэгущыІэрэм фэдэу сыкъыжъудэгущыІэ.  

ЩыІэныгъэ зиІэ Тхьэм ипсэупIэр тэры  

14 ШІошъхъуныгъэ зимыІэхэм гъусэ шъуафэхъунэу зыбжь шъуадыкІэмыуцу. Шъыпкъагъэмрэ бзэджагъэмрэ сыдэущтэу гъусэ зэфэхъущтха? Нэфынэмрэ шІункІымрэ сыд фэдэ гъусагъа зыфыряІэр?

15 Христосрэ Белиаррэ* сыд фэдэ зэзэгъыныгъэ азыфагу дэлъына? ШІошъхъуныгъэ зиІэмрэ зимыІэмрэ сыдэущтэу яІахь зэхэлъына?

16 Тхьэм иунэшхорэ тхьэ нэпцІхэмрэ сыд фэдэ зэзэгъыныгъэ азыфагу дэлъына? Сыда пІомэ, щыІэныгъэ зиІэ Тхьэм иунэшхо лъапIэ тэры, Тхьэм къызэриІуагъэм фэдэу*:

«Сэ ахэмэ сахэсыщт ыкІи сахэтыщт. Сэ ахэмэ сыря Тхьэщт, ахэри сэ слъэпкъыщтых.

17 'Арышъ', къеІо Зиусхьаным*, 'ахэмэ шъуакъыхэкІи, зы лъэныкъо шъухъу. Мыкъабзэм шъунэмыси, ащыгъум сэ шъусштэщт.

18 Сэ Ты сыкъышъуфэхъущт, шъори къорэ пхъурэ шъукъысфэхъущт', –  зэкIэ зыфызэшIокIырэ Зиусхьаным къеІо».
...