ALİNİN RÜYASI LAZCA HEİDİ

Ali İhsan Aksamaz 

Alişi İzmoce

(Yohanna Sp̆irişi Haidişi Skidalaşen Ambarepe)

Goʒ̆otkvala

Lazuri nena ren dunyaşi irişen mcveşi nenapeşi arteri. Antik̆uri K̆olxuri nenaşen genomskide ren Lazuri Nena. Lazuri-Margaluri, Svanuri/ Şonuri do Kortuli nenape renan mzaxali artimajuranişa.  Antik̆uri K̆olxuri nenaşen genomskide majura nena ren Margaluri nena. Lingvist̆epek amk̆ata ambarepe momçapan.

Lazuri nena ren Turkiye do Gurcistanişi nananenapeşen arteri. Lazuri nena ğurun ndğaşen ndğaşa. Didos va uçkin aya nena do emuşeni. Aya ketabi ipti Lazuro dop̆ç̆ari ma. Ok̆açxeti çkimi majura nenapeten pxaziri aya noçalişe çkimi: Turkulo, İt̆alyanuro do İnglisuro. Lazuri t̆ekst̆i jur alboniten pxaziri. Arteri ren Latinuri alboniten Lazuri. Majura ren Kortuli alboniten Lazuri.

Aya ketabi Haidişi malamture berepe şeni pxaziri. Ma mepşven ki, berepek Haidi do buncinaşi qoropaten ik̆itxasunonan aya ketabi. Aya noçalişeşi suretepe ezdimeri renan Şorli T̆emp̆ilişi filimişen.

Yohanna Sp̆irişi Haidi coxoni ketabi vik̆itxeret̆i ma. Şorli T̆emp̆ilişi filimiti mižirun sinemas. Emindros ma ç̆it̆a bere vort̆i. Mamgure vort̆i ma geç̆k̆ap̆uroni nʒ̆opulas.

Ar- jur ʒ̆ana iqven; ar ndğas izmoce kobžiri: Ma rak̆anoni ar oput̆es vort̆i. Ar şvacis ar ç̆iç̆it̆a k̆ulani memagu. Memaguşi, dido vixeli ma. Mati ç̆it̆a vort̆i izmoces. Tuta steri rt̆u k̆ulani. Dido mskva rt̆u em k̆ulani. K̆ulanişi coxo emedeni gomaşinu. Haidi rt̆u. Haidi coxont̆u k̆ulanis. Haidi k̆ala bğarğali ma izmoces.

Ma İzmoceşen gop̆k̆uʒxişi, çkini olafupe astaxolo dop̆ç̆ari do aya mk̆ule noçalişe mjoraşi teşa kogamaxtu.

 

  1. Haidişi Ocaği
  • Dğa xeleri gaqvas! Dğa ginže gaqvas! Si gcoxons Haidi, hoi? Ma eşo miçkin. Mtini reni?
  • Ho, ma Haidi mcoxons. Si mu gcoxons?
  • Ma Ali mcoxons. Coxo çkimi nana- baba çkimik gemodveren.
  • Opşa k̆ai! Çkimi coxoti nana- baba çkimik gemodveren. Si solen miçinop ma?!
  • Skani coxo dunyaşi iri svas içkinen. Ma si manebra çkimi steri kşinapt̆i berobaşen doni. Aʒ̆i dido xvala vore ma. Hele, manebra domaqvi. Ma skanden çkar mutu va minon.
  • Mati si manebra kşinap. Dğa gatanas! Hele, ak moxti! Ma si megişvelaminon aʒ̆i.
  • Guri xelaten yemapşu. Mgara komomixtu aʒ̆i. Yohanna Sp̆irişi ketabişen si giçinop.
  • Hoi?! Aya ren dido onç̆eloni do gok̆vironi ambari!
  • Ma bere vort̆işi, arndğas baba çkimik ar oçukare komomiğu.
  • Aʒ̆i oncğore domaqu do govimç̆itani, giçkit̆as! Baba skanişi oçukare mu rt̆u? Emuk mu mekçu? Hele, miʒ̆vi!
  • Baba çkimik Yohanna Sp̆irişi Haidi coxoni ketabi komomiğu do oçukare komomçeret̆u.
  • Yohanna Sp̆irişi ketabi mokʒ̆onderet̆ui?
  • Moro mu, ketabi momʒ̆onderet̆u! Xeloni ambarepe gamognapapt̆u. Edo arşvacis vik̆itxi eya ketabi ma.
  • Emindros muk̆o ʒ̆aneri rt̆i? Kşunsi?!
  • Ho, komşuns ma. (1971-2) vit̆on çxoro oşi do sume neçi do vit̆o ar varna jur ʒ̆anas rt̆u. Aʒ̆i k̆aixeşa va mşuns. (11) vit̆o ar varna (12) vit̆o jur ʒ̆aneri vort̆i. 1971 ʒ̆ana rt̆u domaʒ̆onen aʒ̆i.
  • Opşa mskva! Dido k̆ai! Ginže ora golaxteren! Xoloti kokşuns si.
  • Ok̆açxe skani filimiti mižirun Turkuli sinemapes.
  • Ar- jur filimi çkimi yeşiğes filimişi şirketepek. Eşo komşuns aʒ̆i. Namu filimi çkimi gižirun?
  • Uça- xçe filimi rt̆u. Dido mcveşi filimi rt̆u.
  • Mik osağupt̆u çkimi roli eya filimis?
  • Şorli T̆emp̆ilik osağupt̆u skani roli eya filimis. Aʒ̆i eşo komşuns ma.
  • Ho, mtini zop̆on. Şorli T̆emp̆ilik osağupt̆u çkimi roli. (1937) vit̆on çxoro oşi do eçi do vit̆o şkvit ʒ̆ana rt̆u. Eşo komşuns mati. Eya filimi mok̆ʒ̆onderet̆ui?
  • Moro mu, eya filimi momʒ̆onderet̆u! Mefikironi filimi rt̆u. Filimik milletis nosi meçapt̆u. Berepes nosi ogurapt̆u ketabi do filimik. K̆ainoba do cumalobaşi maana ogurapt̆u milletis.
  • Mundes žiri eya filimi çkimi?
  • Xolo ç̆it̆a vort̆i ma. Mamgure vort̆i geç̆k̆ap̆uroni nʒ̆opulas. Nʒ̆opulas sinemaşi saloni kuğut̆u. K̆arta Mjaçxas ar filimi iqvet̆u nʒ̆opulaşi sinemaşi saloni. Sinemaşi xçe perdes voʒ̆k̆ert̆it çkin.
  • Vit̆on çxoro oşi do eçi do vit̆o şkvit tariğoni eya filimişi çkvadoçkva versiyonepeti yeşiğeri renan. Eşo miçkin.
  • Ho, entepeşenti ambari komiğun ma.
  • Dido k̆ai. Opşa mskva! Skani topuroni nena dido momʒ̆ondu ma.
  • Nʒaşa exti! P̆anda ixeli, Haidi! Mu giʒ̆vare, giçkini?! Si ora giğuni? Ora giğun na, skani dobadona do ocağişen ar- jur mutu gk̆itxare, iqveni?! Ma dido gixvamaminon!
  • Ho, moro mu, skani şeni p̆anda ora komiğun ma! Ma skani manebra vore do siti çkimi manebra re! Allaise, mu ginon na, eya mk̆itxi do emedeni nena gegiktira ma.
  • İpti dobadona do ocaği skanişen bğarğalat! Ti skanişen mutupe otkvalu ginoni?!
  • Moro mu, otkvalu minon ma. Hayde, bğarğalat! Ma gisimin! Tamo- tamo miʒ̆vi! Tito- tito mk̆itxi, Alik̆o!
  • Mu giʒ̆va, va miçkin. Allahi irote skanden razi iqvas.Nʒaşa exti!
  • Skandenti razi iqvas Allahi! Siti nʒaşa exti, Alik̆o!
  • Mara, ipti ar mutu giʒ̆vare. Aya ren onç̆eloni dulya: Si re (19.) vit̆o maçxorani oşʒ̆anuraşi ç̆iç̆it̆a k̆ulani. Ma vore (21.) eçi do maartani oşʒ̆anuraşi k̆oçi. Eşo- aşo sume neçi ʒ̆aneri k̆oçi vore ma. Si solen giçkin (21.) eçi do maartani oşʒ̆anuraşi ambarepe eşo?! Aya va oxomaʒ̆onu ma! Hele, miʒ̆vi!
  • Alik̆o, va giçkini si?! Ma skani izmoces vore. İzmoces govulurt çkin aʒ̆i. Siti bere re. Badi va re. Si sume neçi ʒ̆aneri k̆oçi va re! İpti aya giçkit̆as!
  • Çkin aʒ̆i izmoces voreti? Lai skidalas voret çkin. Mixarsuvi, va maçkinu ma.
  • K̆aixeşa giçkit̆as, aʒ̆i varti vit̆o maçxorani oşʒ̆anuras varti eçi do maartani oşʒ̆anuras voret çkin. Aʒ̆i izmoces voret çkin. Aʒ̆i mu ginon na, mk̆itxi. Aʒ̆i nenaş gektiruşa xaziri vore ma!  Xe- gontxeri kçumer. Derdi mo zdip!
  • Allahik gxvamas si! Haidi, si so yeçkindi? Sonuri re? Miepeşen re?
  • Ma yepçkindi oput̆e Dorflis. Dorfli ren ç̆iç̆it̆a oput̆e mskva Alp̆epes. Mayenfeldi ren çkini noğa. Opute Dorfliti, noğa Mayenfilditi qoroponi ren. Allahis kuğun aya meçkireli dixati.
  • Noğa Mayenfeldi namu dobadonaşi doloxe geladgin? Hele, miʒ̆vi do milletik mskvaşa ognas!
  • Noğa Mayenfeldi geladgin İsviçreşi K̆onfederasyonişi sinorepeşi doloxe.
  • İsviçreşi namu k̆eles geladgin noğa Mayenfeldi?
  • İsviçres kuğun (26) eçi do anşi k̆ant̆oni. Eçi do anşi k̆ant̆onik ʒ̆opxupan İsviçreşi K̆onfederasyoni. Ayati giçkit̆as! İsviçreşi Graubundeni coxoni k̆ant̆onis geladgin noğa Mayenfeldi.
  • İsviçreşi namu k̆eles geladgin k̆ant̆oni Graubundeni?!
  • İsviçreşi Yulva k̆eleni dixapes geladgin k̆ant̆oni Graubundeni.
  • Ar- jur nenatenti, İsviçreşi nenaşen bğarğalat, iqveni?!
  • Moro mu, va iqven, iqveni?! Astaxolo bğarğalat! Mara, giçkit̆as, İsviçres ar var, otxo nena kuğun!
  • Eşoi?! Ma mu miçkin?! Ma dunyaşi mteli nenapeşa toli komiğun do emuşeni. K̆arta nena ren Allahişi noxvene! Ma aşo komiçkin. Mu iqven, İsviçreşi nenapeşen ambari komomçi!
  • İsviçres kuğun otxo nena. İsviçres kuğun otxo devleturi nena.  İsviçres kuğun otxo resmuri nena. İptineri ren Alamanuri Nena. Majurani ren Fransuli Nena. Masumani ren İt̆alyanuri Nena. Maotxani ren Romanşuri Nena.
  • Xoş Alamanuri, Fransuli do İt̆alyanuri nenapeşen ambari komiğun. Mara mu ren Romanşuri Nena?! Hele, molamişini!
  • Romanşuri nena, moxtimeri ren didopeten Latinuri nenaşen. Aʒ̆i aşo matkven. Mara giçkit̆as isviçreşi Federasyoni ren dunyaşi irişen demok̆rat̆iuri dobadona.
  • Aya otxo nenapeten gamantana do radio-t̆elevizyonişi ç̆andina reni?!
  • Ho, koren. Aya nenapeten gazetape do jurnalepeti koren.
  • Dido onç̆eloni ambarepe momçap si! Namu ren skani nena?
  • Yohanna Sp̆irişi nena rt̆u Alamanuri. Çkimi ambariti ipti Alamanuri nenaten iç̆arinu, mara aya otxo nenati çkimi ren. Aʒ̆i şk̆ule skani nenati çkimi nenapeşen ren, giçkit̆as! Lazuriti çkimi nenapeşen ren. Dunyaşi mtel nenape ren çkimi. Ma irote cumalobaşi mesajepe komiğun do emuşeni.
  • Ma şukuri giʒ̆umer aya onç̆eloni do gok̆vironi ambarepe şeni. Aʒ̆iti tamo- tamo tito- tito ocaği skanişa komoptat! İqveni?!
  • Moro mu, ocaği çkimişa komoptat! Si mk̆itxi do ma giʒ̆va!
  • Nana skanis mu coxons? Mu coxont̆u. Baba skanis mu coxons? Mu coxont̆u? Si mişi bere re? Si miepeşi re? Miepeşen re si?
  • Nana çkimis Greçini coxons. Baba çkimis T̆obiasi coxons. Juriti ğurerenan. Saği va renan.
  • Nana do baba skani mundes ğurerenan?
  • Ma aya va miçkin. Va maçkinen. ʒ̆ana muşişen ambari va miğun. Ambari va miğun. Ma ç̆iç̆it̆a bere vort̆işi, ğurerenan. Ma entepe va mižirun.
  • Si mcveşi mi oğli rt̆i? Mʒxade mu ren?
  • Oput̆eşi xalk̆işen vort̆it çkin. Aşo matkven. Aya si dogibağun!
  • Ho, aya domibağun! Si unaneli do ubabeli rt̆i. Mi k̆ala irdi? So irdi? Mik si gordu?
  • Dadi çkimik mordu. Nana çkimişi dak mordu.
  • Dadi skanis mu coxons? Mu coxont̆u emus?
  • Emus Dit̆i coxons. Dit̆i coxont̆u dadi çkimis.
  • Emuk mu dulya ikipt̆u? Mu dulyaten ibodert̆u dadi skanik?
  • Emu rt̆u xezmetkyari. Xampa k̆oçepeşi k̆onağapes içalişept̆u emuk.
  • P̆ap̆uli skanis mu coxont̆u?
  • P̆ap̆uli çkimis Adolfi coxont̆u. Mara p̆ap̆uli çkimis Alp̆cumaditi coxont̆u. Eşoti içkinen mtel dulyas.
  • Komiçkin. P̆ap̆uli skani şeni mot elapatxeri ren ya zop̆ont̆u milletik?
  • Va miçkin. Mara p̆ap̆uli çkimi elapatxeri va rt̆u. Dido noseri k̆oçi rt̆u. Qalgelakteri rt̆u.
  • Mot qalgelakteri rt̆u? Hele, miʒ̆vi!
  • Skiri do nisa duğureret̆u do emuşeni. Umiteli rt̆u. Mara buncinaten guri raxat̆i kuğut̆u.
  • Dadi skanik muşeni si p̆ap̆uli skanişa mendagiqonu do megaşku?
  • Dadi çkimik dido k̆ai dulya kožireren ar didi k̆onağis noğa Frank̆furt̆is. K̆onağişi mance dido xampa rt̆eren. Didi esnafi t̆eren. Didi turcari t̆eren. Oxormancek dido k̆ai maaşi komeçeren dadi çkimis. Dido k̆ai para komeçeren. Emuşeniti dadi çkimik p̆ap̆uli çkimişa mendamiqonu ma do memaşku. Eşo miçkin ma.
  • Muk̆o ʒ̆anei rt̆i si emindros?
  • Ma (6) anşi ʒ̆aneri vort̆i, va vort̆i. Aʒ̆i eşo komşuns.
  • Muk̆o ʒ̆aneri rt̆u p̆ap̆uli skani? Muk̆o ʒ̆aneri rt̆u Alp̆cumadi?! Gogaşineni?
  • (80) otxo neçi ʒ̆aneri rt̆ui, va rt̆ui?! Va miçkin aʒ̆i. Xçe pimpiloni k̆oçi rt̆u. Mʒikati ndura rt̆u p̆ap̆uli çkimi.
  • Skani aya ambarepeten doviç̆vi do dovixali ma, Haidi. Si domç̆vi do domxali, gyuli çkimi!
  • Çkimi ketabik dogçveren do dogxaleren, Alik̆o. Eşo oxomaʒ̆onu ma. Mara giçkit̆as, aya va ren çkimi k̆abaeti! Aya ren mʒxade!
  • Komiçkin, aya ren emindroneri skidalaşi k̆abaeti! Fuk̆aroba do ugurapobaşi guri şeni rt̆u emk̆ata skidala skani! Xvala si var, skani malamturepesti amk̆ata skidala kuğut̆es aya dunyas!

 

  1. P̆ap̆ulişi Paʒxa

– Dadi skanik si megaşku p̆ap̆uli skani k̆ala do noğa Frank̆furt̆işa mendaxtu.

– Ho, dadi çkimik memaşku oput̆e Dorflis do noğa Frank̆furt̆işa mendaxtu. Dadi çkimi, oçalişu do para mogapu şeni noğa Frank̆furt̆işa mendaxtu. İpti meydanes xvala kodopskidi domaʒ̆onu ma. Şuri dololaperi vort̆i.

– Si P̆ap̆uli skani k̆ala oskidus kogeoç̆k̆i. Emdğaşa si p̆ap̆uli skani k̆ala, p̆ap̆uli skanis skani k̆ala irtibati va giğut̆es. Artikarti va içinopt̆it. Edo p̆ap̆uli skanik mu qu iptineri ndğalepes? Emuk si megişvelui?

– P̆ap̆uli çkimi, didşuroni rt̆u. Edo irote mskvaşa memişvelu emuk. Mara P̆ap̆uli çkimik ipti çkimi k̆ala dido va ğarğalu. İnnadi; nosi do qoropaten icginen! Ok̆açxe p̆ap̆uli çkimik dido ixelu çkimi renobaten oxoris.

– Emuk p̆anda megişvelu.

– Ho, p̆anda memivelu p̆ap̆uli çkimik. Ma muşi mota vort̆i do emuşeni.

– P̆ap̆uli skanis çkar manebra va uqount̆u. Oput̆eşi xalk̆is p̆ap̆uli skanişen aşkurinet̆u. Oxvamu do oxveʒ̆u şeni k̆iliseşa va ulut̆u p̆ap̆uli skani. İpti insafiti va uğut̆u p̆ap̆uli skanis. Eşo miçkin ma. Muşeni amk̆ata xasieti uğut̆u emus. Tabietsuzi k̆oçi rt̆ui?

– Eşo va matkven ma. K̆ai natura kuğut̆u. Emuk skidut̆u oput̆es, mara muşi paʒxa va rt̆u oput̆eşi doloxe. Oput̆eşa mendra rt̆u paʒxa muşi.  İri-xoloşen mendra rt̆u. Tolişen mendra skidut̆u. Paʒxa muşi rak̆anis geladgit̆u. Oxori muşi mendra rt̆u oput̆eşa. Emuşeni p̆ap̆uli çkimis manebra va uqount̆u. Eşo miçkin ma. Dulyape muşi oxvenu şeni mongoneri k̆oçi rt̆u p̆ap̆uli çkimi. P̆ap̆uli çkimi dido dulyamxvenu k̆oçi rt̆u. Edo mitişa muxtiaci va rt̆u. Kibiri k̆oçi rt̆u. Guri didi kuğut̆u p̆ap̆uli çkimis.  P̆at̆i va pskidut̆it çkin paʒxas. Emus unt̆u ki, çkvaşi mak̆vande va viqvat̆i ma.

– Miçkin, mutuşen şkurineri va rt̆u p̆ap̆uli skani. Muten dulyamxvenu rt̆u p̆ap̆uli skani? Muepe ikipt̆u emuk?

– Emus txape kuqount̆u. P̆ap̆uli çkimik txape nçvalupt̆u. Edo emuk txapeşi mjaten qvali ikipt̆u, k̆arak̆i ikipt̆u. Oç̆k̆omaleti ikipt̆u p̆ap̆uli çkimik. Mç̆k̆idi ikipt̆u, kovali ikipt̆u p̆ap̆uli çkimik. Umancele va rt̆u.  Xçe pimpiloni rt̆u, badi rt̆u, mara marifet̆oni k̆oçi rt̆u.  P̆ap̆uli çkimi tabietsuzi k̆oçi va rt̆u. Emuk troni ikipt̆u, st̆oli ikipt̆u. Piʒarişi biblopeti ikipt̆u p̆ap̆uli çkimik. Dido sanatkyari k̆oçi rt̆u. Tabietsuzi k̆oçi va rt̆u. Noseri k̆oçi rt̆u.

– Oput̆eşa çkar va geulut̆ui p̆ap̆u skani?

– Geulut̆u. Ar dukyani kort̆u oput̆es. Mkiri, mbela, k̆azyaği, şekeri, lukuna, tutuni, ebza yeç̆opinuşa geulut̆u oput̆eşa.

– Mara oput̆eşi k̆oçepeşen manebra va uqonut̆u p̆ap̆uli skanis! Çkar miti k̆ala irtibati va uğut̆u. Çkar miti k̆ala irtibati va ikipt̆u. Eşo va reni?

– Pet̆eri k̆ala irtibati kuğut̆u. Muşi k̆ala k̆ai irtibati kuğut̆u p̆ap̆uli çkimis!

– Ho, eşo! Mara Pet̆eri ç̆iç̆it̆a bere rt̆u. P̆ap̆uli skanişi malamture va rt̆u. Edo p̆ap̆uli skanişi txape ocvinapt̆u Pet̆erik. Pet̆eri k̆ala irtibati oxvenus mecburi kodoskideret̆u. Malamture va rt̆es.

– P̆ap̆uli çkimi çkinerk̆oçi rt̆u. P̆ap̆uli çkimik udodginu nosi do gza ogurapt̆u Pet̆eris.  Pet̆erikti k̆ai ambarepe igurapt̆u p̆ap̆uli çkimişen. Edo aya ambarepe k̆ai aʒ̆onet̆u Pet̆eris.

– Xvala- xvala skidut̆u. Oğarğalu şeni çkar manebra va uqount̆u p̆ap̆uli skanis.

– Eşo va rt̆u. Çkimi k̆ala rt̆u. Pet̆eri k̆ala rt̆u. Çkini k̆ala ğarğalapt̆u p̆ap̆u çkimik. Pet̆erişi dinana do nana k̆ala ğarğalapt̆u namtini orapes.

– Ho, eşo ren. Mara çkva miti k̆ala irtibati uğut̆u p̆ap̆uli skanis.

– Si xilafi giçkin. Mtini va ren aya ambari.

– Miepe k̆ala ğarğalapt̆u p̆ap̆uli skanik?

– P̆ap̆uli çkimik txape muşi k̆ala ğarğalapt̆u.  Coğori muşi k̆ala ğarğalapt̆u. Entepekti p̆ap̆uli çkimi k̆ala ğarğalept̆es. Mjora, muruʒxepe, nʒa, dixa, mç̆ima, gola, rak̆ani k̆ala ğarğalapt̆u p̆ap̆uli çkimik. Entepekti p̆ap̆uli çkimi k̆ala ğarğalapt̆es.

– Oput̆es ʒxeni, cori do giriniti iqvet̆ui emindros?

– Ho, iqvet̆u. Mara p̆ap̆uli çkimis xvala coğori kuqonut̆u. Edo jur txa kuqonut̆u emus.

– Si mtini zop̆on. Ma aya va maçkinu. Mixarsuvi, Haidi! Bere vort̆işi, mati xvala vort̆i. Xoi aʒ̆iti xvala vore. Mati muruʒxepe k̆ala bğarğalapt̆i. K̆at̆u çkimi k̆ala bğarğalapt̆i. Si ʒ̆ori re.

– P̆ap̆uli çkimik irote buncinaşen igurapt̆u. Buncina k̆ai mamgurapale çkini ren. Eşo va reni, Alik̆o?!

– Eşo ren. Mtini zop̆on. Buncina k̆oçepeşen çkva mcveşi ren. Emuşeniti k̆oçepeşen çkva dido uçkin buncinas.

– İrişen çkineri ren buncina. Emuşeniti çkinden çkva k̆ai uçkin buncinas. Mjora, muruʒxepe, nʒa, dixa, mç̆ima, gola, ğali, t̆iba, rak̆anis çkinden çkva k̆ai uçkin.

– Ayati mtini ren. Mtini zop̆on, Haidi.

– Nena beciti ren. Artikarti oxoʒ̆onu şeni, ipti nena va domaç̆irnan. İpti qoropa domaç̆irnan. İpti Allahi do buncinaşi qoropa domaç̆irnan.

– Dido mtini zop̆on. Mati skani steri mevisamedep, Haidi!.

– K̆oçik k̆oçis zarari meçaps. K̆oçik skindinapes zarari meçaps. K̆oçik buncinas zarari meçaps. Buncinak çkar mitis zarari va meçaps. Buncinak çkar mutus zarari va meçaps. Buncinak k̆oçi do skindinas manebroba doguraps. Allahik k̆oçi do skindinas manebroba doguraps. Eşo va reni, Alik̆o?!

-Eşo ren, Haidi. Tişen k̆udelişa mtini zop̆on si.

– Si Alamanuri nena giçkini?

– Var, ma Alamanuri nena va miçkin.

– Mati Lazuri nena va miçkin. Si Lazuri ğarğalap, ma Alamanuri bğarğalap. Artikartişi nena oxovoʒ̆onapt çkin. Çkin artikartişi nenaten va bğarğalapt, mara artikartişi nena oxovoʒ̆onapt. Mu menceliten artikartişi nena oxovoʒ̆onapt, giçkini?

– Artikartişa qoropa komiğunan do emuşeni.

– Aha Mʒxade! Aya ren nk̆ila: Qoropa! Çkin qoropaşi nenaten bğarğalapt. Emuşeniti artikartişi xali oxovoʒ̆onapt. Edo p̆ap̆uli çkimisti buncina do Allahişi qoropa kuğut̆u guris do emuşeniti mjora, muruʒxepe, nʒa, dixa, mç̆ima, gola, rak̆ani, mç̆ima, mtviri, xorşak̆ali, ixi, skindinapa k̆ala ağarğalet̆u emus. Entepe k̆ala ağarğalet̆u p̆ap̆uli çkimis. Xvala- xvala skidut̆u, mara xvala va rt̆u. Mitişa minneti va uğut̆u p̆ap̆uli çkimis. Emuş- amuşi nositen dulya va ikipt̆u p̆ap̆uli çkimik.

– P̆ap̆uli skanis ar çkva oxori kuğut̆u oput̆eşi doloxe. Eşo miçkin ma.

– Xilafi va giçkin. Mtini giçkin. Oput̆eşi doloxeti oxori kuğut̆u p̆ap̆uli çkimis. Mara ek va skidut̆u. Eya oxori genk̆ileri rt̆u.

– Muşeni ek va skidut̆u?

– P̆at̆i gonoşinepe kuğut̆u eya oxorişi doloxe do emuşeni.

– Xvala- xavala skidut̆u mara xvala va rt̆u.  Gurimeç̆veri rt̆u.

 

  1. Buncinaşi Manebroba
  • Si P̆ap̆uli skani k̆ala skidut̆u. P̆et̆eriş met̆a manebra va giqonut̆u. Eşo miçkin. Si çkva megabre va giqount̆u.
  • Var, eşo va ren. Eşo reni? Ma eşo va miçkin.
  • Mi rt̆u skani majura manebra? P̆ap̆uli skanii?
  • Ho, p̆ap̆uli çkimi manebra çkimi rt̆u. P̆et̆eri manebra çkimi rt̆u. Txape manebra çkimi rt̆es. K̆vinçepeti manebra çkimi rt̆es. Coğori manebra çkimi rt̆u. Ca, germa, nʒa, ʒ̆k̆ari, gola, ğali, t̆iba do dixati çkimi manebra rt̆u. Entepe mteliti çkimi manebrape rt̆es.
  • Txa, k̆vinçi, coğori, germa, nʒa, ʒ̆k̆ari, dixa k̆ala siti gağarğalet̆ui?
  • Ho, moro mu, mati entepe k̆ala mağarğalet̆u.
  • Si solen gaguru entepeşi nena?
  • Mdğura ma giʒ̆veret̆i: Qoropaşi nenaten! Txasti, k̆vinçisti, coğoristi, germasti, nʒasti, ʒ̆k̆aristi, dixasti tito nena kuğun. Entepe qoropaşi nena kuğunan. Siti entepeşi qoropa giğut̆aşi, entepe k̆ala mskvaşa gağarğalen. Emuşeniti ma entepe k̆ala loqaşa bğarğalapt̆i.
  • Siti buncinas dido qorop! Si nena topuri giğun!
  • Siti nena topuri giğun! Ho, moro mu! Ma buncinas dido p̆qorop. Buncinas oskiduk memişvelu do emuşeni.
  • Ç̆it̆a- ç̆it̆a P̆et̆erişenti bğarğalat! P̆et̆eri, skani k̆ai manebra rt̆u.
  • Ho, P̆et̆eri k̆ai manebra çkimi rt̆u. Pet̆eri şurimşine çkimi rt̆u.
  • Emuti ç̆it̆a rt̆u. P̆et̆eri muk̆o ʒ̆aneri rt̆u emindros?
  • P̆et̆eri (11) vit̆o ar ʒ̆aneri rt̆u. Aʒ̆i eşo komşuns ma.
  • P̆et̆eri mç̆k̆eşi rt̆u do oput̆eşi txape ocvinapt̆u. Mzgudapeşen k̆aixeşa ambari kuğut̆u Pet̆eris. Nostoneri mzgudapeten xampa rt̆u oput̆e tkvanişi gomorgva.
  • Ho, oput̆e çkini, loqa mzgudapeten dido xampa rt̆u. Pet̆erik oput̆eşi mç̆k̆eşi rt̆u do milletişi txape ocvinapt̆u. Emuşeniti Pet̆erik dido sva okaçapt̆u oput̆eşi skidalas. Txapeşen coğabi-memçale rt̆u.
  • P̆et̆eris p̆ilili uğut̆ui? P̆et̆erik p̆ilili gelaçapt̆ui?
  • Moro mu, p̆ililiti kuğut̆u emus. Piʒarişi p̆ililiti ikipt̆u mskvaşa. Emuk p̆ilili muşi gelaçamuti mogurapt̆u ma. Edo irote p̆ip̆ili muşi mskvaşa do loqaşa gelaçapt̆u P̆et̆erik. Txapesti p̆ililişi sersi aʒ̆onet̆es. Maxarot̆oni biç̆i rt̆u Pet̆eri. Upeleri va rt̆u. Musik̆işi bere rt̆u. K̆ap̆et̆i quci kuğut̆u. K̆itxeri va rt̆u. Mara Fuk̆ara nosişi bereti va rt̆u Pet̆eri. Didşuroni rt̆u.
  • Pet̆erik siti p̆ilili gelagiçapt̆u.
  • Ho, mati p̆ilili gelamiçapt̆u emuk do moxelapt̆u.
  • Çkva muepe ikipt̆u Pet̆eri k̆ala oput̆es?
  • Pet̆eris ar gosriale kuğut̆u. Qinora moxtuşi, mtviri dido domtupt̆u. Çkinti mtviris gestvinuşa mevulurt̆it gosrialeten. Mtviris ar rak̆anişen majuranişa gosriales gexuneri goxtimu dido xeloni iqvet̆u. Nenaten va matkven ma aʒ̆i.
  • Dido mskva t̆eren aya gonoşine skaniti. Çkinti gosriales gexuneri goxtimuşi gzalepe bgorupt̆it noğa İst̆anbolişi sokağapes. Mara k̆ai va iqvet̆u. Dido mtviri va iqvet̆u noğa İst̆anbolis.
  • Alp̆epe çkini irot̆e mtvironi iqvet̆u. Mtviriten çinoberi ren Alp̆epe çkini.
  • Pet̆eri xvala k̆ai mç̆k̆eşi var, k̆ai mençxometi rt̆u. Eşo miçkin. Eşo va reni?!
  • Ho, k̆ai mençxome rt̆u. Ğaliti komiğut̆es semti çkinis. Edo çxomi oç̆opuşa mevulurt̆it çkin.
  • Muten ç̆opupt̆it çxomi? Ank̆esiteni?
  • Var, ank̆esiten va p̆ç̆opupt̆it çxomepe çkin. Çkin t̆ik̆inaten p̆ç̆opupt̆it.
  • Mu çxomi iqvet̆u ğalis?
  • K̆almaxa iqvet̆u. Mara dido var.
  • K̆almaxa nostoneri iqvet̆ui?
  • İqvet̆u. Emindroneri nositen, çxomi oç̆opu k̆ai maʒ̆enet̆u. Mara andğaneri nositen, çxomi oç̆opu dido gyunaxi ren. Çxomisti nana-baba kuqonun do emuşeni. Çxomisti bere kuqonun do emuşeni.
  • Ho, mevagni ma! Si vejet̆eryeni vana vegani re!
  • Ma hemi vejet̆eryeni hemiti vegani vore.
  • P̆et̆erik so skidut̆u? Sonuri t̆u? Mi oğlişi rt̆u?
  • P̆et̆erik oput̆e çkinis skidut̆u. Dorflis skidut̆u. Dorfluri rt̆u P̆et̆eri. Oput̆e Dorflis skidut̆u.
  • K̆itxeri va rt̆u. Eşo miçkin ma. Nʒ̆opulas igurapt̆ui Pet̆erik?
  • Ç̆iç̆it̆a nʒ̆opula kort̆u noğas. Aya nʒ̆opulas igurapt̆u Pet̆erik. Mjaçxaşi nʒ̆opulati komiğut̆es oput̆es.
  • Mskvaşa ok̆itxu-oç̆aru uçkit̆ui Pet̆eris?
  • Ho, uçkit̆u, mara dido var, ç̆it̆a-ç̆it̆a. Pet̆erik mskvaşa do loqaşa birapape mibirt̆u. Birapapes şuri mepçapt̆it emuk.
  • Pet̆eri bunduri bere rt̆ui?
  • Var, var, Pet̆eri bunduri va rt̆u, mara nʒ̆opulaşa toli dido va uğut̆u.
  • Ocaği muşi k̆ala skidut̆u Pet̆eri. Eşo miçkin ma.
  • Ho, mtini giçkin. Ocaği muşi k̆ala skidut̆u.
  • Mara Pet̆eri korbala rt̆u. Tolužğe rt̆u. Eşo komşuns. Mitini bzop̆oni?!
  • Ho, eşo rt̆u. Mara k̆arta bere eşo rt̆u emindros. Aʒ̆ineri steri va rt̆u skidala. Aʒ̆ineri şekelepe do xalvapeşen mitis ambari va uğut̆u. Pet̆eri xçeguroni do keskini bere rt̆u. Pelaperi do anaç̆i rt̆u.  Umoşvacinu oçalişept̆u Pet̆erik. Arguroni manebra çkimi  rt̆u. Mara çkar raxat̆i va doxedut̆u. Mşkurinace va rt̆u. Encami ç̆it̆a bere rt̆u Pet̆eri. Mu p̆a?! Mara guri didi kuğut̆u Pet̆eris.
  • Tkvan rak̆anişen rak̆anişen artikartis işmariti oğodapt̆it. Eşo va reni?
  • Ho, eşo vikipt̆it. Golaşen golaşa artikartis işmari voğodapt̆it çkin do vistert̆it bereluri gagnapaten.
  • Oç̆aru- ok̆itxuti skanden diguru Pet̆erik. Eşo komşuns. Eşo reni?
  • Ho, mati emus mevuşveli. Mara xvala çkimden va diguru Pet̆erik.
  • Mişi txape ocvinapt̆u Pet̆erik?
  • Pet̆erik oput̆eşi mteli txape ocvinapt̆u.
  • Muk̆o txa uqount̆u p̆ap̆uli skanis?
  • P̆ap̆uli çkimis jur txa kuqount̆u.
  • Txapes mu coxont̆es? Coxope mutepeşi gogaşinen aʒ̆i?
  • Mixarsuvi, Alik̆o. Dido ora kogolaxtu. Ma va gomaşinen aʒ̆i. Mara qoroponi coxope kuğut̆es.
  • Mi varna miepe k̆ala skidut̆u P̆et̆eri?
  • P̆et̆eri, nana do dinana muşi k̆ala skidut̆u.
  • Baba va uqounut̆ui Pet̆eris?
  • Var, baba va uqounut̆u P̆et̆eris.
  • Ğureli rt̆u, hoi?
  • Ho! Pet̆erişi dinana utole do žabuni rt̆u. Şira rt̆u. Dido xçini rt̆u, mara xoloti ʒ̆inek̆i şupt̆u. ʒ̆oxleşen mamuni t̆eren. Eşo kovogni ma. Dinana utole rt̆u, mara k̆ai guroni rt̆u. Dinanak irote loqaşa memişvelt̆u. Metak̆si steri xçe toma kuğut̆u dinana Elenis. Qoroponi rt̆u. Žiʒinace oxorca rt̆u. İrote p̆odias gelavuxert̆i ma.
  • P̆et̆erişi nana muç̆oşi xanumi rt̆u?
  • P̆et̆erişi nanati k̆ai guroni rt̆u. Emuti şira rt̆u. P̆et̆erişi nanakti mç̆ipaşaşi memişvelt̆u. Mskva tolepe kuğut̆u, mzoğaşperi. K̆irk̆oleri tomoni. Qoroponi oxorca rt̆u. Topuri nenoni. Ç̆umanişen serişakis şurdoguriten içalişept̆u, kimoli va uqonut̆u do emuşeni. Nostoneri oç̆k̆omalepe ikipt̆u. Aʒ̆i eşo komşuns.
  • Si gçapt̆ui Pet̆erişi nanak?
  • Moro mu, mati oç̆k̆omale komçapt̆u. Sutli ikipt̆u. Termoni ikipt̆u. Luqu xarxaşi ikipt̆u. Edo komçapt̆u. Ma k̆ulani muşi mşinapt̆u. Mengapua va uqount̆u emus oput̆es.
  • Si P̆et̆erişi k̆ai manebra rt̆i. Çkva manebra va giqonut̆u. So gulut̆it? Muepe ikipt̆it? Mu gonoşinepe giğun emoraşen?
  • Dido qoroponi gonoşinepe komiğun ma. Çkin zenepes govulut̆it. Txape vocvinapt̆it çkini zenepes. Txapes xe çkimiten pçapt̆i. Txape k̆ala bğarğalapt̆it. Namtini txapes tik̆ani kuqount̆es. Entepe k̆ala vistert̆it çkin. Dido qoroponi rt̆es tik̆anepe. Ar oput̆eşen majuranişa govulut̆it. Ekolen- akolen lafi vikipt̆it. Ok̆açxe P̆et̆erişa oxorişa mevulurt̆it. Dinana k̆ala bğarğalapt̆i.
  • P̆et̆erişi dinana k̆ala ğarğalapt̆i, hoi?!
  • Ho, P̆et̆rişi dinana k̆ala loqa-loqa bğarğalapt̆i. Dido k̆ap̆et̆i nosi kuğut̆u. Dido mskva sersi kuğut̆u.
  • Dinana muşis mu coxont̆u?
  • Emus Eleni coxont̆u.
  • Muç̆oşi oxorca rt̆u dinana Eleni?
  • Dido çkineroxorca rt̆u. Utole rt̆u, mara karta şeyişen mç̆ipaşaşi ambari kuğut̆u. Mitişi dedik̆odişa toli va uğut̆u. Udodginu mskva ambarepeşen molamişinapt̆u. Angelozi steri oxorca rt̆u. Loqa nena kuğut̆u dinanas. P̆anda emus p̆odias gelavuxet̆i ma. Çkva mu giʒ̆va ma?!
  • Pet̆erişi oxori muç̆oşi rt̆u? Didi rt̆ui, ç̆it̆a rt̆ui?
  • Oput̆eşi oxorepe artneri iqvet̆u. Pet̆erepeşi oxoriti mçveşi rt̆u.
  • P̆ap̆uli skanişi paʒxaşen didi rt̆ui?
  • Ho, eşo rt̆u. Paʒxa paʒxa ren. Paʒxa ar toli ren. Mʒ̆ule ren. Mçire va iqvet̆u. Ç̆it̆a iqvet̆u. Oxori, paʒxaşen dido iqvet̆u. Çkva mçire iqvet̆u.  Edo Dinana Elenik ç̆ink̆a do germak̆oçişi ambarepeti molamişinapt̆es.
  • Ç̆ink̆a do germak̆oçişi ambare k̆ai gaʒ̆onet̆ui?
  • Ho, ç̆ink̆a do germak̆oçişi ambari dido k̆ai maʒ̆onet̆u mara, k̆ap̆k̆ap̆işi ambari k̆ai va maʒ̆onet̆u, p̆at̆i maʒ̆onet̆u. Maşkurinet̆u ma, moşkurinapt̆es entepeşi ambarapek.

 

  1. P̆ap̆azefendi do Mamgurapaleşi Mok̆itxa
  • Ar ndğas oput̆eşi p̆ap̆azefendik p̆ap̆u skanişi paʒxaşa komextu.
  • Ho, mok̆itxu şeni komexteret̆u. Ar xanumi k̆ala komexteret̆u. İpti mutu va mevagni ma. Ma dido maxelu.
  • Mok̆itxuşa komexteret̆es, hoi? P̆ap̆uli skani, musafirişi mok̆itxuşa gegaperi va rt̆u!
  • Ho! Mok̆itxuşa komexteret̆es
  • Oput̆eşi p̆ap̆azefendis mu coxont̆u?
  • P̆ap̆azefendis Şult̆zi coxont̆u.
  • Em xanumis mu coxont̆u?
  • Em xanumis Elsa coxont̆u.
  • Elsa xanumi, Şult̆zişi çili rt̆u ya gaçkinet̆u ipti!
  • Ho, eşo maçkinet̆u ipti. Encami ç̆iç̆it̆a bere vort̆i ma!
  • Elsa xanumi mi t̆eren. Elsa xanumik mu dulya ikipt̆u?
  • Elsa xanumi oput̆eşi nʒ̆opulaşi mamgurapale rt̆eren. K̆ai guroni rt̆u. Ti- moʒ̆oneri va rt̆u. Mskva toloni do ginže tomaloni xanumi rt̆u. Žiʒinace rt̆u.
  • P̆ap̆uli skanis entepe k̆ala oğarğaluşa çkar niyeti va uğut̆u. Eşo komşuns ma.
  • Ho, mtini zop̆on si. P̆ap̆uli çkimis entepe k̆ala oğarğaluşa çkar niyeti va uğut̆u.
  • P̆ap̆azefendi do Elas xanumik muşeni komexteret̆es p̆ap̆uli skanişi paʒxaşa?
  • Çkimi şeni komexteret̆es entepe. P̆ap̆uli çkimi k̆ala çkimi xalişen oğarğalu şeni komexteret̆es. Entepek ma mgorupt̆es.
  • Muşeni si ggorupt̆es entepek? P̆ap̆azefendi do mamgurapales mu unt̆es?
  • P̆ap̆azefendi do mamgurapalek p̆ap̆uli çkimis izni ak̆vandes.
  • Muşeni emus izni ak̆vandes entepek?
  • P̆ap̆uli çkimis çkimi gurapa şeni izni ak̆vandes entepek. P̆ap̆uli çkimik k̆ilise do nʒ̆opulaşa oxtimuşa izni va momçapt̆u.
  • Muşeni p̆ap̆uli skanik izni va mekçapt̆u k̆ilise do nʒ̆opulaşa oxtimuşa.
  • K̆ilise do nʒ̆opulaşa toli va uğut̆u p̆ap̆uli çkimis do emuşeni.
  • Muşeni k̆ilise do nʒ̆opulaşa toli va uğut̆u p̆ap̆uli skanis?!
  • P̆ap̆uli çkimik oput̆eşi xalk̆is va qoropt̆u emindros?
  • P̆ap̆uli skanik muşeni va qoropt̆u xalk̆is emindros?
  • Baba çkimis nana çkimi k̆ala oçilu unt̆eren, mara p̆ap̆uli çkimik aya oçilu-okimocus nodgiteren. Oput̆eşi xalk̆ik aya oçilu-okimocus numxvaceren. Emuşeni p̆ap̆uli çkimik va qoropt̆u oput̆eşi xalk̆is. Nana- baba domiğuruşi, oput̆eşen mendrani rak̆anis gek̆ideren aʒ̆ineri paʒxa muşi do dibargeren.
  • P̆ap̆azefendi do mamgurapales mu unt̆es p̆ap̆uli skanişen?
  • Mamgurapale xanumik Haidik nʒ̆opulas iguras ya uʒ̆u. P̆ap̆azefendikti Haidik k̆iliseşa moxtas ya uʒ̆u
  • P̆ap̆azefendi do mamgurapale xanumik si nʒ̆opula do k̆iliseşa kçumert̆es.
  • Ho, ma nʒ̆opula do k̆iliseşa mçumert̆es entepek. Nʒ̆opula do k̆iliseşa ma miç̆andept̆es.
  • P̆ap̆uli skani razi iqui? Si nʒ̆opulaşa mendegoçkvui p̆ap̆u skanik? Mjaçxas si k̆iliseşa mendegoçkvui p̆ap̆u skanik?
  • Var, mututen razi va iqu p̆ap̆uli çkimi. K̆ilise do nʒ̆opulaşa oxtimuşa mututen izni va momçu p̆ap̆uli çkimik. Varti k̆iliseşa do nʒ̆opulaşa mendemoçkvu p̆ap̆uli çkimik, vart̆i k̆iliseşa mendaxtu.
  • K̆arari meçameri t̆eren! P̆ap̆uli skanik skani gurapaşa nodgitu do nʒ̆opulaşi gza gegiğobu.
  • Ho, nʒ̆opulaşi gza gemiğobu p̆ap̆u çkimik.
  • P̆ap̆uli skanik skani xvamaşa nodgitu do k̆iliseşi gza gegiğobu.
  • Ho, kiliseşi gza gemiğobu p̆ap̆u çkimik. Edo Tolis çelamure kodolomidgut̆u.
  • P̆ap̆uli skanik p̆ap̆azefendi do mamgurapales nuşvelui?
  • Var, p̆ap̆uli çkimik skanik p̆ap̆azefendi do mamgurapales çkar va nuşvelu. P̆ap̆azefendişi notkvamepeten dido dişumu do emus ubecğu.
  • Xe muşişen dudi skani va mogaşletinu si. Mitis emuşa nena va atkvet̆u.
  • Ho, xe muşişen dudi çkimi va momaşletinu ma.
  • Muşeni p̆ap̆uli skanik entepes va nuşvelu?
  • P̆ap̆uli çkimik oput̆eşi xalk̆i manebra va şinapt̆u do emuşeni.
  • Mara nʒ̆opulaşa do k̆iliseşa toli giğut̆u si. Nʒ̆opulas oguruşa do k̆ilises oxvamuşa toli giğut̆u si!
  • Ho, nʒ̆opulas oguru do k̆ilises oxvamu guris meşamixet̆u ma.
  • Guri çiçku dogaqu. Nʒ̆opula do k̆iliseşa oxtimu guris mek̆agilapt̆u. Mara gza genk̆ileri rt̆u oput̆eşa.
  • Mtini giçkin. Guri çiçku domaqu. P̆ap̆uli çkimişi aya k̆arari dido p̆at̆i maʒ̆onu ma. Dovigemzuli. Nʒ̆opula do k̆iliseşi oranʒk̆ironişi sersi vognişi, şik̆ineri- şik̆ineri vimgart̆i. Guri yepşeri vimgart̆i ma. Qali do qucişa vimgart̆i ma. Çare va miğut̆u. Ti-k̆uçxeten t̆et̆eli vort̆i ma. Deli dervişi steri govulurt̆i paʒxa do avlis. Mara xoloti irote omudi komiğut̆u ma, nʒ̆opula ek geladgit̆u, k̆ilise ek geladgit̆u. Vay ti çkimis.  Tolis nciri va meşulut̆u. Çelamure dido mepxvi ma, giçkit̆as!
  • Qinora moxtuşi, muepe qvit tkvan?
  • Qinora moxtuşi, dido mtviri domtu. Alp̆epeşi adeti eşo ren, dido mtvironi. Dido qini do mtviri diqu. Mtvirik dompulu buncina, mteli xolo. Xçeşi met̆a peri va ižiret̆u buncinas.
  • Tkvan muepe ikipt̆it paʒxas? Aʒ̆ineri steri va rt̆u oput̆eşi skidala.
  • Ma noğa Mayenfeldis dadi çkimi k̆ala vort̆işi, mjaçxaşi nʒ̆opulaşa mevulurt̆i. Aʒ̆i p̆ap̆uli çkimi k̆ala xeleberi vort̆i, mara ma mjaçxaşi nʒ̆opula do ekoni manebrape çkimi gomanç̆elu. P̆ap̆uli çkimis dido vak̆vandi.
  • Si p̆ap̆uli skanis mu ak̆vandi?!
  • P̆ap̆uli çkimik alboni ogurus do dinuri p̆aşurape ok̆itxus ma memişvelas, aya vak̆vandi ma.
  • Mu qu p̆ap̆uli skanik? Si megişvelui emuk?
  • Giçkin, ok̆itxuşa toli do xavesoba komiğut̆u ma.
  • P̆ap̆uli skanis k̆iliseşa do p̆ap̆azefendişa toli va uğut̆u! Eşo va reni? Nʒ̆opulaşa toli va uğut̆u!
  • Ho, eşo rt̆u. Megerem emus şinaxeri dinuri do p̆aşuraşi ketabepe uğut̆eren. Edo dini do ok̆itxuşa toli uğut̆eren p̆ap̆uli çkimis. Emuk eya ketabepe komomçu do ma ç̆it̆a- ç̆it̆a ok̆itxus kogevoç̆k̆i. Mara ma ok̆itxus k̆ai va vort̆i. Encami uk̆itxeri va vort̆i. Emuşeniti ma emuk mik̆itxu ar-jur ambari ketabepeşen.
  • Emuk eya ambarepe ketabepeşen gik̆itxui?
  • P̆ap̆uli çkimik dinuri ambari mik̆itxu, mara ketabişen var, ezberi muşişen. Megerem emk̆ata dindari k̆oçi t̆eren p̆ap̆uli çkimi! Mati govişaşi! Edebiyatişenti, dinişenti ambari kuğut̆eren k̆oçis.
  • Merağis domit̆alep si. Şukurişa komexteren k̆oçi! Tovbeşa komexteren. Eşo ptkva! Ok̆açxe mu qu p̆ap̆uli skanik?
  • Ar-jur tutas ok̆itxu-oç̆aru domoguru p̆ap̆uli çkimik. Majura k̆eleti ti-muşi k̆ala k̆iliseşa oxtimu şeni, gza bgorupt̆i udodginu ma. Emus ocerapu şeni şurdoguriten doviçalişi ma. Çodinasti, ar ndğas p̆ap̆uli do ma noğaşa kogeptit xe- xes ok̆ok̆limeri. Çkin Mayenfeldişa kogeptit!
  • Gok̆vironi ambari! Mu dulya giğut̆es noğa Mayenfeldis?
  • Mjaçxa rt̆u. Edo k̆iliseşa mendaptit. Çkinti dinuri dua voğodit do ilahepe vibirit k̆ilises.
  • ʒ̆oxleşen p̆ap̆uli skanis toli va uğut̆u k̆ilise do p̆ap̆azefendişa.
  • Ho, eşo rt̆eren! Edo k̆iliseşi cemaatis dido gaak̆viru. K̆oçepek çkin k̆ilises komžires do dido gaak̆vires.
  • Gondineri tik̆ani oxorişa guiktu, hoi?
  • Ho, gondineri tik̆ani oxorişa guiktu. Edo k̆iliseşi cemaatik dido ixelu. Mati vixeli, p̆ap̆uli çkimikti ixelu.
  • Nosi ʒ̆anas var, tis ren! Edo k̆oçi k̆oçişi ç̆ami ren! Uçodinu mutu va ren!

 

  1. Ucoxinu Musafiri

– Ar ndğas Dit̆i Frank̆furt̆işen noğa Mayenfeldişa komexteret̆u.

– Ho, komexteret̆u dadi çkimi.

–  Emedeniti p̆ap̆uli skanişi paʒxaşa komexteret̆u.

– Mtini zop̆on, paʒxaşa komexteret̆u. P̆ap̆uli çkimi paʒxas va rt̆u. Germaşa mendaxteret̆u.

– Muşeni mendaxteret̆u germaşa p̆ap̆uli skani?

– Dişka momaluşa mendaxteret̆u p̆ap̆uli çkimi.

– Si paʒxas xvala rt̆i. Eşo komşuns ma. Edo mu iqu?!

– Mtini kokşuns si. Xilafi va ren. Ma paʒxas xvala vort̆i.

– Muşeni komexteret̆u dadi skani?

– Emedeni ixaziri, ma si noğa Frank̆furt̆işa  mendagiqonaminon ya miʒveret̆u dadi çkimik.

– Dit̆ik raxat̆i egizdu. Mot noğa Frank̆furt̆işa mendagiqonasunt̆u Dit̆ik?

– Çkimi şeni ar dulya kožireren noğa Frank̆furt̆is. Ar xampa k̆oçişi k̆onağis t̆eren aya dulya.

– Si ç̆iç̆it̆a bere rt̆u. Mu dulya giğut̆u didi noğas?! Si noğa Frank̆furt̆işa oxtimu gint̆ui?

– Var, ma noğa Frank̆furt̆işa oxtimu çkar va mint̆u. Mara emuk dubaraten kamomoğerdinu. Onʒ̆elişi bere va vort̆i, mara encami mati ç̆iç̆it̆a k̆ulani vort̆i. Dunyaşen çkar ambari va miğut̆u. K̆itxeri va vort̆i. Cahili vort̆i ma.  Oput̆e çkimişi met̆a, sotxanişen ambari va miğut̆u.  Ma oxtimu va mint̆u. Dadi çkimik aya kognu do arşvacis mibecğu.

– Dit̆ik mu giʒ̆u? Mu molagişinu emuk?

–  Xvala ar doloni şeni noğa Frank̆furt̆işa mevulurt ya miʒ̆veret̆u dadi çkimik. Edo oceroni momixtu notkvame muşi. Encami ma ç̆iç̆it̆a vort̆i.  Mişa omudi p̆a?! Emuk k̆ibiri moʒ̆iru. Edo da xe muşişen dudi çkimi va momaşletinu. Omt̆inuşi gzati va miğut̆u. Dadi çkimis tolik mutu va užiropt̆u. Ma mocerapu dadi çkimik.

– P̆ap̆u skanis aya dulyaşen ambari va uğut̆u. P̆ap̆uli skani şeni xeloni dulya va rt̆u.

– Ho, p̆ap̆u çkimis mutuşen ambari va uğut̆u.

– Ok̆açxe mu iqu?!

-Ma zoriten oput̆eşa mendemiqonu dadi çkimik. İpti çkin oput̆e Dorflişa kogeptit. P̆ap̆azefendik ma komžireret̆u dadi çkimi k̆ala oput̆es.  Dadik çkimik p̆ap̆azefendis duğarğalu. Çkimi şeni mʒudi nenape tkveren dadi çkimik. P̆ap̆uli muşis ambari uğun ya uʒ̆veren p̆ap̆azefendis dadi çkimik.

-Oxorişa guiktuşi, p̆ap̆uli skanis mteli şuri gamuxtu mondo! K̆oçis t̆ura guri ut̆k̆vaʒu.

-Mati eşo domaʒ̆onu.  Zavali k̆oçi! Ma mgorasunt̆u.

– Siti va gažiru p̆ap̆uli skani. Nesibi va iqveren! Dit̆i nosi- titxu oxorca t̆eren.

-Ho, va mažiru p̆ap̆uli çkimi mati. P̆ap̆uli çkimisti ma ažiru.

– Oput̆e Dorflişen so mendaxtit tkvan?

– Oput̆e Dorflişen ar fayt̆onis gepxedit do noğa Mayenfeldişa mendapt̆it.  Ma fayt̆onis gemxedu dadi çkimik. Ok̆açxeti st̆aʒiaşa mendaptit. Ekşen trenis gepxedit do noğa Frank̆furt̆işa mendaptit çkin. Noğa Frank̆furt̆işa gza vokaçapt̆it. Dido ginže gza rt̆u. Eşo momixtu emindros.

– Trenişi magzaloba k̆ai gaʒ̆onui?

– Ho, trenişi magzaloba k̆ai maʒ̆onu, mara p̆ap̆uli çkimis mutuşen ambari va uğut̆u. Edo ma dido p̆ati maʒ̆onu.

– Ar k̆ele k̆ai gaʒ̆onu majura k̆eleti p̆at̆i gaʒ̆onu! İzmoces vore dogaʒ̆onu!

– Ho, ar k̆ele k̆ai maʒ̆onu majura k̆eleti p̆at̆i maʒ̆onu! Xelecaniten t̆ura bğurut̆i. Osimaduk kemç̆opu. Osimaduten kagomduni ma. Ma mu mağodu, aya dulyaşen p̆ap̆uli çkimis ambari va uğut̆u. Pupuloni maqu guri ma. Dadi çkimikti ar eşo, ar aşo gokteri ğarğalapt̆u udodginu- udoç̆k̆indinu.

– Mzaxalepetenti k̆ap̆ula k̆ap̆et̆i va giğut̆u si. Umiteli rt̆i!

– ʒ̆ori zop̆on, mzaxalepeten k̆ap̆ula k̆ap̆et̆i va miğut̆u ma. Umuteli do umiteli vort̆i ma. Tolepe mapşu ma.

–  Noğa Mayenfeldişen noğa Frank̆furt̆işa gza ginže rt̆ui?

– Ho, dido ginže rt̆u. Eşo gomaşinen aʒ̆i. Muk̆o ginže rt̆u, eya va miçkin aʒ̆i.

– Noğa Frank̆furt̆i muç̆oşi gaʒ̆onu? K̆ai gaʒ̆onui?

– Ar k̆ele k̆ai maʒ̆onu majura k̆ele k̆ai va maʒ̆onu!

-Mot?!  Muşeni ar k̆ele k̆ai gaʒ̆onu majura k̆ele k̆ai va gaʒ̆onu?!

– P̆ap̆uli çkimişi paʒxaşa gegaperi vort̆i. Oput̆e çkinişa, Dorflişa gegaberi vort̆i. Noğa Mayenfeldişa gegaperi vort̆i ma. Galeni noğapeşen, galeni k̆oçepeşen çkar ambari va miğut̆u ma!

– Dorplis do Mayenfeldis va nungapt̆u Frank̆furt̆i. Eşo rt̆ui?! Osimadus mepçi ma.

– Ho! Frank̆furt̆i didi noğa rt̆u. K̆alabaluği rt̆u. Fayt̆onepe kort̆es. Ginže do mçire gzalepe kort̆es.  K̆azonepe kort̆es. Dorflişi gzalepe mʒ̆ule rt̆u. Mağali K̆aldurumepe kort̆es noğa Frank̆urt̆is. Didi kvaşi binape kort̆es. Dukyanepe kort̆es. Mçire do ginže sokağepe kort̆es. ʒxenoni p̆olisepe kort̆es. Xalk̆i dido telaşoni rt̆u.  Dido calepe va ižiret̆es sokağepes. Çkimi toliten, ar didi k̆afesi steri rt̆u noğa Frankfurt̆i. Fabrik̆apeşi gelik̆onişi sersepe vognapt̆i sum- otxo fara ar ndğas.

– Skani şeni noğa Frankfurt̆i nungapt̆u didi k̆afesis! Eşoi?

– Ho, eşo rt̆u. Mati moloxuneri k̆vinçi vort̆i. P̆ap̆uli çkimi do Pet̆eri mendra komiqonut̆u. Oput̆e çkimi mendra komiğut̆u do emuşeni. Artimajuraşa mendra vort̆it.

– Nakoni oxorepe çkva mskva rt̆es?

– Oput̆eşi oxorepe çkva mskva rt̆es.

– Frankfurt̆işi oxorepe mskva va rt̆esi?

-Var! Ar didi oxoriş ʒ̆oxle majura çkva did oxori goʒ̆udgit̆u do mutu var. Oxorepe imskvanenan k̆oçişi qoropaten. Noğarepek artikartis selamiti va meçapt̆es, artikartis va qoropt̆es do emuşeni. Eşo oxomaʒ̆onu. Eşo momixtu ma. Nʒas mjora, tuta do muruʒxiti va ižiret̆u. Aşo rt̆u didi noğa! Didi noğaşi xilapeti şuryani va rt̆i. Mʒudişi va giʒ̆umer. Eşo rt̆u.

– Didi noğaşi xalik tolepe skani va goxeleren! Didi noğaşi maxoroba dido ren. Gonepti emuşeni eşo ren.

– Va maçkinen ma. Mara artikartis va nuşvelt̆u milletik. Eşo maçkinu. Dido k̆alabaluği rt̆u.

– St̆aʒiaşen so mendaxtit?

–  Ekşen ar fayt̆onis gepʒxont̆it. Ar fayt̆onik mçumert̆es, ç̆ak̆a- ç̆uk̆a! Ar mskva fayt̆onis gepxedit do ar oxorişa mendaptit.

– ʒ̆oxleşen Dit̆ik k̆onağişen ambari mekçii?

– Ç̆iç̆a- ç̆it̆a ambari komomçeret̆u oxorişen dadi çkimik.

– Dit̆ik mu giʒ̆veret̆u? Mu ambarepe mekçeret̆u Dit̆ik.

– K̆onağişi mance dido xampa rt̆eren. Dido para uğut̆eren. Xoş ma paraşen ambari va miğut̆u emindros. Xezmetkyarepe kuqonut̆eren em xampa k̆oçis. Dido itibaroni k̆oçi t̆eren noğa Frank̆furt̆is.  K̆onağişi mance genci t̆eren. Dido mskva t̆eren. Mara çili va uqonut̆eren. Ar k̆ulani bere uqonut̆eren k̆oçis. Amk̆ata ambarape momçeret̆u dadi çkimik.

– Çkva mutu va giʒ̆ui? Si mu mekşvent̆u Dit̆ik?

– Ma mu memşvent̆u dadi çkimik?! Milletişa rezili mo mʒ̆ipxup ya miʒ̆u dadi çkimik. Ma mutu va oxomaʒ̆onu aya notkvame muşişen.

– Acaebişa mogixtui?! Nosi kodologokunu!

– Ho!  Nosi kodolomokunu dadi çkimik. Moro mu, acaebişa momixtu. P̆ap̆uli çkimişen ambari va miğut̆u. Emusti çkimden ambari va uğut̆u.

-Artikartişen uambere rt̆it. Guriş meç̆voni dulya ren. Kart̆ali va ren. T̆ilifoni va ren emindros! Mobiluri t̆ilifoni va ren. İnt̆ernet̆işi mosa va ren!

-Saği- ğuraşi ambari va miğut̆es artikartişen. Allahis voxveʒ̆apt̆i ma.

-Ç̆ak̆a- ç̆uk̆a fayt̆onişen kagextit. Ok̆açxe mu iqu.

– Oxori dido didi rt̆u do ar diditi avli kuğut̆u. Ar didi t̆ikşari kuğut̆u avlis. Ar-jurti nca kobžiri avlis do mutu var! Nek̆na dido didi do mozdimeri rt̆u. Çkar mutu do miti va ižiret̆u.

 

  1. Dit̆işi P̆at̆inoba
  • Mişi Oxori t̆eren. Oxormance mi rt̆eren? Hele, miʒ̆vi!
  • Zizimanişi begişi oxori t̆eren. Didi xoconi k̆oçi t̆eren Zizimanişi begi. Cixa steri k̆vaşi oxori rt̆u. Zizimani begi rt̆eren oxormance. Mara oxoris va rt̆u emindros. Turcari t̆eren. Didi esnafi t̆eren. K̆oçis dido didi dulyape uğut̆eren noğa P̆arisis, Fransas.
  • Tkvan mik megarges nek̆nas ipti? Mik tkvan oxorişa kegzdes?
  • Xezmetkyari Sabest̆ianik çkin komemarges t̆ikşaris. Ok̆açxeti Rot̆enmayer xanumik komemarges oxorişi nek̆nas. Çkin Rot̆enmayer xanumik kemzdes oxorişa.
  • Rot̆enmayer xanumi mi rt̆u? Zizimani begişi çili rt̆ui?
  • Var, var, va rt̆u. Dudxezmetkyari rt̆u. Kahya t̆eren. Ukimoce rt̆eren. Xçini rt̆u. Jure neçi do xut varna jure neçi do vit ʒ̆aneri rt̆u.  Megerem Rot̆enmayer xanumis toli uğut̆eren Zizimani begişa.
  • Dedikodu ikip, hoi?
  • Var! Ok̆açxe ambari maqu ma aya dulyaşen.
  • Çkva miepek megarges? Çkva miti va rt̆ui?
  • Majura uşağepe do xezmetkyarepek memarges. K̆larak memarges çkin.
  • K̆lara mi rt̆u.
  • K̆lara, Zizimani begişi k̆ulani rt̆u. Ti sirmali do nunk̆u pukira. Mara K̆lara k̆ak̆vat̆a rt̆u, zavali. Tekerleğoni tronis gexederi rt̆u do irote eşo gulurt̆u dido oxoris. K̆lara guris memaç̆u ma. Zavali K̆larak ma komžiruşi, dido ixelu do xelebaten soti va imt̆ret̆u. Manebra domaqu.
  • Si kegzdu da. K̆lara muk̆o ʒ̆aneri rt̆u? Muç̆oşi k̆ulani rt̆u? Hele miʒ̆vi!
  • Mtini zop̆on. Ma da kemzdu. Xoş k̆ai guroni rt̆u. (10) vit ʒ̆aneri rt̆u K̆lara. Xampa ocağişi bere rt̆u, mara elamʒkvineri va rt̆u. Tuta steri k̆ulani rt̆u. Mskva toloni. Ginže tomaloni rt̆u.
  • Rot̆enmayer xanumi muç̆oşi xanumi rt̆u?
  • Var, Rot̆enmayer xanumi k̆ai guroni va rt̆u. Ar çarbi dixas majura çarbi nʒas kuğut̆u oxorcas. Anksi oxorca rt̆u. Şuri medvaloni rt̆u. Ma ç̆iç̆it̆a vort̆i, mara xoloti Rot̆enmayer xanumis dovubağut̆i ma. ʒ̆ori vort̆i do emuşeni.
  • Emk̆ata kimoli do oxorcaşa k̆ap̆ula va megadven ma! Mi geskideren aya dunyas! P̆at̆i kimoli do oxorcas jur toli dudgitas!
  • Ok̆açxe ambari maqu. Dadi çkimiti k̆ai guroni va rt̆eren. Megerem dadi çkimi var, mendranuri k̆oçi t̆eren. ʒ̆iʒ̆ila t̆eren!
  • Si solen ambari gaqu ki, dadi skaniti k̆ai guroni va rt̆eren?! Muç̆oşi oxorca t̆eren dadi skani?
  • Zizimani begik k̆ulani muşi şeni, K̆lara şeni, ar malamture manebra goreren. Dadi çkimikti ma kemzderen. Mtini nenaten,  momork̆eren p̆ap̆uli çkimişi paʒxaşen do noğa Frank̆fut̆işa mendemiqoneren ma. Mara ʒ̆oxleşen ambari va miğut̆u ma.
  • Dit̆ik k̆ainoba şeni si noğa Frank̆fut̆işa mendegiqoneren, hoi?
  • Var, k̆ainoba şeni var, para şeni ma momork̆eren do mendemiqoneren noğa Frank̆furt̆işa. Edo paraten gamamçeren ma. Aya oxoris ma komemçeren. Guri domit̆axu emuk.
  • Dit̆ik paraşi dulyas si gint̆aleren! Qini diʒxironi oxorca t̆eren!
  • Ho, paraşi dulyas ma mint̆aleren. Paraşi dulya vognişi, k̆uçxes domadginu ma.
  • Dido p̆at̆i oxorca t̆eren dadi skani, Dido p̆at̆i t̆eren Dit̆i. Mara giçkit̆as, amk̆ata p̆at̆i adetepe dido gont̆aleri rt̆es Romaşi İmp̆eriaşi orasti, Bizansişi orasti, Alosmanişi orasti.
  • Xvala ğurak k̆oçi rezili va ikips. Aya siti kogiçkin!
  • Dit̆ik megaşku do igzalu. Si akonaşi miti va içinopt̆i.
  • Ho, dadi çkimik memaşku do igzalu. Edo ma miti va viçinopt̆i noğa Frank̆furt̆is.
  • Oxorişi xalk̆ik si megişvelui?
  • Ho, irik ma memişvelu. Mara Rot̆enmayer xanumik irote maana gorupt̆u obecğu şeni.
  • Muşeni eşo ikipt̆u Rot̆enmayer xanumik?
  • Emuk msincu emuk. Rot̆enmayer xanumik k̆ibirepe dilasirupt̆u. Ok̆itxu- oç̆aru va miçkit̆u do emuşeni. Noğaşi adeteğeşen ambari va miğut̆u do emuşeni.
  • Emuşeniti si cahili gşinapt̆u Rot̆enmayer xanumik!
  • Andğaneri steri komşuns. Şuris mance gamomixtu oxorcak.
  • Udodginu çkinapaten gsincui emuk?!
  • Ho! Ma cahili mşinapt̆u Rot̆enmayer xanumik. Mʒudi va matkven ma. Zurna steri dgit̆u. Coxo-t̆axeri oxorca rt̆u oxoris.
  • Dixakti va şinaxups emk̆ata kimoli do oxorca. ʒ̆iʒ̆ila steri oxorca t̆eren. Beti. Eşo miçkin ma.
  • Xilafi va giçkin. Namu ptkva, namu va ptkva va miçkin aʒ̆i! Ma xoloti Rot̆enmayer xanumişi mteli nenas quci mepçapt̆i. K̆arta k̆oçi k̆ala nena va itkven, siti aya k̆aixeşa giçkin!
  • Mezmoneri kodoskidi. Dido p̆at̆i xalis rt̆i.
  • Ho, p̆anda mezmoneri vort̆i ma, umuteli dido didi noğas. Didi belas dolobli ma domaʒ̆onu.
  • Si musafiri egzdes. Si oda mekçesi?
  • Ho, ma odati komomçes. Oda ç̆eris komiğut̆u. Penceroni rt̆u. Ç̆it̆a rt̆u oda çkimi. Dolabi komiğut̆u. Yaşik̆i komiğut̆u. K̆avela komiğut̆u.
  • Oncire megirçes si. Oncire, balişi, yorğani kogiğut̆u. Mara dolokunu va giğut̆u. Umodvalu rt̆i. Eşo va reni?
  • Var! Ağani dolokunuti do modvaluti komomçes. Dolokunu do modvalu komižires. Fork̆a yemiç̆opes. Ma oç̆k̆omale komçes entepek.
  • Dido raxat̆i rt̆i.
  • Ho, dido raxat̆i vort̆i, mara umiteli vort̆i ma.
  • Çkva mu ambari giğun ilkineri dğalepeşen?!
  • K̆laras dido modvalu do dolokunu kuğut̆u, mara k̆ak̆vat̆a rt̆u.  Emus mteli şeyi yopşa kuğut̆u. Emuşeniti dolokunu, modvalupe muşi momçapt̆u. K̆larak entepe domoxrapu.
  • Yaşik̆işi doloxe mu dologižit̆u?
  • Yaşik̆işi doloxe dolokunepe dolomižit̆es.
  • Oda skani muç̆oşi rt̆u? Ç̆it̆a rt̆ui Oda k̆ai gaʒ̆onui?
  • Ho, oda k̆ai maʒ̆onu. Varti ç̆it̆a do vart̆i didi rt̆u. Ortani rt̆u. Mara irot̆e gemzuli vort̆i ma. Pencereşen sokaği ižiret̆u. Fayt̆onepe ižiret̆u. K̆at̆upe ižiret̆u. K̆vinçepe ižiret̆es. Germape va ižiret̆es. Rak̆anepe va ižiret̆es. Cape va ižiretes. Aya oxorik ma şuri emiç̆opasunt̆u. Eşo mevisimadi emindros. Emuşeniti irote gemzuli vort̆i ma.
  • Xvala rt̆i do imgart̆i. Mara Rot̆enmayer xanumik ibirt̆u.
  • Ho, ma vimgart̆i, mara Rot̆enmayer xanumik ibirt̆u. Em oxorcak kuni gemiç̆k̆omu. Ma xvala vort̆i. Xvala- xvala pskidut̆i ma. Umanceli vort̆i. Umiteli vort̆i. P̆ap̆uli çkimi çkimi k̆ala va rt̆u. Pet̆eri, çkimi k̆ala va rt̆u. Hemi xvala vort̆i hemiti aya oxorişi adeti k̆ai va maʒ̆oneret̆u. Şik̆ineri- şik̆ineri vimgart̆i ma oda çkimis. P̆at̆i izmoces vore domaʒ̆onet̆u. Mundeşa xvala- xvala goptamint̆u ma aya kvaşi didi oxoris!
  • Ek̆o milletişi doloxe xvala rt̆i si. İrote unciru otanapt̆i si. Edo irote doç̆k̆indineri rt̆i.
  • Ho, irote doç̆k̆indineri vort̆i. Lai gverdi ğureli vort̆i oput̆eşi xasret̆iten. Dadi çkimişenti çinadveri vort̆i. Dadi çkimik xoş gemçinadveret̆u.
  • Mu gekçinadveret̆u dadi skanik?
  • Oput̆eşa oxtimuşi gza va giğun ya do gemçinadveret̆u dadi çkimik.
  • P̆ap̆uli skani do Pet̆eri goganç̆elu si!
  • Xvala p̆ap̆uli çkimi do Pet̆eri va gomanç̆elu ma. İzmoceten irote antepe k̆ala vort̆i. Oput̆eşi k̆oçepe, txapeti gomanç̆elu ma. Dixaşi sersi, t̆ibaşi oşiralu, k̆ilise do nʒ̆opulaşi oranʒ̆k̆ironişi sersiti gomanç̆elu ma.
  • Noğa Frank̆furt̆is k̆ilise va rt̆ui? Eya k̆iliseşi sersi va ognapt̆ii?
  • Ho, vognapt̆i, mara oput̆eşi k̆ilise do nʒ̆opulaşi oranʒ̆k̆ironişi sersi gomanç̆elu ma.
  • Noğa Frank̆furt̆işi sokağepes gulut̆ui?
  • Var, irote oxoris vort̆i. Oxoris molaxuneri pskidut̆u ma. Edo dido memandaru. İrote sokağepes goxtimu mint̆u ma. Sokağişa toli komiğut̆u. Osimadus mepçi ma. Mu bğoda ağani dolokunepe ma.
  • Oxoris avli uğut̆ui?
  • Kuğut̆u. Hemiti dido didi avli kuğut̆u oxoris.
  • Mitik sokağis goxtimus do avlis osteramus va megişvelui?
  • Var, mitik sokağis goxtimus va memişvelu. Oxoris didi avli kuğut̆u do avlis osteramus derdi komiğut̆u ma. Avlis osteramu şeni gza va momçapt̆u Rot̆enmayer xanumik. Ar nenaten, oxoris molaxuneri mʒ̆ipxu ma oxorcak. Soti va moçkumert̆u emuk. Mati udodginu, udoxunu oput̆eşi hulyape vikipt̆i. Mjoraşi teti va moʒ̆irapt̆es. Açkva şuri mepçap domaʒ̆onu. Çkimi ğuraşi ora moxtimeri ren domaʒ̆onu.

 

  1. Haidi do K̆laraşi Manebroba
  • Dadik skanik si oxorişi mances paraten gamagçu. Oxormancekti si yekç̆opu. Uk̆uleti dadi skanik megaşku do ekşen imt̆u.
  • Ho, Dit̆i dadik ma paraten gamamçeren. Dudxezmetkyari Rot̆enmayer xanumik yemç̆operen. Dadi çkimik ma memaşku do imt̆eren ekşen. Ma mutuşen ambari va miğut̆u. Ma aya dulya vognişi, dixa do nʒa kuxuiktu.
  • P̆ap̆uli skani şeni elapatxeri zop̆ont̆u milletik. Mara dadi skani t̆eren elapatxeri. Para şeni eşo dulya ixveneni? Para mogapu şeni bere gamiçineni?
  • Moro mu, va ixvenen. Para mogapu şeni xvala k̆oçi var, skindinati va gamiçinen.
  • Ok̆açxe dudxezmetkyari Rot̆enmayer xanumik si megişvelui?
  • Var, Rot̆enmayer xanumi çkar va memişvelu. Udodginu ma mzapt̆u emuk. Rot̆enmayer xanumik p̆anda ma memç̆irapapt̆u.  Mu giʒ̆va?! Tabietsuzi rt̆u. K̆ibirepe xʒaperi kuğut̆u. Ot̆orit̆eri rt̆u. Rot̆enmayer xanumişi noxvenepek derdi ma komomçes. Mara K̆lara eşo va rt̆u. K̆larak k̆ai guroni manebra çkimi rt̆u. K̆larak dolokunepe muşi do kalamanepe muşi oçukare komomçu. Qoroponi do žiʒinace rt̆u. Majura xezmertkyarepeti didopeten žiʒinace rt̆es. Sabest̆iani coxoni xezmertkyariti k̆ai manebra çkimi rt̆u.
  • Rot̆enmayer xanumik oxorişi xalk̆i mskibu steri oktapt̆u. Eşo ižiren. Edo irote k̆usuri žiropt̆u.
  • Ho, eşo ikipt̆u. Obecğu p̆anda k̆usuri gorupt̆u. İrote nena memik̆vatupt̆u. Çkar mutu şeni gza va momçapt̆u ma emuk. Çkimi ğuraş dğaşa aşo dopskidaminon domaʒ̆onu.
  • K̆laras nana va uqount̆u, hoi?
  • Ho, K̆laras nana va uqount̆u. K̆lara ç̆iç̆ita rt̆uşi, ğureren nana muşi. Ma mint̆u ki, p̆ap̆uli çkimişa mendapta. K̆laras unt̆u ki, ma muşi k̆ala dopskida oxoris. Mara ma irote toli komiğut̆u p̆ap̆uli çkimi k̆ala oskiduşa oput̆es.
  • Si K̆laras nuşvelt̆i. Emuk irote megişvelt̆u. K̆ai manebrape rt̆it.
  • K̆larakti irote memişvelt̆u. Mati K̆laras mevuşvelt̆i. K̆ai manebra doviqvit artimajuraşa çkin. Ti- gemaleri k̆ulani rt̆u K̆lara. Dimç̆k̆uti va zapt̆u.
  • Oxorişi adeti muç̆oşi gaʒ̆onu? K̆ai gaʒ̆onui?
  • Var, entepeşi adeti k̆ai va maʒ̆onu. Entepeşi oç̆k̆omuşi adeti monk̆a momixtu. Entepeşi sofraşi merasimi monk̆a momixtu. Aya merasimepeten, ma oreksi va miğut̆u oç̆k̆omuşa ipti. Oreksi mamt̆u. Entepeşi oğarğaluşi adeti monk̆a momixtu. Entepeşi onciruşi adeti monk̆a momixtu. Nciri mamt̆u.
  • İrişen dido namu adeti monk̆a mogixt̆u?
  • Sofraşi adeti dido monk̆a komomixtu.
  • Sofraşi merasimi monk̆a mogixtu!
  • Ho! Didi noğaşi oskiduşi adeti monk̆a momixtu. Ma oput̆eşi skidala gomanç̆elu. P̆ap̆uli çkimişi oput̆e gomanç̆elu. Mjaçxaşi nʒ̆opulaşen menebrape gomanç̆elu. K̆arta şeyi saatiten ixvenet̆u aya kvaşi oxoris. Va memaxondinu emk̆ata adetepeşa ma.
  • Oxorişi xalk̆i mutu gimpului?
  • Var, entepek çkar mutu va mimpules. İrote met̆ua rt̆es. Xegonʒ̆k̆imeri rt̆es. Xexampa rt̆es. Aşo matkven. Udolokunu do umodvalu va dopskidi ma. Mu mint̆u, eya astaxolo mixvenes. K̆larak peroni k̆alemepe muşi domoxmarapu.  Osuretuşi xavesoba eşaviği.
  • K̆lara, tekerloğoni tronişen eselu gint̆u si.
  • Ho! K̆lara tekerloğoni tronişen eselu mint̆u ma. Tekerleğoni tronişa kyole rt̆u. Mara K̆laras tekerleğoni tronişen eseluşi omudi va uğut̆u. K̆laras aşkurinet̆u. K̆uçxepeşi jin va dvadginet̆u K̆laras.
  • Mara si irote emus nuşvelt̆i. Ginon na, gaxvenen!
  • Ho, ma emus irote mevuşvelt̆i. Ç̆it̆a- ç̆it̆a dermani kuğut̆u, mara cesareti va uğut̆u K̆laras. Asti Rot̆enmayer xanumikti K̆laras nodgitut̆u. Rot̆enmayer xanumik guri va geçapt̆u K̆laraşi eselus. Ma K̆laras voʒ̆irapt̆i muşi eseluşi gzalepe.
  • Muşeni eşo ikipt̆u Rot̆enmayer xanumik? Mot K̆laras va oʒ̆irapt̆u moşletinuşi gzalepe emuk?
  • Rot̆enmayer xanumik K̆laraşi žabonobaşen k̆ai para mogapt̆u do emuşeni. Emuşeniti emuk va nuşvelt̆u K̆laras.
  • Si p̆anda perdeşen gale ixosart̆i.
  • Ho, xvala do gemzuli vort̆i do emuşeni. Gale vixosart̆i ma.
  • Arndğas p̆ap̆uli skanişi sersiten gok̆uʒxi si. P̆ap̆uli skanişi sersi kogni dogaʒ̆onu.
  • Ho, p̆ap̆uli çkimişi sersi kovogni ma domaʒ̆onu, mara p̆ap̆uli çkimi va rt̆u. Manavi t̆eren. Megerem manavişi sersi t̆eren.
  • Ar ndğas si oxorişen imt̆i. Eşo miçkin. Si muşeni imt̆i oxorişen?
  • Var! Aya mʒxade va ren. Aya xilafi ambari ren. Ma oxorişen va vimt̆i. Ma noğa Frank̆furt̆is goxtimu mint̆u. Goxtimu k̆ai domaʒ̆onet̆u ma. Giçkin, germaşi k̆ulani vore ma. Germa ren dudmoşletineroba çkimi şeni. Mara ma molaxuneri dopskideret̆u aya didi oxoris. Rot̆enmayer xanumi rt̆u mpuleri ʒ̆iʒ̆ila. Emuk sokağis goxtimu şeni gza va momçapt̆u. Avlis osteramu şeniti gza va momçapt̆u emuk. Mutu çare va mažiru.  Emuşeniti dubara voğodi do oxorişen kogamapti ar ndğas. Gale gamapti ma mt̆k̆obaşaşi. Edo sokağapes gopti mskvaşa ma. Dudmoşletineri vort̆i.
  • Si so idi? Muepe žiri Frank̆furt̆işi sokağepes?
  • Dido k̆alabaluği rt̆u. Dimç̆k̆u steri dido k̆oçi kort̆u sokağepes. Mçire do ginže sokağape kort̆es. Xoloti gzalepe  ikipt̆es madulyepek. Xoloti gzalepe omçiranapt̆es milletik.
  • Çkva gok̆vironi varna onç̆eloni muepe žiri si noğa Frank̆furt̆işi sokağepes?
  • Fabrik̆ape k̆idupt̆es madulyepek udodginu. Zup̆ark̆i kort̆u. Bereş p̆ark̆i kort̆u. Op̆eraşi bina kort̆u. Sinemaşi bina kort̆u. Baleşi bina kort̆u. T̆eatr’oşi bina kort̆u. Mara milleti xeleberi va ižiret̆u noğa Frank̆furt̆işi sokağepes.
  • Oput̆es emk̆ata binape va giğut̆es!
  • Ho, va miğut̆es emk̆ata binapa çkin. Gok̆vironi rt̆u.
  • Ok̆açxe namu binape žiri si?
  • Ok̆açxe ar dido didi k̆ilise kobžiri. Astaxolo arşvacis k̆ilises kamapti. Eya k̆ilise dido didi rt̆u noğa Mayenfeldişi k̆iliseşen.
  • Milletik k̆iliseşen si mekt̆k̆çesi?!
  • Var, mitik ma k̆iliseşen var memt̆k̆oçu. K̆ilisepes emk̆ata adeti va uğun. K̆ilise k̆alabaluği va rt̆u. Xvala zangoç̆i kort̆u k̆iliseşi doloxe. Žiʒinace k̆oçi rt̆u. İpti k̆iliseşi dudiraşa yepti. K̆iliseşi ç̆erişa yepti ma. K̆iliseşi ç̆erişen voʒ̆k̆edi.
  • Muşeni yexti k̆iliseşi dudiraşa? Muşeni yexti k̆iliseşi ç̆erişa?
  • Mayenfeldişi mtvironi germape ar kobžira mado yepti ç̆erişa ma?
  • Muepe gažiru k̆iliseşi ç̆erişen? Mayenfeldişi mtvironi germape gažirui k̆iliseşi dudiraşen?
  • Var, ma va mažiru Mayenfeldişi mtvironi germape eya k̆iliseşi dudiraşen. Aya p̆at̆i ambari rt̆u çkimi şeni. Emuşeniti aya xaliten ma doviç̆vi do dovixali.
  • Ok̆açxe oxorişi gza va gogindunui?
  • Var, gza va gomindinu mara, xvala va vort̆i ma. Ar qoroponi musafiriti çkimi k̆ala rt̆u. Ar sup̆rizi komiğut̆u.
  • Mu rt̆u?! Mi rt̆u?! Hele, miʒ̆vi!
  • Ç̆eris ar k̆alat̆i kobžiru ma. K̆alatis meşaxet̆u ar ç̆iç̆it̆a k̆at̆una. Dido qoroponi rt̆u. K̆at̆una guris memaç̆u.
  • Mu qvi em qoroponi k̆at̆una?
  • Ma em k̆at̆una kebzdi do kagepti k̆iliseseşi dudiraşen.
  • K̆iliseşi dudiraşen si va gažiru Mayenfeldişi mtvironi germape, mara ar qoroponi k̆at̆una kožiri! Aya rt̆u Allahişi oçukare!
  • Ho, aya rt̆u Allahişi oçukare. Ma gemzuli vort̆i. Allahik komžiru aya do xeleberi domʒ̆ipxu. Edo xvalanoba gomindinu. Dido qoroponi k̆at̆una maqu ma. K̆iliseşen gamapti do xolo sokağapes gopti ma. K̆at̆una çkimi k̆ala rt̆u.
  • Oxorişi xalk̆ik k̆at̆una žirui?
  • Var, mitik mutu va oxvaʒ̆onu. Çkar mitis ambari va uğut̆u k̆at̆unaşen. Xvala K̆laras ambari kuğut̆u. Emus vuʒ̆veret̆i. Emusti k̆at̆una k̆ai aʒ̆onu. K̆larakti memişvelu k̆at̆una şeni.
  • Mu coxont̆u k̆at̆unas?
  • Pambuği coxont̆u. Aʒ̆i eşo gomaşinen. Edo ç̆it̆a- ç̆it̆a irdet̆u pambuği çkimi. Emus oç̆k̆omale pçapt̆i ma. Emus xe çkimiten vuxezmetupt̆i.
  • So skidut̆u k̆at̆una skani?
  • İpti çkimi k̆ala skidut̆u, oda çkimis skidut̆u. Loqa- loqa gemiyapupt̆u. Mara arndğas Rot̆enmayer xanumik kognu k̆at̆unaşi sersi do didelu. Emuk k̆at̆una çkimi kemizdu oda çkimişen.
  • Vay ti çkimis! Zvali pambuği!
  • Oxorişen k̆at̆una çkimi get̆k̆oçu şeni emedeni xezmetkyari Sabest̆ianis geçinadu Rot̆enmayer xanumik.
  • Xezmetkyari Sabest̆ianik Rot̆enmayer xanumis nusiminui?
  • Var, va nusiminu. Quci va meçu emus. Ç̆eris ar umanceli do upşu oda kort̆u do ek dovobargit k̆at̆una çkimi çkin.
  • K̆ai guroni t̆eren xezmetkyari Sabest̆iani.
  • Ho, k̆ai manebra çkimi rt̆u do irote memişvelt̆u
  • K̆arta k̆oçi ark̆aeli va ren.
  • Ho, k̆arta k̆oçi ark̆aeli va iqven!
  • Rot̆enmayer xanumis žegne uğut̆ui?!
  • Ho, kuğut̆u.
  • Mu rt̆u žegne muşi?!
  • Şamama rt̆u muşi žegne!
  • Açkva xvala va rt̆i eya didi kvaşi oxoris. Ar manebrape çkva kogiqonut̆u.
  • Ho, sum manebra komiqonut̆u ma.
  • Pambuği, K̆lara do Sabest̆iani!
  • Açkva xvala va re! Qoroponi do žiʒinace manebrape kogiqonun!
  • Ho! K̆larati, Sabest̆iani, k̆at̆unati k̆ai guroni manebrape çkimi rt̆es eya kvaşi qini oxoris. Oskiduşi xela momçapt̆es entepek. ʒ̆oxleni steri xvala va vort̆i. Am magebrape çkimik ma skidalas qoropaten komemok̆ires.

 

  1. Dinana
  • Arndğas K̆laraşi dinanati oxorişa komextu. Eşo komşuns aʒ̆i. Muç̆oşi xanumi rt̆u K̆laraşi dinana?
  • Dido k̆ai xanumi rt̆u. Didşuroni oxorca rt̆u. K̆itxeri do çkineri oxorca rt̆u. Xçe tomaloni rt̆u. Žiʒinace xanumi rt̆u. Ar ketabiti komomçu. Emuk oçukare komomçeret̆u.
  • Ketabi muç̆oşi rt̆u? Mu ambarepe meçapt̆u oçukare ketabi muşik?
  • Ketabik ar oput̆e do oput̆eşi xalk̆işi skidalaşen ambarepe meçapt̆u. Buncina, nʒa, dixa do skindinapeşen ambarepe meçapt̆u eya ketabik. Mara k̆aixeşa ok̆itxu va miçk̆it̆u. Dinanak ketabişen p̆aşurape mik̆itxupt̆u udoginu.
  • Oçukare ketabi k̆ai gaʒ̆onu, hoi?
  • Ho, ketabi dido k̆ai maʒ̆onu. Onç̆eloni ketabi rt̆u. Mara p̆ap̆uli çkimi, P̆et̆eri, dinana, Noğa Mayenfeldi, oput̆e Dorfli, paʒxa çkini, oput̆eşi skidala gomaşinu ma. Edo entepeşi xasret̆işa açkva va memaxondinet̆u ma. Guris memodgitu xasret̆i. Dopxedi do udodginu şik̆ineri- şik̆ineri vimgari ma. İgbali gokteri miğut̆u ma. K̆urbetis xvala- xvala vort̆i ma. Umiteli vort̆i aya didi kvaşi oxoris. Qini rt̆u. Tolepe uteeli dopskidi.
  • Oput̆eşen umuteli do umiteli rt̆i do emuşeni.
  • Ho, oput̆eşa xasret̆i dolomižit̆u guris. İrote oput̆eşa gza bgorupt̆i. Guris mgarini momixtept̆u. Mara teselli komiğut̆u. K̆lara do dinana muşi, Sanest̆iani do pambuği k̆ala vort̆i. Amʒika guri mixvenet̆u K̆laraşi nandidikti. Guri çiçku komiğut̆u ma.
  • Ketabi k̆aixeşa ik̆itxii, dinanas gok̆itxapii?
  • Ar fara var, oşi fara vik̆itxit do vok̆itxapi eya k̆etabi ma. Dinanak ark̆ele ketabi mik̆itxupt̆u, majura k̆eleti alboni ç̆it̆a- ç̆it̆a mogurapt̆u. İrote udodinu çkimi xalitenti derdi zdipt̆u zavali dinanak.
  • K̆laraşi dinanati k̆ai guroni rt̆eren. Ok̆itxu k̆aixeşa gagurui si?
  • Gagurui mu tkvala ren? Moro mu, ma maguru matkven. Ç̆it̆a- ç̆it̆a miçkit̆u. Ç̆it̆a- ç̆it̆a mak̆itxet̆u. Ok̆açxeti K̆andidat̆i begişenti doviguri ma.
  • K̆andidat̆i begi mi rt̆u? Mu dulya ikipt̆u em k̆oçik oxoris?
  • Emindroneri xampa ocağepes doxmeli mamgurapalepe kuqount̆es berepe mutepeşi şeni. K̆andidat̆i begi, K̆laraşi doxmeli mamgurapale rt̆u. Emuk doxmeli dersepe meçapt̆u K̆laras oxoris.
  • Mamgurapale K̆andidat̆i begi muç̆oşi k̆oçi rt̆u?
  • Dido çkinerk̆oçi rt̆u K̆andidat̆i begi. Dido zaifi rt̆u. Uça toloni rt̆u. Toma va uğut̆u tis. Tip̆et̆k̆eleri rt̆u. Pimpili do oşumeşiti va uğut̆u. Ofiditi va uğut̆u. Dido ginže çxvindi do jur dido didi quci kuğut̆u k̆oçis. Muç̆o k̆ap̆k̆ap̆i eşo rt̆u. Oşkurinoni nunk̆u kuğut̆u. İrote ğvinimşumu steri rt̆u. Mara dido mskva sersi kuğut̆u.
  • Muk̆o ʒ̆aneri rt̆u em mamgurapale?
  • Va maçkinu, va oxomaʒ̆onu ma. P̆ap̆uli çkimişen badi ižiret̆u. Eşo matkven.
  • K̆ai guroni rt̆ui K̆andidat̆i begik?
  • Çkinerk̆oçi rt̆u, mara timoʒ̆onderi rt̆u. Emuk ç̆it̆a mşinapt̆u, mundixomula mşinapt̆u. Rot̆enmayer xanumişi k̆udeli rt̆u. Çkimden dido ink̆raxi kuğut̆u emus. K̆andidat̆i begis qucikti k̆ai va ugnapt̆u. Tolik k̆ai va užiropt̆u. Çorçi k̆oçi rt̆u. P̆alalo rt̆u. Rot̆enmayer xanumişi nenaten gulut̆u irote.
  • Muepe gogurapt̆u K̆andidat̆i begik?
  • Alamanuri Nenaşi gramerişi k̆aidepe mogurapt̆u emuk. Didi do ç̆it̆a boncepe, nokta, virguli do entepeşi sva do becitoba mogurapt̆u K̆andidat̆i begik.
  • Çkva mu gogurapt̆u K̆andidat̆i begik?
  • K̆andidat̆i begik k̆aixeşa Latinuri nena kuçkit̆u. Xesap̆i uçkit̆u. Latinuri nenaşi grameri mogurapt̆u. Ma xesap̆i mogurapt̆u emuk. Suretişi dersi komiğut̆es. Musik̆işi dersi komiğut̆es. Oxoronuşi dersiti kort̆u. Oxoronuti doviguri ma. Çkin birapape vibirt̆it mele-mole. Dest̆anepe ptkumert̆it çkin loqaşa.
  • ʒ̆k̆ari steri igurapt̆i! Namu birapape ibirt̆it?
  • Alamanuri, İt̆alyanuri, Fransuli birapape vigurapt̆it do vibirt̆it loqaşa. Op̆erapa vibirt̆it. Xalk̆uri birapape vibirt̆it çkin. Dido xampa musik̆işi rep̆ert̆uari maqu.
  • Dido xampa musik̆işi rep̆ert̆uari qaqu. Dido k̆ai! Musik̆işi not̆a do solfejiti gagoresi?
  • Ho, not̆ati, solfejiti dovigurit. K̆andidat̆i begik eyati çkin domogures.
  • K̆laras musik̆aluri inst̆rument̆i uğut̆ui?
  • Ho, kuğut̆u. P̆iana kuğut̆u do mskvaşa gelaçapt̆u.
  • K̆andidat̆i begik mu isnst̆ument̆i gelaçapt̆u?
  • Flut̆i gelaçapt̆u emuk.
  • Si mu inst̆rument̆i gelaçapt̆i?
  • Ma p̆ililişa toli komiğut̆u. Pet̆erişen p̆ililişa gegaperi vort̆i.
  • Mara K̆andidat̆i begis p̆ilili va uğut̆u. İpti flut̆i muşi komomçu. Edo ma flut̆i gelaçapt̆i. Pet̆erişi p̆ililişen armʒika gelaçamu dovigureret̆i do emuşeni.
  • Pet̆eris not̆a do solfeji va uçkit̆u. Eşo va reni?
  • Ho, Pet̆eris not̆aşen do solfejişen çkar ambari va uğut̆u, mara loqaşa gelaçapt̆u. K̆andidat̆i begik not̆aten gelaçamu domoguru.
  • Flut̆i gelaçamu k̆aixeşa gagurui?
  • Ho, mç̆ipaşaşi doviguri ma.
  • Ok̆itxu do oç̆aru dobağine gagurui? Latinuri nenaşi grameri do xesap̆i gagurui si?
  • Ho, ok̆itxu-oç̆aru dobağine doviguri ma. Latinuri grameriti, xesap̆iti doviguri, domaguru..
  • K̆andidat̆i begişen Latinuri Nena do xesap̆i mç̆ipaşaşi gagurui si?
  • Mteli xolo var, mç̆ipaşaşi var, mara ç̆it̆a- ç̆it̆a doviguri.
  • Si k̆ai mamgure rt̆i. K̆andidat̆i begis ağani xali skani k̆ai aʒ̆onui?
  • Moro mu, K̆andidat̆i begis ağani xali çkimi k̆ai aʒ̆onu do ok̆açxe mundixomula çkar va mşinu. Ağani xali çkimi kožiru do emuşk̆ule ma çkar ç̆it̆a va mşinu. İrote mskva nenape miʒ̆u do açkva çkimden çkar ink̆raxi kuğut̆u K̆andidat̆i begis. Oncğore aqu k̆oçis. Emuk ma domosağu. Ugurapobaşen ma momişletinu K̆andidat̆i begik. Edo vizengini. Seri-dğaleri va dobdgiti do ağani ambarepe doviguri ma. Gurapaten k̆vinçi doviqvi do udodginu vputxi ma. Lai şkvit nʒaş jin vort̆i gurapaşi menceliten.
  • K̆andidat̆i begik megişveleren. K̆andidat̆i begik mʒ̆k̆upişen k̆ap̆ineri mogişletineren. Megerem k̆ai k̆oçi t̆eren. Didşuroni t̆eren. Namusoni t̆eren. Aʒ̆i ma gemzuli kodopskidi. Edo oncğore maqu ma. Asteri k̆oçi dido va ižiren aya dunyas.
  • Ho, K̆andidat̆i begik çkinapa do k̆ult̆uri muşiten mozenginu. Açkva k̆arta dulyas otxo toliten voʒ̆k̆ert̆i ma. Açkva xaziri vort̆i cahiloba mergapuşa. Ç̆ara miçkit̆u ma. Hukmi maxvenet̆u.
  • Çkva miepek megişvelu ok̆itxu-oç̆aru-osuretus?
  • Ok̆itxu- oç̆aru- osuretus K̆larakti, dinanakti, Sabest̆ianikti irote memişvelu.
  • Skani ağani xaliten K̆lara do dinanakti ixelesi?
  • Moro mu, ixeles.
  • Rot̆enmayer xanumikti ixelui skani gecginobaten?
  • Var, emuk çkar va ixelu. Gecginoba çkimi ak̆isk̆anet̆u. Ar nenaten si xesap̆i qvi! Ma ç̆iç̆it̆a bere vore, Rot̆enmayer xanumi ren k̆oca oxorca!
  • Muşeni eşo ikipt̆u Rot̆enmayer xanumik?
  • Fuk̆arepe k̆ai va aʒ̆onet̆u oxorcas. Berepe k̆ai va aʒ̆onet̆u Rot̆enmayer xanumis.
  • Onç̆eloni oxorca t̆eren! Hemiti nosi mğiri uğut̆eren Rot̆enmayer xanumis.
  • Oxoşirşoleri dulyape kuğut̆u emus.
  • Qoropa do vicdani va uğut̆eren oxorcas.
  • Xampa k̆oçişa t̆oli va uğut̆u. Para do xampobaşa toli kuğut̆u oxorcas. Tolužgu rt̆u.
  • Rot̆enmayer xanumik si gbaxupt̆ui?
  • Var, va mbaxupt̆u. Emk̆ata ceza va rt̆u oxoris. Rot̆enmayer xanumik irote nenaten mbaxupt̆u. Mara açkva dudi çkimi gordinuşi gzas vort̆i. Udodginu k̆arta speroşen vigurapt̆i ma
  • Si ʒ̆ori zop̆on. Si açkva k̆ap̆et̆i rt̆i skidalas.
  • Umuteloba do umiteloba p̆at̆i ren, mara ugurapoba irişen p̆at̆i ren!

 

  1. K̆laraşi Baba
  • Ar ndğas K̆laraşi baba komextu. Zizimani begi oxorişa komextu.
  • Ho, K̆laraşi baba komexteret̆u. Oçukarepeten komexteret̆u. Ağani ʒ̆anaşi ora rt̆u.
  • Muç̆oşi k̆oçi rt̆u K̆laraşi baba? Muepe gatkven si em k̆oçişen.
  • Ginže k̆oçi rt̆u, t̆anmağali. Mçire mxucepe kuğut̆u. Mk̆ule tomaloni rt̆u. Mzoğaşperi tolepe kuğut̆u.
  • Pimpili do oşumeşi uğut̆ui Zizimani begis?
  • Oşumeşi kuğutu, mara pimpili va uğut̆u. Upimpile rt̆u. Varti gvaneri varti sap̆ara rt̆u. K̆oçinoboni k̆oçi rt̆u. Noseri k̆oçi rt̆u. Fuk̆ara nosişi k̆oçi va rt̆u. P̆anda žiʒinace rt̆u.
  • Zizimani begik si megişvelui?
  • Ho, emuk irot̆e mskvaşa ma memişvelu. Oçukareti komomçeret̆u ma emuk. Emus k̆oçinuri çkar k̆usuri va uğut̆u.
  • Si mu oçukare mekçeret̆u Zizimani begik?
  • Camişi kyure komomçeret̆u. Ç̆iç̆it̆a rt̆u kyure. Manzaroni k̆rist̆ali kyure komomçeret̆u Zizimani begik?
  • Muşi manzara uğut̆u k̆rist̆ali kyures?
  • Mtvironi manzara kuğut̆u k̆rist̆ali kyures. Edo dido k̆ai domaʒ̆onu eya oçukare. K̆rist̆ali kyureşi manzara nungapt̆u p̆ap̆uli çkimişi paʒxas do emuşeni.
  • Xeleberi rt̆i. Eya k̆rist̆ali kyurek oput̆e skani gožirapt̆u do emuşeni!
  • Ho, hemiti dido! K̆larati xeleberi rt̆u. Emusti oçukare komomçeret̆u Zizimani begik.
  • K̆laraşi oçukare mu rt̆u?!
  • Babaʒ̆a rt̆u. K̆laraşi oçukare, babaʒ̆a rt̆u. Noğa P̆arisişi noxvene rt̆eren eya babaʒ̆a. Dido paxali t̆eren.
  • K̆lara xeleberi rt̆u aya babaʒ̆aten!
  • Ho, xeleberi rt̆u. Mara K̆laras ʒ̆oxleşenti babaʒ̆ape kuğut̆u oxoris. Hemiti ar var, dido. Mara K̆lara didopetenti çkimi k̆ala dido xeleberi do keifoni rt̆u. K̆laraşi aya mskva xali kožiru do dido ixelu Zizimani begikti.
  • K̆lara xeleberi do keifoni rt̆u, mara si xeleberi do keifoni va rt̆i. Eşo va reni?
  • Ho, ma xeleberi va vort̆i. Emuşeniti keifoni va vort̆i ma. Ma irote gza bgorupt̆u noğa Mayenfeldişa oxtimu şeni.
  • Si p̆anda gemzuli rt̆i. P̆ap̆uli skani skani k̆ala va rt̆u.
  • Ho! İrote gemzuli vort̆i. Gemzuli- gemzuli govulurt̆u eya didi oxoris. Ma p̆ap̆uli çkimi k̆ala oskidu mint̆u. Pet̆eri k̆ala goxtimu mint̆u çkini zenepes.
  • Zizimani begik aya xali skani va žiropt̆ui? Skani uxeloba va oxvaʒ̆onu emus?
  • Moro mu, oxvaʒ̆onu, koxoʒ̆onu. Zizimani begi k̆ai guroni rt̆u do aya xali çkimiti kožiropt̆u. Edo çarepe gorupt̆u emuk.
  • Zizimani begis çare ažirui xali skanişa? Mu çare žiru?
  • Xali çkimişa çare ažiru emus!
  • Çare mu rt̆u?
  • Mayenfeldişa oxtimu do p̆ap̆uli çkimi k̆ala oskidu t̆eren çkimi ç̆ami.
  • Noğa Mayenfeldişa oxtimuşa izni mekçii Zizimani begik?
  • Ho, Zizimani begik noğa Mayenfeldişa oxtimuşa izni komomçu, mara K̆larak ekşen oxtimuşa izni va momçu. Edo emedeni omgarinus kogeoç̆k̆u zavali K̆larak. Xvala do k̆ak̆vat̆a rt̆u. Zavali k̆ulanis manebra va uqonut̆u didi oxoris.
  • Si mu qvi? Siti zavali xalis rt̆i. Umiteli rt̆i eya kvaşi k̆oca oxoris.
  • Ho, eşo vort̆i. Mara govonk̆vati do oxoris dopskidi K̆lara k̆ala. K̆lara xeleberi rt̆u çkimi k̆ala. Çkin k̆ai manebrape vort̆it. K̆larati ma memingapt̆u. Ma K̆laras mevungapt̆i. Çkin juriti xvala vort̆it.
  • Si mjora va rt̆i, mara te skaniten otanapt̆i. Si lukuna rt̆i mʒ̆k̆upis. Vicdani do qoropa kuğut̆u si.
  • Oput̆eşa oxtimuşa çare va mažiru ma.
  • Si do Pet̆eri k̆alati k̆ai manebrape rt̆it.
  • Eşo rt̆u, mara Pet̆eri xvala va rt̆u! K̆larak uçkimeli imgart̆u do memaxondineret̆u!
  • Solen giçkin, gonep Pet̆erikti uskaneli imgart̆u. Gaçkineni?
  • Var, va maçkinu aya.
  • Ok̆açxeti p̆at̆i dižabuni si! Eşo miçkin! Fizik̆uri zabunoba va rt̆u. Psikolojiuri rt̆u skani žabonoba!
  • Ho, psikolojiuri žabunoba rt̆u. Ma dovižabuni do sovnablist̆obaşi žabunoba maqveren. Emindros ma mutuşen ambari va miğut̆u.
  • Sovnablist̆obaşi žabunoba mu ren? Hele, miʒ̆vi!
  • Nciris goxtimu t̆eren. Si nciris re. Nciris gulur, mara mutuşen ambari va giğun. Mtel oxoris gulur, nciris re. Goʒ̆k̆uʒxaşi, mutuşen ambari va giğun. Aya žabuni ren sovnablist̆oba.
  • Mati amk̆ata zabunoba komiğut̆u, bere vort̆işi.
  • Hoi?! Eşoi?!
  • Ho! Aya žabunoba gont̆aleri ren.
  • Aya va miçkit̆u ma.
  • Si žabuni rt̆i, mara žabunoba skanişen ambari va giğut̆u!
  • Ho, ambari va miğut̆u. Ma govulur nciris. Majurapek ognapan k̆uçxeşi sersepe. Maxirce komoxteren oxorişa yado daʒ̆onerenan oxorişi miletis. Livori dokaçeri doçveren Zizimani begik. Axiristi kožireren maxirce(!) Zizimani begik.
  • Si aya xalis koziresşi, mu qverenan?!
  • Hekimis ucoxeren Zizimani begik. Hekimi komemixteren. Ma mutuşen ambari va miğun. Nciris vore xolo.
  • Oxžabuneşen hekimi komegixtui!
  • Var, Zizimani begis doxmeli hekimi kuqonut̆eren. Emu komemixteren.
  • Muç̆oşi k̆oçi rt̆u?
  • K̆ai k̆oçi rt̆u. P̆anda memişvelu emuk.
  • Aʒ̆i komoptat žabunoba skanişa! Aya žabunobaşi sebebi mu rt̆eren? Mu tkveren hekimik?
  • Žabunoba çkimişi sebebi rt̆eren oput̆e do p̆ap̆ulişa xasret̆i.
  • Ç̆amişi dulya va ren. Qoropaşi dulya rt̆u. Xasret̆ik eşo ikips. Siti žabuni gʒ̆ipxu xasret̆ik! Hekimik dogik̆arui žabunoba?!
  • Ho, xasretik mati žabuni mʒ̆ipxu. Buncina, nʒa, dixa, gola, germa, skindinape, manebrape do p̆ap̆uli çkimişa xasret̆i t̆eren aya žabunobaşi sebebi.
  • Mayenfeldişa oxtimuşen çkva çare va giğut̆u! Oput̆eşa gegapineri rt̆u. Oput̆eşi skidalaşa gegapineri rt̆u. Oput̆eşa oxtimoni rt̆i.
  • Ho, oput̆eşa oxtimuşen çkva çare va miğut̆u ma. Eşo miʒ̆u hekimikti.
  • Xasret̆ik dogç̆veret̆u do dogxaleret̆u
  • Ho, xasret̆ik domç̆veret̆u do domxaleret̆u. ʒ̆oxleşen gurik mutu va migorupt̆u. Mara hekimişi k̆arariten vixeli ma. Oreksiti komemixtu.
  • Ok̆açxe mu iqu?! Çkva mu ambari giğun si?
  • Zizimani begik noğa Mayenfeldişa ma mendemoçkvu. Aya ambariten dovimuruʒxi ma. Dovişeni!
  • Aya xasret̆is kamogişletinu hekimik. Dido şeyepe tis megixteret̆u! K̆larakti megiqucu!
  • Ho, K̆larakti memiqucu! Razi iqu.Çkva gza va uğut̆u zavali k̆ulanis.
  • Guris mu giğut̆u?
  • Ma oput̆e çkimişa oxtimu mint̆u. Xasret̆is kamomişletinu Zizimani begik.
  • Si mi k̆ala mendegoçkvu emuk?
  • Xezmetkyari Sabest̆iani k̆ala St̆aʒiaşak mendemoçkvu ma noğa Frank̆furt̆işen.
  • Xezmetkyari Sabest̆ianik trenis gegxedu si.Trenis xvala rt̆i!?
  • Ho, ma xvala vort̆i trenis. Noğa Frank̆furtişen trenis gepxedi do eşo mendapti.
  • Trenisti xvala- xvala rt̆i!
  • Ho, xvala vort̆i ma. Mtini giʒ̆va, xvala va vort̆i ma. Ketabepe komiğut̆u do udodginu vik̆itxi ma. Gazetati komiğut̆u. Jurnali komiğut̆u ʒanʒas. ʒ̆oxleşen gazetaşi renobaşen çkar ambari va miğut̆u, oput̆es vort̆işi ma. Jurnalişenti çkar ambari va miğut̆u ma. Jurnelepe, suretoni iqvet̆u didopeten.
  • K̆lara razi iqu! Mu tku emuk?
  • Ho, K̆lara ʒ̆oxleşen razi va iqu, mara Zizimani begik emus ocerapu. Dinanakti ocerapu K̆laras. Hekimikti žabunoba çkimişen ambari meçeren K̆laras. Aşoten oxtimuşa izni komomçu K̆lara çkimik.
  • Açkva xasret̆i gogindinu. K̆arta kva sva muşis monk̆a iqven!
  • Ho, mtini zop̆on. Kva sva muşis monk̆a iqven! Mati eşo.
  • Açkva raxat̆i rt̆i.
  • Ho! Noğa Mayenfeldişa mendapti.
  • Xasret̆i gogindinu!
  • Ho, xasret̆i gomindinu. Xasret̆i mep̆t̆k̆oçi k̆ap̆ulaşen. Açkva dovinosereret̆u ma. Udodginu Allahi çkimis şukuri vuʒ̆vi magzalobas.
  • ʒ̆oxleşenti noseri rt̆u oput̆es. Ma aʒ̆i hemi noseri hemiti k̆itxeri rt̆i. Hemuşeniti mskvaşa hukmi gaxvenet̆u si.
  • K̆oçis xvala nosi va ubağun, oguruti lazimi ren!

 

  1. Mcveşi Manebrape K̆ala
  • Açkva oput̆e skanis rt̆i. Xolo mance gaqveret̆u. Xvala va rt̆i açkva.
  • Açkva xvala va vort̆i ma. Manca maqu ma.
  • Si oput̆e Dorflişa guiktişi, ipti miepe žiri?
  • İpti manžagerepe kobžiri ma sokağepes. Entepek komžires ma sokağis.
  • Manžagerepek si gžiresşi, mu qves? İxelesi?
  • Ho! Milletis gaak̆viru do ipti moşvacinoni şeni kemepti yado açkines manžagerepes.
  • Aya xilafi ambari rt̆u. ʒ̆ori ambari entepes ognapii si?
  • Ho, vognapi do irik ixelu. Milletik ma mqoropt̆u.
  • Bedigoç̆veri bere rt̆u si. Ok̆açxe p̆ap̆uli skanişi paʒxaşa mextii?
  • Var, Pet̆erepeşi oxorişa mendapti ipti ma.
  • Muşeni ipti Pet̆erepeşi oxorişa mendaxti si?
  • Pet̆erişi oxori, oput̆eşi doloxe rt̆u. P̆ap̆uli çkimisti oxori kuğut̆u oput̆es. Mara eya oxoris va skidut̆u. Rak̆anis rt̆u p̆ap̆uli çkimişi paʒxa. Ek skidut̆u, giçkin! Rak̆anis geladgit̆u paʒxa muşi. Emuşeni ipti Pet̆erepeşi oxorişa komepti ma.
  • Pet̆erik si gžiraşi mu qu? Dido oraşen doni artimajuraşen mendra rt̆it.
  • Var, ma emu va mažiru.
  • Muşeni va gažiru Pet̆eri?
  • Pet̆eri oxoris va rt̆u. Ma emu va mažiru.
  • Oxoris miti gažirui si?
  • Ho, mažiru.
  • Mi rt̆u oxoris? Dinanai?!
  • Ho, xvala dinana kort̆u oxoris. Edo xvala rt̆u.
  • Dinanak si gžiruşi, mu qu?! Mtini nenaten giʒ̆va; sersi skani ognuşi, dinanak ixelui?
  • Ho, dido ixelu dinanak. Xelaten t̆ura ğurut̆u!
  • Si dinana k̆ala muepe ğarğali? Mu amberepe meçi emus?
  • Açkva ak vore ma ptkvi. Açkva oput̆es pskidaminon ma ptkvi. Açkva xvala va re ma ptkvi.
  • Dinanak mupe giʒ̆u?
  • Nenaten va itkven muşi xela. Mati nenaten va matkven muşi xela. Dido ixelu. Edo xelaten omgarinus do mutu var. Ar k̆ele ma vimgart̆i majura k̆ele emuk imgart̆u.
  • Ok̆açxe muepe qvit? Muepe ğarğalit?
  • İpti oçukare muşi komepçi emus.
  • Mu rt̆u oçukare muşi?!
  • P̆arfumi rt̆u. Noğa Frank̆furt̆işi monoçane rt̆eren. Mara p̆arfumişen ambari va uğut̆eren zavalis.
  • Dinanas p̆arfumi k̆ai aʒ̆onui?
  • Ho! Ma dinanas qalis kodolovak̆idi. Dinanak ma qalis dolomak̆idu. K̆laraşi dinanak ar ketabi komomçeret̆u. Eya ketabişen ar- jur mk̆ule p̆aşura vik̆itxi emus. Nandidik p̆aşurapes nusiminu do dido ixelu.
  • Eya p̆aşura k̆ai aʒ̆onui dinanas!
  • Ho, dido! Ketabi suretoni rt̆u. Nandidi utole rt̆u. Ma vik̆itxupt̆i. Emuk suretepeşen ambarepe momçapt̆u. Dido k̆ap̆et̆i gagnapa kuğut̆u dinanas do mati govişaşi.
  • Pet̆eri do nana muşi so t̆erenan?
  • Pet̆eri nʒ̆opulas t̆eren. Nana muşiti qonas t̆eren.
  • Ho, komevagni.
  • Ok̆açxe tito- tito entepeti komextes oxorişa.
  • İpti mik mextu oxorişa? Pet̆erii?
  • Var! İpti Pet̆erişi nana komextu oxorişa. Ma Pet̆erişi nanas qalis kodolovak̆idi. Pet̆erişi nanak ma qalis dolomak̆idu.
  • Pet̆erişi nanak si gžiruşi dido ixelu. Eşo ižiren.
  • Ho, dido! Pet̆erişi nanak ma mžiruşi dido ixelu.
  • Emusti ʒ̆ori ambari meçii?
  • Ho, emusti ʒ̆ori ambari çkimi komepçi ma. Açkva tkvani k̆ala vort̆i ya vuʒ̆vi.
  • Ho, dido k̆ai! İxeleren zavalik.
  • K̆lara do muşi dinanak Pet̆eri, dinana do nana muşi şeni ma oçukarepe komomçeret̆es. Ma xemboşi va ok̆onomoktines oput̆eşa.
  • Mu rt̆u Pet̆erişi nanaşi oçukare?
  • Met̆aksişi şarpa! Orkoşi paloroni yazma.
  • Pet̆erişi nanas eya şarpa k̆ai aʒ̆onui?
  • Moro mu, k̆ai aʒ̆onu!
  • Pet̆eri va mextui?
  • Ar saati şk̆ule, nʒ̆opulaşen komextu oxorişa. Mextuşi, ma Pet̆eris qalis kodolovak̆idi. Pet̆erikti qalis dolomak̆idu. Edo oçukare muşi komepçi emus.
  • Pet̆erişi oçukare mu rt̆u?
  • Şekeleme, virvili do met̆alişi p̆ilili.
  • Pet̆eris ağani p̆ilili k̆ai aʒ̆onui?
  • Ho, dido k̆ai aʒ̆onu do emedeni gelaçamus kogeoç̆k̆u. Edo piʒarişi p̆ilili muşi ma komomçu. Oçukare komomçu eya.
  • Ok̆açxe mu qvit?
  • Ok̆açxe Pet̆eri k̆ala p̆ap̆uli çkimişi paʒxaşa mendapti ma. Rak̆anişa yeptit.
  • P̆ap̆uli skanik si gžiruşi, mu qu?
  • Dido ixelu p̆ap̆uli çkimik. Pap̆uli çkimik qalis dolomak̆idu do k̆vas memacundu ma. Oçukare muşiti komepçi p̆ap̆uli çkimis.
  • Oçukare muşi mu rt̆u?
  • Muşt̆uk̆i rt̆u! Muşt̆uk̆i do tutuni rt̆u muşi oçukare. Entepe k̆omepçi ma p̆ap̆uli çkimis.
  • P̆ap̆uli skanis oçukare muşi k̆ai aʒ̆onui?
  • Ho, k̆ai aʒ̆onu. Noğaşi dulya rt̆u muşt̆uk̆i. Tutuniti noğa Soxumişen t̆eren.
  • Noğa Soxumi so rt̆eren, giçkini?
  • K̆afk̆asias t̆eren eya noğa. Tutunişi p̆lant̆asyoniten çinoberi t̆eren noğa Soxumi. Avrup̆uri turcarepes kuğut̆eren tutunişi p̆lant̆asyoni noğa Soxumis. Edo am Avrupuri turcarepek tutunişi ticareti ikipt̆erenan noğa Soxumişen noğa Frank̆furt̆işa.
  • Emora şk̆ule si p̆ap̆uli skani k̆ala skidagint̆u. Aya ambari ognuşi, mu qu p̆ap̆uli skanik?
  • Dido dido ixelu p̆ap̆uli çkimik. Ok̆açxe manžagerepekti komextes paʒxaşa.
  • Manžagerepek mu qves? Si megarges manžagerepek!
  • Ho, entepekti memarges ma paʒxas.
  • Entepek paʒxas çkin momik̆itxes do çkvadoçkva oçukarepe momiğes çkinda. Milleti kok̆ibğes ç̆it̆a paʒxas do ç̆anda kododges. Coğorikti xelaten loqaşa lalupt̆u ma. Mu qvas!
  • Si coğoris oç̆k̆omale çapt̆i.  Em coğoris Josefi coxont̆u!
  • Ho, p̆ap̆uli çkimişi coğori rt̆u Josefi.
  • Manžagerepek mu oçukarepe mogiğes tkvanda?
  • Markvali, kovali do amk̆ata oç̆k̆omalepe komomiğes. Aʒ̆i aşo komşuns ma. Mati musafirepes şekeleme
  • Noğa Frank̆furt̆is meç̆ireli ora gaqveret̆u mara, açkva xeleberi rt̆i. Dudmoşletineri rt̆i. P̆ap̆uli skani k̆ala rt̆i. Pet̆eri, nana do dinana muşi k̆ala rt̆i. Germape, rak̆anepe, buncina k̆ala rt̆i xolo.
  • Ho, noğa Frank̆furt̆is meç̆ireli orape maqveret̆u, mara k̆ai manebrapeti maqveret̆u. K̆lara, dinana muşi, xezmetkyari Sabest̆iani k̆ai manebrape çkimi rt̆es. Pambuğiti eşo. Xeleberi vort̆i, mara nosi K̆laras kodomoskideret̆u.
  • Noğa Frank̆furt̆is rt̆i, xasret̆i giğut̆u oput̆eşa. K̆urbetis rt̆i, mara K̆andidat̆ik begik megişvelu do k̆arta şeyi diguri si! Guri k̆ap̆et̆i giğut̆u açkva.
  • Ho, guri k̆ap̆eti komiğut̆u açkva. Dido şeyi doviguri ma K̆andidat̆ik begişen. Mara xoloti xeleberi va vort̆i.
  • Muşeni xeleberi va rt̆i si?
  • Xolo xasret̆i komiğut̆u ma.
  • Muşi xasret̆i giğut̆u si aʒ̆i?
  • K̆laraşa xasret̆i komiğut̆u. Didi nanaşa xasret̆i komiğut̆u. K̆at̆una çkimişa xasret̆i komiğut̆u. Entepeşen mendra dopskidi ma do emuşeni.
  • Pambuği noğa Frank̆furt̆is doskidu. Eşo reni?!
  • Ho k̆at̆una çkimi kodoskidu noğa Frank̆furt̆is. Noğa Frank̆furt̆is yeçkindineri rt̆u do emuşeni. Pambuği çkimi Frank̆furt̆uri rt̆u. Emuşeniti emu ak mevaşkvi ma. K̆lara k̆ala skidut̆u k̆at̆una çkimi.
  1. K̆laraşi Didi Sup̆rizi
  • Noğa Frank̆furt̆is p̆ap̆uli skanişi omuditen xert̆i. Aʒ̆iti K̆laraşi omuditen xert̆i oput̆e Dorflis!
  • Xe- gontxeri pçumert̆i K̆lara çkimi ma. Lai p̆anda K̆lara k̆ala vort̆i oput̆es. Mitxani mok̆ʒ̆ondaşi, emus mance re si! P̆anda aşo ren! Eşo itkvet̆u didilepek.

–   Mʒika ora kogolaxtu. Arndğas Frank̆furt̆uri K̆larak sup̆rizi qu do oput̆e Dorflişa komextu. Didi sup̆rizi rt̆u skani şeni!

–  Ho, K̆larak sup̆rizi qu. Didi sup̆rizi rt̆u. Aya rt̆u dido mskva surp̆rizi.

-K̆lara mi k̆ala komexteret̆u oput̆e Dorflişa.

– Giçkin, K̆lara k̆ak̆vat̆a do ogzaluşi menceli va uğut̆u emus. Majurapeti muşi k̆ala rt̆u. Entepe k̆ala komexteret̆u K̆lara.

– Mi rt̆es majurape? Mi rt̆es majura musafirepe?!

– Dinana muşi, baba muşi, hekimi muşi, xezmetkyari Sabest̆iani do Rot̆enmayer xanumiti komextu oput̆e Dorflişa.

– Entepes oput̆eşi xalk̆i, buncina do skidala k̆ai aʒ̆onesi?

– K̆lara, dinana muşi, baba muşi, hekimi begi, xezmetkyari Sabest̆ianis oput̆eşi xalk̆i,  buncina do skidala k̆ai aʒ̆onu.

– Mara Rot̆enmayer xanumis oput̆eşi xalk̆i,  buncina, skidala do t̆aroni k̆ai va aʒ̆onu. Eşo va reni?

– Ho, si mtini zop̆on. Xilafi va ren. Rot̆enmayer xanumis oput̆eşi xalk̆i, t̆aroni, buncina do oput̆eşi skidala k̆ai va aʒ̆onu.

– Muepe tkumert̆u Rot̆enmayer xanumik?

-Rot̆enmayer xanumis udoginu şikayeti kuğut̆u, irote p̆esimist̆i rt̆u do emuşeni. Buncinaşi mencelişen ambari va uğut̆u.

– K̆laraşi mok̆itxuten irik ixelu. Eşo va reni?

– İrik var, Pet̆eriş met̆a, irik ixelu.

– Muşeni Pet̆erik va ixelu K̆laraşi moxtimapaşen?

– Megerem Pet̆eri dido paxili t̆eren. Va aya miçkit̆u ma. Paxili rt̆u, emuşeniti çkimi do K̆laraşi manebroba va yazdu Pet̆eris. Edo guri domiç̆vinu Pet̆erik.

– Pet̆erik K̆lara manebra va şinapt̆u. Eşo reni?

– Ho, Pet̆erik K̆lara manebra va şinapt̆u. Duşmani şinapt̆eren.

– K̆larak Pet̆eri manebra şinapt̆u. K̆lara k̆ai guroni rt̆u!

– Pet̆eriti k̆ai guroni rt̆u, mara bere rt̆u. Encami bere rt̆u Pet̆eri. Mara aya rt̆u p̆at̆i ambari, giçkit̆as!

– Muşi p̆at̆i ambari?! İnşalla p̆at̆i mutu va yeçkindu!

– Arndğas K̆laras tekerleğoni troni nuxireren do oktişen mejat̆k̆oçeren Pet̆erik. Aya rt̆u p̆at̆i ambari.

– Megerem Pet̆eri mt̆k̆uri t̆eren! Zavali K̆lara utroneli doskidu. Qal-gelakteri doskidu.

– İptineri mendaʒ̆k̆omiluten, aya rt̆u dido p̆at̆i dulya. Pet̆erişi noxvene dido p̆at̆i rt̆u. Mara utronelobak K̆laras nuşvelu.

– Utronelobak muç̆oşi nuşvelu K̆laras?

– Mati emus mevuşveli. Majurapekti nuşveles K̆laras. Allahik nuşvelu K̆laras. Buncinaşi qoropaktik nuşvelu K̆laras. K̆uçxes muiselu! K̆uçxepeşi jin dvadginu K̆laras. ʒ̆oxle ç̆it̆a- ç̆it̆a ogzalus, ok̆açxeti ç̆it̆a- ç̆it̆a onk̆ap̆inus kogeoç̆k̆u K̆larak. Aşoten majura fara yeçkindu K̆lara. Aya ren mskva ambari.

– Aya rt̆u mucize. Aya rt̆u skani qoropa do şvelaşi mucize!

– Çkimi var, Allahişi qoropa do şvelaşi mucize rt̆u aya ambari.

– Mara si dido k̆ai kuçxeşi re. Skani qoropa do mot̆ivasyonik K̆laras menceli komeçu.

– Xvala çkimi qoropa do mot̆ivasyonik var, Allahik nuşvelu K̆laras. Bucinaşi menceli do qoropak nuşvelu K̆laras. Buncinak manti menceli do qoropaten memişveleret̆u do emuşeni. K̆laraşi ocağik dido ixelu! Majura fara yeçkindes aya dunyas!

– İgbaliten K̆lara si megingaps do siti emus nungap.

– Mati eşo visimadeps. Artneri igbali komiğut̆es.  İgbaliten, K̆lara ma memingapt̆u do mati emus mevungapt̆i.

– Xvala K̆laraşi ocağik var, oput̆eşi xalk̆ikti dido ixelu K̆laraşi ağani xaliten. Çkvalapekti ixeles.

– Namu çkvalepek ixeles? Oput̆arepeki?! Manžagerepeki?!

– P̆at̆i noxvene muşişen Pet̆erikti ipti dipişmaneret̆u, mara ok̆açxe K̆laraşi xeironi ambariten dido ixelu. Rot̆enmayer xanumikti dido ixelu K̆laraşi xeironi ambariten. Mcveşi ğeci Rot̆enmayer xanumiti gondunu do ağani oxorca komextu dunyaşa! Xolo yeçkindu oxorca. Ok̆açxeti ikimocu hekimi begi k̆ala.

– Dido pukironi ambarepe komomçi, Haidi. Dido şukuri giʒ̆umer.

– Pimpili dixaşa, Alik̆o! K̆uçxe bedineri! Moxtimu skanik ma dido maxelinu, giçkit̆as!

– Ar- jur nenatenti maç̆arale Yohanna Sp̆irişen molapşinat, mu iqven! İqveni?!

– İqven, iqven! Derdi mo zdip si! Maç̆arale Yohanna Sp̆iri, çkimi şeniti, dunyaşi mtel berepe şeniti dido beciti ren. Ho, emuşenti molapşinat!

– Yohanna Sp̆iri mundes do namu noğas yeçkindu?

– (12) vit̆o jur Mbuloba (1827) vit̆o ovro oşi do eçi do şkvit  ʒ̆anas, İsviçreşi noğa Hirzelis yeçkindu Yohanna Sp̆iri. Edo doğuru (7) şkvit Xʒala vit̆on çxoro oşi do ar (1901) ʒ̆anas, Ziruxis.

– Yohanna Sp̆iri çinoberi ren skani ketabiten. Çkva ç̆areli ketabepeti uğuni emus?

-Ho, kuğun. Gamiçkvineri dido ketabi kuğun Yohanna Sp̆iris. Otkvuten va itkven.

– Si muşeni irote k̆uçxe t̆et̆eli gulurt̆i oput̆es. Kalamani va giğut̆ui si? Modvalu va giğut̆ui? Çapula va giğut̆ui si?!

-Kalamani ar var,  dido komiğut̆u ma. Modvalu ar var,  dido komiğut̆u ma. Çapulati komiğut̆u ma!   K̆uçxe t̆et̆eli goxtimuten buncinak irote qoropa, xela do menceli muşi momçapt̆u ma do emuşeni. Mati aya qoropa, xela do menceliten majuranepes qoropa, xela do omudi çkimi mepçapt̆i. Emuşeniti k̆uçxe t̆et̆eli govulurt̆i ma.

– Ketabi skani muk̆o nenaten gamiçkvinu? Giçkini?

– Ho, komiçkin. (70) sume neçi do vit çkvadoçkva nenaten gamiçkvinu ketabi çkimi. Aşo matkven ma aʒ̆i.

– Filimi skani muk̆o fara yeşiğinu? Aya dulyaşenti ambari giğuni si?

-Ho, ambari komiğun. (15) vit̆o xutişen dido ren filimi çkimişi adapt̆asyoni. Aʒ̆i eşo miçkin.

-Umuteloba, udulyeloba, mşkironeroba do uqazu dulyape gont̆aleri rt̆eren (19.) vit̆o maçxorani oşʒ̆anuraşi İsviçresti, mteli dunyasti.  Eşo vik̆itxeret̆i ketabepeşen. İsviçre şeni aya ambari mtini reni?

-Ho, mtini ren. Mtini giçkin do mtini zop̆on, Alik̆o. Umuteloba, udulyeloba, mşkironeroba do uqazu dulyape dido gont̆aleri rt̆u İsviçre çkimisti, mtel dunyasti. Aya ren çkimi uça tarixi.  Aya ren çkini uça tarixi. Aya ren skani uça tarixi. Aya ren tkvani uça tarixi. Aya ren mteli k̆oçinobaşi oşkaruli uça tarixi.

– Dido İsviçrelurepek naşkves dobadona mutepeşi do dibarges majura dobadonapes. Eşo miçkin!

– Mtini zop̆on. Aya rt̆u (19.) vit̆o maçxorani oşʒ̆anuraşi çodinas. Mohaciri gamaxtu milleti İsviçreşen, para mogapu şeni. (330) sum oşi do eçi do vit vitoşi İsviçreluri mohaciri gamaxtu.

– Didopeten namu dobadonapes dibarges am İsviçreluri mohacirepe?

– Didopeten dibarges emindroneri Amerik̆aşi Ok̆ont̆aleri Oxenʒales.

– Andğaneri ndğas İsviçre muten çinoberi ren? Hele, ayati miʒ̆vi, Haidi!

-İrişen ʒ̆oxle, İsviçre ren çinoberi demok̆rasi muşiten. K̆onfederaluri dobadona ren. Otxo resmuri nena kuğun İsviçreşi K̆onfedersayonis. Çkva k̆arta nenaşen k̆oçepeti skidunan İsviçres. Edo k̆ult̆uruli ot̆onomi kuğunan entepes.  Aya xali muşiten çinoberi ren İsviçre mteli dunyas.

– Çkva muten çinoberi ren İsviçre?

-İsviçres resmuri didi va uğun. Mara İsviçreşi milleti didopeten Kristiani ren. K̆atolik̆uri do P̆rot̆est̆anuri k̆ilisepeten içkinen İsviçre. Reformist̆uri k̆iliseti, Ortodoksuri k̆iliseti koren İsviçres. Muslimanuri, Yahuduri, Budist̆uri, Hindust̆uri lamtinapeti koren İsviçres.

– Çkva mu monoçonepeten çinoberi ren İsviçre?

-Didopeten xami, saati, ğvini do çik̆olat̆aten dido çinoberi ren mteli dunyas.

– Dini, nena do k̆ult̆uriten dido p̆luralist̆uri dobadona t̆eren İsviçreşi Federasyoni. Ma aya va miçkit̆u. Dido şukuri giʒ̆umer, Haidi çkimi! K̆ai guriten vižirat bolaki!

– İrote vižirat! Mati dido şukuri giʒ̆umer. K̆ai guriten vižirat, Alik̆o. Gogixta do gogağara! Allahik irote megişvelas! Dulya skani irote ʒ̆ori idas!

 

DİÇODU

(http://www.omniglot.com/writing/laz.htm)

ალიში იზმოჯე

(ჲოჰანნა სპირიში ჰაიდიშენ ამბარეფე)

ალი იჰსან აქსამაზი

გოწოთქვალა

ლაზური ნენა რენ დუნჲაში ირიშენ მჯვეში ნენაფეში ართერი. ანთიკური კოლხური ნენაშენ გენომსქიდე რენ ლაზური ნენა. ლაზური-მარგალური, სვანური/ შონური დო ქორთული/ გურჯული ნენაფე რენან მზახალი ართიმაჟურანიშა.  ანთიკური კოლხური ნენაშენ გენომსქიდე მაჟურა ნენა რენ მარგალური ნენა. ლინგვისტეფექ ამკათა ამბარეფე მომჩაფან.

ლაზური ნენა რენ თურქიჲე, გურჯისთანი დო აფხაზეთიში ნანანენაფეშენ ართერი. ლაზური ნენა ღურუნ ნდღაშენ ნდღაშა. დიდოს ვა უჩქინ აჲა ნენა დო ემუშენი.

აჲა ქეთაბი ჰაიდიში მალამთურე ბერეფე შენი ფხაზირი. მა მეფშვენ ქი, ბერეფექ ჰაიდი დო ბუნჯინაში ყოროფათენ იკითხასუნონან აჲა ქეთაბი.

ჲოჰანნა სპირიში ჰაიდი ჯოხონი ქეთაბი ვიკითხერეტი მა. შორლი ტემპილიში ჶილიმითი მიძირუნ სინემას. ემინდროს მა ჭიტა ბერე ვორტი. მამგურე ვორტი მა გეჭკაპურონი ნწოფულას.

არ- ჟურ წანა იყვენ; არ ნდღას იზმოჯე ქობძირი: მა რაკანონი არ ოფუტეს ვორტი. არ შვაჯის არ ჭიჭიტა კულანი მემაგუ. მემაგუში, დიდო ვიხელი მა. მათი ჭიტა ვორტი იზმოჯეს. თუთა სთერი რტუ კულანი. დიდო მსქვა რტუ ემ კულანი. კულანიში ჯოხო ემედენი გომაშინუ. ჰაიდი რტუ. ჰაიდი ჯოხონტუ კულანის. ჰაიდი კალა ბღარღალი მა იზმოჯეს.

მა იზმოჯეშენ გოპკუცხიში, ჩქინი ოლაჶუფე ასთახოლო დოპჭარი დო აჲა მკულე ნოჩალიშე მჟორაში თეშა ქოგამახთუ.

 

ალი იჰსან აქსამაზ

ნოღა ისტანბოლი

 

  1. ჰაიდიში ოჯაღი

 

  • დღა ხელერი გაყვას! დღა გინძე გაყვას! სი გჯოხონს ჰაიდი, ჰოი? მა ეშო მიჩქინ. მთინი რენი?
  • ჰო, მა ჰაიდი მჯოხონს. სი მუ გჯოხონს?
  • მა ალი მჯოხონს. ჯოხო ჩქიმი ნანა- ბაბა ჩქიმიქ გემოდვერენ.
  • ოფშა კაი! ჩქიმი ჯოხოთი ნანა- ბაბა ჩქიმიქ გემოდვერენ. სი სოლენ მიჩინოფ მა?!
  • სქანი ჯოხო დუნჲაში ირი სვას იჩქინენ. მა სი მანებრა ჩქიმი სთერი ქშინაფტი ბერობაშენ დონი. აწი დიდო ხვალა ვორე მა. ჰელე, მანებრა დომაყვი. მა სქანდენ ჩქარ მუთუ ვა მინონ.
  • მათი სი მანებრა ქშინაფ. დღა გათანას! ჰელე, აქ მოხთი! მა სი მეგიშველამინონ აწი.
  • გური ხელათენ ჲემაფშუ. მგარა ქომომიხთუ აწი. ჲოჰანნა სპირიში ქეთაბიშენ სი გიჩინოფ მა.
  • ჰოი?! აჲა რენ დიდო ონჭელონი დო გოკვირონი ამბარი!
  • მა ბერე ვორტიში, არნდღას ბაბა ჩქიმიქ არ ოჩუქარე ქომომიღერეტუ.
  • აწი ონჯღორე დომაყუ დო გოვიმჭითანი, გიჩქიტას! ბაბა სქანიში ოჩუქარე მუ რტუ? ემუქ მუ მექჩუ? ჰელე, მიწვი!
  • ბაბა ჩქიმიქ ჲოჰანნა სპირიში ჰაიდი ჯოხონი ქეთაბი ქომომიღუ დო ოჩუქარე ქომომჩერეტუ.
  • ჲოჰანნა სპირიში ქეთაბი მოკწონდერეტუი?
  • მორო მუ, ქეთაბი მომწონდერეტუ! ხელონი ამბარეფე გამოგნაფაფტუ. ედო არშვაჯის ვიკითხი ეჲა ქეთაბი მა.
  • ემინდროს მუკო წანერი რტი? ქშუნსი?!
  • ჰო, ქომშუნს მა. (1971-2) ვიტონ ჩხორო ოში დო სუმე ნეჩი დო ვიტო არ ვარნა ჟურ წანას რტუ. აწი კაიხეშა ვა მშუნს. (11) ვიტო არ ვარნა (12) ვიტო ჟურ წანერი ვორტი. 1971 წანა რტუ დომაწონენ აწი.
  • ოფშა მსქვა! დიდო კაი! გინძე ორა გოლახთერენ! ხოლოთი ქოქშუნს სი.
  • ოკაჩხე სქანი ჶილიმითი მიძირუნ მა თურქული სინემაფეს.
  • არ- ჟურ ჶილიმი ჩქიმი ჲეშიღეს ჶილიმიში შირქეთეფექ. ეშო ქომშუნს აწი. ნამუ ჶილიმი ჩქიმი გიძირუნ?
  • უჩა- ხჩე ჶილიმი რტუ. დიდო მჯვეში ჶილიმი რტუ.
  • მიქ ოსაღუფტუ ჩქიმი როლი ეჲა ჶილიმის?
  • შორლი ტემპილიქ ოსაღუფტუ სქანი როლი ეჲა ჶილიმის. აწი ეშო ქომშუნს მა.
  • ჰო, მთინი ზოპონ. შორლი ტემპილიქ ოსაღუფტუ ჩქიმი როლი. (1937) ვიტონ ჩხორო ოში დო ეჩი დო ვიტო შქვით წანა რტუ. ეშო ქომშუნს მათი. ეჲა ჶილიმი მოკწონდერეტუი?
  • მორო მუ, ეჲა ჶილიმი მომწონდერეტუ! მეჶიქირონი ჶილიმი რტუ. ჶილიმიქ მილლეთის ნოსი მეჩაფტუ. ბერეფეს ნოსი ოგურაფტუ ქეთაბი დო ჶილიმიქ. კაინობა დო ჯუმალობაში მაანა ოგურაფტუ მილლეთის.
  • მუნდეს ძირი ეჲა ჶილიმი ჩქიმი?
  • ხოლო ჭიტა ვორტი მა. მამგურე ვორტი გეჭკაპურონი ნწოფულას. ნწოფულას სინემაში სალონი ქუღუტუ. კართა მჟაჩხას არ ჶილიმი იყვეტუ ნწოფულაში სინემაში სალონის. სინემაში ხჩე ფერდეს ვოწკერტით ჩქინ.
  • ვიტონ ჩხორო ოში დო ეჩი დო ვიტო შქვით თარიღონი ეჲა ჶილიმიში ჩქვადოჩქვა ვერსიჲონეფეთი ჲეშიღერი რენან. ეშო მიჩქინ.
  • ჰო, ენთეფეშენთი ამბარი ქომიღუნ მა.
  • დიდო კაი. ოფშა მსქვა! სქანი თოფურონი ნენა დიდო მომწონდუ მა.
  • ნცაშა ეხთი! პანდა იხელი, ჰაიდი! მუ გიწვარე, გიჩქინი?! სი ორა გიღუნი? ორა გიღუნ ნა, სქანი დობადონა დო ოჯაღიშენ არ- ჟურ მუთუ გკითხარე, იყვენი?! მა დიდო გიხვამამინონ!
  • ჰო, მორო მუ, სქანი შენი პანდა ორა ქომიღუნ მა! მა სქანი მანებრა ვორე დო სითი ჩქიმი მანებრა რე! ალლაისე, მუ გინონ ნა, ეჲა მკითხი დო ემედენი ნენა გეგიქთირა მა.
  • იფთი დობადონა დო ოჯაღი სქანიშენ ბღარღალათ! თი სქანიშენ მუთუფე ოთქვალუ გინონი?!
  • მორო მუ, ოთქვალუ მინონ მა. ჰაჲდე, ბღარღალათ! მა გისიმინ! თამო- თამო მიწვი! თითო- თითო მკითხი, ალიკო!
  • მუ გიწვა, ვა მიჩქინ. ალლაჰი იროთე სქანდენ რაზი იყვას. ნცაშა ეხთი!
  • სქანდენთი რაზი იყვას ალლაჰი! სითი ნცაშა ეხთი, ალიკო!
  • მარა, იფთი არ მუთუ გიწვარე. აჲა რენ ონჭელონი დულჲა: სი რე (19.) ვიტო დო მაჩხორანი ოშწანურაში ჭიჭიტა კულანი. მა ვორე (21.) ეჩი დო მაართანი ოშწანურაში კოჩი. ეშო- აშო სუმე ნეჩი წანერი კოჩი ვორე მა. სი სოლენ გიჩქინ (21.) ეჩი დო მაართანი ოშწანურაში ამბარეფე ეშო?! აჲა ვა ოხომაწონუ მა! ჰელე, მიწვი!
  • ალიკო, ვა გიჩქინი სი?! მა სქანი იზმოჯეს ვორე. იზმოჯეს გოვულურთ ჩქინ აწი. სითი ბერე რე. ბადი ვა რე. სი სუმე ნეჩი წანერი კოჩი ვა რე! იფთი აჲა გიჩქიტას!
  • ჩქინ აწი იზმოჯეს ვორეთი? ლაი სქიდალას ვორეთ ჩქინ. მიხარსუვი, ვა მაჩქინუ მა.
  • კაიხეშა გიჩქიტას, აწი ვართი ვიტო დო მაჩხორანი ოშწანურას ვართი ეჩი დო მაართანი ოშწანურას ვორეთ ჩქინ. აწი იზმოჯეს ვორეთ ჩქინ. აწი მუ გინონ ნა, მკითხი. აწი ნენაშ გექთირუშა ხაზირი ვორე მა!  ხე- გონთხერი ქჩუმერ. დერდი მო ზდიფ!
  • ალლაჰიქ გხვამას სი! ჰაიდი, სი სო ჲეჩქინდი? სონური რე? მიეფეშენ რე?
  • მა ჲეფჩქინდი ოფუტე დორჶლის. დორჶლი რენ ჭიჭიტა ოფუტე მსქვა ალპეფეს. მაჲენჶელდი რენ ჩქინი ნოღა. ოფუთე დორჶლითი, ნოღა მაჲენჶილდითი ყოროფონი რენ. ალლაჰის ქუღუნ აჲა მეჩქირელი დიხათი.
  • ნოღა მაჲენჶელდი ნამუ დობადონაში დოლოხე გელადგინ? ჰელე, მიწვი დო მილლეთიქ მსქვაშა ოგნას!
  • ნოღა მაჲენჶელდი გელადგინ ისვიჩრეში კონჶედერასჲონიში სინორეფეში დოლოხე.
  • ისვიჩრეში ნამუ კელეს გელადგინ ნოღა მაჲენჶელდი?
  • ისვიჩრეს ქუღუნ (26) ეჩი დო ანში კანტონი. ეჩი დო ანში კანტონიქ წოფხუფან ისვიჩრეში კონჶედერასჲონი. აჲათი გიჩქიტას იფთი! ისვიჩრეში გრაუბუნდენი ჯოხონი კანტონის გელადგინ ნოღა მაჲენჶელდი.
  • ისვიჩრეში ნამუ კელეს გელადგინ კანტონი გრაუბუნდენი?!
  • ისვიჩრეში ჲულვა კელენი დიხაფეს გელადგინ კანტონი გრაუბუნდენი.
  • არ- ჟურ ნენათენთი, ისვიჩრეში ნენაშენ ბღარღალათ, იყვენი?!
  • მორო მუ, ვა იყვენ, იყვენი?! ასთახოლო ბღარღალათ! მარა, გიჩქიტას, ისვიჩრეს არ ვარ, ოთხო ნენა ქუღუნ!
  • ეშოი?! მა მუ მიჩქინ?! მა დუნჲაში მთელი ნენაფეშა თოლი ქომიღუნ დო ემუშენი. კართა ნენა რენ ალლაჰიში ნოხვენე! მა აშო ქომიჩქინ. მუ იყვენ, ისვიჩრეში ნენაფეშენ ამბარი ქომომჩი!
  • ისვიჩრეს ქუღუნ ოთხო ნენა. ისვიჩრეს ქუღუნ ოთხო დევლეთური ნენა.  ისვიჩრეს ქუღუნ ოთხო რესმური ნენა. იფთინერი რენ ალამანური ნენა. მაჟურანი რენ ჶრანსული ნენა. მასუმანი რენ იტალჲანური ნენა. მაოთხანი რენ რომანშური ნენა.
  • ხოშ ალამანური, ჶრანსული დო იტალჲანური ნენაფეშენ ამბარი ქომიღუნ. მარა მუ რენ რომანშური ნენა?! ჰელე, მოლამიშინი!
  • რომანშური ნენა, მოხთიმერი რენ დიდოფეთენ ლათინური ნენაშენ. აწი აშო მათქვენ. მარა გიჩქიტას ისვიჩრეში ჶედერასჲონი რენ დუნჲაში ირიშენ დემოკრატიური დობადონა!
  • აჲა ოთხო ნენაფეთენ გამანთანა დო რადიო-ტელევიზჲონიში ჭანდინა რენი?!
  • ჰო, ქორენ. აჲა ნენაფეთენ გაზეთაფე დო ჟურნალეფეთი ქორენ.
  • დიდო ონჭელონი ამბარეფე მომჩაფ სი! ნამუ რენ სქანი ნენა?
  • ჲოჰანნა სპირიში ნენა რტუ ალამანური. ჩქიმი ამბარითი იფთი ალამანური ნენათენ იჭარინუ, მარა აჲა ოთხო ნენათი ჩქიმი რენ. აწი შკულე სქანი ნენათი ჩქიმი ნენაფეშენ რენ, გიჩქიტას! ლაზურითი ჩქიმი ნენაფეშენ რენ. დუნჲაში მთელ ნენაფე ჩქიმი რენ. მა იროთე ჯუმალობაში მესაჟეფე ქომიღუნ დო ემუშენი.
  • მა შუქური გიწუმერ აჲა ონჭელონი დო გოკვირონი ამბარეფე შენი. აწითი თამო- თამო თითო- თითო ოჯაღი სქანიშა ქომოფთათ! იყვენი?!
  • მორო მუ, ოჯაღი ჩქიმიშა ქომოფთათ! სი მკითხი დო მა გიწვა!
  • ნანა სქანის მუ ჯოხონს? მუ ჯოხონტუ. ბაბა სქანის მუ ჯოხონს? მუ ჯოხონტუ? სი მიში ბერე რე? სი მიეფეში რე? მიეფეშენ რე სი?
  • ნანა ჩქიმის გრეჩინი ჯოხონს. ბაბა ჩქიმის ტობიასი ჯოხონს. ჟურითი ღურერენან. საღი ვა რენან.
  • ნანა დო ბაბა სქანი მუნდეს ღურერენან?
  • მა აჲა ვა მიჩქინ. ვა მაჩქინენ. წანა მუშიშენ ამბარი ვა მიღუნ. ამბარი ვა მიღუნ. მა ჭიჭიტა ბერე ვორტიში, ღურერენან. მა ენთეფე ვა მიძირუნ.
  • სი მჯვეში მი ოღლი რტი? მცხადე მუ რენ?
  • ოფუტეში ხალკიშენ ვორტით ჩქინ. აშო მათქვენ. აჲა სი დოგიბაღუნ!
  • ჰო, აჲა დომიბაღუნ! სი უნანელი დო უბაბელი რტი. მი კალა ირდი? სო ირდი? მიქ სი გორდუ?
  • დადი ჩქიმიქ მორდუ. ნანა ჩქიმიში დაქ მორდუ.
  • დადი სქანის მუ ჯოხონს? მუ ჯოხონტუ ემუს?
  • ემუს დიტი ჯოხონს. დიტი ჯოხონტუ დადი ჩქიმის.
  • ემუქ მუ დულჲა იქიფტუ? მუ დულჲათენ იბოდერტუ დადი სქანიქ?
  • ემუ რტუ ხეზმეთქჲარი. ხამფა კოჩეფეში კონაღაფეს იჩალიშეფტუ ემუქ.
  • პაპული სქანის მუ ჯოხონტუ?
  • პაპული ჩქიმის ადოლჶი ჯოხონტუ. მარა პაპული ჩქიმის ალპჯუმადითი ჯოხონტუ. ეშოთი იჩქინენ მთელ დულჲას.
  • ქომიჩქინ! პაპული სქანი შენი მოთ ელაფათხერი რენ ჲა ზოპონტუ მილლეთიქ?
  • ვა მიჩქინ. მარა პაპული ჩქიმი ელაფათხერი ვა რტუ. დიდო ნოსერი კოჩი რტუ. ყალგელაქთერი. ჯუნჯური ვა რტუ.
  • მოთ ყალგელაქთერი რტუ? ჰელე, მიწვი!
  • სქირი დო ნისა დუღურერეტუ დო ემუშენი. უმითელი რტუ. მარა ბუნჯინათენ გური რახატი ქუღუტუ.
  • დადი სქანიქ მუშენი სი პაპული სქანიშა მენდაგიყონუ დო მეგაშქუ?
  • დადი ჩქიმიქ დიდო კაი დულჲა ქოძირერენ არ დიდი კონაღის ნოღა ჶრანკჶურტის. კონაღიში მანჯე დიდო ხამფა რტერენ. დიდი ესნაჶი ტერენ. დიდი თურჯარი ტერენ. ოხორმანჯექ დიდო კაი მააში ქომეჩერენ დადი ჩქიმის. დიდო კაი ფარა ქომეჩერენ. ემუშენითი დადი ჩქიმიქ პაპული ჩქიმიშა მენდამიყონუ მა დო მემაშქუ. ეშო მიჩქინ მა.
  • მუკო წანეი რტი სი ემინდროს?
  • მა (6) ანში წანერი ვორტი, ვა ვორტი. აწი ეშო ქომშუნს.
  • მუკო წანერი რტუ პაპული სქანი? მუკო წანერი რტუ ალპჯუმადი?! გოგაშინენი?
  • (80) ოთხო ნეჩი წანერი რტუი, ვა რტუი?! ვა მიჩქინ აწი. ხჩე ფიმფილონი კოჩი რტუ. მციქათი ნდურა რტუ პაპული ჩქიმი.
  • სქანი აჲა ამბარეფეთენ დოვიჭვი დო დოვიხალი მა, ჰაიდი. სი დომჭვი დო დომხალი, გჲული ჩქიმი!
  • ჩქიმი ქეთაბიქ დოგჩვერენ დო დოგხალერენ, ალიკო. ეშო ოხომაწონუ მა. მარა გიჩქიტას, აჲა ვა რენ ჩქიმი კაბაეთი! აჲა რენ მცხადე!
  • ქომიჩქინ, აჲა რენ ემინდრონერი სქიდალაში კაბაეთი! ჶუკარობა დო უგურაფობაში გური შენი რტუ ემკათა სქიდალა სქანი! ხვალა სი ვარ, სქანი მალამთურეფესთი ამკათა სქიდალა ქუღუტეს აჲა დუნჲას!

 

  1. პაპულიში ფაცხა

– დადი სქანიქ სი მეგაშქუ პაპული სქანი კალა დო ნოღა ჶრანკჶურტიშა მენდახთუ.

– ჰო, დადი ჩქიმიქ მემაშქუ ოფუტე დორჶლის დო ნოღა ჶრანკჶურტიშა მენდახთუ. დადი ჩქიმი, ოჩალიშუ დო ფარა მოგაფუ შენი ნოღა ჶრანკჶურტიშა მენდახთუ. იფთი მეჲდანეს ხვალა ქოდოფსქიდი დომაწონუ მა. შური დოლოლაფერი ვორტი.

– სი პაპული სქანი კალა ოსქიდუს ქოგეოჭკი. ემდღაშა სი პაპული სქანი კალა, პაპული სქანის სქანი კალა ირთიბათი ვა გიღუტეს. ართიქართი ვა იჩინოფტით. ედო პაპული სქანიქ მუ ყუ იფთინერი ნდღალეფეს? ემუქ სი მეგიშველუი?

– პაპული ჩქიმი, დიდშურონი რტუ. ედო იროთე მსქვაშა მემიშველუ ემუქ. მარა პაპული ჩქიმიქ იფთი ჩქიმი კალა დიდო ვა ღარღალუ. ინნადი; ნოსი დო ყოროფათენ იჯგინენ! ოკაჩხე პაპული ჩქიმიქ დიდო იხელუ ჩქიმი რენობათენ ოხორის.

– ემუქ პანდა მეგიშველუ!

– ჰო, პანდა მემიშველუ პაპული ჩქიმიქ. მა მუში მოთა ვორტი დო ემუშენი.

– პაპული სქანის ჩქარ მანებრა ვა უყოუნტუ. ოფუტეში ხალკის პაპული სქანიშენ აშქურინეტუ. ოხვამუ დო ოხვეწუ შენი კილისეშა ვა ულუტუ პაპული სქანი. იფთი ინსაჶითი ვა უღუტუ პაპული სქანის. ეშო მიჩქინ მა. მუშენი ამკათა ხასიეთი უღუტუ ემუს. თაბიეთსუზი კოჩი რტუი?

– ეშო ვა მათქვენ მა. კაი ნათურა ქუღუტუ. ემუქ სქიდუტუ ოფუტეს, მარა მუში ფაცხა ვა რტუ ოფუტეში დოლოხე. ოფუტეშა მენდრა რტუ ფაცხა მუში.  ირი-ხოლოშენ მენდრა რტუ. თოლიშენ მენდრა სქიდუტუ. ფაცხა მუში რაკანის გელადგიტუ. ოხორი მუში მენდრა რტუ ოფუტეშა. ემუშენი პაპული ჩქიმის მანებრა ვა უყოუნტუ. ეშო მიჩქინ მა. დულჲაფე მუში ოხვენუ შენი მონგონერი კოჩი რტუ პაპული ჩქიმი. პაპული ჩქიმი დიდო დულჲამხვენუ კოჩი რტუ. ედო მითიშა მუხთიაჯი ვა რტუ. ქიბირი კოჩი რტუ. გური დიდი ქუღუტუ პაპული ჩქიმის.  პატი ვა ფსქიდუტით ჩქინ ფაცხას. ემუს უნტუ ქი, ჩქვაში მაკვანდე ვა ვიყვატი მა.

– მიჩქინ, მუთუშენ შქურინერი ვა რტუ პაპული სქანი. მუთენ დულჲამხვენუ რტუ პაპული სქანი? მუეფე იქიფტუ ემუქ?

– ემუს თხაფე ქუყოუნტუ. პაპული ჩქიმიქ თხაფე ნჩვალუფტუ. ედო ემუქ თხაფეში მჟათენ ყვალი იქიფტუ, კარაკი იქიფტუ. ოჭკომალეთი იქიფტუ პაპული ჩქიმიქ. მჭკიდი იქიფტუ, ქოვალი იქიფტუ პაპული ჩქიმიქ. უმენჯელე ვა რტუ.  ხჩე ფიმფილონი რტუ, ბადი რტუ, მარა მარიჶეტონი კოჩი რტუ.  პაპული ჩქიმი თაბიეთსუზი კოჩი ვა რტუ. ემუქ თრონი იქიფტუ, სტოლი იქიფტუ. ფიცარიში ბიბლოფეთი იქიფტუ პაპული ჩქიმიქ. დიდო სანათქჲარი კოჩი რტუ. თაბიეთსუზი კოჩი ვა რტუ. ნოსერი კოჩი რტუ.

– ოფუტეშა ჩქარ ვა გეულუტუი პაპუ სქანი?

– გეულუტუ! არ დუქჲანი ქორტუ ოფუტეს. მქირი, მბელა, კაზჲაღი, შექერი, ლუქუნა, თუთუნი, ებზა ჲეჭოფინუშა გეულუტუ ოფუტეშა.

– მარა ოფუტეში კოჩეფეშენ მანებრა ვა უყონუტუ პაპული სქანის! ჩქარ მითი კალა ირთიბათი ვა უღუტუ. ჩქარ მითი კალა ირთიბათი ვა იქიფტუ. ეშო ვა რენი?

– ფეტერი კალა ირთიბათი ქუღუტუ. მუში კალა კაი ირთიბათი ქუღუტუ პაპული ჩქიმის!

– ჰო, ეშო! მარა ფეტერი ჭიჭიტა ბერე რტუ. პაპული სქანიში მალამთურე ვა რტუ. ედო პაპული სქანიში თხაფე ოჯვინაფტუ ფეტერიქ. ფეტერი კალა ირთიბათი ოხვენუს მეჯბური ქოდოსქიდერეტუ. მალამთურე ვა რტეს.

– პაპული ჩქიმი ჩქინერკოჩი რტუ. პაპული ჩქიმიქ უდოდგინუ ნოსი დო გზა ოგურაფტუ ფეტერის.  ფეტერიქთი კაი ამბარეფე იგურაფტუ პაპული ჩქიმიშენ. ედო აჲა ამბარეფე კაი აწონეტუ ფეტერის.

– ხვალა- ხვალა სქიდუტუ. ოღარღალუ შენი ჩქარ მანებრა ვა უყოუნტუ პაპული სქანის.

– ეშო ვა რტუ. ჩქიმი კალა რტუ. ფეტერი კალა რტუ. ჩქინი კალა ღარღალაფტუ პაპუ ჩქიმიქ. ფეტერიში დინანა დო ნანა კალა ღარღალაფტუ ნამთინი ორაფეს.

– ჰო, ეშო რენ. მარა ჩქვა მითი კალა ირთიბათი უღუტუ პაპული სქანის.

– სი ხილაჶი გიჩქინ. მთინი ვა რენ აჲა ამბარი.

– მიეფე კალა ღარღალაფტუ პაპული სქანიქ?!

– პაპული ჩქიმიქ თხაფე მუში კალა ღარღალაფტუ.  ჯოღორი მუში კალა ღარღალაფტუ. ენთეფექთი პაპული ჩქიმი კალა ღარღალეფტეს. მჟორა, მურუცხეფე, ნცა, დიხა, მჭიმა, გოლა, რაკანი კალა ღარღალაფტუ პაპული ჩქიმიქ. ენთეფექთი პაპული ჩქიმი კალა ღარღალაფტეს.

– ოფუტეს ცხენი, ჯორი დო გირინითი იყვეტუი ემინდროს?

– ჰო, იყვეტუ. მარა პაპული ჩქიმის ხვალა არ ჯოღორი ქუყონუტუ. ედო ჟურ თხა ქუყონუტუ ემუს.

– სი მთინი ზოპონ. მა აჲა ვა მაჩქინუ. მიხარსუვი, ჰაიდი! ბერე ვორტიში, მათი ხვალა ვორტი. ხოშ აწითი ხვალა ვორე. მათი მურუცხეფე კალა ბღარღალაფტი. კატუ ჩქიმი კალა ბღარღალაფტი. სი წორი რე.

– პაპული ჩქიმიქ იროთე ბუნჯინაშენ იგურაფტუ. ბუნჯინა კაი მამგურაფალე ჩქინი რენ. ეშო ვა რენი, ალიკო?!

– ეშო რენ! მთინი ზოპონ. ბუნჯინა კოჩეფეშენ ჩქვა მჯვეში რენ. ემუშენითი კოჩეფეშენ ჩქვა დიდო უჩქინ ბუნჯინას.

– ირიშენ ჩქინერი რენ ბუნჯინა. ემუშენითი ჩქინდენ ჩქვა კაი უჩქინ ბუნჯინას. მჟორა, მურუცხეფე, ნცა, დიხა, მჭიმა, გოლა, ღალი, ტიბა, რაკანის ჩქინდენ ჩქვა კაი უჩქინ.

– აჲათი მთინი რენ. მთინი ზოპონ, ჰაიდი!

– ნენა ბეჯითი რენ. ართიქართი ოხოწონუ შენი, იფთი ნენა ვა დომაჭირნან. იფთი ყოროფა დომაჭირნან. იფთი ალლაჰი დო ბუნჯინაში ყოროფა დომაჭირნან.

– დიდო მთინი ზოპონ! მათი სქანი სთერი მევისამედეფ, ჰაიდი!

– კოჩიქ კოჩის ზარარი მეჩაფს. კოჩიქ სქინდინაფეს ზარარი მეჩაფს. კოჩიქ ბუნჯინას ზარარი მეჩაფს. ბუნჯინაქ ჩქარ მითის ზარარი ვა მეჩაფს. ბუნჯინაქ ჩქარ მუთუს ზარარი ვა მეჩაფს. ბუნჯინაქ კოჩი დო სქინდინას მანებრობა დოგურაფს. ალლაჰიქ კოჩი დო სქინდინას მანებრობა დოგურაფს. ეშო ვა რენი, ალიკო?!

-ეშო რენ, ჰაიდი! თიშენ კუდელიშა მთინი ზოპონ სი.

– სი ალამანური ნენა გიჩქინი?

– ვარ, მა ალამანური ნენა ვა მიჩქინ.

– მათი ლაზური ნენა ვა მიჩქინ. სი ლაზური ღარღალაფ, მა ალამანური ბღარღალაფ. ართიქართიში ნენა ოხოვოწონაფთ ჩქინ. ჩქინ ართიქართიში ნენათენ ვა ბღარღალაფთ, მარა ართიქართიში ნენა ოხოვოწონაფთ. მუ მენჯელითენ ართიქართიში ნენა ოხოვოწონაფთ, გიჩქინი?

– ართიქართიშა ყოროფა ქომიღუნან დო ემუშენი!

– აჰა მცხადე! აჲა რენ ნკილა: ყოროფა! ჩქინ ყოროფაში ნენათენ ბღარღალაფთ. ემუშენითი ართიქართიში ხალი ოხოვოწონაფთ. ედო პაპული ჩქიმისთი ბუნჯინა დო ალლაჰიში ყოროფა ქუღუტუ გურის დო ემუშენითი მჟორა, მურუცხეფე, ნცა, დიხა, მჭიმა, გოლა, რაკანი, მჭიმა, მთვირი, ხორშაკალი, იხი, სქინდინაფა კალა აღარღალეტუ ემუს. ენთეფე კალა აღარღალეტუ პაპული ჩქიმის. ხვალა- ხვალა სქიდუტუ, მარა ხვალა ვა რტუ. მითიშა მინნეთი ვა უღუტუ პაპული ჩქიმის. ემუშ- ამუში ნოსითენ დულჲა ვა იქიფტუ პაპული ჩქიმიქ.

– პაპული სქანის არ ჩქვა ოხორი ქუღუტუ ოფუტეში დოლოხე. ეშო მიჩქინ მა!

– ხილაჶი ვა გიჩქინ. მთინი გიჩქინ. ოფუტეში დოლოხეთი ოხორი ქუღუტუ პაპული ჩქიმის. მარა ექ ვა სქიდუტუ. ეჲა ოხორი გენკილერი რტუ.

– მუშენი ექ ვა სქიდუტუ?

– პატი გონოშინეფე ქუღუტუ ეჲა ოხორიში დოლოხე დო ემუშენი.

– ხვალა- ხავალა სქიდუტუ მარა ხვალა ვა რტუ.  გურიმეჭვერი რტუ!

 

  1. ბუნჯინაში მანებრობა
  • სი პაპული სქანი კალა სქიდუტუ. პეტერიშ მეტა მანებრა ვა გიყონუტუ. ეშო მიჩქინ. სი ჩქვა მეგაბრე ვა გიყოუნტუ!
  • ვარ, ეშო ვა რენ. ეშო რენი?! მა ეშო ვა მიჩქინ!
  • მი რტუ სქანი მაჟურა მანებრა? პაპული სქანიი?
  • ჰო, პაპული ჩქიმი მანებრა ჩქიმი რტუ. პეტერი მანებრა ჩქიმი რტუ. თხაფე მანებრა ჩქიმი რტეს. კვინჩეფეთი მანებრა ჩქიმი რტეს. ჯოღორი მანებრა ჩქიმი რტუ. ჯა, გერმა, ნცა, წკარი, გოლა, ღალი, ტიბა დო დიხათი ჩქიმი მანებრა რტუ. ენთეფე მთელითი ჩქიმი მანებრაფე რტეს.
  • თხა, კვინჩი, ჯოღორი, გერმა, ნცა, წკარი, დიხა კალა სითი გაღარღალეტუი?
  • ჰო, მორო მუ, მათი ენთეფე კალა მაღარღალეტუ.
  • სი სოლენ გაგურუ ენთეფეში ნენა?
  • მდღურა მა გიწვერეტი: ყოროფაში ნენათენ! თხასთი, კვინჩისთი, ჯოღორისთი, გერმასთი, ნცასთი, წკარისთი, დიხასთი თითო ნენა ქუღუნ. ენთეფე ყოროფაში ნენა ქუღუნან. სითი ენთეფეში ყოროფა გიღუტაში, ენთეფე კალა მსქვაშა გაღარღალენ. ემუშენითი მა ენთეფე კალა ლოყაშა ბღარღალაფტი.
  • სითი ბუნჯინას დიდო ყოროფ! სი ნენა თოფური გიღუნ!
  • სითი ნენა თოფური გიღუნ! ჰო, მორო მუ! მა ბუნჯინას დიდო პყოროფ. ბუნჯინას ოსქიდუქ მემიშველუ დო ემუშენი.
  • ჭიტა- ჭიტა პეტერიშენთი ბღარღალათ! პეტერი, სქანი კაი მანებრა რტუ.
  • ჰო, პეტერი კაი მანებრა ჩქიმი რტუ. ფეტერი შურიმშინე ჩქიმი რტუ.
  • ემუთი ჭიტა რტუ. პეტერი მუკო წანერი რტუ ემინდროს?
  • პეტერი (11) ვიტო არ წანერი რტუ. აწი ეშო ქომშუნს მა.
  • პეტერი მჭკეში რტუ დო ოფუტეში თხაფე ოჯვინაფტუ. მზგუდაფეშენ კაიხეშა ამბარი ქუღუტუ ფეტერის. ნოსთონერი მზგუდაფეთენ ხამფა რტუ ოფუტე თქვანიში გომორგვა.
  • ჰო, ოფუტე ჩქინი, ლოყა მზგუდაფეთენ დიდო ხამფა რტუ.  ფეტერიქ ოფუტეში მჭკეში რტუ დო მილლეთიში თხაფე ოჯვინაფტუ. ემუშენითი ფეტერიქ დიდო სვა ოქაჩაფტუ ოფუტეში სქიდალას. თხაფეშენ ჯოღაბი-მემჩალე რტუ.
  • პეტერის პილილი უღუტუი? პეტერიქ პილილი გელაჩაფტუი?
  • მორო მუ, პილილითი ქუღუტუ ემუს. ფიცარიში პილილითი იქიფტუ მსქვაშა. ემუქ პილილი მუში გელაჩამუთი მოგურაფტუ მა. ედო იროთე პიპილი მუში მსქვაშა დო ლოყაშა გელაჩაფტუ პეტერიქ. თხაფესთი პილილიში სერსი აწონეტეს. მახაროტონი ბიჭი რტუ ფეტერი. უფელერი ვა რტუ. ჯუნჯური ვა რტუ. მუსიკიში ბერე რტუ. კაპეტი ყუჯი ქუღუტუ. კითხერი ვა რტუ. მარა ჶუკარა ნოსიში ბერეთი ვა რტუ ფეტერი. დიდშურონი რტუ.
  • ფეტერიქ სითი პილილი გელაგიჩაფტუ.
  • ჰო, მათი პილილი გელამიჩაფტუ ემუქ დო მოხელაფტუ.
  • ჩქვა მუეფე იქიფტუ ფეტერი კალა ოფუტეს?
  • ფეტერის არ გოსრიალე ქუღუტუ. ყინორა მოხთუში, მთვირი დიდო დომთუფტუ. ჩქინთი მთვირის გესთვინუშა მევულურტით გოსრიალეთენ. მთვირის არ რაკანიშენ მაჟურანიშა გოსრიალეს გეხუნერი გოხთიმუ დიდო ხელონი იყვეტუ. ნენათენ ვა მათქვენ მა აწი.
  • დიდო მსქვა ტერენ აჲა გონოშინე სქანითი. ჩქინთი გოსრიალეს გეხუნერი გოხთიმუში გზალეფე ბგორუფტით ნოღა ისტანბოლიში სოქაღაფეს. მარა კაი ვა იყვეტუ. დიდო მთვირი ვა იყვეტუ ნოღა ისტანბოლის.
  • ალპეფე ჩქინი იროტე მთვირონი იყვენ. მთვირითენ ჩინობერი რენ ალპეფე ჩქინი.
  • ფეტერი ხვალა კაი მჭკეში ვარ, კაი მენჩხომეთი რტუ. ეშო მიჩქინ. ეშო ვა რენი?!
  • ჰო, კაი მენჩხომე რტუ. ღალითი ქომიღუტეს სემთი ჩქინის. ედო ჩხომი ოჭოფუშა მევულურტით ჩქინ.
  • მუთენ ჭოფუფტით ჩხომი? ანკესითენი?
  • ვარ, ანკესითენ ვა პჭოფუფტით ჩხომეფე ჩქინ. ჩქინ ტიკინათენ პჭოფუფტით.
  • მუ ჩხომი იყვეტუ ღალის?
  • კალმახა იყვეტუ. მარა დიდო ვარ.
  • კალმახა ნოსთონერი იყვეტუი?
  • იყვეტუ. ემინდრონერი ნოსითენ, ჩხომი ოჭოფუ კაი მაწონეტუ. მარა ანდღანერი ნოსითენ, ჩხომი ოჭოფუ დიდო გჲუნახი რენ. ჩხომისთი ნანა-ბაბა ქუყონუნ დო ემუშენი. ჩხომისთი ბერე ქუყონუნ დო ემუშენი.
  • ჰო, მევაგნი მა! სი ვეჟეტერჲენი ვანა ვეგანი რე!
  • მა ჰემი ვეჟეტერჲენი ჰემითი ვეგანი ვორე აწი.
  • პეტერიქ სო სქიდუტუ? სონური ტუ? მი ოღლიში რტუ?
  • პეტერიქ ოფუტე ჩქინის სქიდუტუ. დორჶლის სქიდუტუ. დორჶლური რტუ პეტერი. ოფუტე დორჶლის სქიდუტუ.
  • კითხერი ვა რტუ. ეშო მიჩქინ მა! ნწოფულას იგურაფტუი ფეტერიქ?
  • ჭიჭიტა ნწოფულა ქორტუ ნოღას. აჲა ნწოფულას იგურაფტუ ფეტერიქ. მჟაჩხაში ნწოფულათი ქომიღუტეს ოფუტეს.
  • მსქვაშა ოკითხუ- ოჭარუ უჩქიტუი ფეტერის?
  • ჰო, უჩქიტუ, მარა დიდო ვარ, ჭიტა-ჭიტა. ფეტერიქ მსქვაშა დო ლოყაშა ბირაფაფე მიბირტუ. ბირაფაფეს შური მეფჩაფტით ემუქ.
  • ფეტერი ბუნდური ბერე რტუი?
  • ვარ, ვარ, ფეტერი ბუნდური ვა რტუ.ჯუჯური ვა რტუ, მარა ნწოფულაშა თოლი დიდო ვა უღუტუ.
  • ოჯაღი მუში კალა სქიდუტუ ფეტერი! ეშო მიჩქინ მა.
  • ჰო, მთინი გიჩქინ. ოჯაღი მუში კალა სქიდუტუ.
  • მარა ფეტერი ქორბალა რტუ. თოლუძღე რტუ. ეშო ქომშუნს. მითინი ბზოპონი?!
  • ჰო, ეშო რტუ. მარა კართა ბერე ეშო რტუ ემინდროს. აწინერი სთერი ვა რტუ სქიდალა. აწინერი შექელეფე დო ხალვაფეშენ მითის ამბარი ვა უღუტუ. ფეტერი ხჩეგურონი დო ქესქინი ბერე რტუ. ფელაფერი დო ანაჭი რტუ.  უმოშვაჯინუ ოჩალიშეფტუ ფეტერიქ. არგურონი მანებრა ჩქიმი რტუ. მარა ჩქარ რახატი ვა დოხედუტუ. მშქურინაჯე ვა რტუ. ენჯამი ჭიტა ბერე რტუ ფეტერი. მუ პა?! მარა გური დიდი ქუღუტუ ფეტერის.
  • თქვან რაკანიშენ რაკანიშენ ართიქართის იშმარითი ოღოდაფტით! ეშო ვა რენი?!
  • ჰო, ეშო ვიქიფტით. გოლაშენ გოლაშა ართიქართის იშმარი ვოღოდაფტით ჩქინ დო ვისთერტით ბერელური გაგნაფათენ.
  • ოჭარუ- ოკითხუთი სქანდენ დიგურუ ფეტერიქ! ეშო ქომშუნს. ეშო რენი?!
  • ჰო, მათი ემუს მევუშველი. მარა ხვალა ჩქიმდენ ვა დიგურუ ფეტერიქ.
  • მიში თხაფე ოჯვინაფტუ ფეტერიქ?
  • ფეტერიქ ოფუტეში მთელი თხაფე ოჯვინაფტუ.
  • მუკო თხა უყოუნტუ პაპული სქანის?
  • პაპული ჩქიმის ჟურ თხა ქუყოუნტუ.
  • თხაფეს მუ ჯოხონტეს? ჯოხოფე მუთეფეში გოგაშინენ აწი?
  • მიხარსუვი, ალიკო! დიდო ორა ქოგოლახთუ. მა ვა გომაშინენ აწი. მარა ყოროფონი ჯოხოფე ქუღუტეს.
  • მი ვარნა მიეფე კალა სქიდუტუ პეტერი?
  • პეტერი, ნანა დო დინანა მუში კალა სქიდუტუ.
  • ბაბა ვა უყოუნუტუი ფეტერის?!
  • ვარ, ბაბა ვა უყოუნუტუ პეტერის.
  • ღურელი რტუ, ჰოი?!
  • ჰო! ფეტერიში დინანა უთოლე დო ძაბუნი რტუ. შირა რტუ. დიდო ხჩინი რტუ, მარა ხოლოთი წინეკი შუფტუ. წოხლეშენ მამუნი ტერენ. ეშო ქოვოგნი მა. დინანა უთოლე რტუ, მარა კაი გურონი რტუ. დინანაქ იროთე ლოყაშა მემიშველტუ. მეთაკსი სთერი ხჩე თომა ქუღუტუ დინანა ელენის. ყოროფონი რტუ. ძიცინაჯე ოხორჯა რტუ. იროთე პოდიას გელავუხერტი მა.
  • პეტერიში ნანა მუჭოში ხანუმი რტუ?
  • პეტერიში ნანათი კაი გურონი რტუ. ემუთი შირა რტუ. პეტერიში ნანაქთი მჭიფაშაში მემიშველტუ. მსქვა თოლეფე ქუღუტუ, მზოღაშფერი. კირკოლერი თომონი. ყოროფონი ოხორჯა რტუ, თოფური ნენონი. ჭუმანიშენ სერიშაქის შურდოგურითენ იჩალიშეფტუ, ქიმოლი ვა უყონუტუ დო ემუშენი. ნოსთონერი ოჭკომალეფე იქიფტუ. აწი ეშო ქომშუნს.
  • სი გჩაფტუი ფეტერიში ნანაქ?!
  • მორო მუ, მათი ოჭკომალე ქომჩაფტუ. სუთლი იქიფტუ. თერმონი იქიფტუ. ლუყუ ხარხაში იქიფტუ. ედო ქომჩაფტუ. მა კულანი მუში მშინაფტუ. მენგაფუა ვა უყოუნტუ ემუს ოფუტეს.
  • სი პეტერიში კაი მანებრა რტი. ჩქვა მანებრა ვა გიყონუტუ! სო გულუტით? მუეფე იქიფტით? მუ გონოშინეფე გიღუნ ემორაშენ?
  • დიდო ყოროფონი გონოშინეფე ქომიღუნ მა. ჩქინ ზენეფეს გოვულუტით. თხაფე ვოჯვინაფტით ჩქინი ზენეფეს. თხაფეს ხე ჩქიმითენ ფჩაფტი. თხაფე კალა ბღარღალაფტით. ნამთინი თხაფეს თიკანი ქუყოუნტეს. ენთეფე კალა ვისთერტით ჩქინ. დიდო ყოროფონი რტეს თიკანეფე. არ ოფუტეშენ მაჟურანიშა გოვულუტით. ექოლენ- აქოლენ ლაჶი ვიქიფტით. ოკაჩხე პეტერიშა ოხორიშა მევულურტით. დინანა კალა ბღარღალაფტი.
  • პეტერიში დინანა კალა ღარღალაფტი, ჰოი?!
  • ჰო, პეტრიში დინანა კალა ლოყა-ლოყა ბღარღალაფტი. დიდო კაპეტი ნოსი ქუღუტუ. დიდო მსქვა სერსი ქუღუტუ!
  • დინანა მუშის მუ ჯოხონტუ?
  • ემუს ელენი ჯოხონტუ.
  • მუჭოში ოხორჯა რტუ დინანა ელენი?
  • დიდო ჩქინეროხორჯა რტუ. უთოლე რტუ, მარა ქართა შეჲიშენ მჭიფაშაში ამბარი ქუღუტუ. მითიში დედიკოდიშა თოლი ვა უღუტუ. უდოდგინუ მსქვა ამბარეფეშენ მოლამიშინაფტუ. ანგელოზი სთერი ოხორჯა რტუ. ლოყა ნენა ქუღუტუ დინანას. პანდა ემუს პოდიას გელავუხეტი მა. ჩქვა მუ გიწვა?!
  • ფეტერიში ოხორი მუჭოში რტუ? დიდი რტუი, ჭიტა რტუი?
  • ოფუტეში ოხორეფე ართნერი იყვეტუ. ფეტერეფეში ოხორითი მჩვეში რტუ.
  • პაპული სქანიში ფაცხაშენ დიდი რტუი?
  • ჰო, ეშო რტუ. ფაცხა ფაცხა რენ. ფაცხა არ თოლონი იყვენ. მწულე რენ. მჩირე ვა იყვეტუ. ჭიტა იყვეტუ. ოხორი, ფაცხაშენ დიდი იყვეტუ. ჩქვა მჩირე იყვეტუ.  ედო დინანა ელენიქ ჭინკა დო გერმაკოჩიში ამბარეფეშენთი მოლამიშინაფტეს.
  • ჭინკა დო გერმაკოჩიში ამბარე კაი გაწონეტუი?
  • ჰო, ჭინკა დო გერმაკოჩიში ამბარი დიდო კაი მაწონეტუ მარა, კაპკაპიში ამბარი კაი ვა მაწონეტუ, პატი მაწონეტუ. მაშქურინეტუ მა, მოშქურინაფტეს ენთეფეში ამბარაფექ.

 

  1. პაპაზეჶენდი დო მამგურაფალეში მოკითხა
  • არ ნდღას ოფუტეში პაპაზეჶენდიქ პაპუ სქანიში ფაცხაშა ქომეხთუ!
  • ჰო, მოკითხუ შენი ქომეხთერეტუ. არ ხანუმი კალა ქომეხთერეტუ. იფთი მუთუ ვა მევაგნი მა. მა დიდო მახელუ.
  • მოკითხუშა ქომეხთერეტეს, ჰოი?! პაპული სქანი, მუსაჶირიში მოკითხუშა გეგაფერი ვა რტუ!
  • ჰო! მოკითხუშა ქომეხთერეტეს
  • ოფუტეში პაპაზეჶენდის მუ ჯოხონტუ?
  • პაპაზეჶენდის შულტზი ჯოხონტუ.
  • ემ ხანუმის მუ ჯოხონტუ?
  • ემ ხანუმის ელსა ჯოხონტუ.
  • ელსა ხანუმი, შულტზიში ჩილი რტუ ჲა გაჩქინეტუ იფთი!
  • ჰო, ეშო მაჩქინეტუ იფთი. ენჯამი ჭიჭიტა ბერე ვორტი მა!
  • ელსა ხანუმი მი ტერენ. ელსა ხანუმიქ მუ დულჲა იქიფტუ?
  • ელსა ხანუმი ოფუტეში ნწოფულაში მამგურაფალე რტერენ. კაი გურონი რტუ. თი- მოწონერი ვა რტუ. მსქვა თოლონი დო გინძე თომალონი ხანუმი რტუ. ძიცინაჯე რტუ.
  • პაპული სქანის ენთეფე კალა ოღარღალუშა ჩქარ ნიჲეთი ვა უღუტუ! ეშო ქომშუნს მა!
  • ჰო, მთინი ზოპონ სი. პაპული ჩქიმის ენთეფე კალა ოღარღალუშა ჩქარ ნიჲეთი ვა უღუტუ.
  • პაპაზეჶენდი დო ელას ხანუმიქ მუშენი ქომეხთერეტეს პაპული სქანიში ფაცხაშა?
  • ჩქიმი შენი ქომეხთერეტეს ენთეფე. პაპული ჩქიმი კალა ჩქიმი ხალიშენ ოღარღალუ შენი ქომეხთერეტეს. ენთეფექ მა მგორუფტეს.
  • მუშენი სი გგორუფტეს ენთეფექ? პაპაზეჶენდი დო მამგურაფალეს მუ უნტეს?
  • პაპაზეჶენდი დო მამგურაფალექ პაპული ჩქიმის იზნი აკვანდეს.
  • მუშენი ემუს იზნი აკვანდეს ენთეფექ?
  • პაპული ჩქიმის ჩქიმი გურაფა შენი იზნი აკვანდეს ენთეფექ. პაპული ჩქიმიქ კილისე დო ნწოფულაშა ოხთიმუშა იზნი ვა მომჩაფტუ.
  • მუშენი პაპული სქანიქ იზნი ვა მექჩაფტუ კილისე დო ნწოფულაშა ოხთიმუშა.
  • კილისე დო ნწოფულაშა თოლი ვა უღუტუ პაპული ჩქიმის დო ემუშენი.
  • მუშენი კილისე დო ნწოფულაშა თოლი ვა უღუტუ პაპული სქანის?!
  • პაპული ჩქიმიქ ოფუტეში ხალკის ვა ყოროფტუ ემინდროს?
  • პაპული სქანიქ მუშენი ვა ყოროფტუ ხალკის ემინდროს?!
  • ბაბა ჩქიმის ნანა ჩქიმი კალა ოჩილუ უნტერენ, მარა პაპული ჩქიმიქ აჲა ოჩილუ- ოქიმოჯუს ნოდგითერენ. ოფუტეში ხალკიქ აჲა ოჩილუ- ოქიმოჯუს ნუმხვაჯერენ. ემუშენი პაპული ჩქიმიქ ვა ყოროფტუ ოფუტეში ხალკის. ნანა- ბაბა დომიღურუში, ოფუტეშენ მენდრანი რაკანის გეკიდერენ აწინერი ფაცხა მუში დო დიბარგერენ.
  • პაპაზეჶენდი დო მამგურაფალეს მუ უნტეს პაპული სქანიშენ?
  • მამგურაფალე ხანუმიქ, ჰაიდიქ ნწოფულას იგურას ჲა უწუ. პაპაზეჶენდიქთი, ჰაიდიქ კილისეშა მოხთას ჲა უწუ
  • პაპაზეჶენდი დო მამგურაფალე ხანუმიქ სი ნწოფულა დო კილისეშა ქჩუმერტეს.
  • ჰო, მა ნწოფულა დო კილისეშა მჩუმერტეს ენთეფექ. ნწოფულა დო კილისეშა მა მიჭანდეფტეს.
  • პაპული სქანი რაზი იყუი?! სი ნწოფულაშა მენდეგოჩქვუი პაპუ სქანიქ? მჟაჩხას სი კილისეშა მენდეგოჩქვუი პაპუ სქანიქ?
  • ვარ, მუთუთენ რაზი ვა იყუ პაპული ჩქიმი. კილისე დო ნწოფულაშა ოხთიმუშა მუთუთენ იზნი ვა მომჩუ პაპული ჩქიმიქ. ვართი კილისეშა დო ნწოფულაშა მენდემოჩქვუ პაპული ჩქიმიქ, ვარტი კილისეშა მენდახთუ.
  • კარარი მეჩამერი ტერენ! პაპული სქანიქ სქანი გურაფაშა ნოდგითუ დო ნწოფულაში გზა გეგიღობუ.
  • ჰო, ნწოფულაში გზა გემიღობუ პაპუ ჩქიმიქ.
  • პაპული სქანიქ სქანი ხვამაშა ნოდგითუ დო კილისეში გზა გეგიღობუ.
  • ჰო, ქილისეში გზა გემიღობუ პაპუ ჩქიმიქ. ედო თოლის ჩელამურე ქოდოლომიდგუტუ.
  • პაპული სქანიქ პაპაზეჶენდი დო მამგურაფალეს ნუშველუი?
  • ვარ, პაპული ჩქიმიქ სქანიქ პაპაზეჶენდი დო მამგურაფალეს ჩქარ ვა ნუშველუ! პაპაზეჶენდიში ნოთქვამეფეთენ დიდო დიშუმუ დო ემუს უბეჯღუ.
  • ხე მუშიშენ დუდი სქანი ვა მოგაშლეთინუ სი. მითის ემუშა ნენა ვა ათქვეტუ.
  • ჰო, ხე მუშიშენ დუდი ჩქიმი ვა მომაშლეთინუ მა.
  • მუშენი პაპული სქანიქ ენთეფეს ვა ნუშველუ?
  • პაპული ჩქიმიქ ოფუტეში ხალკი მანებრა ვა შინაფტუ დო ემუშენი!
  • მარა ნწოფულაშა დო კილისეშა თოლი გიღუტუ სი. ნწოფულას ოგურუშა დო კილისეს ოხვამუშა თოლი გიღუტუ სი!
  • ჰო, ნწოფულას ოგურუ დო კილისეს ოხვამუ გურის მეშამიხეტუ მა!
  • გური ჩიჩქუ დოგაყუ. ნწოფულა დო კილისეშა ოხთიმუ გურის მეკაგილაფტუ. მარა გზა გენკილერი რტუ ოფუტეშა.
  • მთინი გიჩქინ! გური ჩიჩქუ დომაყუ. პაპული ჩქიმიში აჲა კარარი დიდო პატი მაწონუ მა. დოვიგემზული! ნწოფულა დო კილისეში ორანცკირონიში სერსი ვოგნიში, შიკინერი- შიკინერი ვიმგარტი. გური ჲეფშერი ვიმგარტი მა. ყალი დო ყუჯიშა ვიმგარტი მა. ჩარე ვა მიღუტუ. თი- კუჩხეთენ ტეტელი ვორტი მა. დელი დერვიში სთერი გოვულურტი ფაცხა დო ავლის. მარა ხოლოთი იროთე ომუდი ქომიღუტუ მა, ნწოფულა ექ გელადგიტუ, კილისე ექ გელადგიტუ. ვაჲ თი ჩქიმის!  თოლის ნჯირი ვა მეშულუტუ. ჩელამურე დიდო მეფხვი მა, გიჩქიტას!
  • ყინორა მოხთუში, მუეფე ყვით თქვან?
  • ყინორა მოხთუში, დიდო მთვირი დომთუ. ალპეფეში ადეთი ეშო რენ, დიდო მთვირონი. დიდო ყინი დო მთვირი დიყუ. მთვირიქ დომფულუ ბუნჯინა, მთელი ხოლო. ხჩეში მეტა ფერი ვა იძირეტუ ბუნჯინას.
  • თქვან მუეფე იქიფტით ფაცხას? აწინერი სთერი ვა რტუ ოფუტეში სქიდალა!
  • მა ნოღა მაჲენჶელდის დადი ჩქიმი კალა ვორტიში, მჟაჩხაში ნწოფულაშა მევულურტი. აწი პაპული ჩქიმი კალა ხელებერი ვორტი, მარა მა მჟაჩხაში ნწოფულა დო ექონი მანებრაფე ჩქიმი გომანჭელუ. პაპული ჩქიმის დიდო ვაკვანდი.
  • სი პაპული სქანის მუ აკვანდი?!
  • პაპული ჩქიმიქ ალბონი ოგურუს დო დინური პაშურაფე ოკითხუს მა მემიშველას, ეჲა ვაკვანდი მა.
  • მუ ყუ პაპული სქანიქ? სი მეგიშველუი ემუქ?
  • გიჩქინ, ოკითხუშა თოლი დო ხავესობა ქომიღუტუ მა!
  • პაპული სქანის კილისეშა დო პაპაზეჶენდიშა თოლი ვა უღუტუ! ეშო ვა რენი? ნწოფულაშა თოლი ვა უღუტუ!
  • ჰო, ეშო რტუ. მეგერემ ემუს შინახერი დინური დო პაშურაში ქეთაბეფე უღუტერენ. ედო დინი დო ოკითხუშა თოლი უღუტერენ პაპული ჩქიმის. ემუქ ეჲა ქეთაბეფე ქომომჩუ დო მა ჭიტა- ჭიტა ოკითხუს ქოგევოჭკი. მარა მა ოკითხუს კაი ვა ვორტი. ენჯამი კითხერი ვა ვორტი ნწოფულას. ემუშენითი მა ემუქ მიკითხუ არ-ჟურ ამბარი ქეთაბეფეშენ.
  • ემუქ ეჲა ამბარეფე ქეთაბეფეშენ გიკითხუი?
  • პაპული ჩქიმიქ დინური ამბარი მიკითხუ, მარა ქეთაბიშენ ვარ, ეზბერი მუშიშენ. მეგერემ ემკათა დინდარი კოჩი ტერენ პაპული ჩქიმი! მათი გოვიშაში! ედებიჲათიშენთი, დინიშენთი ამბარი ქუღუტერენ კოჩის.
  • მერაღის დომიტალეფ სი. შუქურიშა ქომეხთერენ კოჩი! თოვბეშა ქომეხთერენ! ეშო ფთქვა! ოკაჩხე მუ ყუ პაპული სქანიქ?
  • არ- ჟურ თუთას ოკითხუ- ოჭარუ დომოგურუ პაპული ჩქიმიქ. მაჟურა კელეთი თი- მუში კალა კილისეშა ოხთიმუ შენი, გზა ბგორუფტი უდოდგინუ მა. ემუს ოჯერაფუ შენი შურდოგურითენ დოვიჩალიში მა. ჩოდინასთი, არ ნდღას პაპული დო მა ნოღაშა ქოგეფთით ხე- ხეს ოკოკლიმერი. ჩქინ მაჲენჶელდიშა ქოგეფთით!
  • გოკვირონი ამბარი! მუ დულჲა გიღუტეს ნოღა მაჲენჶელდის?
  • მჟაჩხა რტუ. ედო კილისეშა მენდაფთით. ჩქინთი დინური დუა ვოღოდით დო ილაჰეფე ვიბირით კილისეს.
  • წოხლეშენ პაპული სქანის თოლი ვა უღუტუ კილისე დო პაპაზეჶენდიშა!
  • ჰო, ეშო რტერენ! ედო კილისეში ჯემაათისთი დიდო გააკვირუ. კოჩეფექ ჩქინ კილისეს ქომძირეს დო დიდო გააკვირეს.
  • გონდინერი თიკანი ოხორიშა გუიქთუ, ჰოი?!
  • ჰო, გონდინერი თიკანი ოხორიშა გუიქთუ. ედო კილისეში ჯემაათიქ დიდო იხელუ. მათი ვიხელი, პაპული ჩქიმიქთი იხელუ.
  • ნოსი წანას ვარ, თის რენ! ედო კოჩი კოჩიში ჭამი რენ! უჩოდინუ მუთუ ვა რენ!

 

  1. უჯოხინუ მუსაჶირი

– არ ნდღას დადი სქანი ჶრანკჶურტიშენ ნოღა მაჲენჶელდიშა ქომეხთერეტუ!

– ჰო, ქომეხთერეტუ დადი ჩქიმი!

– ემედენითი პაპული სქანიში ფაცხაშა ქომეხთერეტუ!

– მთინი ზოპონ, ფაცხაშა ქომეხთერეტუ. პაპული ჩქიმი ფაცხას ვა რტუ. გერმაშა მენდახთერეტუ.

– მუშენი მენდახთერეტუ გერმაშა პაპული სქანი?

– დიშქა მომალუშა მენდახთერეტუ პაპული ჩქიმი.

– სი ფაცხას ხვალა რტი. ეშო ქომშუნს მა. ედო მუ იყუ?!

– მთინი ქოქშუნს სი. ხილაჶი ვა რენ. მა ფაცხას ხვალა ვორტი.

– მუშენი ქომეხთერეტუ დადი სქანი?

– ემედენი იხაზირი, მა სი ნოღა ჶრანკჶურტიშა  მენდაგიყონამინონ ჲა მიცვერეტუ დადი ჩქიმიქ.

– დიტიქ რახატი ეგიზდუ. მოთ ნოღა ჶრანკჶურტიშა მენდაგიყონასუნტუ დიტიქ?

– ჩქიმი შენი არ დულჲა ქოძირერენ ნოღა ჶრანკჶურტის. არ ხამფა კოჩიში კონაღის ტერენ ეჲა დულჲა.

– სი ჭიჭიტა ბერე რტი. მუ დულჲა გიღუტუ დიდი ნოღას?! სი ნოღა ჶრანკჶურტიშა ოხთიმუ გინტუი?

– ვარ, მა ნოღა ჶრანკჶურტიშა ოხთიმუ ჩქარ ვა მინტუ. მარა ემუქ დუბარათენ ქამომოღერდინუ. ონწელიში ბერე ვა ვორტი, მარა ენჯამი მათი ჭიჭიტა კულანი ვორტი. დუნჲაშენ ჩქარ ამბარი ვა მიღუტუ. კითხერი ვა ვორტი. ჯაჰილი ვორტი მა. ჰუქმი ვა მახვენუ! ბაში ვა მახვენუ დადი ჩქიმი კალა. ოფუტე ჩქიმიშ მეტა სოთხანიშენ ამბარი ვა მიღუტუ.  მა ოხთიმუ ვა მინტუ. დადი ჩქიმიქ აჲა ქოგნუ დო არშვაჯის მიბეჯღუ.

– დიტიქ მუ გიწუ? მუ მოლაგიშინუ ემუქ?

–  ხვალა არ დოლონი შენი ნოღა ჶრანკჶურტიშა მევულურთ ჲა მიწვერეტუ დადი ჩქიმიქ. ედო ოჯერონი მომიხთუ ნოთქვამე მუში. ენჯამი მა ჭიჭიტა ვორტი.  მიშა ომუდი პა?! სო გომდუნა?! ემუქ კიბირი მოწირუ. ედო და ხე მუშიშენ დუდი ჩქიმი ვა მომაშლეთინუ. ომტინუში გზათი ვა მიღუტუ. დადი ჩქიმის თოლიქ მუთუ ვა უძიროფტუ. მა მოჯერაფუ ემუქ.

– პაპუ სქანის აჲა დულჲაშენ ამბარი ვა უღუტუ! პაპული სქანი შენი ხელონი დულჲა ვა რტუ!

– ჰო, პაპუ ჩქიმის მუთუშენ ამბარი ვა უღუტუ.

– ოკაჩხე მუ იყუ?!

– მა ზორითენ ოფუტეშა მენდემიყონუ დადი ჩქიმიქ. იფთი ჩქინ ოფუტე დორჶლიშა ქოგეფთით. პაპაზეჶენდიქ მა ქომძირერეტუ დადი ჩქიმი კალა ოფუტეს.  დადიქ ჩქიმიქ პაპაზეჶენდის დუღარღალუ. ჩქიმი შენი მცუდი ნენაფე თქვერენ დადი ჩქიმიქ. პაპული მუშის ამბარი უღუნ ჲა უწვერენ პაპაზეჶენდის დადი ჩქიმიქ.

-ოხორიშა გუიქთუში, პაპული სქანის მთელი შური გამუხთუ მონდო! კოჩის ტურა გური უტკვაცუ!

– მათი ეშო დომაწონუ.  ზავალი კოჩი! მა მგორასუნტუ დელი დევრიში სთერი!

– სითი ვა გაძირუ პაპული სქანი. ნესიბი ვა იყვერენ! დიტი ნოსი- თითხუ ოხორჯა ტერენ!

-ჰო, ვა მაძირუ პაპული ჩქიმი მათი. პაპული ჩქიმისთი ვა აძირუ მა!

– ოფუტე დორჶლიშენ სო მენდახთით თქვან?

– ოფუტე დორჶლიშენ არ ჶაჲტონის გეფხედით დო ნოღა მაჲენჶელდიშა მენდაფტით.  მა ჶაჲტონის გემხედუ დადი ჩქიმიქ. ოკაჩხეთი სტაციაშა მენდაფთით. ექშენ თრენის გეფხედით დო ნოღა ჶრანკჶურტიშა მენდაფთით ჩქინ. ნოღა ჶრანკჶურტიშა გზა ვოქაჩაფტით თრენითენ. დიდო გინძე გზა რტუ. ეშო მომიხთუ ემინდროს!

– თრენიში მაგზალობა კაი გაწონუი?

– ჰო, თრენიში მაგზალობა კაი მაწონუ, მარა პაპული ჩქიმის მუთუშენ ამბარი ვა უღუტუ. ედო მა დიდო პათი მაწონუ.

– არ კელე კაი გაწონუ მაჟურა კელეთი პატი გაწონუ! იზმოჯეს ვორე დოგაწონუ სი!

– ჰო, არ კელე კაი მაწონუ მაჟურა კელეთი პატი მაწონუ! ხელეჯანითენ ტურა ბღურუტი. ოსიმადუქ ქემჭოფუ. ოსიმადუთენ ქაგომდუნი მა. მა მუ მაღოდუ, აჲა დულჲაშენ პაპული ჩქიმის ამბარი ვა უღუტუ. ფუფულონი მაყუ გურის. დადი ჩქიმიქთი არ ეშო, არ აშო გოქთერი ღარღალაფტუ უდოდგინუ- უდოჭკინდინუ.

– მზახალეფეთენთი კაპულა კაპეტი ვა გიღუტუ სი. უმითელი რტი!

– წორი ზოპონ, მზახალეფეთენ კაპულა კაპეტი ვა მიღუტუ მა. უმუთელი დო უმითელი ვორტი მა. თოლეფე მაფშუ მა!

–  ნოღა მაჲენჶელდიშენ ნოღა ჶრანკჶურტიშა გზა გინძე რტუი?

– ჰო, დიდო გინძე რტუ. ეშო გომაშინენ აწი. მუკო გინძე რტუ, ეჲა ვა მიჩქინ აწი.

– ნოღა ჶრანკჶურტი მუჭოში გაწონუ? კაი გაწონუი?

– არ კელე კაი მაწონუ მაჟურა კელე კაი ვა მაწონუ!

-მოთ?!  მუშენი არ კელე კაი გაწონუ მაჟურა კელე კაი ვა გაწონუ?!

– პაპული ჩქიმიში ფაცხაშა გეგაფერი ვორტი. ოფუტე ჩქინიშა, დორჶლიშა გეგაბერი ვორტი. ნოღა მაჲენჶელდიშა გეგაფერი ვორტი მა. გალენი ნოღაფეშენ, გალენი კოჩეფეშენ ჩქარ ამბარი ვა მიღუტუ მა!

– დორფლის დო მაჲენჶელდის ვა ნუნგაფტუ ჶრანკჶურტი! ეშო რტუი?! ოსიმადუს მეფჩი მა.

– ჰო! ჶრანკჶურტი დიდო დიდი ნოღა რტუ. ლიმანიში ნოღა რტუ. თიჯარეთიში შქაგური რტუ. ჶინანსიში შქაგური რტუ. დიდო კოჩი სქიდუტუ ნოღას. სოქაღაფე კალაბალუღი რტუ. ჶაჲტონეფე ქორტეს. გინძე დო მჩირე გზალეფე ქორტეს.  კაზონეფე ქორტეს. დორჶლიში გზალეფე მწულე რტუ. მაღალი კალდურუმეფე ქორტეს ნოღა ჶრანკურტის. დიდი ქვაში ბინაფე ქორტეს. დუქჲანეფე ქორტეს. მჩირე დო გინძე სოქაღეფე ქორტეს. ცხენონი პოლისეფე ქორტეს. ხალკი დიდო თელაშონი რტუ.  დიდო ჯალეფე ვა იძირეტეს სოქაღეფეს. ჩქიმი თოლითენ, არ დიდი კაჶესი სთერი რტუ ნოღა ჶრანქჶურტი. ჶაბრიკაფეში გელიკონიში სერსეფე ვოგნაფტი სუმ- ოთხო ჶარა არ ნდღას.

– სქანი შენი ნოღა ჶრანქჶურტი ნუნგაფტუ დიდი კაჶესის! ეშოი?!

– ჰო, ეშო რტუ! მათი მოლოხუნერი კვინჩი ვორტი. პაპული ჩქიმი დო ფეტერი მენდრა ქომიყონუტუ. ოფუტე ჩქიმი მენდრა ქომიღუტუ დო ემუშენი. ართიმაჟურაშა მენდრა ვორტით.

– ნაქონი ოხორეფე ჩქვა მსქვა რტეს?!

– ოფუტეში ოხორეფე ჩქვა მსქვა რტეს.

– ჶრანქჶურტიში ოხორეფე მსქვა ვა რტესი?

-ვარ! არ დიდი ოხორიშ წოხლე მაჟურა ჩქვა დიდი ოხორი გოწუდგიტუ დო მუთუ ვარ. ოხორეფე იმსქვანენან კოჩიში ყოროფათენ. ნოღარეფექ ართიქართის სელამითი ვა მეჩაფტეს, ართიქართის ვა ყოროფტეს დო ემუშენი. ეშო ოხომაწონუ. ეშო მომიხთუ მა. ნცას მჟორა, თუთა დო მურუცხითი ვა იძირეტუ. აშო რტუ დიდი ნოღა! დიდი ნოღაში ხილაფეთი შურჲანი ვა რტეს. მცუდიში ვა გიწუმერ მა. ეშო რტუ!

– დიდი ნოღაში ხალიქ თოლეფე სქანი ვა გოხელერენ! დიდი ნოღაში მახორობა დიდო რენ. გონეფთი ემუშენი ეშო რენ!

– ვა მაჩქინენ მა. მარა ართიქართის ვა ნუშველტუ მილლეთიქ. ეშო მაჩქინუ. დიდო კალაბალუღი რტუ.

– სტაციაშენ სო მენდახთით?

–  ექშენ არ ჶაჲტონის გეფცხონტით. არ ჶაჲტონიქ ჩქინ მჩუმერტეს, ჭაკა- ჭუკა! არ მსქვა ჶაჲტონის გეფხედით დო არ ოხორიშა მენდაფთით.

– წოხლეშენ დიტიქ ეჲა კონაღიშენ ამბარი მექჩიი?

– ჭიჭა- ჭიტა ამბარი ქომომჩერეტუ ოხორიშენ დადი ჩქიმიქ.

– დიტიქ მუ გიწვერეტუ? მუ ამბარეფე მექჩერეტუ დიტიქ.

– კონაღიში მანჯე დიდო ხამფა რტერენ. დიდო ფარა ქუღუტერენ. ხოშ მა ფარაშენ ამბარი ვა მიღუტუ ემინდროს. ხეზმეთქჲარეფე ქუყონუტერენ ემ ხამფა კოჩის. დიდო ითიბარონი კოჩი ტერენ ნოღა ჶრანკჶურტის.  კონაღიში მანჯე გენჯი ტერენ. დიდო მსქვა ტერენ. მარა ჩილი ვა უყონუტერენ. არ კულანი ბერე უყონუტერენ კოჩის. ამკათა ამბარაფე მომჩერეტუ დადი ჩქიმიქ.

– ჩქვა მუთუ ვა გიწუი? სი მუ მექშვენტუ დიტიქ?

– მა მუ მემშვენტუ დადი ჩქიმიქ?! მილლეთიშა რეზილი მო მწიფხუფ ჲა მიწუ დადი ჩქიმიქ. მა მუთუ ვა ოხომაწონუ ეჲა ნოთქვამე მუშიშენ.

– აჯაებიშა მოგიხთუი?! ნოსი ქოდოლოგოქუნუ!

– ჰო!  ნოსი ქოდოლომოქუნუ დადი ჩქიმიქ. მორო მუ, აჯაებიშა მომიხთუ. პაპული ჩქიმიშენ ამბარი ვა მიღუტუ. ემუსთი ჩქიმდენ ამბარი ვა უღუტუ.

-ართიქართიშენ უამბერე რტით! გურიშ მეჭვონი დულჲა რენ. ქარტალი ვა რენ. ტილიჶონი ვა რენ ემინდროს! მობილური ტილიჶონი ვა რენ. ინტერნეტიში მოსა ვა რენ! სიბერული მუთუ ვა რენ!

-საღი- ღურაში ამბარი ვა მიღუტეს ართიქართიშენ. ალლაჰის ვოხვეწაფტი მა.

-ჭაკა- ჭუკა ჶაჲტონიშენ ქაგეხთით. ოკაჩხე მუ იყუ.

– ოხორი დიდო დიდი რტუ დო არ დიდითი ავლი ქუღუტუ. არ დიდი ტიქშარი ქუღუტუ ავლის. არ- ჟურთი ნჯა ქობძირი ავლის დო მუთუ ვარ! ნეკნა დიდო დიდი დო მოზდიმერი რტუ. ჩქარ მუთუ დო მითი ვა იძირეტუ.

 

  1. დიტიში პატინობა
  • მიში ოხორი ტერენ. ოხორმანჯე მი რტერენ? ჰელე, არ დაა მიწვი!
  • ზიზიმანიში ბეგიში ოხორი ტერენ. დიდი კოჩონი კოჩი ტერენ ზიზიმანიში ბეგი. ჯიხა სთერი კვაში ოხორი რტუ. ზიზიმანი ბეგი რტერენ ოხორმანჯე. მარა ოხორის ვა რტუ ემინდროს. თურჯარი ტერენ. დიდი ესნაჶი ტერენ. კოჩის დიდო დიდი დულჲაფე უღუტერენ ნოღა პარისის, ჶრანსას.
  • თქვან მიქ მეგარგეს ნეკნას იფთი? მიქ თქვან ოხორიშა ქეგზდეს?
  • ხეზმეთქჲარი საბესტიანიქ ჩქინ ქომემარგეს ტიქშარის. ოკაჩხეთი როტენმაჲერ ხანუმიქ ქომემარგეს ჩქინ ოხორიში ნეკნას. როტენმაჲერ ხანუმიქ ჩქინ ქემზდეს ოხორიშა.
  • როტენმაჲერ ხანუმი მი რტუ? ზიზიმანი ბეგიში ჩილი რტუი?
  • ვარ, ვარ, ვა რტუ! დუდხეზმეთქჲარი რტუ. ოხორიში ქაჰჲა ტერენ. უქიმოჯე რტერენ. ხჩინი რტუ. (45- 50) ჟურე ნეჩი დო ხუთ ვარნა ჟურე ნეჩი დო ვით წანერი რტუ.  მეგერემ როტენმაჲერ ხანუმის თოლი უღუტერენ ზიზიმანი ბეგიშა.
  • დედიქოდუთი იქიფ აწი, ჰოი?!
  • ვარ! დედიქოდუშა თოლი ვა მიღუნ მა! სითი აჲა გიჩქინ! ოკაჩხე ამბარი მაყუ მა ეჲა დულჲაშენ.
  • ჩქვა მიეფექ მეგარგეს? ჩქვა მითი ვა რტუი?
  • მაჟურა უშაღეფე დო ხეზმეთქჲარეფექ მემარგეს. კლარაქ მემარგეს ჩქინ.
  • კლარა მი რტუ?!
  • კლარა, ზიზიმანი ბეგიში კულანი რტუ. თი სირმალი დო ნუნკუ ფუქირა! მარა კლარა კაკვატა რტუ, ზავალი. თექერლეღონი თრონის გეხედერი რტუ დო იროთე ეშო გულურტუ დიდო ოხორის. კლარა გურის მემაჭუ მა. ზავალი კლარაქ მა ქომძირუში, დიდო იხელუ დო ხელებათენ სოთი ვა იმტრეტუ. მეგერემ ხვალა ტერენ ეჲა ოხორის! მანებრა დომაყუ.
  • სი და ქეგზდუ კლარაქ! კლარა მუკო წანერი რტუ ემინდროს? მუჭოში კულანი რტუ? ჰელე, მიწვი, მათი ვოგნა!
  • მთინი ზოპონ. მა და ქემზდუ კლარაქ. ხოშ კაი გურონი რტუ. (10) ვით წანერი რტუ კლარა. ხამფა ოჯაღიში ბერე რტუ, მარა ელამცქვინერი ვა რტუ. თუთა სთერი კულანი რტუ. მსქვა თოლონი. გინძე თომალონი რტუ.
  • როტენმაჲერ ხანუმი მუჭოში ხანუმი რტუ?!
  • როტენმაჲერ ხანუმი კაი გურონი ვა რტუ. არ ჩარბი დიხას მაჟურა ჩარბი ნცას ქუღუტუ ოხორჯას. ანქსი ოხორჯა რტუ. შური მედვალონი რტუ. ჯუნჯური რტუ. მა ჭიჭიტა ვორტი, მარა ხოლოთი როტენმაჲერ ხანუმის დოვუბაღუტი მა. წორი ვორტი დო ემუშენი.
  • ემკათა ქიმოლი დო ოხორჯაშა კაპულა ვა მეგადვენ მა! მი გესქიდერენ აჲა დუნჲას! პატი ქიმოლი დო ოხორჯას ჟურ თოლი დუდგითას!
  • ოკაჩხე ამბარი მაყუ. დადი ჩქიმითი კაი გურონი ვა რტერენ. მეგერემ დადი ჩქიმი ვარ, მენდრანური კოჩი ტერენ. წიწილა ტერენ!
  • სი სოლენ ამბარი გაყუ ქი, დადი სქანითი კაი გურონი ვა რტერენ?! მუჭოში ოხორჯა ტერენ დადი სქანი?
  • წოხლეშენ ზიზიმანი ბეგიქ კულანი მუში შენი არ მალამთურე მანებრა გორერენ. დადი ჩქიმიქთი მა ქემზდერენ. მთინი ნენათენ, მომორკერენ პაპული ჩქიმიში ფაცხაშენ დო ნოღა ჶრანკჶუტიშა მენდემიყონერენ მა. მარა წოხლეშენ ამბარი ვა მიღუტუ მა.
  • დიტიქ კაინობა შენი სი ნოღა ჶრანკჶუტიშა მენდეგიყონერენ, ჰოი?!
  • ვარ, კაინობა შენი ვარ, ფარა შენი მა მომორკერენ დო მენდემიყონერენ ნოღა ჶრანკჶურტიშა. ედო ფარათენ გამამჩერენ მა ემუქ. აჲა ოხორის მა ქომემჩერენ. გური დომიტახუ დადი ჩქიმიქ.
  • დიტიქ ფარაში დულჲას სი გინტალერენ! ყინი დიცხირონი ოხორჯა ტერენ!
  • ჰო, ფარაში დულჲას მა მინტალერენ. ფარაში დულჲა ვოგნიში, კუჩხეს ვა დომადგინუ მა.
  • დიდო პატი ოხორჯა ტერენ დადი სქანი! დიდო პატი ტერენ დიტი! მარა გიჩქიტას, ამკათა პატი ადეთეფე დიდო გონტალერი რტეს რომაში იმპერიაში ორასთი, ბიზანსიში ორასთი, ალოსმანიში ორასთი.
  • ხვალა ღურაქ კოჩი რეზილი ვა იქიფს. აჲა სითი ქოგიჩქინ, ალიკო!
  • დიტიქ მეგაშქუ დო იგზალუ. სი აქონაში მითი ვა იჩინოფტი. სი უმითელი რტი დიდი ნოღას!
  • ჰო, დადი ჩქიმიქ მემაშქუ დო იგზალუ. ედო მა მითი ვა ვიჩინოფტი ნოღა ჶრანკჶურტის.
  • ოხორიში ხალკიქ სი მეგიშველუი?!
  • ჰო, ირიქ მა მემიშველუ. მარა როტენმაჲერ ხანუმიქ იროთე მაანა გორუფტუ ობეჯღუ შენი.
  • მუშენი ეშო იქიფტუ როტენმაჲერ ხანუმიქ?
  • ემუქ მა მსინჯუ. როტენმაჲერ ხანუმიქ კიბირეფე დილასირუფტუ. ოკითხუ- ოჭარუ ვა მიჩქიტუ დო ემუშენი. ნოღაში ადეთეფეშენ ამბარი ვა მიღუტუ დო ემუშენი.
  • ემუშენითი სი ჯაჰილი გშინაფტუ როტენმაჲერ ხანუმიქ!
  • ანდღანერი სთერი ქომშუნს. შურის მანჯე გამომიხთუ ოხორჯაქ.
  • უდოდგინუ ჩქინაფათენ გსინჯუი ემუქ?!
  • ჰო! მა ჯაჰილი მშინაფტუ როტენმაჲერ ხანუმიქ. მცუდი ვა მათქვენ მა. ზურნა სთერი დგიტუ. ჯოხო-ტახერი ოხორჯა რტუ ოხორის.
  • დიხაქთი ვა შინახუფს ემკათა ქიმოლი დო ოხორჯა! წიწილა სთერი ოხორჯა ტერენ. ეშო ოხომაწონუ მა! ბეთი ტერენ. ეშო მიჩქინ მა.
  • ხილაჶი ვა გიჩქინ. ნამუ ფთქვა, ნამუ ვა ფთქვა ვა მიჩქინ აწი! მა ხოლოთი როტენმაჲერ ხანუმიში მთელი ნენას ყუჯი მეფჩაფტი. კართა კოჩი კალა ნენა ვა ითქვენ, სითი აჲა კაიხეშა გიჩქინ!
  • მეზმონერი ქოდოსქიდი. დიდო პატი ხალის რტი.
  • ჰო, პანდა მეზმონერი ვორტი მა, უმითელი დიდო დიდი ნოღას. დიდი ბელას დოლობლი მა დომაწონუ.
  • სი მუსაჶირი ეგზდეს. სი ოდა მექჩესი?
  • ჰო, მა ოდათი ქომომჩეს. ოდა ჭერის ქომიღუტუ. ფენჯერონი რტუ. ჭიტა რტუ ოდა ჩქიმი. დოლაბი ქომიღუტუ. ჲაშიკი ქომიღუტუ. კაველა ქომიღუტუ.
  • ონჯირე მეგირჩეს სი! ონჯირე, ბალიში, ჲორღანი ქოგიღუტუ. მარა დოლოქუნუ ვა გიღუტუ. უმოდვალუ რტი. ეშო ვა რენი?!
  • ვარ! აღანი დოლოქუნუთი დო მოდვალუთი ქომომჩეს. დოლოქუნუ დო მოდვალუ ქომიძირეს. ჶორკა ჲემიჭოფეს. მა ოჭკომალე ქომჩეს ენთეფექ.
  • დიდო რახატი რტი!
  • ჰო, დიდო რახატი ვორტი, მარა უმითელი ვორტი მა.
  • ჩქვა მუ ამბარი გიღუნ ილქინერი დღალეფეშენ?!
  • კლარას დიდო მოდვალუ დო დოლოქუნუ ქუღუტუ, მარა კაკვატა რტუ.  ემუს მთელი შეჲი ჲოფშა ქუღუტუ. ემუშენითი დოლოქუნუ დო მოდვალუფე მუში მომჩაფტუ. კლარაქ ენთეფე დომოხრაფუ.
  • ჲაშიკიში დოლოხე მუ დოლოგიძიტუ?
  • ჲაშიკიში დოლოხე დოლოქუნეფე დოლომიძიტეს.
  • ოდა სქანი მუჭოში რტუ? ჭიტა რტუი? ოდა კაი გაწონუი?
  • ჰო, ოდა კაი მაწონუ. ვართი ჭიტა დო ვარტი დიდი რტუ. ორთანი რტუ. მარა იროთე გემზული ვორტი მა. ფენჯერეშენ სოქაღი იძირეტუ. ჶაჲტონეფე იძირეტეს. კატუფე იძირეტეს. კვინჩეფე იძირეტეს. გერმაფე ვა იძირეტეს. რაკანეფე ვა იძირეტეს. ჯაფე ვა იძირეთეს. აჲა ოხორიქ მა შური ემიჭოფასუნტუ. ეშო მევისიმადი ემინდროს. ემუშენითი იროთე გემზული ვორტი მა.
  • ხვალა რტი დო იმგარტი! მარა როტენმაჲერ ხანუმიქ იბირტუ!
  • ჰო, მა ვიმგარტი, მარა როტენმაჲერ ხანუმიქ იბირტუ. ემ ოხორჯაქ ქუნი გემიჭკომუ. მა ხვალა ვორტი. ხვალა- ხვალა ფსქიდუტი მა. უმანჯელი ვორტი. უმენჯელე ვორტი. უმითელი ვორტი. პაპული ჩქიმი ჩქიმი კალა ვა ვორტი. ფეტერი, ჩქიმი კალა ვა ვორტი. ჰემი ხვალა ვორტი ჰემითი აჲა ოხორიში ადეთი კაი ვა მაწონერეტუ. შიკინერი- შიკინერი ვიმგარტი მა ოდა ჩქიმის. პატი იზმოჯეს ვორე დომაწონეტუ. მუნდეშა ხვალა- ხვალა გოფთამინტუ მა აჲა ქვაში დიდი ოხორის?!
  • ეკონარი მილლეთიში დოლოხე სი ხვალა რტი. იროთე უნჯირუ ოთანაფტი სი. ედო იროთე დოჭკინდინერი რტი.
  • ჰო, იროთე დოჭკინდინერი ვორტი. ლაი გვერდი ღურელი ვორტი ოფუტეში ხასრეტითენ. დადი ჩქიმიშენთი ჩინადვერი ვორტი. დადი ჩქიმიქ ხოშ გემჩინადვერეტუ.
  • მუ გექჩინადვერეტუ დადი სქანიქ?
  • ოფუტეშა ოხთიმუში გზა ვა გიღუნ ჲა დო გემჩინადვერეტუ დადი ჩქიმიქ.
  • პაპული სქანი დო ფეტერი გოგანჭელუ სი!
  • ხვალა პაპული ჩქიმი დო ფეტერი ვა გომანჭელუ მა. იზმოჯეთენ იროთე ანთეფე კალა ვორტი. ოფუტეში კოჩეფე, თხაფეთი გომანჭელუ მა. დიხაში შურა, ტიბაში ოშირალუ, კილისე დო ნწოფულაში ორანწკირონიში სერსითი გომანჭელუ მა.
  • ნოღა ჶრანკჶურტის კილისე ვა რტუი? ეჲა კილისეში სერსი ვა ოგნაფტიი?
  • ჰო, ვოგნაფტი, მარა ოფუტეში კილისე დო ნწოფულაში ორანწკირონიში სერსი გომანჭელუ მა.
  • ნოღა ჶრანკჶურტიში სოქაღეფეს გულუტუი?
  • ვარ, იროთე ოხორის ვორტი. ოხორის მოლახუნერი ფსქიდუტი მა. ედო დიდო მემანდარუ. იროთე სოქაღეფეს გოხთიმუ მინტუ მა. სოქაღიშა თოლი ქომიღუტუ. ოსიმადუს მეფჩი მა. მუ ბღოდა აღანი დოლოქუნეფე მა?!
  • ოხორის ავლი უღუტუი?
  • ქუღუტუ. ჰემითი დიდო დიდი ავლი ქუღუტუ ოხორის.
  • მითიქ სოქაღის გოხთიმუს დო ავლის ოსთერამუს ვა მეგიშველუი?
  • ვარ, მითიქ სოქაღის გოხთიმუს ვა მემიშველუ. ოხორის დიდო დიდი ავლი ქუღუტუ დო ავლის ოსთერამუს დერდი ქომიღუტუ მა. ავლის ოსთერამუ შენი გზა ვა მომჩაფტუ როტენმაჲერ ხანუმიქ. არ ნენათენ, ოხორის მოლახუნერი მწიფხუ მა ოხორჯაქ. სოთი ვა მოჩქუმერტუ ემუქ. მათი უდოდგინუ, უდოხუნუ ოფუტეში ჰულჲაფე ვიქიფტი. ენთეფექ მჟორაში თეთი ვა მოწირაფტეს მა. აჩქვა შური მეფჩაფ დომაწონუ! ჩქიმი ღურაში ორა მოხთიმერი რენ დომაწონუ!

 

  1. ჰაიდი დო კლარაში მანებრობა
  • დადიქ სქანიქ სი ოხორიში მანჯეს ფარათენ გამაგჩუ. ოხორმანჯექთი სი ჲექჭოფუ. ოკაჩხეთი დადი სქანიქ მეგაშქუ ოხორის დო ექშენ იმტუ.
  • ჰო, დიტი დადიქ მა ფარათენ გამამჩერენ. დუდხეზმეთქჲარი როტენმაჲერ ხანუმიქ ჲემჭოფერენ. დადი ჩქიმიქ მა მემაშქუ როტენმაჲერ ხანუმი კალა დო იმტუ ექშენ. მა მუთუშენ ამბარი ვა მიღუტუ. მა აჲა დულჲა ვოგნიში, დიხა დო ნცა ქუხუიქთუ.
  • პაპული სქანი შენი ელაფათხერი ზოპონტუ მილლეთიქ. მარა დადი სქანი ტერენ ელაფათხერი. ფარა შენი ეშო დულჲა იხვენენი?! ფარა მოგაფუ შენი ბერე გამიჩინენი?
  • მორო მუ, ვა იხვენენ. ფარა მოგაფუ შენი ხვალა კოჩი ვარ, სქინდინათი ვა გამიჩინენ!
  • ოკაჩხე დუდხეზმეთქჲარი როტენმაჲერ ხანუმიქ სი მეგიშველუი?
  • ვარ, როტენმაჲერ ხანუმი მუთუთენ ჩქარ ვა მემიშველუ. უდოდგინუ მა მზაფტუ ემუქ. როტენმაჲერ ხანუმიქ პანდა მა მემჭირაფაფტუ.  მუ გიწვა?! თაბიეთსუზი რტუ. კიბირეფე ხცაფერი ქუღუტუ. ოტორიტერი რტუ. როტენმაჲერ ხანუმიში ნოხვენეფექ მა დერდი ქომომჩეს. მარა კლარა ეშო ვა რტუ. კლარაქ კაი გურონი მანებრა ჩქიმი რტუ. კლარაქ დოლოქუნეფე მუში დო ქალამანეფე მუში ოჩუქარე ქომომჩუ. ყოროფონი დო ძიცინაჯე რტუ. მაჟურა ხეზმერთქჲარეფეთი დიდოფეთენ ძიცინაჯე რტეს. საბესტიანი ჯოხონი ხეზმერთქჲარითი კაი მანებრა ჩქიმი რტუ.
  • როტენმაჲერ ხანუმიქ ოხორიში ხალკი მსქიბუ სთერი ოქთაფტუ. ეშო იძირენ. ედო იროთე კუსური ძიროფტუ მილლეთის!
  • ჰო, ეშო იქიფტუ. ობეჯღუ შენი პანდა კუსური გორუფტუ. იროთე ნენა მემიკვათუფტუ. ჩქარ მუთუ შენი გზა ვა მომჩაფტუ მა ემუქ. ჩქიმი ღურაშ დღაშა აშო დოფსქიდამინონ დომაწონუ.
  • კლარას ნანა ვა უყოუნტუ, ჰოი?!
  • ჰო, კლარას ნანა ვა უყოუნტუ. კლარა ჭიჭითა რტუში, ღურერენ ნანა მუში. მა მინტუ ქი, პაპული ჩქიმიშა მენდაფთა. კლარას უნტუ ქი, მა პანდა თი- მუში კალა დოფსქიდა ეჲა ოხორის. მარა მა იროთე თოლი ქომიღუტუ პაპული ჩქიმი კალა ოსქიდუშა ოფუტეს.
  • სი კლარას ნუშველტი. ემუქთი იროთე სი მეგიშველტუ. კაი მანებრაფე რტით.
  • კლარაქთი იროთე მა მემიშველტუ. მათი კლარას მევუშველტი. კაი მანებრა დოვიყვით ართიმაჟურაშა ჩქინ. თი- გემალერი კულანი რტუ კლარა. დიმჭკუთი ვა ზაფტუ!
  • ოხორიში ადეთი მუჭოში გაწონუ? კაი გაწონუი?!
  • ვარ, ენთეფეში ადეთი კაი ვა მაწონუ. ენთეფეში ოჭკომუში ადეთი მონკა მომიხთუ. ენთეფეში სოჶრაში მერასიმი მონკა მომიხთუ. აჲა მერასიმეფეთენ, მა ორექსი ვა მიღუტუ ოჭკომუშა იფთი. ორექსი მამტუ. ენთეფეში ოღარღალუში ადეთი მონკა მომიხთუ. ენთეფეში ონჯირუში ადეთი მონკა მომიხთუ. ნჯირი მამტუ.
  • ირიშენ დიდო ნამუ ადეთი მონკა მოგიხტუ?
  • სოჶრაში ადეთი დიდო მონკა ქომომიხთუ.
  • სოჶრაში მერასიმი მონკა მოგიხთუ!
  • ჰო! დიდი ნოღაში ოსქიდუში ადეთი მონკა მომიხთუ. მა ოფუტეში სქიდალა გომანჭელუ. პაპული ჩქიმიში ოფუტე გომანჭელუ. პაპული ჩქიმიში სოჶრა გომანჭელუ. ოფუტეში ზენეფე გომანჭელუ. თხაფე დო თიკანეფეში ოპეტელუ გომანჭელუ. პეტერიში პილილი გომანჭელუ. მჟაჩხაში ნწოფულაშენ მანებრაფე გომანჭელუ. კართა შეჲი საათითენ იხვენეტუ ეჲა ქვაში ოხორის. ვა მემახონდინუ ემკათა ადეთეფეშა მა.
  • ოხორიში ხალკი მუთუ გიმფულუი?
  • ვარ, ენთეფექ ჩქარ მუთუ ვა მიმფულეს. იროთე მეტუა რტეს. ხეგონწკიმერი რტეს. ხეხამფა რტეს. აშო მათქვენ. უდოლოქუნუ დო უმოდვალუ ვა დოფსქიდი მა. მუ მინტუ, ეჲა ასთახოლო მა მიხვენეს. კლარაქ ფერონი კალემეფე მუში დომოხმარაფუ.  ოსურეთუში ხავესობა ეშავიღი.
  • კლარა, თექერლოღონი თრონიშენ ესელუ გინტუ სი!
  • ჰო! კლარა თექერლოღონი თრონიშენ ესელუ მინტუ მა. თექერლეღონი თრონიშა ქჲოლე რტუ. მარა კლარას თექერლეღონი თრონიშენ ესელუში ომუდი ვა უღუტუ. კლარას აშქურინეტუ. კუჩხეფეში ჟინ ვა დვადგინეტუ კლარას.
  • მარა სი იროთე ემუს ნუშველტი. გინონ ნა, გახვენენ ჲა უწუმერტი სი!
  • ჰო, მა ემუს იროთე მევუშველტი. ჭიტა- ჭიტა დერმანი ქუღუტუ, მარა ჯესარეთი ვა უღუტუ კლარას. ასთი როტენმაჲერ ხანუმიქთი კლარას ნოდგითუტუ. როტენმაჲერ ხანუმიქ გური ვა გეჩაფტუ კლარაში ესელუს. მა კლარას ვოწირაფტი მუში ესელუში გზალეფე.
  • მუშენი ეშო იქიფტუ როტენმაჲერ ხანუმიქ? მოთ კლარას ვა ოწირაფტუ მოშლეთინუში გზალეფე ემუქ?
  • როტენმაჲერ ხანუმიქ კლარაში ძაბონობაშენ კაი ფარა მოგაფტუ დო ემუშენი. ემუშენითი ემუქ ვა ნუშველტუ კლარას.
  • სი პანდა ფერდეშენ გალე იხოსარტი.
  • ჰო, ხვალა დო გემზული ვორტი დო ემუშენი. გალე ვიხოსარტი მა.
  • არნდღას პაპული სქანიში სერსითენ გოკუცხი სი. პაპული სქანიში სერსი ქოგნი დოგაწონუ!
  • ჰო, პაპული ჩქიმიში სერსი ქოვოგნი მა დომაწონუ, მარა პაპული ჩქიმი ვა რტერენ. მანავიში ჩირაღი ტერენ. მეგერემ მანავიში ჩირაღიში სერსი ტერენ.
  • არ ნდღას სი ოხორიშენ იმტი! ეშო მიჩქინ. სი მუშენი იმტი ოხორიშენ?!
  • ვარ! აჲა მცხადე ვა რენ. აჲა ხილაჶი ამბარი რენ. მა ოხორიშენ ვა ვიმტი. მა ნოღა ჶრანკჶურტის გოხთიმუ მინტუ. გოხთიმუ კაი დომაწონეტუ მა. გიჩქინ, გერმაში კულანი ვორე მა. გერმა რენ დუდმოშლეთინერობა ჩქიმი შენი. მარა მა მოლახუნერი დოფსქიდერეტუ აჲა დიდი ოხორის. როტენმაჲერ ხანუმი რტუ მფულერი წიწილა. ემუქ სოქაღის გოხთიმუ შენი გზა ვა მომჩაფტუ. ავლის ოსთერამუ შენითი გზა ვა მომჩაფტუ ემუქ. მუთუ ჩარე ვა მაძირუ მა.  ემუშენითი დუბარა ვოღოდი დო ოხორიშენ ქოგამაფთი არ ნდღას. გალე გამაფთი მა ტკობაშა. ედო სოქაღაფეს გოფთი მსქვაშა მა. დუდმოშლეთინერი ვორტი.
  • სი სო იდი? მუეფე ძირი ჶრანკჶურტიში სოქაღეფეს?
  • დიდო კალაბალუღი რტუ. დიმჭკუ სთერი დიდო კოჩი ქორტუ სოქაღეფეს. მჩირე დო გინძე სოქაღაფე ქორტეს. ხოლოთი გზალეფე  იქიფტეს მადულჲეფექ. ხოლოთი გზალეფე ომჩირანაფტეს მილლეთიქ.
  • ჩქვა გოკვირონი ვარნა ონჭელონი მუეფე ძირი სი ნოღა ჶრანკჶურტიში სოქაღეფეს?
  • ჶაბრიკაფე კიდუფტეს მადულჲეფექ უდოდგინუ. ზუპარკი ქორტუ. ბერეშ პარკი ქორტუ. ოპერაში ბინა ქორტუ. სინემაში ბინა ქორტუ. ბალეში ბინა ქორტუ. ტეატროში ბინა ქორტუ. მარა მილლეთი ხელებერი ვა იძირეტუ ნოღა ჶრანკჶურტიში სოქაღეფეს.
  • ოფუტეს ემკათა ბინაფე ვა გიღუტეს!
  • ჰო, ვა მიღუტეს ემკათა ბინაფა ჩქინ. გოკვირონი რტუ ჩქიმი შენი.
  • ოკაჩხე ნამუ ბინაფე ძირი სი?
  • ოკაჩხე არ დიდო დიდი კილისე ქობძირი. ასთახოლო არშვაჯის კილისეს ქამაფთი. ეჲა კილისე დიდო დიდი რტუ ნოღა მაჲენჶელდიში კილისეშენ.
  • მილლეთიქ კილისეშენ სი გექტკოჩესი?!
  • ვარ, მითიქ მა კილისეშენ ვარ გემტკოჩუ. კილისეფეს ემკათა ადეთი ვა უღუნან. კილისე კალაბალუღი ვა რტუ. ხვალა ზანგოჭეჶენდი ქორტუ კილისეში დოლოხე. ძიცინაჯე კოჩი რტუ. იფთი კილისეში დუდირაშა ჲეფთი. კილისეში ჭერიშა ჲეფთი მა. კილისეში ჭერიშენ ვოწკედი სოქაღის.
  • მუშენი ჲეხთი კილისეში დუდირაშა? მუშენი ჲეხთი კილისეში ჭერიშა?
  • მაჲენჶელდიში მთვირონი გერმაფე არ ქობძირა მადო ჲეფთი ჭერიშა მა?
  • მუეფე გაძირუ კილისეში ჭერიშენ? მაჲენჶელდიში მთვირონი გერმაფე გაძირუი კილისეში დუდირაშენ?
  • ვარ, მა ვა მაძირუ მაჲენჶელდიში მთვირონი გერმაფე ეჲა კილისეში დუდირაშენ. აჲა პატი ამბარი რტუ ჩქიმი შენი. ემუშენითი აჲა ხალითენ მა დოვიჭვი დო დოვიხალი!
  • ოკაჩხე ოხორიში გზა ვა გოგინდუნუი?
  • ვარ, გზა ვა გომინდინუ. ხოშ უღნოსე ვა ვორე მა! მარა ხვალა ვა ვორტი მა გიჩქიტას! არ ყოროფონი მუსაჶირითი ჩქიმი კალა რტუ. არ სუპრიზი ქომიღუტუ!
  • მუ რტუ?! მი რტუ?! ჰელე, მიწვი!
  • ჭერის არ კალატი ქობძირუ მა. კალათის მეშახეტუ არ ჭიჭიტა კატუ, მოთალი! დიდო ყოროფონი რტუ. კატუნა გურის მემაჭუ. ეთი ჩქიმი სთერი ხვალა რტუ.
  • მუ ყვი ემ ყოროფონი კატუნა?
  • ემ კატუნა ქებზდი დო ქაგეფთი კილისესეში დუდირაშენ.
  • კილისეში დუდირაშენ სი ვა გაძირუ მაჲენჶელდიში მთვირონი გერმაფე, მარა არ ყოროფონი კატუნა ქოძირი! აჲა რტუ ალლაჰიში ოჩუქარე!
  • ჰო, აჲა რტუ ალლაჰიში ოჩუქარე. მა გემზული ვორტი. ალლაჰიქ ქომძირუ აჲა დო ხელებერი დომწიფხუ. ედო ხვალანობა გომინდინუ არშვაჯის. დიდო ყოროფონი კატუნა მაყუ მა. კილისეშენ გამაფთი დო ხოლო სოქაღაფეს გოფთი მა. კატუნა ჩქიმი კალა რტუ.
  • ოხორიში ხალკიქ კატუნა ძირუი?
  • ვარ, ოხორიში ხალკიშენ მითის მუთუ ვა ოხვაწონუ. ჩქარ მითის ამბარი ვა უღუტუ კატუნაშენ. ხვალა კლარას ამბარი ქუღუტუ. ემუს ვუწვერეტი. ემუსთი კატუნა კაი აწონუ. კლარაქთი მემიშველუ კატუნა შენი.
  • მუ ჯოხონტუ კატუნას?
  • ფამბუღი ჯოხონტუ. აწი ეშო გომაშინენ. ედო ჭიტა- ჭიტა ირდეტუ ფამბუღი ჩქიმი. ემუს ოჭკომალე ფჩაფტი მა. ემუს ხე ჩქიმითენ ვუხეზმეთუფტი.
  • სო სქიდუტუ კატუნა სქანი?
  • იფთი ჩქიმი კალა სქიდუტუ. ოდა ჩქიმის სქიდუტუ. ლოყა- ლოყა გემიჲაფუფტუ. მარა არნდღას როტენმაჲერ ხანუმიქ ქოგნუ კატუნაში სერსი დო დიდელუ. ემუქ კატუნა ჩქიმი ქემიზდუ ოდა ჩქიმიშენ.
  • ვაჲ თი ჩქიმის! ზავალი ფამბუღი!
  • ოხორიშენ კატუნა ჩქიმი გეტკოჩუ შენი ემედენი ხეზმეთქჲარი საბესტიანის გეჩინადუ როტენმაჲერ ხანუმიქ.
  • ხეზმეთქჲარი საბესტიანიქ როტენმაჲერ ხანუმის ნუსიმინუი?!
  • ვარ, ჩქარ ვა ნუსიმინუ. ყუჯი ვა მეჩუ ემუს. ჭერის არ უმანჯელი დო უფშუ ოდა ქორტუ დო ექ დოვობარგით კატუნა ჩქიმი ჩქინ.
  • კაი გურონი კოჩი ტერენ ხეზმეთქჲარი საბესტიანი.
  • ჰო, კაი მანებრა ჩქიმი რტუ დო იროთე მემიშველტუ
  • კართა კოჩი არკაელი ვა რენ!
  • ჰო, კართა კოჩი არკაელი ვა იყვენ!
  • როტენმაჲერ ხანუმის ძეგნე უღუტუი?!
  • ჰო, ქუღუტუ.
  • მუ რტუ ძეგნე მუში?!
  • შამამა რტუ მუში ძეგნე!
  • აჩქვა ხვალა ვა რტი ეჲა დიდი ქვაში ოხორის. არ მანებრა ჩქვა ქოგიყონუტუ!
  • ჰო, სუმ მანებრა ქომიყონუტუ მა.
  • ფამბუღი, კლარა დო საბესტიანი!
  • აჩქვა ხვალა ვა რე! ყოროფონი დო ძიცინაჯე მანებრაფე ქოგიყონუნ!
  • ჰო! კლარათი, საბესტიანი, კატუნათი კაი გურონი მანებრაფე ჩქიმი რტეს ეჲა ქვაში ყინი ოხორის. ოსქიდუში ხელა მომჩაფტეს ენთეფექ. წოხლენი სთერი ხვალა ვა ვორტი მა. ამ მაგებრაფე ჩქიმიქ მა სქიდალას ყოროფათენ ქომემოკირეს.

 

  1. დინანა
  • არნდღას კლარაში დინანათი ოხორიშა მუსაჶირი ქომეხთუ. ეშო ქომშუნს აწი. მუჭოში ხანუმი რტუ კლარაში დინანა?
  • დიდო კაი ხანუმი რტუ. დიდშურონი ოხორჯა რტუ. კითხერი დო ჩქინერი ოხორჯა რტუ. ხჩე თომალონი რტუ. ძიცინაჯე ხანუმი რტუ. არ ქეთაბითი ქომომჩუ. ემუქ ოჩუქარე ქომომჩერეტუ.
  • ქეთაბი მუჭოში რტუ? მუ ამბარეფე მეჩაფტუ ოჩუქარე ქეთაბი მუშიქ?
  • ქეთაბიქ არ ოფუტე დო ოფუტეში ხალკიში სქიდალაშენ ამბარეფე მეჩაფტუ. ბუნჯინა, ნცა, დიხა დო სქინდინაფეშენ ამბარეფე მეჩაფტუ ეჲა ქეთაბიქ. მარა კაიხეშა ოკითხუ ვა მიჩკიტუ მა. დინანაქ ქეთაბიშენ პაშურაფე მიკითხუფტუ უდოგინუ.
  • ოჩუქარე ქეთაბი კაი გაწონუ, ჰოი?!
  • ჰო, ქეთაბი დიდო კაი მაწონუ. ონჭელონი ქეთაბი რტუ. მარა პაპული ჩქიმი, პეტერი, დინანა, ნოღა მაჲენჶელდი, ოფუტე დორჶლი, ფაცხა ჩქინი, ოფუტეში სქიდალა გომაშინუ მა ეჲა ქეთაბითენ. ედო ენთეფეში ხასრეტიშა აჩქვა ვა მემახონდინეტუ მა. გურის მემოდგითუ ხასრეტი. დოფხედი დო უდოდგინუ შიკინერი- შიკინერი ვიმგარი მა. იგბალი გოქთერი მიღუტუ. კურბეთის ხვალა- ხვალა ვორტი მა. უმითელი ვორტი აჲა დიდი ქვაში ოხორის. ყინი რტუ. გრილონი რტუ. თოლეფე უთეელი დოფსქიდი.
  • ოფუტეშენ უმუთელი დო უმითელი რტი დო ემუშენი!
  • ჰო, ოფუტეშა ხასრეტი დოლომიძიტუ გურის. იროთე ოფუტეშა გზა ბგორუფტი. გურის მგარინი მომიხთეფტუ. მარა თესელლი ქომიღუტუ. კლარა დო დინანა მუში, სანესტიანი დო ფამბუღი კალა ვორტი. ამციქა გური მიხვენეტუ კლარაში ნანდიდიქთი. გური ჩიჩქუ ქომიღუტუ მა.
  • ბარემ ქეთაბი კაიხეშა იკითხიი, დინანაქ სი გოკითხაფიი?
  • არ ჶარა ვარ, ოში ჶარა ვიკითხით დო ვოკითხაფი ეჲა კეთაბი მა. დინანაქ არკელე ქეთაბი მიკითხუფტუ, მაჟურა კელეთი ალბონი ჭიტა- ჭიტა მოგურაფტუ. იროთე უდოდინუ ჩქიმი ხალითენთი დერდი ზდიფტუ ზავალი დინანაქ.
  • კლარაში დინანათი კაი გურონი რტერენ! ოკითხუ კაიხეშა გაგურუი სი?
  • გაგურუი მუ თქვალა რენ?! მორო მუ, მა მაგურუ მათქვენ. წკარი სთერი ვა რტუ, მარა ჭიტა- ჭიტა მიჩქიტუ. ჭიტა- ჭიტა მაკითხეტუ. ოკაჩხეთი კანდიდატი ბეგიშენთი დოვიგური მა.
  • კანდიდატი ბეგი მი რტუ?! მუ დულჲა იქიფტუ ემ კოჩიქ ოხორის?
  • ემინდრონერი ხამფა ოჯაღეფეს დოხმელი მამგურაფალეფე ქუყოუნტეს ოხორის, ბერეფე მუთეფეში ოკითხაფუ შენი. ბურჟუვაფეში ბერეფეს ემკათა ადეთი ქუღუტეს. კანდიდატი ბეგი, კლარაში დოხმელი მამგურაფალე რტუ. ემუქ დოხმელი დერსეფე მეჩაფტუ კლარას ოხორის.
  • მამგურაფალე კანდიდატი ბეგი მუჭოში კოჩი რტუ?
  • დიდო ჩქინერკოჩი რტუ კანდიდატი ბეგი. დიდო ზაიჶი რტუ. უჩა თოლონი რტუ. თომა ვა უღუტუ თის. თიპეტკელერი რტუ. ფიმფილი დო ოშუმეშითი ვა უღუტუ. ოჶიდითი ვა უღუტუ. დიდო გინძე ჩხვინდი დო ჟურ დიდო დიდი ყუჯი ქუღუტუ კოჩის. მუჭო კაპკაპი ეშო რტუ. ოშქურინონი ნუნკუ ქუღუტუ. იროთე ღვინიმშუმუ სთერი რტუ. მარა დიდო მსქვა სერსი ქუღუტუ.
  • მუკო წანერი რტუ ემ მამგურაფალე?
  • ვა მაჩქინუ, ვა ოხომაწონუ მა. პაპული ჩქიმიშენ ბადი იძირეტუ. ეშო მათქვენ.
  • კაი გურონი რტუი კანდიდატი ბეგი?
  • ჩქინერკოჩი რტუ, მარა თი- მოწონდერი რტუ. ემუქ ჭიტა მშინაფტუ, მუნდიხომულა მშინაფტუ. როტენმაჲერ ხანუმიში კუდელი რტუ. ჩქიმდენ დიდო ინკრახი ქუღუტუ ემუს. კანდიდატი ბეგის ყუჯიქთი კაი ვა უგნაფტუ. თოლიქ კაი ვა უძიროფტუ. ჩორჩი კოჩი რტუ. პალალო რტუ. როტენმაჲერ ხანუმიში ნენათენ გულუტუ იროთე.
  • მუეფე გოგურაფტუ კანდიდატი ბეგიქ?
  • ალამანური ნენაში გრამერიში კაიდეფე მოგურაფტუ ემუქ. დიდი დო ჭიტა ბონჯეფე, ნოქთა, ვირგული დო ენთეფეში სვა დო ბეჯითობა მოგურაფტუ კანდიდატი ბეგიქ.
  • ჩქვა მუ გოგურაფტუ კანდიდატი ბეგიქ?
  • კანდიდატი ბეგიქ კაიხეშა ლათინური ნენა ქუჩქიტუ. ხესაპი უჩქიტუ. ლათინური ნენაში გრამერი მოგურაფტუ. ხესაპი მოგურაფტუ ემუქ. სურეთიში დერსი ქომიღუტეს. მუსიკიში დერსი ქომიღუტეს. ოხორონუში დერსითი ქორტუ. ოხორონუთი დოვიგური მა. ჩქინ ბირაფაფე ვიბირტით მელე- მოლე. დესტანეფე ფთქუმერტით ჩქინ ლოყაშა.
  • წკარი სთერი იგურაფტი სი! ნამუ ბირაფაფე იბირტით?
  • ალამანური, იტალჲანური, ჶრანსული ბირაფაფე ვიგურაფტით დო ვიბირტით ლოყაშა. ოპერაფა ვიბირტით. ხალკური ბირაფაფე ვიბირტით ჩქინ. დიდო ხამფა მუსიკიში რეპერტუარი მაყუ.
  • დიდო ხამფა მუსიკიში რეპერტუარი ყაყუ. დიდო კაი! მუსიკიში ნოტა დო სოლჶეჟითი გაგურესი?
  • ჰო, ნოტათი, სოლჶეჟითი დოვიგურით. კანდიდატი ბეგიქ ეჲათი ჩქინ დომოგურეს.
  • კლარას მუსიკალური ინსტრუმენტი უღუტუი?
  • ჰო, ქუღუტუ. პიანა ქუღუტუ დო მსქვაშა გელაჩაფტუ.
  • კანდიდატი ბეგიქ მუ ინსტუმენტი გელაჩაფტუ?
  • ჶლუტი გელაჩაფტუ ემუქ.
  • სი მუ ინსტრუმენტი გელაჩაფტი?
  • მა პილილიშა თოლი ქომიღუტუ. ფეტერიშენ პილილიშა გეგაფერი ვორტი.
  • მარა კანდიდატი ბეგის პილილი ვა უღუტუ. იფთი ჶლუტი მუში ქომომჩუ. ედო მა ჶლუტი გელაფჩაფტი. ფეტერიში პილილიშენ არმციქა გელაჩამუ დოვიგურერეტი დო ემუშენი.
  • ფეტერის ნოტა დო სოლჶეჟი ვა უჩქიტუ! ეშო ვა რენი?!
  • ჰო, ფეტერის ნოტაშენ დო სოლჶეჟიშენ ჩქარ ამბარი ვა უღუტუ, მარა ლოყაშა გელაჩაფტუ. კანდიდატი ბეგიქ ნოტათენ გელაჩამუ დომოგურუ.
  • ჶლუტი გელაჩამუ კაიხეშა გაგურუი?
  • ჰო, მჭიფაშაში დოვიგური მა.
  • ოკითხუ დო ოჭარუ დობაღინე გაგურუი? ლათინური ნენაში გრამერი დო ხესაპი გაგურუი სი?
  • ჰო, ოკითხუ- ოჭარუ დობაღინე დოვიგური მა. ლათინური გრამერითი, ხესაპითი დოვიგური, დომაგურუ.
  • კანდიდატი ბეგიშენ ლათინური ნენა დო ხესაპი მჭიფაშაში გაგურუი სი?
  • მთელი ხოლო ვარ, მჭიფაშაში ვარ, მარა ჭიტა- ჭიტა დოვიგური.
  • სი კაი მამგურე რტი. კანდიდატი ბეგის აღანი ხალი სქანი კაი აწონუი?
  • მორო მუ, კანდიდატი ბეგის აღანი ხალი ჩქიმი კაი აწონუ დო ოკაჩხე მუნდიხომულა ჩქარ ვა მშინუ. აღანი ხალი ჩქიმი ქოძირუ დო ემუშკულე მა ჩქარ ჭიტა ვა მშინუ. იროთე მსქვა ნენაფე მიწუ დო აჩქვა ჩქიმდენ ჩქარ ინკრახი ქუღუტუ კანდიდატი ბეგის. ონჯღორე აყუ კოჩის. ემუქ მა დომოსაღუ. უგურაფობაშენ მა მომიშლეთინუ კანდიდატი ბეგიქ. ედო ვიზენგინი. სერი-დღალერი მბოში ვა დობდგითი დო აღანი ამბარეფე დოვიგური მა. გურაფათენ ლაი კვინჩი დოვიყვი დო უდოდგინუ ვფუთხი მა. ლაი შქვით ნცაშ ჟინ ვორტი გურაფაში მენჯელითენ.
  • კანდიდატი ბეგიქ მეგიშველერენ. კანდიდატი ბეგიქ მწკუფიშენ კაპინერი მოგიშლეთინერენ. მეგერემ კაი კოჩი ტერენ. დიდშურონი ტერენ. ნამუსონი ტერენ. აწი მა გემზული ქოდოფსქიდი. ედო ონჯღორე მაყუ მა. ასთერი კოჩი დიდო ვა იძირენ აჲა დუნჲას.
  • ჰო, კანდიდატი ბეგიქ ჩქინაფა დო კულტური მუშითენ მოზენგინუ. აჩქვა კართა დულჲას ოთხო თოლითენ ვოწკერტი მა. აჩქვა ხაზირი ვორტი ჯაჰილობა მერგაფუშა. ჭარა მიჩქიტუ მა. ჰუქმი მახვენეტუ აჩქვა.
  • ჩქვა მიეფექ მეგიშველუ ოკითხუ- ოჭარუ- ოსურეთუს?
  • ოკითხუ- ოჭარუ- ოსურეთუს კლარაქთი, დინანაქთი, საბესტიანიქთი იროთე მემიშველუ.
  • სქანი აღანი ხალითენ კლარა დო დინანაქთი იხელესი?
  • მორო მუ, იხელეს.
  • როტენმაჲერ ხანუმიქთი იხელუი სქანი გეჯგინობათენ?
  • ვარ, ემუქ ჩქარ ვა იხელუ. გეჯგინობა ჩქიმი აკისკანეტუ. არ ნენათენ სი ხესაპი ყვი! მა ჭიჭიტა ბერე ვორე, როტენმაჲერ ხანუმი რენ კოჯა ოხორჯა!
  • მუშენი ეშო იქიფტუ როტენმაჲერ ხანუმიქ?
  • ჶუკარეფე პატი აწონეტუ ოხორჯას. ბერეფე კაი ვა აწონეტუ როტენმაჲერ ხანუმის.
  • ონჭელონი ოხორჯა ტერენ! ჰემითი ნოსი მღირი უღუტერენ როტენმაჲერ ხანუმის.
  • ოხოშირშოლერი დულჲაფე ქუღუტუ ემუს.
  • ყოროფა დო ვიჯდანი ვა უღუტერენ ოხორჯას!
  • ხამფა კოჩიშა ტოლი ვა უღუტუ. ფარა დო ხამფობაშა თოლი ქუღუტუ ოხორჯას. თოლუძგუ რტუ.
  • როტენმაჲერ ხანუმიქ სი გბახუფტუი?
  • ვარ, ვა მბახუფტუ. ემკათა ჯეზა ვა რტუ ოხორის. როტენმაჲერ ხანუმიქ იროთე ნენათენ მბახუფტუ. მარა აჩქვა დუდი ჩქიმი გორდინუში გზას ვორტი მა. უდოდგინუ კართა სფეროშენ ვიგურაფტი მა
  • სი წორი ზოპონ. სი აჩქვა კაპეტი რტი სქიდალას.
  • უმუთელობა დო უმითელობა პატი რენ, მარა უგურაფობა ირიშენ პატი რენ!

 

  1. კლარაში ბაბა
  • არ ნდღას კლარაში ბაბა ქომეხთუ ოხორიშა. ზიზიმანი ბეგი ოხორიშა ქომეხთუ.
  • ჰო, კლარაში ბაბა ქომეხთერეტუ. ოჩუქარეფეთენ ქომეხთერეტუ. აღანი წანაში ორა რტუ.
  • მუჭოში კოჩი რტუ კლარაში ბაბა? მუეფე გათქვენ სი ემ კოჩიშენ.
  • გინძე კოჩი რტუ, ტანმაღალი. მჩირე მხუჯეფე ქუღუტუ. მკულე თომალონი რტუ. მზოღაშფერი თოლეფე ქუღუტუ.
  • ფიმფილი დო ოშუმეში უღუტუი ზიზიმანი ბეგის?
  • ოშუმეში ქუღუთუ, მარა ფიმფილი ვა უღუტუ. უფიმფილე რტუ. ვართი გვანერი ვართი საპარა რტუ. კოჩინობონი კოჩი რტუ. ნოსერი კოჩი რტუ. ჶუკარა ნოსიში კოჩი ვა რტუ. პანდა ძიცინაჯე რტუ.
  • ზიზიმანი ბეგიქ სი მეგიშველუი?
  • ჰო, ემუქ იროთე მსქვაშა მემიშველუ. ოჩუქარეთი ქომომჩერეტუ მა ემუქ. ემუს კოჩინური ჩქარ კუსური ვა უღუტუ.
  • სი მუ ოჩუქარე მექჩერეტუ ზიზიმანი ბეგიქ?
  • ჯამიში ქჲურე ქომომჩერეტუ. ჭიჭიტა რტუ ქჲურე. მანზარონი კრისტალი ქჲურე ქომომჩერეტუ ზიზიმანი ბეგიქ?
  • მუში მანზარა უღუტუ კრისტალი ქჲურეს?
  • მთვირონი მანზარა ქუღუტუ კრისტალი ქჲურეს. ედო დიდო კაი დომაწონუ ეჲა ოჩუქარე. კრისტალი ქჲურეში მანზარა ნუნგაფტუ პაპული ჩქიმიში ფაცხას დო ემუშენი.
  • ხელებერი რტი. ეჲა კრისტალი ქჲურექ ოფუტე სქანი გოძირაფტუ დო ემუშენი!
  • ჰო, ჰემითი დიდო! კლარათი ხელებერი რტუ. ემუსთი ოჩუქარე ქომეჩერეტუ ზიზიმანი ბეგიქ.
  • კლარაში ოჩუქარე მუ რტუ?!
  • ბაბაწა რტუ. კლარაში ოჩუქარე, ბაბაწა რტუ. ნოღა პარისიში ნოხვენე რტერენ ეჲა ბაბაწა. დიდო ფახალი ტერენ. ეშო უჯუზი მუთუ ვა ტერენ.
  • კლარათი ხელებერი რტუი ეჲა ბაბაწათენ?!
  • ჰო, ხელებერი რტუ. ბაბა მუშიში მოხთიმაფათენ ხელებერი რტუ. კლარას წოხლეშენთი ბაბაწაფე ქუღუტუ ოხორის. ჰემითი არ ვარ, დიდო. მარა კლარა დიდოფეთენთი ჩქიმი კალა დიდო ხელებერი დო ქეიჶონი რტუ. კლარაში აჲა მსქვა ხალი ქოძირუ დო დიდო იხელუ ზიზიმანი ბეგიქთი.
  • კლარა ხელებერი დო ქეიჶონი რტუ, მარა სი ხელებერი დო ქეიჶონი ვა რტი. ეშო ვა რენი?
  • ჰო, მა ხელებერი ვა ვორტი. ემუშენითი ქეიჶონი ვა ვორტი მა. მა იროთე გზა ბგორუფტუ ნოღა მაჲენჶელდიშა ოხთიმუ შენი.
  • სი პანდა გემზული რტი. პაპული სქანი სქანი კალა ვა რტუ!
  • ჰო! იროთე გემზული ვორტი. გემზული- გემზული გოვულურტუ ეჲა დიდი ოხორის. მა პაპული ჩქიმი კალა ოსქიდუ მინტუ. ფეტერი კალა გოხთიმუ მინტუ ჩქინი ზენეფეს.
  • ზიზიმანი ბეგიქ აჲა ხალი სქანი ვა ძიროფტუი? სქანი უხელობა ვა ოხვაწონუ ემუს?
  • მორო მუ, ოხვაწონუ, ქოხოწონუ. ზიზიმანი ბეგი კაი გურონი რტუ დო აჲა ხალი ჩქიმითი ქოძიროფტუ. ედო ჩარეფე გორუფტუ ემუქ.
  • ზიზიმანი ბეგის ჩარე აძირუი ხალი სქანიშა? მუ ჩარე აძირუ?
  • ხალი ჩქიმიშა ჩარე აძირუ ემუს!
  • ჩარე მუ რტუ?
  • მაჲენჶელდიშა ოხთიმუ დო პაპული ჩქიმი კალა ოსქიდუ ტერენ ჩქიმი ჭამი.
  • ნოღა მაჲენჶელდიშა ოხთიმუშა იზნი მექჩიი ზიზიმანი ბეგიქ?
  • ჰო, ზიზიმანი ბეგიქ ნოღა მაჲენჶელდიშა ოხთიმუშა იზნი ქომომჩუ, მარა კლარაქ ექშენ ოხთიმუშა იზნი ვა მომჩუ. ედო ემედენი ომგარინუს ქოგეოჭკუ ზავალი კლარაქ. ხვალა დო კაკვატა რტუ. ზავალი კულანის მანებრა ვა უყონუტუ დიდი ოხორის.
  • სი მუ ყვი? სითი ზავალი ხალის რტი. უმითელი რტი ეჲა ქვაში კოჯა ოხორის.
  • ჰო, ეშო ვორტი. მარა გოვონკვათი დო ოხორის დოფსქიდი კლარა კალა. კლარა ხელებერი რტუ ჩქიმი კალა. ჩქინ კაი მანებრაფე ვორტით. კლარათი მა მემინგაფტუ. მა კლარას მევუნგაფტი. ჩქინ ჟურითი ხვალა ვორტით.
  • სი მჟორა ვა რტი, მარა თე სქანითენ ოთანაფტი. სი ლუქუნა რტი მწკუფის! ვიჯდანი დო ყოროფა ქუღუტუ სი.
  • ოფუტეშა ოხთიმუშა ჩარე ვა მაძირუ მა.
  • სი დო ფეტერი კალათი კაი მანებრაფე რტით.
  • ეშო რტუ, მარა ფეტერი ხვალა ვა რტუ! კლარაქ უჩქიმელი იმგარტუ დო მემახონდინერეტუ!
  • სოლენ გიჩქინ, გონეფ ფეტერიქთი უსქანელი იმგარტუ. გაჩქინენი?!
  • ვარ, ვა მაჩქინუ აჲა.
  • ოკაჩხეთი პატი დიძაბუნი სი! ეშო მიჩქინ! ჶიზიკური ზაბუნობა ვა რტუ. ფსიქოლოჟიური რტუ სქანი ძაბონობა!
  • ჰო, ფსიქოლოჟიური ძაბუნობა რტუ. მა დოვიძაბუნი დო სოვნაბლისტობაში ძაბუნობა მაყვერენ. ემინდროს მა მუთუშენ ამბარი ვა მიღუტუ.
  • სოვნაბლისტობაში ძაბუნობა მუ რენ? ჰელე, მიწვი!
  • ნჯირის გოხთიმუ ტერენ. სი ნჯირის რე. ნჯირის გულურ, მარა მუთუშენ ამბარი ვა გიღუნ. მთელ ოხორის გულურ, ნჯირის რე. გოწკუცხაში, მუთუშენ ამბარი ვა გიღუნ. აჲა ძაბუნი რენ სოვნაბლისტობა.
  • მათი ამკათა ზაბუნობა ქომიღუტუ, ბერე ვორტიში.
  • ჰოი?! ეშოი?!
  • ჰო! აჲა ძაბუნობა გონტალერი რენ ბერობას.
  • აჲა ვა მიჩქიტუ მა.
  • სი ძაბუნი რტი, მარა ძაბუნობა სქანიშენ ამბარი ვა გიღუტუ!
  • ჰო, ამბარი ვა მიღუტუ. მა უდოდგინუ გოვულურ ნჯირის, მარა ვა მიჩქინ. ოხორიში მილლეთიქ ოგნაფს კუჩხეფე ჩქიმიში სერსეფე. მახირჯე ქომოხთერენ ოხორიშა ჲადო დაწონერენან ოხორიში მილლეთის. ლივორი დოქაჩერი დოჩვერენ ზიზიმანი ბეგიქ. ახირისთი ქოძირერენ მახირჯე(!) ზიზიმანი ბეგიქ.
  • სი აჲა ხალის ქოგზირესში, მუ ყვერენან?!
  • ჰექიმის უჯოხერენ ზიზიმანი ბეგიქ. ჰექიმი ქომემიხთერენ. მა მუთუშენ ამბარი ვა მიღუნ ხოლო. ნჯირის ვორე მა ხოლო.
  • ოხძაბუნეშენ ჰექიმი ქომეგიხთუი!
  • ვარ, ზიზიმანი ბეგის დოხმელი ჰექიმი ქუყონუტერენ. ემუ ქომემიხთერენ.
  • მუჭოში კოჩი რტუ?
  • კაი კოჩი რტუ. პანდა მემიშველუ ემუქ.
  • აწი ქომოფთათ ძაბუნობა სქანიშა! აჲა ძაბუნობაში სებები მუ რტერენ? მუ თქვერენ ჰექიმიქ?
  • ძაბუნობა ჩქიმიში სებები რტერენ ოფუტე დო პაპულიშა ხასრეტი.
  • ჭამიში დულჲა ვა რენ! ყოროფაში დულჲა რტუ. ხასრეტიქ ეშო იქიფს. სითი ძაბუნი გწიფხუ ხასრეტიქ! ჰექიმიქ დოგოკარუი?!
  • ჰო, ხასრეტიქ მათი ძაბუნი მწიფხუ. ბუნჯინა, ცა, დიხა, გოლა, გერმა, სქინდინაფე, მანებრაფე დო პაპული ჩქიმიშა ხასრეტი ტერენ აჲა ძაბუნობაში სებები.
  • მაჲენჶელდიშა ოხთიმუშენ ჩქვა ჩარე ვა გიღუტუ! ოფუტეშა გეგაფინერი რტუ. ოფუტეში სქიდალაშა გეგაფინერი რტუ. ოფუტეშა ოხთიმუში რტი.
  • ჰო, ოფუტეშა ოხთიმუშენ ჩქვა ჩარე ვა მიღუტუ მა. ეშო მიწუ ჰექიმიქთი.
  • ხასრეტიქ დოგჭვერეტუ დო დოგხალერეტუ
  • ჰო, ხასრეტიქ დომჭვერეტუ დო დომხალერეტუ. წოხლეშენ გურიქ მუთუ ვა მიგორუფტუ. მარა ჰექიმიში კარარითენ ვიხელი მა. ორექსითი ემედენი ქომემიხთუ.
  • ოკაჩხე მუ იყუ?! ჩქვა მუ ამბარი გიღუნ სი?
  • ზიზიმანი ბეგიქ ნოღა მაჲენჶელდიშა მა მენდემოჩქვუ. აჲა ამბარითენ დოვიმურუცხი მა. დოვიშენი!
  • აჲა ხასრეტის ქამოგიშლეთინუ ჰექიმიქ. დიდო შეჲეფე თის მეგიხთერეტუ! კლარაქთი მეგიყუჯუ!
  • ჰო, კლარაქთი მემიყუჯუ! რაზი იყუ.ჩქვა გზა ვა უღუტუ ზავალი კულანის.
  • გურის მუ გიღუტუ?
  • მა ოფუტე ჩქიმიშა ოხთიმუ მინტუ. ხასრეტის ქამომიშლეთინუ ზიზიმანი ბეგიქ.
  • სი მი კალა მენდეგოჩქვუ ემუქ?
  • ხეზმეთქჲარი საბესტიანი კალა სტაციაშახა მენდემოჩქვუ მა ნოღა ჶრანკჶურტიშენ.
  • ხეზმეთქჲარი საბესტიანიქ თრენის გეგხედუ სი.თრენის ხვალა რტი სი!?
  • ჰო, მა ხვალა ვორტი თრენის. ნოღა ჶრანკჶურთიშენ თრენის გეფხედი დო ეშო მენდაფთი.
  • თრენისთი ხვალა- ხვალა რტი!
  • ჰო, ხვალა ვორტი მა. მთინი გიწვა, ხვალა ვა ვორტი მა. ქეთაბეფე ქომიღუტუ დო უდოდგინუ ვიკითხი მა. გაზეთათი ქომიღუტუ. ჟურნალი ქომიღუტუ ცანცას. წოხლეშენ გაზეთაში რენობაშენ ჩქარ ამბარი ვა მიღუტუ, ოფუტეს ვორტიში მა. ჟურნალიშენთი ჩქარ ამბარი ვა მიღუტუ მა. ჟურნელეფე სურეთონი იყვეტუ დიდოფეთენ. ქეიჶონი რტეს.
  • კლარა რაზი იყუ! მუ თქუ ემუქ?
  • ჰო, კლარა წოხლეშენ რაზი ვა იყუ, მარა ზიზიმანი ბეგიქ ემუს ოჯერაფუ. დინანაქთი ოჯერაფუ კლარას. ჰექიმიქთი ძაბუნობა ჩქიმიშენ კუტალიშა ამბარი მეჩერენ კლარას. რიზათენ ოხთიმუშა იზნი ქომომჩუ კლარა ჩქიმიქ.
  • აჩქვა ხასრეტი გოგინდინუ. კართა ქვა სვა მუშის მონკა იყვენ!
  • ჰო, მთინი ზოპონ. ქვა სვა მუშის მონკა იყვენ! მათი ეშო.
  • აჩქვა რახატი რტი.
  • ჰო! ნოღა მაჲენჶელდიშა გზა ვოქაჩი დო მენდაფთი.
  • ხასრეტი გოგინდინუ!
  • ჰო, ხასრეტი გომინდინუ. ხასრეტი მეპტკოჩი კაპულაშენ. აჩქვა დოვინოსერერეტუ მა. უდოდგინუ ალლაჰი ჩქიმის შუქური ვუწვი მაგზალობას.
  • წოხლეშენთი ნოსერი რტუ ოფუტეს. მა აწი ჰემი ნოსერი ჰემითი კითხერი რტი. ჰემუშენითი მსქვაშა ჰუქმი გახვენეტუ სი.
  • კოჩის ხვალა ნოსი ვა უბაღუნ, გურაფათი ლაზიმი რენ! გურაფა ირიშენ ბეჯითი დულჲა რენ.

 

  1. მჯვეში მანებრაფე კალა
  • აჩქვა ოფუტე სქანის რტი. ხოლო მანჯე გაყვერეტუ. ხოლო პაპული გაყვერეტუ. პაპული სქანი კალა რტი. ხვალა ვა რტი აჩქვა!
  • აჩქვა ხვალა ვა ვორტი მა. მანჯა მაყუ მა.
  • სი ოფუტე დორჶლიშა გუიქთიში, იფთი მიეფე ძირი?!
  • იფთი მანძაგერეფე ჩქინი ქობძირი მა სოქაღეფეს. ენთეფექ ქომძირეს მა სოქაღის.
  • მანძაგერეფექ სი გძირესში, მუ ყვეს? იხელესი?
  • ჰო! მილლეთის გააკვირუ დო იფთი მოშვაჯინონი შენი ქომეფთი ჲადო აჩქინეს მანძაგერეფეს.
  • აჲა ხილაჶი ამბარი რტუ. წორი ამბარი ენთეფეს ოგნაფიი სი?
  • ჰო, ემედენი ვოგნაფი დო ირიქ იხელუ. მილლეთიქ მა მყოროფტუ.
  • ბედიგოჭვერი ბერე რტი სი. ოკაჩხე პაპული სქანიში ფაცხაშა მეხთიი?
  • ვარ, ფეტერეფეში ოხორიშა მენდაფთი იფთი მა.
  • მუშენი იფთი ფეტერეფეში ოხორიშა მენდახთი სი?
  • ფეტერიში ოხორი, ოფუტეში დოლოხე რტუ. ხოლოს რტუ. პაპული ჩქიმისთი ოხორი ქუღუტუ ოფუტეს. მარა ეჲა ოხორის ვა სქიდუტუ. რაკანის რტუ პაპული ჩქიმიში ფაცხა. ექ სქიდუტუ, გიჩქინ! რაკანის გელადგიტუ ფაცხა მუში. ემუშენი იფთი ფეტერეფეში ოხორიშა ქომეფთი მა.
  • ფეტერიქ სი გძირაში მუ ყუ? დიდო ორაშენ დონი ართიმაჟურაშენ მენდრა რტით.
  • მა ემუ ვა მაძირუ.
  • მუშენი ვა გაძირუ ფეტერი?!
  • ფეტერი ოხორის ვა რტუ. მა ემუ ვა მაძირუ იფთი.
  • ოხორის მითი გაძირუი სი?
  • ჰო, მაძირუ.
  • მი რტუ ოხორის? დინანაი?!
  • ჰო, ხვალა დინანა ქორტუ ოხორის. ედო ხვალა რტუ.
  • დინანაქ სი გძირუში, მუ ყუ?! მთინი ნენათენ გიწვა; სერსი სქანი ოგნუში, დინანაქ იხელუი?
  • ჰო, დიდო იხელუ დინანაქ. ხელათენ ტურა ღურუტუ!
  • სი დინანა კალა მუეფე ღარღალი? მუ ამბერეფე მეჩი ემუს?
  • აჩქვა აქ ვორე მა ფთქვი. აჩქვა ოფუტეს ფსქიდამინონ მა ფთქვი. აჩქვა ხვალა ვა რე მა ფთქვი.
  • დინანაქ მუფე გიწუ?
  • ნენათენ ვა ითქვენ მუში ხელა. მათი ნენათენ ვა მათქვენ მუში ხელა. დიდო იხელუ. ედო ხელათენ ომგარინუს ქოგეოჭკუ დო მუთუ ვარ. არ კელე მა ვიმგარტი მაჟურა კელე ემუქ იმგარტუ.
  • ოკაჩხე მუეფე ყვით? მუეფე ღარღალით?
  • იფთი ოჩუქარე მუში ქომეფჩი ემუს.
  • მუ რტუ ოჩუქარე მუში?!
  • პარჶუმი რტუ. ნოღა ჶრანკჶურტიში მონოჩანე რტერენ. მარა პარჶუმიშენ ამბარი ვა უღუტერენ ზავალის.
  • დინანას პარჶუმი კაი აწონუი?
  • ჰო! მა დინანას ყალის ქოდოლოვაკიდი. დინანაქ ყალის დოლომაკიდუ. კლარაში დინანაქ არ ქეთაბი ქომომჩერეტუ. ეჲა ქეთაბიშენ არ- ჟურ მკულე პაშურა ვიკითხი ემუს. ნანდიდიქ პაშურაფეს ნუსიმინუ დო დიდო იხელუ.
  • ეჲა პაშურა კაი აწონუი დინანას?
  • ჰო, დიდო! ქეთაბი სურეთონი რტუ. ნანდიდი უთოლე რტუ. მა ვიკითხუფტი. ემუქ სურეთეფეშენ ამბარეფე მომჩაფტუ. დიდო კაპეტი გაგნაფა ქუღუტუ დინანას დო მათი გოვიშაში.
  • ფეტერი დო ნანა მუში სო ტერენან?
  • ფეტერი ნწოფულას ტერენ. ნანა მუშითი ყონას ტერენ.
  • ჰო, ქომევაგნი.
  • ოკაჩხე თითო- თითო ენთეფეთი ქომეხთეს ოხორიშა.
  • იფთი მიქ მეხთუ ოხორიშა? ფეტერიი?
  • ვარ! იფთი ფეტერიში ნანა ქომეხთუ ოხორიშა. მა ფეტერიში ნანას ყალის ქოდოლოვაკიდი. ფეტერიში ნანაქ ყალის დოლომაკიდუ.
  • ფეტერიში ნანაქ სი გძირუში დიდო იხელუ! ეშო იძირენ.
  • ჰო, დიდო! ფეტერიში ნანაქ მა მძირუში დიდო იხელუ.
  • ემუსთი წორი ამბარი მეჩიი?
  • ჰო, ემუსთი წორი ამბარი ჩქიმი ქომეფჩი მა. აჩქვა თქვანი კალა ვორე ჲა ვუწვი.
  • ჰო, დიდო კაი! იხელერენ ზავალიქ.
  • კლარა დო მუში დინანაქ ფეტერი, დინანა დო ნანა მუში შენი მა ოჩუქარეფე ქომომჩერეტეს. მა ხემბოში ვა ოკონომოქთინეს ოფუტეშა.
  • მუ რტუ ფეტერიში ნანაში ოჩუქარე?
  • მეტაქსიში შარფა, ჲაზმა!
  • ფეტერიში ნანას ეჲა შარფა კაი აწონუი?
  • მორო მუ, კაი აწონუ!
  • ფეტერი ვა მეხთუი?
  • ქომეხთუ. არ საათი შკულე, ნწოფულაშენ ქომეხთუ ოხორიშა. მეხთუში, მა ფეტერის ყალის ქოდოლოვაკიდი. ფეტერიქთი ყალის დოლომაკიდუ. ედო ოჩუქარე მუში ქომეფჩი ემუს.
  • ფეტერიში ოჩუქარე მუ რტუ?
  • შექელემე, ვირვილი დო მეტალიში პილილი.
  • ფეტერის აღანი პილილი კაი აწონუი?
  • ჰო, დიდო კაი აწონუ დო ემედენი გელაჩამუს ქოგეოჭკუ. ედო ფიცარიში პილილი მუში მა ქომომჩუ. ოჩუქარე ქომომჩუ ეჲა.
  • ოკაჩხე მუ ყვით?
  • ოკაჩხე ფეტერი კალა პაპული ჩქიმიში ფაცხაშა მენდაფთი მა. რაკანიშა ჲეფთით.
  • პაპული სქანიქ სი გძირუში, მუ ყუ?
  • დიდო იხელუ პაპული ჩქიმიქ. ფაპული ჩქიმიქ ყალის დოლომაკიდუ დო კვას მემაჯუნდუ მა. ოჩუქარე მუშითი ქომეფჩი პაპული ჩქიმის.
  • ოჩუქარე მუში მუ რტუ?
  • მუშტუკი რტუ! მუშტუკი დო თუთუნი რტუ მუში ოჩუქარე. ენთეფე კომეფჩი მა პაპული ჩქიმის.
  • პაპული სქანის ოჩუქარე მუში კაი აწონუი?
  • ჰო, კაი აწონუ. ნოღაში დულჲა რტუ მუშტუკი. თუთუნითი ნოღა სოხუმიშენ ტერენ.
  • ნოღა სოხუმი სო რტერენ, გიჩქინი?
  • კაჶკასიას ტერენ ეჲა ნოღა. თუთუნიში პლანტასჲონითენ ჩინობერი ტერენ ნოღა სოხუმი. ავრუპური თურჯარეფეს ქუღუტერენ თუთუნიში პლანტასჲონი ნოღა სოხუმის. ედო ამ ავრუფური თურჯარეფექ თუთუნიში თიჯარეთი იქიფტერენან ნოღა სოხუმიშენ ნოღა ჶრანკჶურტიშა.
  • ემორა შკულე სი პაპული სქანი კალა სქიდაგინტუ. აჲა ამბარი ოგნუში, მუ ყუ პაპული სქანიქ?
  • დიდო დიდო იხელუ პაპული ჩქიმიქ. ოკაჩხე მანძაგერეფექთი ქომეხთეს ფაცხაშა.
  • მანძაგერეფექ მუ ყვეს? სი მეგარგეს მანძაგერეფექ!
  • ჰო, ენთეფექთი მემარგეს მა ფაცხას.
  • ენთეფექ ფაცხას ჩქინ მომიკითხეს დო ჩქვადოჩქვა ოჩუქარეფე მომიღეს ჩქინდა. მილლეთი ქოკიბღეს ჭიტა ფაცხას დო ჭანდა ქოდოდგეს. ჯოღორიქთი ხელათენ ლოყაშა ლალუფტუ მა. მუ ყვას!
  • სი ჯოღორის ოჭკომალე ჩაფტი.  ემ ჯოღორის ჟოსეჶი ჯოხონტუ!
  • ჰო, პაპული ჩქიმიში ჯოღორი რტუ ჟოსეჶი.
  • მანძაგერეფექ მუ ოჩუქარეფე მოგიღეს თქვანდა?
  • მარქვალი, ქოვალი დო ამკათა ოჭკომალეფე ქომომიღეს ჩქინ. აწი აშო ქომშუნს მა. მათი მუსაჶირეფეს შექელემე დოვუდგი.
  • ნოღა ჶრანკჶურტის მეჭირელი ორა გაყვერეტუ მარა, აჩქვა ხელებერი რტი. დუდმოშლეთინერი რტი. პაპული სქანი კალა რტი. ფეტერი, ნანა დო დინანა მუში კალა რტი. გერმაფე, რაკანეფე, ბუნჯინა კალა რტი ხოლო.
  • ჰო, ნოღა ჶრანკჶურტის მეჭირელი ორაფე მაყვერეტუ, მარა კაი მანებრაფეთი მაყვერეტუ. კლარა, დინანა მუში, ხეზმეთქჲარი საბესტიანი კაი მანებრაფე ჩქიმი რტეს. ფამბუღითი ეშო. ხელებერი ვორტი, მარა ნოსი კლარას ქოდომოსქიდერეტუ.
  • ნოღა ჶრანკჶურტის რტი, ხასრეტი გიღუტუ ოფუტეშა. კურბეთის რტი, მარა კანდიდატიქ ბეგიქ მეგიშველუ დო კართა შეჲი დიგური სი! გური კაპეტი გიღუტუ აჩქვა.
  • ჰო, გური კაპეთი ქომიღუტუ აჩქვა. დიდო შეჲი დოვიგური მა კანდიდატიქ ბეგიშენ. მარა ხოლოთი ხელებერი ვა ვორტი.
  • მუშენი ხელებერი ვა რტი სი?
  • ხოლო ხასრეტი ქომიღუტუ მა.
  • მუში ხასრეტი გიღუტუ სი აწი?
  • კლარაშა ხასრეტი ქომიღუტუ. დინანაშა ხასრეტი ქომიღუტუ. კატუნა ჩქიმიშა ხასრეტი ქომიღუტუ. ენთეფეშენ მენდრა დოფსქიდი მა დო ემუშენი.
  • ფამბუღი ნოღა ჶრანკჶურტის დოსქიდუ. ეშო რენი?!
  • ჰო, კატუნა ჩქიმი ქოდოსქიდუ ნოღა ჶრანკჶურტის. ნოღა ჶრანკჶურტის ჲეჩქინდინერი რტუ ფამბუღი ჩქიმი დო ემუშენი. ფამბუღი ჩქიმი ჶრანკჶურტური რტუ. ემუშენითი ემუ აქ მევაშქვი მა. კლარა კალა სქიდუტუ კატუნა ჩქიმი

 

  1. კლარაში დიდი სუპრიზი
  • ნოღა ჶრანკჶურტის პაპული სქანიში ომუდითენ ხერტი, სქიდუტი. აწითი კლარაში ომუდითენ ხერტი ოფუტე დორჶლის!
  • ხე- გონთხერი ფჩუმერტი კლარა ჩქიმი მა. ლაი პანდა კლარა კალა ვორტი ოფუტეს. მითხანი მოკწონდაში, ემუს მანჯე რე სი! პანდა აშო რენ! ეშო თქუმერტეს დიდილეფექ!

–   მციქა ორა ქოგოლახთუ. არნდღას ჶრანკჶურტური კლარაქ სუპრიზი ყუ დო ოფუტე დორჶლიშა ქომეხთუ. დიდი სუპრიზი რტუ სქანი შენი!

–  ჰო, კლარაქ სუპრიზი ყუ. დიდი სუპრიზი რტუ ჩქიმი შენი. აჲა რტუ დიდო მსქვა სურპრიზი.

-კლარა მი კალა ქომეხთერეტუ ოფუტე დორჶლიშა.

– გიჩქინ, კლარა კაკვატა რტუ დო ოგზალუში მენჯელი ვა უღუტუ ემუს. მაჟურაფეთი მუში კალა რტუ. ენთეფე კალა ქომეხთერეტუ კლარა.

– მიეფე რტეს მაჟურაფე? მიეფე რტეს მაჟურა მუსაჶირეფე?!

– დინანა მუში, ბაბა მუში, ჰექიმი მუში, ხეზმეთქჲარი საბესტიანი დო როტენმაჲერ ხანუმითი ქომეხთუ ოფუტე დორჶლიშა.

– ენთეფეს ოფუტეში ხალკი, ბუნჯინა დო სქიდალა კაი აწონესი?

– კლარა, დინანა მუში, ბაბა მუში, ჰექიმი ბეგი, ხეზმეთქჲარი საბესტიანის ოფუტეში ხალკი,  ბუნჯინა დო სქიდალა კაი აწონუ.

– მარა როტენმაჲერ ხანუმის ოფუტეში ხალკი,  ბუნჯინა, სქიდალა დო ტარონი კაი ვა აწონუ. ეშო ვა რენი?!

– ჰო, სი მთინი ზოპონ. ხილაჶი ვა რენ. როტენმაჲერ ხანუმის ოფუტეში ხალკი, ტარონი, ბუნჯინა დო ოფუტეში სქიდალა კაი ვა აწონუ.

– მუეფე თქუმერტუ როტენმაჲერ ხანუმიქ?

-როტენმაჲერ ხანუმის უდოგინუ შიქაჲეთი ქუღუტუ, იროთე პესიმისტი რტუ დო ემუშენი. ბუნჯინაში მენჯელიშენ ამბარი ვა უღუტუ.

– კლარაში მოკითხუთენ ირიქ იხელუ. ეშო ვა რენი?

– ირიქ ვარ, ფეტერიშ მეტა, ირიქ იხელუ!

– მუშენი ფეტერიქ ვა იხელუ კლარაში მოხთიმაფაშენ?!

– მეგერემ ფეტერი დიდო ფახილი ტერენ. მა აჲა ვა მიჩქიტუ. ფახილი რტუ, ემუშენითი ჩქიმი დო კლარაში მანებრობა ვა ჲაზდუ ფეტერის, აკისკანუ!  ედო გური დომიჭვინუ ფეტერიქ.

– ფეტერიქ კლარა მანებრა ვა შინაფტუ. ეშო რენი?!

– ჰო, ფეტერიქ კლარა მანებრა ვა შინაფტუ. დუშმანი შინაფტერენ.

– კლარაქ ფეტერი მანებრა შინაფტუ. კლარა კაი გურონი რტუ!

– ფეტერითი კაი გურონი რტუ, მარა ბერე რტუ. ენჯამი ბერე რტუ ფეტერი. მარა აჲა რტუ პატი ამბარი, გიჩქიტას!

– მუში პატი ამბარი?! ინშალლა პატი მუთუ ვა ჲეჩქინდუ!

– არნდღას კლარას თექერლეღონი თრონი ნუხირერენ დო ოქთიშენ მეჟატკოჩერენ ფეტერიქ. აჲა რტუ პატი ამბარი!

– მეგერემ ფეტერი მტკური ტერენ! ზავალი კლარა უთრონელი დოსქიდუ. ყალ-გელაქთერი დოსქიდუ.

– იფთინერი მენდაწკომილუთენ, აჲა რტუ დიდო პატი დულჲა. ფეტერიში ნოხვენე დიდო პატი რტუ. მარა უთრონელობაქ კლარას ნუშველუ.

– უთრონელობაქ მუჭოში ნუშველუ კლარას?

– მათი ემუს მევუშველი. მაჟურაფექთი ნუშველეს კლარას. ალლაჰიქ ნუშველუ კლარას. ბუნჯინაში ყოროფაქთიქ ნუშველუ კლარას. კუჩხეს მუისელუ! კუჩხეფეში ჟინ დვადგინუ კლარას. წოხლე ჭიტა- ჭიტა ოგზალუს, ოკაჩხეთი ჭიტა- ჭიტა ონკაპინუს ქოგეოჭკუ კლარაქ. აშოთენ მაჟურა ჶარა ჲეჩქინდუ კლარა. აჲა რენ მსქვა ამბარი!

– აჲა რტუ მუჯიზე. აჲა რტუ სქანი ყოროფა დო შველაში მუჯიზე!

– ჩქიმი ვარ, ალლაჰიში ყოროფა დო შველაში მუჯიზე რტუ აჲა ამბარი.

– მარა სი დიდო კაი ქუჩხეში რე. სქანი ყოროფა დო მოტივასჲონიქ კლარას მენჯელი ქომეჩუ.

– ხვალა ჩქიმი ყოროფა დო მოტივასჲონიქ ვარ, ალლაჰიქ ნუშველუ კლარას. ბუჯინაში მენჯელი დო ყოროფაქ ნუშველუ კლარას. ბუნჯინაქ მანთი მენჯელი დო ყოროფათენ მემიშველერეტუ დო ემუშენი. კლარაში ოჯაღიქ დიდო იხელუ! მაჟურა ჶარა ჲეჩქინდეს აჲა დუნჲას!

– იგბალითენ კლარა სი მეგინგაფს დო სითი ემუს ნუნგაფ.

– მათი ეშო ვისიმადეფს. ართნერი იგბალი ქომიღუტეს.  იგბალითენ, კლარა მა მემინგაფტუ დო მათი ემუს მევუნგაფტი.

– ხვალა კლარაში ოჯაღიქ ვარ, ოფუტეში ხალკიქთი დიდო იხელუ კლარაში აღანი ხალითენ. ჩქვალაფექთი იხელეს.

– ნამუ ჩქვალეფექ იხელეს? ოფუტარეფექი?! მანძაგერეფექი?!

– პატი ნოხვენე მუშიშენ ფეტერიქთი იფთი დიფიშმანერეტუ, მარა ოკაჩხე კლარაში ხეირონი ამბარითენ დიდო იხელუ. როტენმაჲერ ხანუმიქთი დიდო იხელუ კლარაში ხეირონი ამბარითენ. მჯვეში ღეჯი როტენმაჲერ ხანუმითი გონდუნუ დო აღანი ოხორჯა ქომეხთუ დუნჲაშა! ხოლო ჲეჩქინდუ ოხორჯა. ოკაჩხეთი იქიმოჯერენ კანდიდატი  ბეგი კალა.

– დიდო ფუქირონი ამბარეფე ქომომჩი, ჰაიდი. დიდო შუქური გიწუმერ.

– ფიმფილი დიხაშა, ალიკო! კუჩხე ბედინერი! მოხთიმაფა სქანითენ მა დიდო ვიხელი, გიჩქიტას!

– არ- ჟურ ნენათენთი მაჭარალე ჲოჰანნა სპირიშენ მოლაფშინათ, მუ იყვენ! იყვენი?!

– იყვენ, იყვენ! დერდი მო ზდიფ სი! მაჭარალე ჲოჰანნა სპირი, ჩქიმი შენითი, დუნჲაში მთელ ბერეფე შენითი დიდო ბეჯითი რენ. ჰო, ემუშენთი მოლაფშინათ!

– ჲოჰანნა სპირი მუნდეს დო ნამუ ნოღას ჲეჩქინდუ?

– (12) ვიტო ჟურ მბულობა (1827) ვიტო ოვრო ოში დო ეჩი დო შქვით წანას, ისვიჩრეში ნოღა ჰირზელის ჲეჩქინდუ ჲოჰანნა სპირი. ედო დოღურუ (7) შქვით ხცალა ვიტონ ჩხორო ოში დო არ (1901) წანას, ზირუხის.

– ჲოჰანნა სპირი ჩინობერი რენ სქანი ქეთაბითენ. ჩქვა ჭარელი ქეთაბეფეთი უღუნი ემუს?

-ჰო, ქუღუნ. გამიჩქვინერი დიდო ქეთაბი ქუღუნ ჲოჰანნა სპირის. ოთქვუთენ ვა ითქვენ.

– სი მუშენი იროთე კუჩხე ტეტელი გულურტი ოფუტეს. ქალამანი ვა გიღუტუი სი? მოდვალუ ვა გიღუტუი? ჩაფულა ვა გიღუტუი სი?!

-ქალამანი არ ვარ,  დიდო ქომიღუტუ მა. მოდვალუ არ ვარ,  დიდო ქომიღუტუ მა. ჩაფულათი ქომიღუტუ მა!   კუჩხე ტეტელი გოხთიმუთენ ბუნჯინაქ იროთე ყოროფა, ხელა დო მენჯელი მუში მომჩაფტუ მა დო ემუშენი. მათი აჲა ყოროფა, ხელა დო მენჯელითენ მაჟურანეფეს ყოროფა, ხელა დო ომუდი ჩქიმი მეფჩაფტი. ემუშენითი კუჩხე ტეტელი გოვულურტი მა.

– ქეთაბი სქანი მუკო ნენათენ გამიჩქვინუ? გიჩქინი?

– ჰო, ქომიჩქინ. (70) სუმე ნეჩი დო ვით ჩქვადოჩქვა ნენათენ გამიჩქვინუ ქეთაბი ჩქიმი. აშო მათქვენ მა აწი.

– ჶილიმი სქანი მუკო ჶარა ჲეშიღინუ? აჲა დულჲაშენთი ამბარი გიღუნი სი?!

-ჰო, ამბარი ქომიღუნ. (15) ვიტო ხუთიშენ დიდო რენ ჶილიმი ჩქიმიში ადაფტასჲონი. აწი ეშო მიჩქინ.

-უმუთელობა, უდულჲელობა, მშქირონერობა დო უყაზუ დულჲაფე გონტალერი რტერენ (19.) ვიტო მა მაჩხორანი ოშწანურაში ისვიჩრესთი, მთელი დუნჲასთი.  ეშო ვიკითხერეტი ქეთაბეფეშენ. ისვიჩრე შენი აჲა ამბარი მთინი რენი?

-ჰო, მთინი რენ. მთინი გიჩქინ დო მთინი ზოპონ, ალიკო. უმუთელობა, უდულჲელობა, მშქირონერობა დო უყაზუ დულჲაფე დიდო გონტალერი რტუ ისვიჩრე ჩქიმისთი, მთელ დუნჲასთი. აჲა რენ ჩქიმი უჩა თარიხი.  აჲა რენ ჩქინი უჩა თარიხი. აჲა რენ სქანი უჩა თარიხი. აჲა რენ თქვანი უჩა თარიხი. აჲა რენ მთელი კოჩინობაში ოშქარული უჩა თარიხი.

– დიდო ისვიჩრელურეფექ ნაშქვეს დობადონა მუთეფეში დო დიბარგეს მაჟურა დობადონაფეს. ეშო მიჩქინ!

– მთინი ზოპონ. აჲა რტუ (19.) ვიტო დო მაჩხორანი ოშწანურაში ჩოდინას. მოჰაჯირი გამახთუ მილლეთი ისვიჩრეშენ, ფარა მოგაფუ შენი. (330) სუმ ოში დო ეჩი დო ვით ვითოში ისვიჩრელური მოჰაჯირი გამახთუ.

– დიდოფეთენ ნამუ დობადონაფეს დიბარგეს ამ ისვიჩრელური მოჰაჯირეფე?

– დიდოფეთენ დიბარგეს ემინდრონერი ამერიკაში ოკონტალერი ოხენცალეს.

– ანდღანერი ნდღას ისვიჩრე მუთენ ჩინობერი რენ? ჰელე, აჲათი მიწვი, ჰაიდი!

-ირიშენ წოხლე, ისვიჩრე რენ ჩინობერი დემოკრასი მუშითენ. კონჶედერალური დობადონა რენ. ოთხო რესმური ნენა ქუღუნ ისვიჩრეში კონჶედერასჲონის. ჩქვა კართა ნენაშენ კოჩეფეთი სქიდუნან ისვიჩრეს. ედო კულტურული ოტონომი ქუღუნან ენთეფეს.  აჲა ხალი მუშითენ ჩინობერი რენ ისვიჩრე მთელი დუნჲას.

– ჩქვა მუთენ ჩინობერი რენ ისვიჩრე?

-ისვიჩრეს რესმური დინი ვა უღუნ. მარა ისვიჩრეში მილლეთი დიდოფეთენ ქრისთიანი რენ. კათოლიკური დო პროტესტანური კილისეფეთენ იჩქინენ ისვიჩრე. რეჶორმისტური კილისეთი, ორთოდოქსური კილისეთი ქორენ ისვიჩრეს. მუსლიმანური, ჲაჰუდური, ბუდისტური, ჰინდუსტური ლამთინაფეთი ქორენ ისვიჩრეს.

– ჩქვა მუ მონოჩანეფეთენ ჩინობერი რენ ისვიჩრე?

-დიდოფეთენ ხამი, საათი, ღვინი დო ჩიკოლატათენ დიდო ჩინობერი რენ მთელი დუნჲას.

– დინი, ნენა დო კულტურითენ დიდო პლურალისტური დობადონა ტერენ ისვიჩრეში ჶედერასჲონი. მა აჲა ვა მიჩქიტუ. დიდო შუქური გიწუმერ, ჰაიდი ჩქიმი! კაი გურითენ ვიძირათ ბოლაქი!

– იროთე ვიძირათ! მათი დიდო შუქური გიწუმერ. კაი გურითენ ვიძირათ, ალიკო. გოგიხთა დო გოგაღარა! ალლაჰიქ იროთე მეგიშველას! დულჲა სქანი იროთე წორი იდას!

 

დიჩოდუ